“Usa ka Bag-ong Ngalan”
Kapitulo Bayente-tres
“Usa ka Bag-ong Ngalan”
1. Unsang pasalig ang nahitala sa Isaias kapitulo 62?
PASALIG, kahupayan, paglaom sa kapasig-ulian—kanay gikinahanglan sa naminghoy nga mga Hudiyo sa Babilonya. Milabay na ang ubay-ubayng dekada sukad sa pagkalaglag sa Jerusalem ug sa templo niini. Mga 800 kilometros nga halayo sa Babilonya, ang Juda maoy biniyaan, ug daw gikalimtan na ni Jehova ang mga Hudiyo. Unsay makatul-id sa ilang kahimtang? Ang mga saad ni Jehova nga iyang pabalikon sila sa ilang yuta ug tugotan nga ipasig-uli nila ang putling pagsimba. Unya ang maong mga kabatbatan nga “bug-os nga biniyaan” ug “biniyaan” pulihan sa mga ngalang magpaila sa pag-uyon ni Jehova. (Isaias 62:4; Zacarias 2:12) Ang kapitulo 62 sa Isaias napuno niining mga saara. Bisan pa niana, sama sa ubang mga tagna bahin sa kapasig-ulian, kining kapituloha naghisgot ug mga isyu nga saylo kaayo sa pagkagawas sa mga Hudiyo gikan sa pagkabihag sa Babilonya. Sa dakong katumanan niini, ang Isaias kapitulo 62 nagpasalig kanato nga ang kaluwasan sa espirituwal nga nasod ni Jehova, ang “Israel sa Diyos,” maoy segurado.—Galacia 6:16.
Si Jehova Dili Magpakahilom
2. Sa unsang paagi si Jehova nagpakita pag-usab ug pag-uyon sa Zion?
2 Napukan ang Babilonya sa 539 W.K.P. Human niadto, si Haring Ciro sa Persia miluwat ug usa ka balaod nga nakapahimo sa mahadlokon-sa-Diyos nga mga Hudiyo sa pagbalik sa Jerusalem ug pagpasig-uli sa pagsimba ni Jehova. (Esdras 1:2-4) Sa 537 W.K.P., ang unang namalik nga mga Hudiyo didto na sa ilang yutang-natawhan. Si Jehova nagpakita pag-usab ug pag-uyon sa Jerusalem, sumala sa gibanaag sa pagkamasiboton sa iyang matagnaong pahayag: “Tungod sa Zion ako dili magpabiling walay timik, ug tungod sa Jerusalem ako dili magpakahilom hangtod nga ang iyang pagkamatarong mosidlak sama gayod sa kahayag, ug ang iyang kaluwasan sama sa sulo nga nagdilaab.”—Isaias 62:1.
3. (a) Nganong ang yutan-ong Zion sa kataposan gisalikway ni Jehova, ug kinsay mipuli kaniya? (b) Unsang pagbulag sa pagtuo ang nahitabo, ug kanus-a, ug sa unsang yugto sa panahon kita nagkinabuhi karon?
3 Sa 537 W.K.P., si Jehova nagtuman sa iyang saad sa pagpasig-uli sa Zion, o Jerusalem. Ang mga molupyo niini nakasinati sa kaluwasan pinaagi kaniya, ug ang ilang pagkamatarong masanagong misidlak. Sa ulahi, hinunoa, sa anam-anam sila mibulag sa putling pagsimba. Sa kataposan, ilang gisalikway si Jesus ingong ang Mesiyas, ug sa kataposan gisalikway sila ni Jehova ingong iyang piniling nasod. (Mateo 21:43; 23:38; Juan 1:9-13) Si Jehova nagpahimugso ug usa ka bag-ong nasod, ang “Israel sa Diyos.” Kining bag-ong nasod nahimong iyang linaing katawhan, ug sa unang siglo, ang mga membro niini madasigong nagsangyaw sa maayong balita sa nailhan-kaniadto nga tibuok kalibotan. (Galacia 6:16; Colosas 1:23) Ikasubo, sa pagkamatay sa mga apostoles, may pagbulag gikan sa matuod nga relihiyon. Ingong resulta, ang apostatang matang sa Kristiyanidad naugmad, sama sa makaplagan karon diha sa Kakristiyanohan. (Mateo 13:24-30, 36-43; Buhat 20:29, 30) Sulod sa kasiglohan, ang Kakristiyanohan gitugotang magpahamtang ug dakong pakaulaw sa ngalan ni Jehova. Apan, sa kataposan, niadtong 1914 ang “tuig sa maayong kabubut-on” ni Jehova nagsugod, duyog sa dakong katumanan niining bahina sa tagna ni Isaias.—Isaias 61:2.
4, 5. (a) Kinsay gisimbolohan sa Zion ug sa iyang mga anak karong adlawa? (b) Sa unsang paagi gigamit ni Jehova ang Zion sa paghimo sa “iyang kaluwasan sama sa sulo nga nagdilaab”?
4 Karong adlawa ang saad ni Jehova sa pagpasig-uli sa Zion natuman diha sa iyang langitnong organisasyon, ang “Jerusalem sa itaas,” ingon nga gihawasan dinhi sa yuta sa iyang mga anak, ang dinihogan-sa-espiritung mga Kristohanon. (Galacia 4:26) Ang langitnong organisasyon ni Jehova nag-alagad nga usa ka mahinalarong katabang—mabinantayon, mahigugmaon, ug manggibuhaton. Makalilipay gayod kadtong okasyona sa dihang sa 1914 gipanganak niini ang Mesiyanikong Gingharian! (Pinadayag 12:1-5) Sukad ilabina sa 1919, ang iyang yutan-ong mga anak nagsangyaw ngadto sa mga nasod mahitungod sa iyang pagkamatarong ug kaluwasan. Ingong gitagna ni Isaias, ang maong mga anak naglamdag sa kangitngit samag sulo, nga nagpasidlak sa ilang kahayag.—Mateo 5:15, 16; Filipos 2:15.
5 Si Jehova dulot nga interesado sa iyang mga magsisimba ug dili mopahulay, o magpakahilom, hangtod nga iyang matuman ang tanan nga iyang gisaad sa Zion ug sa iyang mga anak. Ang mga nahibilin sa mga dinihogan uban sa ilang kauban nga “ubang mga karnero” modumili usab sa pagpakahilom. (Juan 10:16) Sila maoy sabaan gayod samtang sila nagpunting sa mga tawo sa bugtong dalan sa kaluwasan.—Roma 10:10.
“Usa ka Bag-ong Ngalan” Gihatag ni Jehova
6. Unsay anaa sa hunahuna ni Jehova alang sa Zion?
6 Unsay anaa sa hunahuna ni Jehova alang sa Zion, ang iyang langitnong “babaye,” ingong gihawasan sa karaang Jerusalem? Siya nagpahayag: “Ang kanasoran makakita gayod sa imong pagkamatarong, Oh babaye, ug ang tanang hari sa imong himaya. Ug ikaw sa pagkatinuod pagatawgon sa usa ka bag-ong ngalan, nga paganganlan sa mismong baba ni Jehova.” (Isaias 62:2) Samtang ang mga Israelinhon nagbuhat sa pagkamatarong, ang mga nasod napugos sa pagtan-awng atentibo. Bisan ang mga hari napugos sa pag-admitir nga ang Jerusalem gigamit ni Jehova ug ang bisan unsang pagmando nga ilang gigamit mawalay-bili kon itandi sa Gingharian ni Jehova.—Isaias 49:23.
7. Unsay gipasabot sa bag-ong ngalan sa Zion?
7 Si Jehova karon nagpalig-on sa nabag-ong kahimtang sa Zion pinaagi sa paghatag kaniyag usa ka bag-ong ngalan. Ang maong bag-ong ngalan nagpasabot sa binulahang kahimtang ug sa madungganong posisyon nga gipahimuslan sa yutan-ong mga anak sa Zion sugod sa 537 W.K.P. a Nagpakita kini nga si Jehova nag-ila sa Zion ingong iyang gipanag-iya. Karong adlawa, ang Israel sa Diyos nalipay nga gikahimut-an ni Jehova sa maong paagi, ug ang ubang mga karnero nagmaya duyog kanila.
8. Sa unsang mga paagi si Jehova nagpasidungog sa Zion?
8 Kay nakahatag ug bag-ong ngalan sa Zion, si Jehova karon nagsaad: “Ikaw mahimo gayod nga usa ka matahom nga purongpurong diha sa kamot ni Jehova, ug usa ka harianong purong diha sa palad sa imong Diyos.” (Isaias 62:3) Si Jehova nagtuboy sa iyang simbolikong asawa, ang langitnong Zion, aron pagatan-awon nga may pagdayeg. (Salmo 48:2; 50:2) Ang matahom nga purongpurong ug ang “harianong purong” nagpailang siya gibestihan sa kadungganan ug awtoridad. (Zacarias 9:16) Kay naghawas sa langitnong Zion, o “Jerusalem sa itaas,” ang Israel sa Diyos maoy talagsaong sangpotanan sa naglihok nga kamot sa Diyos—ang iyang gigamit nga gahom. (Galacia 4:26) Sa tabang ni Jehova, kanang espirituwal nga nasod nakahimog talagsaong reputasyon sa integridad ug pagkamahinalaron. Ang minilyon, lakip ang mga dinihogan ug ubang mga karnero, gipalig-on aron ipasundayag ang talagsaong pagtuo ug gugma. Panahon sa Milenyong Paghari ni Kristo, ang mga dinihogan, kay nakabaton na sa ilang mahimayaong langitnong ganti, mahimong mga instrumento diha sa kamot ni Jehova alang sa pagtuboy sa nagaagulo nga kalalangan ngadto sa kinabuhing walay kataposan.—Roma 8:21, 22; Pinadayag 22:2.
‘Si Jehova Nahimuot Kanimo’
9. Batbata ang kausaban sa Zion.
9 Ang paghatag ug bag-ong ngalan maoy bahin sa kahimut-anang kausaban sa langitnong Zion ingong gihawasan sa iyang yutan-ong mga anak. Atong mabasa: “Dili ka na pagatawgong usa ka babayeng bug-os nga biniyaan; ug ang imong kaugalingong yuta dili na pagaingnong biniyaan; apan ikaw tawgong Ang Akong Kahimuot Anaa Kaniya, ug ang imong yuta Gipanag-iya Ingong Asawa. Kay si Jehova magbaton ug kahimuot kanimo, ug ang imong kaugalingong yuta panag-iyahon ingong usa ka asawa.” (Isaias 62:4) Ang yutan-ong Zion maoy biniyaan sukad sa iyang pagkalaglag sa 607 W.K.P. Bisan pa niana, ang mga pulong ni Jehova nagpasalig nga siya ipasig-uli ug papuy-an pag-usab ang iyang yuta. Ang kanhi-nalaglag nga Zion dili na babayeng bug-os nga biniyaan, ug ang iyang yuta dili na biniyaan. Ang pagpasig-uli sa Jerusalem sa 537 W.K.P. nagpasabot sa usa ka bag-ong kahimtang alang kaniya, nga bug-os katugbang sa iyang kanhi gun-ob nga kahimtang. Si Jehova nagpahayag nga ang Zion pagatawgong “Ang Akong Kahimuot Anaa Kaniya,” ug ang iyang yuta, “Gipanag-iya Ingong Asawa.”—Isaias 54:1, 5, 6; 66:8; Jeremias 23:5-8; 30:17; Galacia 4:27-31.
10. (a) Sa unsang paagi ang Israel sa Diyos nausab? (b) Unsa ang “yuta” sa Israel sa Diyos?
10 Sugod sa 1919 nasinati sa Israel sa Diyos ang susamang kausaban. Panahon sa unang gubat sa kalibotan, ang dinihogang mga Kristohanon daw gisalikway sa Diyos. Apan ang ilang inuyonang kahimtang gipasig-uli sa 1919, ug ang ilang paagi sa pagsimba, giputli. Kini nakaapektar sa ilang mga pagtulon-an, ilang organisasyon, ug ilang kalihokan. Ang Israel sa Diyos nahidangat sa “yuta” niini, sa espirituwal nga kaumahan o nataran sa mga kalihokan niini.—Isaias 66:7, 8, 20-22.
11. Sa unsang paagi ang mga Hudiyo nanag-iya sa ilang inahan ingong asawa?
11 Sa dugang pagpasiugda sa bag-o, inuyonang kahimtang sa iyang katawhan, si Jehova nagpahayag: “Ingon nga ang usa ka batan-ong lalaki magapanag-iya sa usa ka ulay ingong iyang asawa, ang imong mga anak nga lalaki magapanag-iya kanimo ingong asawa. Ug uban sa kasadya sa usa ka pamanhonon tungod sa pangasaw-onon, ang imong Diyos magsadya gayod tungod kanimo.” (Isaias 62:5) Sa unsang paagi ang mga Hudiyo, ang “mga anak nga lalaki” sa Zion, makapanag-iya sa ilang inahan ingong asawa? Sa pagkaaging ang namalik nga mga anak nga lalaki sa Zion nga napagawas sa pagkadestiyero sa Babilonya nakapanag-iya sa ilang daang kaulohang siyudad ug mipuyo diha kaniya pag-usab. Sa dihang nahitabo kana, ang Zion dili na biniyaan kondili napunog mga anak nga lalaki.—Jeremias 3:14.
12. (a) Sa unsang paagi gitin-aw ni Jehova nga ang dinihogang mga Kristohanon maoy bahin sa organisasyon nga nalanggikit kaniya sa kaminyoon? (b) Sa unsang paagi ang mga pakiglabot ni Jehova uban sa iyang katawhan nagtaganag usa ka halangdong sulondan sa kaminyoon karong adlawa? (Tan-awa ang kahon sa panid 342.)
12 Sa katumbas nga paagi, sukad sa 1919 ang mga anak sa langitnong Zion nanag-iya sa ilang yuta, sa ilang espirituwal nga kaumahan, nga adunay matagnaong ngalan nga “Gipanag-iya Ingong Asawa.” Ang ilang Kristohanong kalihokan diha nianang yutaa nagpadayag nga kining dinihogang mga Kristohanon mao ang “katawhan alang sa ngalan [ni Jehova].” (Buhat 15:14) Ang ilang pagpatunghag mga bunga sa Gingharian ug pagmantala sa ngalan ni Jehova nagpadayag nga si Jehova nahimuot sa maong mga Kristohanon. Iyang gihimong tin-aw nga bahin sila sa organisasyon nga nalanggikit kaniya diha sa dili-mabugtong panaghiusa. Pinaagi sa pagdihog sa maong mga Kristohanon sa balaang espiritu, pagpagawas kanila gikan sa espirituwal nga pagkabihag, ug paggamit kanila aron sa pagsangyaw sa paglaom sa Gingharian sa tibuok katawhan, si Jehova nagpasundayag nga siya nagmaya tungod kanila uban sa kalipay sa usa ka pamanhonon tungod sa usa ka pangasaw-onon.—Jeremias 32:41.
“Ayaw Kamo Paghilom”
13, 14. (a) Sa karaang mga panahon, sa unsang paagi ang Jerusalem nahimong usa ka siyudad nga nagtaganag luwas nga kahimtang? (b) Sa modernong mga panahon, sa unsang paagi ang Zion nahimong “kadayeganan sa yuta”?
13 Ang masambingayong bag-ong ngalan nga gihatag ni Jehova mopabati sa iyang katawhan ug kasegurohan. Sila nahibalo nga siya nag-ila kanila ug nga sila gipanag-iya niya. Sa paggamit karon ug usa ka lahing ilustrasyon, si Jehova nakigsulti sa iyang katawhan nga samag ngadto sa usa ka pinarilang siyudad: “Ibabaw sa imong mga paril, Oh Jerusalem, ako nagtudlog mga tigbantay. Sa tibuok adlaw ug sa tibuok gabii, sa kanunay, ayaw itugot nga sila magpabiling walay timik. Kamo nga naghisgot kang Jehova, ayaw kamo paghilom, ug ayaw siya hatagi ug bisan unsang kahilom hangtod nga iyang mapalig-on, oo, hangtod nga iyang mahimo ang Jerusalem nga kadayeganan sa yuta.” (Isaias 62:6, 7) Sa gitakdang panahon ni Jehova human sa pagbalik sa matinumanong nahibilin gikan sa Babilonya, ang Jerusalem nahimong “kadayeganan sa yuta”—usa ka pinarilang siyudad nga nagtaganag luwas nga kahimtang sa iyang mga molupyo. Sa adlaw ug gabii, ang mga tigbantay sa maong mga paril igmat sa pagtino sa kasegurohan sa siyudad ug sa paghatag ug pasidaang mga mensahe ngadto sa iyang mga lungsoranon.—Nehemias 6:15; 7:3; Isaias 52:8.
14 Sa modernong mga panahon gigamit ni Jehova ang iyang dinihogang mga tigbantay sa pagpakita sa mga maaghop sa dalan paingon sa kagawasan gikan sa pagkaulipon sa bakak nga relihiyon. Kini sila gidapit nga mosulod sa iyang organisasyon, diin makakaplag silag panalipod gikan sa espirituwal nga kahugawan, dili-diyosnong mga impluwensiya, ug kasuko ni Jehova. (Jeremias 33:9; Sofonias 3:19) Hinungdanon sa maong panalipod ang papel sa tigbantay nga matang, “ang matinumanon ug maalamong ulipon,” nga nagtaganag espirituwal nga “pagkaon sa hustong panahon.” (Mateo 24:45-47) Kay nagbuhat duyog sa tigbantay nga matang, ang “dakong panon” may hinungdanong bahin usab sa paghimo sa Zion nga “kadayeganan sa yuta.”—Pinadayag 7:9.
15. Sa unsang paagi ang tigbantay nga matang ug ang ilang mga kauban nag-alagad kanunay kang Jehova?
15 Ang pag-alagad sa tigbantay nga matang ug sa ilang mga kauban nagpadayon! Ang ilang tibuok-kalag nga tinamdan makita diha sa madasigong kalihokan sa minilyong matinumanong mga tawo nga gipaluyohan sa nagapanawng mga magtatan-aw ug sa ilang mga asawa; mga boluntaryo diha sa nagkalainlaing mga balayng Bethel ug imprentahanan nga mga pasilidad sa mga Saksi ni Jehova; mga misyonaryo; ug espesyal, regular, ug oksilyare nga mga payunir. Dugang pa, sila nagbudlay sa pagtukod ug bag-ong mga Kingdom Hall, pagduaw sa mga masakiton, pagtabang sa mga indibiduwal nga nagsagubang ug medikal nga mga emerhensiya, ug paghatag ug tukma-sa-panahong hinabang sa mga biktima sa mga katalagman ug mga aksidente. Daghan sa maong nagasakripisyo-sa-kaugalingon nga mga indibiduwal kasagarang nag-alagad sa literal nga “adlaw ug gabii”!—Pinadayag 7:14, 15.
16. Sa unsang paagi ang mga alagad ni Jehova ‘wala mohatag kaniya ug bisan unsang kahilom’?
16 Ang mga alagad ni Jehova gidasig sa pag-ampo nga walay hunong, sa paghangyo sa Diyos nga ang iyang ‘kabubut-on matuman, maingon sa langit, mao man usab sa yuta.’ (Mateo 6:9, 10; 1 Tesalonica 5:17) Sila giawhag: “Ayaw hatagi [si Jehova] ug bisan unsang kahilom” hangtod nga ihatag ang mga tinguha ug mga paglaom bahin sa pagpasig-uli sa matuod nga pagsimba. Gipasiugda ni Jesus ang panginahanglan sa pag-ampo nga walay hunong, nga miawhag sa iyang mga sumusunod sa ‘pagtuaw ngadto [sa Diyos] sa adlaw ug gabii.’—Lucas 18:1-8.
Pag-alagad sa Diyos Pagagantihan
17, 18. (a) Sa unsang paagi ang mga molupyo sa Zion nagdahom nga magpahimulos sa mga bunga sa ilang paghago? (b) Sa unsang paagi ang katawhan ni Jehova karong adlawa nagpahimulos sa mga bunga sa ilang paghago?
17 Ang bag-ong ngalang gihatag ni Jehova sa iyang katawhan nagpasalig kanila nga ang ilang mga panlimbasog dili makawang. “Si Jehova nanumpa pinaagi sa iyang tuong kamot ug pinaagi sa iyang kusgang bukton: ‘Dili na nako ihatag ang imong mga lugas ingon nga pagkaon sa imong mga kaaway, ni ang mga langyaw moinom sa imong bag-ong bino, nga alang niana ikaw nagbudlay. Apan ang mismong nagtigom niini mokaon niini, ug sila tinong magdayeg kang Jehova; ug ang mismong naghipos niini moinom niini sa akong balaang mga sawang.’” (Isaias 62:8, 9) Ang tuong kamot ug kusgang bukton ni Jehova maoy mga simbolo sa iyang gahom ug kusog. (Deuteronomio 32:40; Ezequiel 20:5) Ang iyang pagpanumpa pinaagi niini nagpakitang siya determinado sa pag-usab sa kahimtang sa Zion. Sa 607 W.K.P., gitugotan ni Jehova ang mga kaaway sa Zion sa pagtulis kaniya ug pag-ilog sa iyang mga kabtangan. (Deuteronomio 28:33, 51) Apan karon, ang mga gipanag-iya sa Zion pahimuslan lamang niadtong adunay katungod niana.—Deuteronomio 14:22-27.
18 Sa modernong-adlawng katumanan niining saara, ang napasig-uling katawhan ni Jehova nakasinatig dakong espirituwal nga kadagaya. Sila nagpahimulos sa bug-os sa mga bunga sa ilang paghago—nagdaghan nga Kristohanong mga tinun-an ug dagayang espirituwal nga pagkaon. (Isaias 55:1, 2; 65:14) Tungod kay ang iyang katawhan matinumanon man, dili itugot ni Jehova nga ang ilang mga kaaway manghilabot sa ilang espirituwal nga kauswagan o maghikaw kanila sa mga resulta sa ilang bug-os-kalag nga pag-alagad. Walay buluhatong gihimo diha sa pag-alagad kang Jehova ang makawang.—Malaquias 3:10-12; Hebreohanon 6:10.
19, 20. (a) Sa unsang paagi ang dalan nahawan aron ang mga Hudiyo makabalik sa Jerusalem? (b) Sa unsang paagi sa modernong mga panahon ang dalan nahawanan aron ang mga maaghop makasulod sa organisasyon ni Jehova?
19 Ang bag-ong ngalan naghimo usab sa organisasyon ni Jehova nga madanihon alang sa matinud-anon-ug-kasingkasing nga mga tawo. Panonpanon nanghugop niini, ug ang dalan gibuksan kanunay alang kanila. Ang tagna ni Isaias nagpahayag: “Panggawas, panggawas kamo sa mga ganghaan. Hawani ang dalan sa katawhan. Tambaki, tambaki ang dakong dalan. Kuhai kini sa mga bato. Pagpatindog ug usa ka timaan alang sa mga katawhan.” (Isaias 62:10) Sa unang panghitabo, ang maong awhag lagmit nagtumong sa paggawas sa mga ganghaan sa mga siyudad sa Babilonya aron mobalik sa Jerusalem. Ang mga namalik maghawan sa mga bato gikan sa dalan aron mas sayon ang pagpanaw ug magpatindog ug usa ka timaan sa pagtultol sa dalan.—Isaias 11:12.
20 Sukad sa 1919, ang dinihogang mga Kristohanon gilain alang sa balaang pag-alagad ug nagapanaw sa “Dalan sa Pagkabalaan.” (Isaias 35:8) Sila ang unang nanglakaw subay sa espirituwal nga dakong dalan gikan sa Dakong Babilonya. (Isaias 40:3; 48:20) Ang Diyos naghatag kanila sa pribilehiyo nga manguna diha sa pagpahayag sa iyang gamhanang mga buhat ug sa pagpadayag sa uban sa dalan ngadto sa dakong dalan. Ang pagwagtang sa kabatoan niini—ang paghawan sa mga kapandolanan—maoy alang gayod sa ilang kaayohan. (Isaias 57:14) Kinahanglang sila makasabot sa tin-aw sa mga katuyoan ug mga pagtulon-an sa Diyos. Ang bakak nga mga tinuohan maoy mga batong kapandolanan diha sa dalan paingon sa kinabuhi, apan ang Pulong ni Jehova maoy “sama sa usa ka maso nga nagadugmok sa dakong bato.” Pinaagi niini, ang dinihogang mga Kristohanon nagdugmok sa mga batong kapandolanan nga makapandol niadtong buot moalagad kang Jehova.—Jeremias 23:29.
21, 22. Unsang timaan ang gipatindog ni Jehova alang niadtong nagabiya sa bakak nga relihiyon, ug sa unsang paagi nahibalo kita?
21 Sa 537 W.K.P., ang Jerusalem nahimong timaan nga nagpangamay sa Hudiyong nahibilin aron mobalik ug tukoron pag-usab ang templo. (Isaias 49:22) Sa 1919 sa dihang giluwas ang dinihogang nahibilin gikan sa pagkaulipon sa bakak nga relihiyon, wala sila maglaaglaag nga walay tunong. Nahibalo sila sa ilang adtoan, kay si Jehova nagbutang ug timaan alang kanila. Unsa ba nga timaan? Ang samang timaan nga gitagna sa Isaias 11:10, nga mabasa: “Mahitabo nianang adlawa nga aduna unyay gamot ni Jese nga mobarog ingon nga usa ka timaan alang sa mga katawhan.” Si apostol Pablo nagpadapat niining mga pulonga kang Jesus. (Roma 15:8, 12) Oo, ang timaan mao si Kristo Jesus, nga nagamando ingong Hari sa langitnong Bukid sa Zion!—Hebreohanon 12:22; Pinadayag 14:1.
22 Alirong kang Jesu-Kristo, ang dinihogang mga Kristohanon ug ang ubang mga karnero nagtigom sa paghimo sa nagapahiusang pagsimba sa Labing Hataas nga Diyos. Ang iyang pagmando magabindikar sa unibersohanong pagkasoberano ni Jehova ug magapanalangin sa mga matinud-anon-ug-kasingkasing nga naggikan sa tanang nasod sa yuta. Dili ba katarongan kini nga ang matag usa kanato moduyog sa pagbayaw kaniya uban ang pagdayeg?
“Ang Imong Kaluwasan Nagsingabot”!
23, 24. Sa unsang paagi ang kaluwasan ginadala alang niadtong may pagtuo sa Diyos?
23 Ang bag-ong ngalan nga gihatag ni Jehova sa iyang samag-asawa nga organisasyon adunay kalabotan sa dumalayong kaluwasan sa iyang mga anak. Si Isaias nagsulat: “Tan-awa! Si Jehova nagpahinabo niini nga madungog hangtod sa kinalay-ang bahin sa yuta: ‘Ingna ninyo ang anak nga babaye sa Zion, “Tan-awa! Ang imong kaluwasan nagsingabot. Tan-awa! Ang ganti nga iyang ihatag anaa kaniya, ug ang suhol nga iyang ibayad anaa sa iyang atubangan.”’” (Isaias 62:11) Ang kaluwasan miabot alang sa mga Hudiyo sa dihang ang Babilonya napukan ug sila namalik ngadto sa ilang yutang-natawhan. Apan kining mga pulonga mopunting sa mas dako pang butang. Ang pahayag ni Jehova magpahinumdom sa tagna ni Zacarias bahin sa Jerusalem: “Paglipay sa hilabihan, Oh anak nga babaye sa Zion. Singgit sa kadaogan, Oh anak nga babaye sa Jerusalem. Tan-awa! Ang imong hari moanha kanimo. Siya matarong, oo, linuwas; mapainubsanon, ug nagsakay sa usa ka asno, sa usa ka hingkod nga hayop nga anak nga laki sa usa ka asna.”—Zacarias 9:9.
24 Tulo ka tuig ug tunga human mabawtismohi si Jesus sa tubig ug gidihogan sa espiritu sa Diyos, siya misakay paingon sa Jerusalem ug naghinlo sa templo niini. (Mateo 21:1-5; Juan 12:14-16) Karong adlawa, si Jesu-Kristo mao ang nagadalag kaluwasan gikan ni Jehova alang sa tanang adunay pagtuo sa Diyos. Sukad sa iyang pagkaentrono sa 1914, si Jesus mao usab ang tinudlo ni Jehova nga Maghuhukom ug Maglalaglag. Sa 1918, tulo ka tuig ug tunga human sa iyang pagkaentrono, iyang gihinloan ang espirituwal nga templo ni Jehova, ingong gihawasan sa kongregasyon sa dinihogang mga Kristohanon sa yuta. (Malaquias 3:1-5) Ang pagbanhaw kaniya ingong usa ka timaan nagpaila sa sinugdanan sa dakong pagtigom sa katawhan gikan sa tibuok yuta, sa pagpaluyo sa Mesiyanikong Gingharian. Sa pagsunod sa karaang sulondan, ang “kaluwasan” miabot sa Israel sa Diyos sa dihang sila gipagawas gikan sa Dakong Babilonya sa 1919. “Ang ganti” o “ang suhol” nga gitagana alang sa nagasakripisyo-sa-kaugalingong mga mag-aani maoy walay-kamatayong kinabuhi sa langit o dumalayong kinabuhi sa yuta. Ang tanan nga magpabiling matinumanon makasalig nga ang ilang “paghago dili makawang may kalabotan sa Ginoo.”—1 Corinto 15:58.
25. Unsang pasalig ang gihatag sa katawhan ni Jehova?
25 Pagkamaayong palaaboton alang sa langitnong organisasyon ni Jehova, alang sa dinihogang mga hawas niini dinhi sa yuta, ug alang sa tanang aktibong nakig-uban kanila! (Deuteronomio 26:19) Si Isaias mitagna: “Ang mga tawo magtawag gayod kanila nga balaang katawhan, kadtong mga linukat ni Jehova; ug ikaw mismo tawgon nga Pinangita, usa ka Siyudad nga Wala Biyai sa Bug-os.” (Isaias 62:12) Sa usa ka panahon ang “Jerusalem sa itaas,” nga gihawasan sa Israel sa Diyos, mibating biniyaan. Dili na gayod siya mobati pag-usab niana. Ang katawhan ni Jehova sa walay kataposan mao ang punting sa iyang mapanalipdanong pag-atiman, nga magpahimulos sa iyang mapinadayonong pahiyom sa pag-uyon.
[Footnote]
a Sa tagna sa Bibliya ang “usa ka bag-ong ngalan” mahimong magpasabot sa usa ka bag-ong posisyon o pribilehiyo.—Pinadayag 2:17; 3:12.
[Mga Pangutana sa Pagtuon]
[Kahon sa panid 342]
Halangdong Sulondan sa Kaminyoon
Sa dihang ang mga tawo magminyo, ang ilang mga pagdahom dalhon nila sa panagtiayon. Apan unsay mga pagdahom sa Diyos? Siya ang nagmugna sa institusyon sa kaminyoon. Unsay iyang katuyoan niana?
Ang usa ka timailhan sa panghunahuna sa Diyos nagagikan sa iyang relasyon uban sa nasod sa Israel. Si Isaias naghulagway sa maong relasyon ingon nga kaminyoon. (Isaias 62:1-5) Matikdi kon unsay ginahimo ni Jehova nga Diyos ingong usa ka “bana” alang sa iyang “asawa.” Siya nagapanalipod ug nagabalaan kaniya. (Isaias 62:6, 7, 12) Iyang ginapasidunggan ug ginapabilhan siya. (Isaias 62:3, 8, 9) Ug siya nahimuot kaniya, ingon nga gipaila sa bag-ong mga ngalan nga iyang gihatag kaniya.—Isaias 62:4, 5, 12.
Sa Kristohanon Gregong Kasulatan, gisubli ni Pablo ang kabatbatan ni Isaias bahin sa relasyon tali ni Jehova ug sa Israel sa gitandi niya ang relasyon sa usa ka bana ug asawa ngadto sa iya sa kang Kristo ug sa kongregasyon sa dinihogang mga Kristohanon.—Efeso 5:21-27.
Gidasig ni Pablo ang mga Kristohanon nga sundogon diha sa ilang mga kaminyoon ang relasyon tali ni Jesus ug sa kongregasyon. Walay labaw nga gugma kay sa gipakita ni Jehova ngadto sa Israel ug sa gipakita ni Kristo ngadto sa kongregasyon. Ang maong simbolikong mga relasyon naghatag ug halangdong sulondan alang sa malamposon ug malipayong kaminyoon tali sa mga Kristohanon.—Efeso 5:28-33.
[Hulagway sa panid 339]
Pagatawgon ni Jehova ang langitnong Zion pinaagi sa usa ka bag-ong ngalan
[Mga hulagway sa panid 347]
Sa modernong mga panahon ang tigbantay nga matang ni Jehova wala magpakahilom
