Bahin 4

Ang Diyos Nagapahibalo Kanato sa Iyang mga Katuyoan

1, 2. Sa unsang paagi nahibalo kita nga ang Diyos nagataganag mga tubag niadtong sinserong nangutana?

 ANG usa ka mahigugmaong Diyos magpadayag gayod sa iyang mga katuyoan ngadto sa mga tawo nga sinserong nagapangita kaniya. Iyang ginatagana sa maukitong mga tawo ang mga tubag sa mga pangutana sama sa kon nganong iyang gitugotan ang pag-antos.

² Ang Bibliya nagaingon: “Kon inyong pangitaon ang [Diyos], siya inyong hikaplagan.” “Adunay Diyos sa mga langit nga Tigpadayag sa mga tinagoan.” “Ang Soberano Ginoong Jehova dili mobuhat sa usa ka butang gawas iyang napadayag ang iyang tinagoan nga butang ngadto sa iyang mga alagad ang mga propeta.”​—1 Cronicas 28:9; Daniel 2:28; Amos 3:7.

Hain ang mga Tubag?

3. Asa kita makasusi kon nganong gitugotan sa Diyos ang pag-antos?

³ Ang mga tubag sa mga pangutana sama sa kon nganong gitugotan sa Diyos ang pag-antos ug kon unsay iyang pagabuhaton niini hikaplagan diha sa talaan nga iyang gidasig sa pagpasulat alang sa atong kaayohan. Ang maong talaan mao ang iyang Pulong, ang Balaang Bibliya. “Ang tibuok nga Kasulatan gidasig sa Diyos ug mapuslanon alang sa pagpanudlo, sa pagbadlong, sa pagtul-id sa mga butang, sa pagpanton diha sa pagkamatarong, aron ang tawo sa Diyos mahimong sa bug-os may katakos, hingpit nasangkapan alang sa tanang maayong buhat.”​—2 Timoteo 3:16, 17.

4, 5. Unsay nagahimo sa Bibliya nga talagsaong basahon?

⁴ Ang Bibliya tinuod nga talagsaong basahon. Kini naundan sa labing hustong talaan sa kasaysayan sa tawo ug mosaylo pa sa paglalang sa mga tawo. Kini usab nunot-sa-panahon, kay ang mga tagna niini may labot man sa mga panghitabo sa atong panahon ug usab sa duol nga umaabot.

⁵ Walay laing basahon ang adunay ingong mga kredensiyal sa pagkatukma sa kasaysayan. Pananglitan, pila ra ka manuskristo sa karaang klasikal nga magsusulat ang nagalungtad. Apan nagalungtad ang daghang manuskrito sa Bibliya, ang pila bahin lamang ug ang pila kompleto: mga 6,000 sa Hebreohanong Kasulatan (ang 39 ka basahon sa “Daang Testamento”) ug mga 13,000 sa Kristohanon Gregong Kasulatan (ang 27 ka basahon sa “Bag-ong Testamento”).

6. Nganong kita makapaneguro nga ang Bibliya karong adlawa susama ra sa panahong gidasig sa Diyos ang pagsulat niini?

⁶ Ang Diyos nga Makagagahom sa Tanan, kinsa maoy nagdasig sa Bibliya, nagtino nga ang katukma sa teksto natipigan diha sa maong mga kopya sa manuskrito. Busa ang atong mga Bibliya karong adlawa susama ra sa unang dinasig nga mga sinulat. Laing butang nga motabang nato sa pagpabili niini mao nga pila ka manuskritong kopya sa Kristohanon Gregong Kasulatan may petsa nga pila ka gatos ka tuig lamang gikan sa panahon sa orihinal nga pagsulat. Pila ka manuskritong kopya sa karaang sekular nga mga magsusulat nga nagalungtad pa ang talagsa rang may petsa nga ubay-ubayng mga siglo gikan sa orihinal nga mga magsusulat.

Gasa sa Diyos

7. Unsa ka kanat ang sirkulasyon sa Bibliya?

⁷ Ang Bibliya ang labing kanat pagkatagtag nga basahon sa kasaysayan. Mga tulo ka bilyong kopya napatik na. Walay laing basahon ang haduol nianang gidaghanona. Ug ang Bibliya o mga bahin niini nahubad ngadto sa mga 2,000 ka pinulongan. Busa, gibanabana nga 98 porsiento sa populasyon sa atong planeta ang mahimong makabasa sa Bibliya.

8-10. Unsa ang pila ka katarongan nganong ang Bibliya takos natong susihon?

 ⁸ Seguradong ang usa ka basahon nga nangangkon nga gikan sa Diyos ug nagbaton sa tanang gawasnon ug sulodnon nga mga pamatuod sa pagkatinuod takos sa atong pagsusi. a Nagapatin-aw kini sa katuyoan sa kinabuhi, sa kahulogan sa mga kahimtang sa kalibotan, ug kon unsay anaa sa umaabot. Walay laing basahon ang makahimo niana.

⁹ Oo, ang Bibliya mao ang komunikasyon sa Diyos sa tawhanong pamilya. Gitultolan niya ang pagsulat niini pinaagi sa iyang aktibong gahom, o espiritu, nga mga 40 ka tawo ang nagsulat. Mao nga ang Diyos nagapakigsulti kanato pinaagi sa iyang Pulong, ang Balaang Bibliya. Si apostol Pablo misulat: “Sa diha nga inyong gidawat ang pulong sa Diyos, nga inyong nadungog gikan kanamo, inyong gidawat kini, dili ingon nga pulong sa mga tawo, kondili, sumala sa pagkatinuod mao kini, ingon ang pulong sa Diyos.”​—1 Tesalonica 2:13.

¹⁰ Si Abraham Lincoln, ang ika-16 nga presidente sa Tinipong Bansa, nagtawag sa Bibliya “ang kinamaayohang gasa nga sukad nahatag sa Diyos sa tawo . . . Kondili pa tungod niini dili unta kita mahibalo sa matarong gikan sa sayop.” Busa, unsay ginasugid kanato niining kinalabwang gasa mahitungod kon sa unsang paagi misugod ang pag-antos, kon nganong gitugotan kini sa Diyos, ug kon unsay iyang pagabuhaton niini?

[Mga footnote]

[Mga Pangutana sa Pagtuon]

 [Hulagway sa panid 10]

Ang Bibliya, nga dinasig sa Diyos, mao ang iyang komunikasyon alang sa tawhanong pamilya