Kapitulo Bayente-sayis

‘Paglipay Hangtod sa Kahangtoran sa Akong Gilalang’

Isaias 65:1-25

1. Unsang mapasaligong mga pulong ang gisulat ni apostol Pedro, ug unsang pangutana ang motungha?

 MAKAKITA ba gayod kita nga matapos ang mga inhustisya ug pag-antos? Kapig 1,900 ka tuig kanhi, gisulat ni apostol Pedro kining mapasaligong mga pulong: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini magpuyo ang pagkamatarong.” (2 Pedro 3:13) Si Pedro, duyog sa daghang ubang matinumanong mga alagad sa Diyos latas sa kasiglohan, nagpaabot sa dakong adlaw sa dihang matapos na ang pagkamalapason, pagpanglupig, ug kabangisan ug molungtad ang pagkamatarong. Makatino ba kita nga kining saara matuman?

2. Kinsa ang manalagna nga naghisgot bahin sa “bag-ong mga langit ug usa ka bag-ong yuta,” ug unsa ang mga katumanan nianang karaang tagna?

² Oo, makatino kita! Sa dihang si Pedro naghisgot bahin sa “bag-ong mga langit ug usa ka bag-ong yuta,” wala siya magpahayag ug usa ka bag-ong ideya. Mga 800 ka tuig nga sayosayo, gisulti ni Jehova ang susamang mga pulong pinaagi sa manalagnang si Isaias. Kanang naunang saad may gamay nga katumanan sa 537 W.K.P. sa dihang ang mga Hudiyo gipagawas gikan sa pagkabihag sa Babilonya, nga tungod niadto nakabalik sila sa ilang yutang-natawhan. Apan ang tagna ni Isaias adunay dakong katumanan karong adlawa, ug makapaabot kita sa mas makapahinam pang katumanan sa umaabot nga bag-ong kalibotan sa Diyos. Sa tinuoray, ang makapalipayng tagna nga gipahayag pinaagi ni Isaias maoy pasiklap sa mga panalanging gitagana sa Diyos alang niadtong nahigugma kaniya.

 Si Jehova Mihangyo sa “Usa ka Katawhang Gahian”

3. Unsang pangutana ang gitubag alang kanato sa Isaias kapitulo 65?

³ Hinumdomi nga ang Isaias 63:15–64:12 naundan ug matagnaong pag-ampo ni Isaias alang sa nadestiyerong mga Hudiyo sa Babilonya. Sumala sa gipatin-aw sa mga pulong ni Isaias, daghang Hudiyo wala magsimba kang Jehova sa tibuok kalag, apan ang pipila naghinulsol ug miliso kaniya. Ipasig-uli ba karon ni Jehova ang nasod tungod nianang mahinulsolon nga nahibilin? Atong makaplagan ang tubag diha sa Isaias kapitulo 65. Apan una ipahayag ang usa ka saad bahin sa pagluwas sa pipila ka matinuohon, si Jehova nagbatbat sa paghukom nga naghulat sa daghang walay pagtuo.

4. (a) Kasukwahi sa iyang masuklanong katawhan, kinsay mangita kang Jehova? (b) Giunsa pagpadapat ni apostol Pablo ang Isaias 65:1, 2?

⁴ Si Jehova nag-antos sa mapinadayonong pagkamasuklanon sa iyang katawhan. Bisan pa niana, moabot ang panahon nga iyang itugyan sila ngadto sa ilang mga kaaway ug sa pagkamaluloton dawaton ang uban sa iyang pabor. Pinaagi ni Isaias, si Jehova nag-ingon: “Gitugotan ko nga ako pangitaon nilang wala magpakisayod bahin kanako. Gitugotan ko nga ako makaplagan nilang wala mangita kanako. Ako miingon, ‘Ania ako, ania ako!’ ngadto sa usa ka nasod nga wala magtawag sa akong ngalan.” (Isaias 65:1) Makapasubo nga komentaryo bahin sa katawhang may pakigsaad kang Jehova nga kadtong mga sakop sa mga nasod moduol kang Jehova apan ang gahiang nasod sa Juda sa katibuk-an dili moduol kaniya. Si Isaias dili lang mao ang manalagnang nagtagna nga ang Diyos sa kadugayan mopilig usa ka katawhan nga wala ilha kanhi. (Oseas 1:10; 2:23) Si apostol Pablo nagkutlo sa Isaias 65:1, 2 gikan sa Septuagint sa pagpamatuod nga ang katawhan sa kanasoran makabaton ug “pagkamatarong nga tungod sa pagtuo” bisan pag ang kinaiyanhong mga Hudiyo nagdumili sa pagbuhat niana.—Roma 9:30; 10:20, 21.

5, 6. (a) Unsang masibotong tinguha ang gipadayag ni Jehova, apan unsay sanong sa iyang katawhan? (b) Unsay atong makat-onan gikan sa mga pagpakiglabot ni Jehova sa Juda?

⁵ Si Jehova nagpatin-aw kon nganong iyang tugotan nga ang iyang katawhan mag-antos sa katalagman: “Sa tibuok adlaw gibukhad  ko ang akong mga kamot alang sa usa ka katawhang gahian, kadtong naglakaw sa dalan nga dili maayo, sunod sa ilang mga hunahuna.” (Isaias 65:2) Ang pagbukhad sa mga kamot nagpasabot sa usa ka pagdapit o paghangyo. Si Jehova nagbukhad sa iyang mga kamot, dili lang sa daklit, kondili sa tibuok adlaw. Ang iyang kinasingkasing nga tinguha mao nga ang Juda mobalik kaniya. Bisan pa niana, kanang gahiang katawhan wala mosanong.

⁶ Makapalipay gayong pagtulon-an ang makat-onan nato gikan sa mga pulong ni Jehova! Buot niyang kita moduol kaniya kay siya maoy Diyos nga daling duolon. (Santiago 4:8) Kining mga pulonga nagpakita usab kanato nga si Jehova maoy mapaubsanon. (Salmo 113:5, 6) Kon buot sabton, siya sa masambingayon nagpadayon sa pagbukhad sa iyang mga kamot, nga naghangyo sa iyang katawhan nga mobalik bisan pag tungod sa ilang pagkagahian siya “gipasakitan.” (Salmo 78:40, 41) Human lamang sa paghangyo kanila sulod sa daghang siglo nga sa kataposan sila iyang gitugyan ngadto sa ilang mga kaaway. Bisan pa niana, ang mapaubsanong mga tawo sa ilang taliwala dili niya isalikway.

7, 8. Sa unsang mga paagi ang gahiang katawhan ni Jehova nakapasuko kaniya?

⁷ Ang gahiang mga Hudiyo sublisubling nakapasuko kang Jehova pinaagi sa ilang makauulawng panggawi. Si Jehova nagbatbat sa ilang mapasipalahong mga buhat: “Ang katawhan nga gilangkoban nilang nagpasuko kanunay kanako sa akong atubangan mismo, nga naghalad diha sa mga tanaman ug naghimog gipaaso nga halad ibabaw sa mga tisa, nga nanglingkod taliwala sa mga lubnganan, nga nagpalabay usab sa kagabhion diha mismo sa mga bantayanang payag, nga nagkaon sa unod sa baboy, bisan sa sabaw sa hugaw nga mga butang diha sa ilang mga sudlanan; kadtong nag-ingon, ‘Diha ka lang. Ayaw pagduol kanako, kay akong ipadangat gayod ang pagkabalaan kanimo.’ Kini maoy aso sa mga buho sa akong ilong, usa ka kalayo nga nagadilaab sa tibuok adlaw.” (Isaias 65:3-5) Kining maorag balaang mga tawo nakapasuko kang Jehova ‘sa iyang atubangan mismo’—usa ka pamulong nga mahimong magpasabot sa pagkamapangahason  ug pagkawalay-tahod. Wala sila maningkamot sa pagtago sa ilang dulumtanang mga buhat. Dili ba salawayon gayod ang paghimog mga sala sa presensiya mismo sa Usa nga angayng tahoron ug sundon?

⁸ Sa pagkatinuod, kining nagpakamatarong-sa-kaugalingon nga mga makasasala nagaingon ngadto sa ubang mga Hudiyo: ‘Palayo kamo, kay ako mas balaan kay kaninyo.’ Pagkamaot baya! Ang maong “balaan” nga mga tawo nagtanyag sa mga halad ug nagsunog ug insenso ngadto sa bakak nga mga diyos, nga gihukmang daotan sa Balaod sa Diyos. (Exodo 20:2-6) Sila nanglingkod taliwala sa mga lubnganan, nga naghimo kanilang mahugaw sumala sa Balaod. (Numeros 19:14-16) Sila nagkaon sa unod sa baboy, nga maoy mahugaw nga pagkaon. a (Levitico 11:7) Bisan pa niana, tungod sa ilang relihiyosong mga kalihokan gibati nila nga mas balaan kay sa ubang mga Hudiyo, ug gusto nilang magpalayo ang ubang mga tawo aron sila dili mahimong balaan, ingnon ta, o mahinlo, pinaagi lamang sa pagpakig-uban. Bisan pa niana, kon bahin sa mga butang kana dili gayod mao ang pag-isip sa Diyos kinsa nangayog “bug-os nga pagkamahinalaron”!—Deuteronomio 4:24.

9. Unsay pag-isip ni Jehova sa nagpakamatarong-sa-kaugalingon nga mga makasasala?

⁹ Inay pagaisipon nga balaan ang maong nagpakamatarong-sa-kaugalingon nga mga tawo, si Jehova nag-ingon: “Kini maoy aso sa mga buho sa akong ilong.” Ang Hebreohanong pulong alang sa “ilong” o “buho sa ilong” sagad gigamit sa masambingayong paagi alang sa kasuko. Ang aso nalangkit usab sa nagadilaab nga kasuko ni Jehova. (Deuteronomio 29:20) Ang dulumtanang pagsimbag diyosdiyos nga naunloran sa iyang katawhan nakahaling sa nagadilaab nga kasuko ni Jehova.

10. Sa unsang paagi pabayron ni Jehova ang mga tawo sa Juda tungod sa ilang mga sala?

¹⁰ Tungod sa iyang hustisya, dili itugot ni Jehova nga dili masilotan  kining tinuyong mga makasasala. Si Isaias nagsulat: “‘Tan-awa! Kini gisulat sa akong atubangan. Dili ako maghilom, apan ako magabalos; ako mismo magabalos nganha sa ilang sabakan, tungod sa ilang kaugalingong kasaypanan ug tungod sa kasaypanan sa ilang mga katigulangan sa samang higayon,’ miingon si Jehova. ‘Tungod kay sila naghimog gipaaso nga halad ibabaw sa kabukiran, ug sa kabungtoran sila nagpakaulaw kanako, akong pagasukdon usab ang ilang suhol una sa tanan nganha sa ilang sabakan.’” (Isaias 65:6, 7) Pinaagi sa pagbuhat sa bakak nga pagsimba, ang maong mga Hudiyo nagpakaulaw kang Jehova. Ilang gipadayag nga ang pagsimba sa matuod nga Diyos maoy sama lang sa iya sa mga nasod nga kasikbit nila. “Tungod sa ilang kaugalingong kasaypanan,” lakip ang pagsimbag diyosdiyos ug espiritismo, si Jehova magabalos kanila “nganha sa ilang sabakan.” Ang pulong “sabakan” lagmit nagtumong sa gipilopilo nga mga piligis sa pang-ibabawng besti nga mapormang puyo diin ang mga namaligya makabubo sa tinakos nga produkto. (Lucas 6:38) Alang sa apostatang mga Hudiyo, ang kahulogan matin-aw—si Jehova magtakos sa ilang ‘balos,’ o silot. Ang Diyos sa hustisya mangayog balos. (Salmo 79:12; Jeremias 32:18) Sanglit si Jehova dili mausab, kita makasalig nga sa iyang gitakdang panahon, iyang itakos ang silot sa susamang paagi niining daotang sistema sa mga butang.—Malaquias 3:6.

“Tungod sa Akong mga Alagad”

11. Giunsa pagpasabot ni Jehova nga pagaluwason niya ang usa ka matinumanong nanghibilin?

¹¹ Si Jehova magpakita bag kaluoy sa mga matinumanon taliwala sa iyang katawhan? Si Isaias nagpatin-aw: “Mao kini ang giingon ni Jehova: ‘Sa samang paagi nga ang bag-ong bino makaplagan diha sa pungpong ug ang usa magaingon, “Ayaw kini daota, tungod kay adunay panalangin niini,” mao man usab ang akong buhaton tungod sa akong mga alagad aron dili ang tanan malaglag. Ug pagulaon ko gikan kang Jacob ang usa ka kaliwat ug gikan kang Juda ang manununod nga manag-iya sa akong kabukiran; ug ang akong mga pinili  manag-iya niini, ug ang akong mga alagad mopuyo didto.’” (Isaias 65:8, 9) Sa pagpanig-ingon sa iyang katawhan ngadto sa pungpong sa ubas, gigamit ni Jehova ang ilustrasyon nga dali nilang masabtan. Ang mga ubas maoy dagaya sa yuta, ug ang bino nga ginama gikan sa mga ubas maoy usa ka panalangin alang sa katawhan. (Salmo 104:15) Ang larawan nga gipadayag tingali mao ang usa ka pungpong diin ang pipila, apan dili ang tanan, sa mga ubas maoy maayo. O ang ideya tingali mao nga usa ka pungpong maoy maayo, samtang ang ubang mga pungpong maoy hilaw o dunot. Sa bisan haing kahimtang, ang tig-atiman sa parasan dili magdaot sa maayong mga ubas. Sa ingon gipasaligan ni Jehova ang iyang katawhan nga siya dili maglaglag sa bug-os sa nasod kondili magluwas sa matinumanong nanghibilin. Siya nag-ingon nga kining inuyonang nanghibilin manag-iya sa iyang “kabukiran,” nga mao, ang Jerusalem ug ang yuta sa Juda, ang kabungtoran nga giangkon ni Jehova nga iyaha.

12. Unsang mga panalangin ang nagpaabot sa matinumanong nanghibilin?

¹² Unsang mga panalangin ang nagpaabot niining matinumanong nanghibilin? Si Jehova nagpatin-aw: “Ang Saron mahimo gayod nga usa ka sibsibanan sa mga karnero ug ang ubos nga patag sa Akor usa ka dapit-pahulayan sa mga baka, alang sa akong katawhan nga mangita kanako.” (Isaias 65:10) Ang mga kahayopan may hinungdanong bahin sa kinabuhi sa daghang Hudiyo, ug ang daghan nga sibsibanang yuta makatabang nga mamugna ang pagkamauswagon sa mga panahon sa kalinaw. Si Jehova naghisgot sa duha ka tumoy sa yuta aron ihulagway ang kalinaw ug pagkamauswagon. Sa kasadpan ang Patag sa Saron, nga ilado sa katahom ug sa katabunok niini, nag-ubay sa Mediteranyong Baybayon. Ang Walog sa Akor nahimong bahin sa amihanan-sidlakang utlanan sa yuta. (Josue 15:7) Panahon sa umaabot nga pagkadestiyero, kining mga lugara mahimong biniyaan, duyog sa ubang bahin sa yuta. Bisan pa niana, si Jehova nagsaad nga human sa pagkadestiyero sila mahimong maanindot nga mga sibsibanan alang sa mamauling nanghibilin.—Isaias 35:2; Oseas 2:15.

 Pagsalig sa “Diyos sa Suwerte”

13, 14. Unsang mga buhat ang nagpakitang ang katawhan sa Diyos namiya kaniya, ug unsay mahitabo kanila ingong resulta?

¹³ Ang tagna ni Isaias karon mibalik ngadto niadtong namiya kang Jehova ug nagpadayon sa pagsimbag diyosdiyos. Nag-ingon kini: “Kamo mao kadtong namiya kang Jehova, kadtong nakalimot sa akong balaang bukid, kadtong nag-andam ug usa ka lamesa alang sa diyos sa Suwerte ug kadtong nagpuno ug sinagolan nga bino alang sa diyos sa Kapalaran.” (Isaias 65:11) Pinaagi sa pag-andam ug lamesa sa pagkaon ug ilimnon atubangan sa “diyos sa Suwerte” ug sa “diyos sa Kapalaran,” kining nadalin-as nga mga Hudiyo nahulog ngadto sa idolatrosong mga buhat sa paganong mga nasod. b Unsay mahitabo niadtong sa pagkamotuo-dayon mosalig sa maong mga diyos?

¹⁴ Si Jehova prangkang nagpasidaan kanila: “Itagana ko kamo sa espada, ug kamong tanan mangyukbo ingong mga gipamatay; tungod kay ako mitawag, apan kamo wala motubag; ako misulti, apan kamo wala mamati; ug kamo nagpadayon sa pagbuhat kon unsay daotan sa akong mga mata, ug inyong gipili ang butang nga ako walay kahimuot.” (Isaias 65:12) Pinaagi sa matistison nga paggamit sa ngalang diyos sa Kapalaran diha sa orihinal nga Hebreohanon, si Jehova nag-ingon nga kadtong nagsimba niining bakak nga diyos ‘itagana sa espada,’ nga mao, ngadto sa kalaglagan. Si Jehova sublisubling nag-awhag niining mga tawhana nga maghinulsol pinaagi sa iyang mga manalagna, apan sila wala magpakabana kaniya ug sa pagkagahian nagpalabi sa pagbuhat sa kon unsay ilang nasayran nga daotan sa iyang panan-aw. Pagkadakong pagtamay ang ilang gipakita alang sa Diyos! Ingong katumanan sa pasidaan sa Diyos, ang nasod nakaagom ug dakong katalagman sa 607 W.K.P. sa gitugotan ni Jehova  ang mga Babilonyanhon nga laglagon ang Jerusalem ug ang templo niini. Nianang panahona ang “diyos sa Suwerte” wala makapanalipod sa iyang mga magsisimba sa Juda ug sa Jerusalem.—2 Cronicas 36:17.

15. Sa unsang paagi ang matuod nga mga Kristohanon karong adlawa namati sa pasidaang makaplagan sa Isaias 65:11, 12?

¹⁵ Karong adlawa ang matuod nga mga Kristohanon namati sa pasidaang makaplagan sa Isaias 65:11, 12. Sila dili motuo sa “Suwerte,” nga samag kana usa ka matang sa labaw-kinaiyanhong puwersa nga makahatag ug mga pabor. Kay dili mag-usik-usik sa ilang materyal nga kabtangan sa pagtinguha nga mahupay ang “diyos sa Suwerte,” sila molikay sa tanang dagway sa pagpanugal. Kombinsido sila nga kadtong nagsimba sa maong diyos sa kataposan mawad-an sa tanang butang, kay kanila si Jehova nag-ingon: “Itagana ko kamo sa espada.”

“Tan-awa! Ang Akong mga Alagad Managmaya”

16. Sa unsang mga paagi panalanginan ni Jehova ang iyang matinumanong mga alagad, apan unsay mahitabo niadtong namiya kaniya?

¹⁶ Sa pagbadlong niadtong namiya kang Jehova, ang tagna nagbatbat sa kaatbang nga mga dulnganan nga nagpaabot niadtong sinserong nagsimba sa Diyos ug niadtong sinalingkapaw nga nagsimba: “Mao kini ang giingon sa Soberanong Ginoong Jehova: ‘Tan-awa! Ang akong mga alagad mangaon, apan kamo panggutomon. Tan-awa! Ang akong mga alagad manginom, apan kamo pang-uhawon. Tan-awa! Ang akong mga alagad managmaya, apan kamo manag-antos sa kaulawan. Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing, apan kamo managtuaw tungod sa kasakit sa kasingkasing ug kamo motiyabaw tungod sa bug-os nga pagkahugno sa espiritu.’” (Isaias 65:13, 14) Panalanginan ni Jehova ang iyang matinumanong mga alagad. Tungod sa mga kasingkasing nga nahupong sa kalipay, sila managhugyaw sa kalipay. Ang pagpangaon, pag-inom, ug pagmaya maoy mga pulong nga nagpasabot nga si Jehova magatagana nga madagayaon sa mga panginahanglan sa iyang mga magsisimba. Sa kasukwahi, kadtong nagpalabi sa pagbiya kang Jehova pagagutomon  ug pagauhawon sa espirituwal. Ang ilang mga panginahanglan dili tagbawon. Sila motuaw ug motiyabaw tungod sa kagul-anan ug sa kasakitang modangat kanila.

17. Nganong ang katawhan sa Diyos karong adlawa adunay maayong katarongan sa paghugyaw sa kalipay?

¹⁷ Ang mga pulong ni Jehova nagbatbat pag-ayo sa espirituwal nga kahimtang karong adlawa niadtong nangangkon lamang nga nag-alagad sa Diyos. Samtang ang minilyon sa Kakristiyanohan nag-antos sa pagkahugno sa espiritu, ang mga magsisimba ni Jehova naghugyaw hinuon sa kalipay. Ug sila adunay maayong katarongan sa pagmaya. Sila pinakaon ug maayo sa espirituwal. Gitagan-an sila ni Jehova ug dagayang espirituwal nga pagkaon pinaagi sa binase-sa-Bibliya nga mga publikasyon ug sa Kristohanong mga panagkatigom. Sa pagkatinuod, ang makapalig-ong mga kamatuoran ug ang makahupay nga mga saad sa Pulong sa Diyos mohatag kanato ug “maayong kahimtang sa kasingkasing”!

18. Unsay magpabilin niadtong namiya kang Jehova, ug unsa kahay gipasabot sa paggamit sa ilang ngalan diha sa usa ka panumpa?

¹⁸ Si Jehova nagpadayon sa pagpakigsulti niadtong namiya kaniya: “Kamo tinong maghimo sa inyong ngalan nga usa ka panumpa sa akong mga pinili, ug ang Soberanong Ginoong Jehova sa tinuod mopatay kaninyo nga tagsatagsa, apan ang iyang mga alagad iyang pagatawgon sa laing ngalan; aron nga si bisan kinsa nga nagpanalangin sa iyang kaugalingon diha sa yuta magpanalangin sa iyang kaugalingon pinaagi sa Diyos sa pagtuo, ug si bisan kinsa nga naghimog usa ka gipanumpaang pahayag diha sa yuta manumpa pinaagi sa Diyos sa pagtuo; tungod kay ang kanhing mga kasakit mahikalimtan gayod ug tungod kay kini sila matago gayod gikan sa akong mga mata.” (Isaias 65:15, 16) Ang magpabilin na lang niadtong namiya kang Jehova mao ang ilang ngalan, nga gamiton lang sa usa ka panumpa, o pamalikas. Kini mahimong nagpasabot nga kadtong buot mag-obligar sa ilang kaugalingon sa solemneng paagi pinaagig usa ka panumpa, sa pagkamatuod, moingon: ‘Kon dili nako tumanon kining saara, ipaagom kanako kadtong nahiagoman sa mga apostata.’ Kini mahimong nagpasabot pa nga ang ilang ngalan  gamiton ingong pananglitan, sama sa Sodoma ug Gomora, ingong simbolo sa silot sa Diyos sa daotan.

19. Sa unsang paagi ang mga alagad sa Diyos pagatawgon sa laing ngalan, ug nganong sila may pagsalig sa Diyos sa pagtuo? (Tan-awa usab ang potnot.)

¹⁹ Pagkalahi unya ang dangatan sa mga alagad sa Diyos! Sila pagatawgon sa laing ngalan. Kana nagpasabot sa bulahang kahimtang ug kadungganan nga ilang tagamtamon sa pagbalik nila sa ilang yutang-natawhan. Dili sila magtinguha ug panalangin gikan sa bisan unsang bakak nga diyos o manumpa tungod sa walay-kinabuhing diyosdiyos. Hinunoa, sa dihang sila magapanalangin sa ilang kaugalingon o manumpa, buhaton nila kana tungod sa Diyos sa pagtuo. (Isaias 65:16, potnot) Ang mga molupyo sa yuta may katarongan unya sa bug-os nga pagsalig sa Diyos, kay siya nakapamatuod sa iyang kaugalingon nga nakatuman sa iyang mga saad. c Kay luwas na diha sa ilang yutang-natawhan, ang mga Hudiyo sa dili madugay mahikalimot sa kanhing mga kasakit.

“Ako Naglalang ug Bag-ong mga Langit ug Usa ka Bag-ong Yuta”

20. Sa unsang paagi ang saad ni Jehova mahitungod sa “bag-ong mga langit ug usa ka bag-ong yuta” natuman sa 537 W.K.P.?

²⁰ Si Jehova karon nagpatin-aw sa iyang saad sa pagpasig-uli sa mahinulsolong nahibilin human sa ilang pagbalik gikan sa pagkadestiyero sa Babilonya. Pinaagi ni Isaias, si Jehova nag-ingon: “Ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17) Ang saad ni Jehova bahin sa pagpasig-uli tinong matuman, busa siya naghisgot bahin sa maong umaabot nga pagpasig-uli nga samag nahitabo na kana. Kining tagnaa unang natuman sa 537 W.K.P. sa dihang ang Hudiyong nahibilin napasig-uli sa Jerusalem.  Unsa bay naglangkob sa “bag-ong mga langit” niadtong panahona? Ang pagmando ni Zerubabel ingong gobernador nga sinuportahan sa Hataas nga Saserdote nga si Josue ug nasentro sa Jerusalem. Ang napasig-uli nga Hudiyong nahibilin maoy naglangkob sa “usa ka bag-ong yuta,” nga usa ka nahinloang katilingban nga nagpasakop sa maong pagmando ug mitabang sa pagtukod pag-usab sa maputling pagsimba diha sa nasod. (Esdras 5:1, 2) Ang tanang kanhing pag-antos nahawngan sa kalipay sa maong pagpasig-uli; ang kanhing mga kasakitan wala na gani mahinumdomi.—Salmo 126:1, 2.

21. Unsang bag-ong mga langit ang milungtad na sa 1914?

²¹ Apan, hinumdomi nga gisubli ni Pedro ang tagna ni Isaias ug gipakita nga kini may umaabot nga katumanan. Ang apostol misulat: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Sa 1914 ang dugay-nang-gipaabot nga bag-ong mga langit milungtad na. Ang Mesiyanikong Gingharian nga natawo niadtong tuiga nagmando gikan sa langit mismo, ug si Jehova naghatag niinig awtoridad sa tibuok yuta. (Salmo 2:6-8) Ang maong Gingharian nga kagamhanan, ilalom ni Kristo ug sa iyang 144,000 nga kaubang mga magmamando, mao ang bag-ong mga langit.—Pinadayag 14:1.

22. Kinsay maglangkob sa bag-ong yuta, ug sa unsang paagi ang mga tawo giandam bisan karon aron mahimo nga kinauyokan sa maong kahikayan?

²² Unsa na man ang bahin sa bag-ong yuta? Kay nagsunod sa paagi sa karaang katumanan, ang bag-ong yuta unya pagalangkoban ug mga tawo nga malipayong nagpasakop sa pagmando sa bag-ong langitnong kagamhanan. Bisan karon, ang minilyong tawo nga hilig sa pagkamatarong nagpasakop sa maong kagamhanan ug naningkamot sa pagsunod sa mga balaod niini sumala sa makaplagan diha sa Bibliya. Sila naggikan sa tanang nasyonalidad, mga pinulongan, ug mga rasa, ug sila nag-alagad nga may panaghiusa sa nagamando nga Haring Jesu-Kristo. (Miqueas 4:1-4) Pagkawagtang sa presenteng daotang sistema sa mga butang, kining grupoha mahimong kinauyokan sa usa ka bag-ong yuta nga sa kataposan mahimo unya nga tibuok-yutang katilingban  sa mga tawo nga may kahadlok sa Diyos nga magapanunod sa yutan-ong dominyo sa Gingharian sa Diyos.—Mateo 25:34.

23. Unsang impormasyon ang atong makaplagan diha sa basahong Pinadayag mahitungod sa “usa ka bag-ong langit ug usa ka bag-ong yuta,” ug sa unsang paagi matuman kining tagnaa?

²³ Ang basahong Pinadayag nagbatbat sa usa ka panan-awon nga nakita ni apostol Juan mahitungod sa umaabot nga adlaw ni Jehova, sa dihang pagalaglagon kining sistema sa mga butang. Human niana, si Satanas itambog sa kahiladman. (Pinadayag 19:11–20:3) Human sa maong kabatbatan, gisubli ni Juan ang matagnaong mga pulong ni Isaias, nga misulat: “Nakita ko ang usa ka bag-ong langit ug usa ka bag-ong yuta.” Ang misunod nga mga bersikulo sa asoy mahitungod niining mahimayaong panan-awon naghisgot sa panahon nga si Jehova nga Diyos mag-usob gayod sa mga kahimtang niining yutaa alang sa pagkamaayo. (Pinadayag 21:1, 3-5) Tin-aw, ang saad sa basahon ni Isaias mahitungod sa “bag-ong mga langit ug usa ka bag-ong yuta” makabatog kahibulongang katumanan sa bag-ong kalibotan sa Diyos! Ilalom sa bag-ong kagamhananong mga langit, ang usa ka bag-o nga yutan-ong katilingban magpahimulos sa paraiso nga espirituwal ug pisikal usab. Makapahupay gayod ang saad nga “ang unang mga butang [mga sakit, pag-antos, ug ang daghang ubang kasakitan nga giatubang sa mga tawo] dili na pagahinumdoman, ni kini sila motungha pa sa kasingkasing.” Bisan unsa nga mahinumdoman nato nianang panahona dili makapahinabog lalom nga kasakit, o kagul-anan, nga karon maoy nakapabug-at sa mga kasingkasing sa daghan.

24. Nganong si Jehova magmaya tungod sa pagpasig-uli sa Jerusalem, ug unsay dili na madungog sa kadalanan sa maong siyudad?

²⁴ Ang tagna ni Isaias nagpadayon: ‘Pagsadya kamo ug paglipay hangtod sa kahangtoran sa akong gilalang. Kay ania, akong gilalang ang Jerusalem nga usa ka hinungdan sa kalipay ug ang iyang katawhan nga usa ka hinungdan sa kasadya. Ug ako magakalipay sa Jerusalem ug magasadya sa akong katawhan; ug dili na madungog diha kaniya ang tingog sa paghilak o ang tingog sa pagdanguyngoy.’ (Isaias 65:18, 19) Dili lang mga Hudiyo ang magmaya tungod kay napasig-uli sa ilang yutang-natawhan  kondili ang Diyos mismo magmaya, kay iyang himoon nga matahom ang Jerusalem—nga sa makausa pa ang sentro sa matuod nga pagsimba sa yuta. Ang tingog sa pagdanguyngoy tungod sa katalagman, nga nadungog sa kadalanan sa maong siyudad mga dekada nga sayosayo, dili na madungog.

25, 26. (a) Sa atong adlaw, sa unsang paagi si Jehova naghimo sa Jerusalem nga “usa ka hinungdan sa kalipay”? (b) Sa unsang paagi gamiton ni Jehova ang Bag-ong Jerusalem, ug nganong kita mahimong magsadya karong adlawa?

²⁵ Karong adlawa, usab, si Jehova naghimo sa Jerusalem nga “usa ka hinungdan sa kalipay.” Sa unsang paagi? Sumala sa ato nang nasabtan, ang bag-ong mga langit nga nagsugod sa paglungtad sa 1914 sa kataposan maglakip sa 144,000 nga kaubang magmamando, kinsa adunay bahin sa langitnong kagamhanan. Sila matagnaong gibatbat ingong “Bag-ong Jerusalem.” (Pinadayag 21:2) Maoy may kalabotan sa Bag-ong Jerusalem nga ang Diyos nag-ingon: “Ania, akong gilalang ang Jerusalem nga usa ka hinungdan sa kalipay ug ang iyang katawhan nga usa ka hinungdan sa kasadya.” Ang Bag-ong Jerusalem gamiton sa Diyos aron ibubo ang way-ingon nga mga panalangin diha sa masinundanong katawhan. Dili na madungog ang tingog sa paghilak o pagdanguyngoy, kay pagatagbawon ni Jehova “ang mga hangyo sa [atong] kasingkasing.”—Salmo 37:3, 4.

²⁶ Sa pagkatinuod, adunay tanang katarongan nga kita magsadya karong adlawa! Sa dili madugay pagabalaanon ni Jehova ang iyang bantogang ngalan pinaagi sa paglaglag sa tanang magsusupak. (Salmo 83:17, 18) Unya ang bag-ong mga langit maoy bug-os nga magagahom. Pagkakahibulongang mga katarongan kini aron magsadya ug maglipay hangtod sa kahangtoran sa kon unsay gilalang sa Diyos!

Ang Saad Mahitungod sa May-Kasegurohang Kaugmaon

27. Sa unsang paagi gibatbat ni Isaias ang kasegurohan nga pahimuslan sa namalik nga mga Hudiyo sa ilang yutang-natawhan?

²⁷ Sa unang katumanan, sama sa unsa ang kinabuhi alang sa namalik nga mga Hudiyo ilalom sa bag-ong mga langit? Si Jehova nag-ingon: “Wala na unyay masuso nga pipila ka adlaw  ang kagulangon gikan sa maong dapit, ni usa ka tigulang nga dili makabug-os sa iyang mga adlaw; kay ang usa mamatay ingong bata lamang, bisan tuod usa ka gatos ka tuig ang panuigon; ug kon bahin sa makasasala, bisan tuod usa ka gatos ka tuig ang panuigon siya panghimaraoton.” (Isaias 65:20) Pagkanindot nga hulagway sa kasegurohan nga pahimuslan sa namalik nga mga destiyero diha sa ilang napasig-uling yutang-natawhan! Ang dili-pa-panahong kamatayon dili moangkon sa usa ka bag-ong nahimugso, kinsa pipila pa lang ka adlaw ang edad. Ang maong kamatayon dili mokuha sa usa ka tigulang nga wala pa mabuhi sa bug-os nga gidugayon. d Pagkamapasaligon ang mga pulong ni Isaias alang sa mga Hudiyo nga mobalik sa Juda! Kay luwas na diha sa ilang yuta, sila dili na gayod mabalaka nga ang mga kaaway modagit sa ilang mga masuso o mopatay sa ilang mga lalaki.

28. Unsay atong makat-onan gikan sa mga pulong ni Jehova mahitungod sa kinabuhi sa bag-ong kalibotan ilalom sa iyang Gingharian?

²⁸ Unsay gisulti kanato sa mga pulong ni Jehova mahitungod sa kinabuhi sa umaabot nga bag-ong kalibotan? Ilalom sa Gingharian sa Diyos, ang matag bata makalaom sa may-kasegurohang kaugmaon. Ang kamatayon dili na gayod moangkon sa usa ka tawong may kahadlok sa Diyos diha sa kalunhawan sa iyang kinabuhi. Sa kaatbang, ang masinugtanong katawhan mahilayo sa kapeligrohan, may kasegurohan, magkalipay sa kinabuhi. Komosta si bisan kinsa nga mopalabi sa pagsukol sa Diyos? Sila mawad-an sa pribilehiyo sa kinabuhi. Bisan pag ang masuklanong makasasala maoy “usa ka gatos ka tuig ang panuigon,” siya mamatay. Sa maong kahimtang, siya unya maoy “bata lamang” kon itandi sa kon unsay mahimo unta siya—usa ka tawong may walay-kataposang kinabuhi.

29. (a) Ang masinugtanong katawhan sa Diyos makabaton sa unsang mga kalipay diha sa napasig-uling yuta sa Juda? (b) Nganong ang mga kahoy maoy haom nga ilustrasyon sa hataas nga kinabuhi? (Tan-awa ang potnot.)

²⁹ Si Jehova nagpadayon sa iyang kabatbatan sa mga kahimtang  nga molungtad sa napasig-uling yuta sa Juda: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot.” (Isaias 65:21, 22) Sa paghibalik ngadto sa biniyaan ug sa walay duhaduha walay-kabalayan ug walay-kaparasan nga yuta sa Juda, ang masinugtanong katawhan sa Diyos makabatog kalipay sa pagpuyo sa ilang kaugalingong mga balay ug sa pagkaon sa mga bunga sa ilang kaugalingong mga kaparasan. Panalanginan sa Diyos ang ilang buluhaton, ug sila makabatog hataas nga mga kinabuhi—sama sa mga adlaw sa usa ka kahoy—nga niana mapahimuslan ang mga bunga sa ilang mga paghago. e

30. Unsang malipayong kahimtang ang gipahimuslan karong adlawa sa mga alagad ni Jehova, ug unsay ilang mapahimuslan sa bag-ong kalibotan?

³⁰ Sa atong adlaw, kining tagnaa adunay katumanan. Ang katawhan ni Jehova migawas sa espirituwal nga pagkadestiyero niadtong 1919 ug nagsugod sa pagpasig-uli sa ilang “yuta,” o dominyo sa kalihokan ug pagsimba. Sila nagtukod ug mga kongregasyon ug nag-ugmad sa espirituwal nga pagkamabungahon. Ingong resulta, bisan karon ang katawhan ni Jehova nagpahimulos ug espirituwal nga paraiso ug sa hinatag-sa-Diyos nga kalinaw. Kita makatino nga ang maong kalinaw mopadayon ngadto sa pisikal nga Paraiso. Imposible nga maisip sa tukmang paagi kon unsa ang mahimo ni Jehova pinaagi sa masinugtanong mga kasingkasing ug mga kamot sa iyang mga magsisimba sa bag-ong kalibotan. Pagkamakalipay unya ang pagtukod sa imong kaugalingong balay ug unya pagpuyo niana! Ilalom sa pagmando sa Gingharian, walay kanihit sa makapatagbawng buluhaton. Pagkamagantihon gayod ang ‘pagkakita ug maayo’ sa kanunay tungod sa mga bunga sa imong mga paghago! (Ecclesiastes  3:13) Aduna ba unya kitay dakong panahon aron pahimuslan sa bug-os ang buhat sa atong mga kamot? Oo, sa tinuoray! Ang walay-kataposang mga kinabuhi sa matinumanong mga tawo maoy “sama sa mga adlaw sa usa ka kahoy”—linibo ka tuig, ug labaw pa!

31, 32. (a) Unsang mga panalangin ang mapahimuslan sa mamalik nga mga destiyero? (b) Sa bag-ong kalibotan, unsang kalaoman ang mabatonan sa matinumanong mga tawo?

³¹ Si Jehova nagbatbat sa dugang mga panalangin nga naghulat sa mamalik nga mga destiyero: “Dili sila magbudlay sa walay kapuslanan, ni sila manganak alang sa kahasol; tungod kay sila mao ang mga anak nga gilangkoban sa mga gipanalanginan ni Jehova, ug ang ilang mga kaliwat kauban nila.” (Isaias 65:23) Si Jehova magapanalangin niadtong gipasig-uling mga Hudiyo, mao nga dili sila maghago sa kakawangan. Ang mga ginikanan dili manganak ug mga anak aron lang makaagom silag sayong kamatayon. Ang kanhing mga destiyero dili lamang maoy magpahimulos sa mga panalangin sa pagpasig-uli; ikauban nila ang ilang mga anak. Ang Diyos maikagon kaayo sa pagtagbaw sa mga panginahanglan sa iyang katawhan nga siya nagsaad: “Mahitabo gayod nga sa dili pa sila motawag ako mismo motubag; samtang sila nagasulti pa, ako mamati.”—Isaias 65:24.

³² Sa unsang paagi tumanon ni Jehova kining mga saara sa umaabot nga bag-ong kalibotan? Kinahanglang atong hulaton ug tan-awon. Si Jehova wala maghatag sa tanang detalye, apan kita makatino nga ang matinumanong mga tawo dili na gayod “magbudlay sa walay kapuslanan.” Ang dakong panon sa mga makalabang-buhi sa Armagedon ug ang mga anak nga ilang ipanganak makalaom sa hataas kaayo ug makapatagbawng kinabuhi—ang kinabuhing walay kataposan! Kadtong mabuhi pag-usab sa pagkabanhaw ug mopalabi sa pagkinabuhing nahiuyon sa mga sukdanan sa Diyos magkalipay usab diha sa bag-ong kalibotan. Si Jehova magpatalinghog ug mosanong sa ilang mga panginahanglan, nga makakita daan ug magtagana niana. Sa pagkatinuod, buksan ni Jehova ang iyang kamot ug tagbawon ang angay nga “tinguha sa tanang buhing butang.”—Salmo 145:16.

33. Sa dihang ang mga Hudiyo mobalik sa ilang yutang-natawhan, sa unsang diwa nga may panagdait ang kahayopan?

 ³³ Asa kutob ang epekto sa gisaad nga kalinaw ug kasegurohan? Gitapos ni Jehova kining bahina sa tagna: “‘Ang lobo ug ang nating karnero mag-usa sa pagpaningaon, ug ang leyon mokaon ug uhot ingon sa torong baka; ug kon bahin sa halas, ang iyang pagkaon mao unyay abog. Sila dili mohimog kadaot ni magpahinabog bisan unsang kadaot sa tibuok nakong balaan nga bukid,’ nag-ingon si Jehova.” (Isaias 65:25) Sa dihang ang matinumanong Hudiyo nga nanghibilin mobalik sa ilang yutang-natawhan, sila atimanon ni Jehova. Sa pagkatinuod, ang leyon mokaon ug uhot ingon sa torong baka, kay ang leyon dili mohimog kadaot sa mga Hudiyo o sa ilang kahayopan. Kining saara segurado, kay kini gitapos sa mga pulong, “nag-ingon si Jehova.” Ug ang iyang pulong kanunayng matuman!—Isaias 55:10, 11.

34. Unsa ang makalilipayng katumanan sa mga pulong ni Jehova karong adlawa ug sa bag-ong kalibotan?

³⁴ Ang mga pulong ni Jehova adunay makalilipayng katumanan taliwala sa matuod nga mga magsisimba karong adlawa. Sukad 1919, ang Diyos nagpanalangin sa espirituwal nga yuta sa iyang katawhan, nga nag-usob niana ngadto sa espirituwal nga paraiso. Kadtong mosulod niining espirituwal nga paraiso naghimog talagsaong mga kausaban sa ilang mga kinabuhi. (Efeso 4:22-24) Sa tabang sa espiritu sa Diyos, ang mga tawo nga sa nangagi may samag-hayop nga mga personalidad—nga tingali namentaha o namiktima sa ubang paagi sa ilang isigkatawo—nagmauswagon sa pagpukgo sa daotang mga kinaiya. Ingong resulta, sila nagpahimulos sa pakigdait ug panaghiusa sa pagsimba uban sa mga isigkamagtutuo. Ang mga panalangin nga gipahimuslan karon sa katawhan ni Jehova diha sa ilang espirituwal nga paraiso mokaylap pa ngadto sa pisikal nga Paraiso, diin ang pakigdait nga maglungtad taliwala sa mga tawo duyogan sa pakigdait uban sa kahayopan. Makatino kita nga sa gitakdang panahon sa Diyos, ang iyang orihinal nga sugo ngadto sa katawhan matuman sa hustong paagi: “Gamhi [ang yuta], ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.”—Genesis 1:28.

35. Nganong kita adunay tanang katarongan sa “paglipay hangtod sa kahangtoran”?

 ³⁵ Pagkamapasalamaton nato sa saad ni Jehova nga maglalang ug “bag-ong mga langit ug usa ka bag-ong yuta”! Kanang saara natuman sa 537 W.K.P. ug adunay dugang katumanan karong adlawa. Kining duha ka katumanan nagpunting sa dalan ngadto sa mahimayaong kaugmaon alang sa masinugtanong katawhan. Si Jehova maluloton kaayong naghatag kanato, pinaagi sa tagna ni Isaias, sa pasiklap kon unsay iyang gitagana alang niadtong nahigugma kaniya. Sa pagkatinuod, kita adunay tanang katarongan sa pagpamati sa mga pulong ni Jehova: ‘Paglipay hangtod sa kahangtoran sa akong gilalang’!—Isaias 65:18.

[Mga footnote]

[Mga Pangutana sa Pagtuon]

[Hulagway sa panid 389]

Sa bag-ong kalibotan sa Diyos, aduna unya kitay dakong panahon aron pahimuslan ang buhat sa atong mga kamot