Ang Kahibulongang Bag-ong Kalibotan nga Hinimo sa Diyos
Bahin 10
Ang Kahibulongang Bag-ong Kalibotan nga Hinimo sa Diyos
1, 2. Unsay mahitabo tapos sa nagahinlong gubat sa Armageddon?
HUMAN sa nagahinlong gubat sa Diyos sa Armageddon, unya unsa man? Unya mosugod ang mahimayaon nga bag-ong panahon. Ang mga makalabang-buhi sa Armageddon, kay nakapamatuod na sa ilang kamaunongon sa pagmando sa Diyos, pasudlon sa bag-ong kalibotan. Kulbahinam unya kanang bag-ong yugto sa kasaysayan samtang ang kahibulongang mga kaayohan modagayday gikan sa Diyos nganha sa tawhanong pamilya!
2 Ubos sa pagdumala sa Gingharian sa Diyos, ang mga makalabang-buhi magsugod sa pag-ugmad sa paraiso. Ang ilang kusog ideboto sa di-mahakogong mga pangagpas nga makahatag ug kaayohan sa tanang buhi unya. Ang yuta magsugod sa pagkabalhin ngadto sa matahom, malinawon, makapatagbawng puloy-anan sa katawhan.
Pagkamatarong Mopuli sa Pagkadaotan
3. Unsang dihadihang kahupayan ang mabati tapos gayod sa Armageddon?
3 Kining tanan maposible pinaagi sa paglaglag sa kalibotan ni Satanas. Wala na unyay makapabahinbahing bakak nga mga relihiyon, mga kahikayang sosyal, o mga gobyerno. Wala na unyay satanasnong propaganda sa paglimbong sa katawhan; ang tanang ahensiya nga magpatungha niana mangalaglag uban sa sistema ni Satanas. Hunahunaa lang: ang tibuok makahilong atmospera sa kalibotan ni Satanas mahanaw na! Dako unya kanang kahupayan!
4. Ibatbat ang kausaban sa pagpanudlo nga mahitabo.
4 Unya ang makapadaot nga mga ideya sa tawhanong pagmando pulihan ug makapalig-ong pagtulon-an nga nagagikan sa Diyos. “Ang tanan nimong mga anak maoy mga tawo nga tinudloan ni Jehova.” (Isaias 54:13) Tungod niining maayong pagtudlo sa sunodsunod nga tuig, “ang yuta mapuno gayod sa kahibalo kang Jehova sama sa katubigan nga nagatabon sa dagat mismo.” (Isaias 11:9) Ang katawhan dili na makakat-on ug daotan, apan “ang pagkamatarong mao ang makat-onan sa mga molupyo sa mabungahong yuta.” (Isaias 26:9) Ang makapalig-ong mga hunahuna ug mga buhat mao ang timaan sa mga dalan sa mga katawhan.—Buhat 17:31; Filipos 4:8.
5. Unsay mahitabo sa tanang pagkadaotan ug sa daotang katawhan?
5 Busa, wala na unyay pagpatay, kapintasan, panglugos, pangawat, o ubang krimen. Walay mausa ang magaantos tungod sa daotang mga binuhatan sa uban. Ang Proverbio 10:30 nagaingon: “Mahitungod sa matarong, sa panahong walay katinoan siya dili matarog; apan ang mga daotan, sila dili magapadayon sa pagpuyo sa yuta.”
Hingpit nga Panglawas Ipasig-uli
6, 7. (a) Unsang mapait nga kamatuoran ang pagataposon sa pagmando sa Gingharian? (b) Giunsa ni Jesus pagpasundayag kini samtang dinhi sa yuta?
6 Sa bag-ong kalibotan, aduna unyay pagwagtang sa tanang daotang mga epekto sa unang pag-alsa. Pananglitan, ang pagmando sa Gingharian magwagtang sa sakit ug pagkatigulang. Karong adlawa, bisan pag ikaw nagapahimulos ug maayoayong panglawas, ang mapait nga kamatuoran mao nga samtang ikaw matigulang, mahanap ang imong mga mata, magipod ang imong ngipon, mabungol ang imong igdulongog, mangunot ang imong panit, madaot ang imong mga organo sa sulod sa lawas, hangtod nga sa kataposan ikaw mamatay.
7 Bisan pa, kanang makapaguol nga mga epekto nga atong napanunod gikan sa atong unang mga ginikanan duol nang mahimong butang sa kagahapon. Nakahinumdom ka ba kon unsay gipasundayag ni Jesus mahitungod sa panglawas samtang siya dinhi sa yuta? Ang Bibliya nagaasoy: “Ang mga panon sa katawhan miduol kaniya, nga nagdala ug mga tawo nga bakol, pungkol, buta, amang, ug daghan pang masakiton, ug ilang gibutang sila diha sa iyang tiilan, ug iyang giayo sila; mao nga ang panon natingala samtang ilang nakita nga ang amang nakasulti ug ang bakol nakalakaw ug ang buta nakakita.”—Mateo 15:30, 31.
8, 9. Ibatbat ang kalipay nga moabot sa bag-ong kalibotan sa dihang ipasig-uli ang hingpit nga panglawas.
8 Dako unyang kalipay ang moabot sa bag-ong kalibotan samtang ang tanan natong sakit pagapapason! Ang pag-antos nga sangpotanan sa luya nga panglawas dili na gayod mosakit kanato. “Walay molupyo ang moingon: ‘Ako masakiton.’” “Nianang panahona ang mga mata sa mga buta mangabuka, ug ang mga igdulongog sa mga bungol makadungog. Nianang panahona ang bakol mokatkat sama sa laking kanding, ug ang dila sa amang mosinggit sa kalipay.”—Isaias 33:24; 35:5, 6.
9 Dili ba makapalipay ang pagmata kada buntag ug pagkaamgo nga ikaw karon nagpahimulos na ug himsog nga panglawas? Dili ba makapatagbaw sa mga tigulang sa pagkahibalo nga sila napasig-uli na sa bug-os nga kalagsik sa kabatan-on ug makaangkon sa kahingpitan nga sa sinugdan napahimuslan ni Adan ug Eva? Ang saad sa Bibliya mao: “Ang iyang unod mabag-o kay sa unod sa bata; siya mobalik sa mga adlaw sa iyang batan-ong kusog.” (Job 33:25) Pagkamakapahimuot ang paglabay unya nianang mga antiyohos, mga kasangkapan sa pandungog, mga tukod sa paglakaw, mga silyang may ligid, ug mga tambal! Ang mga ospital, mga doktor, ug mga dentista dili na gayod kinahanglanon.
10. Unsay mahitabo sa kamatayon?
10 Ang mga tawo nga nagpahimulos ug baskog nga lawas dili buot mamatay. Ug dili sila kinahanglang mamatay, kay ang katawhan dili na unya mailalom sa napanunod nga kadili-hingpit ug kamatayon. Si Kristo “kinahanglang maghari hangtod igabutang sa Diyos ang tanang kaaway sa ilalom sa iyang mga tiil. Ingong kataposang kaaway, ang kamatayon pagalaglagon.” “Ang gasa nga ginahatag sa Diyos mao ang kinabuhing walay kataposan.”—1 Corinto 15:25, 26; Roma 6:23; tan-awa usab ang Isaias 25:8.
11. Giunsa pagsumada sa Pinadayag ang mga kaayohan sa bag-ong kalibotan?
11 Sa pagsumada sa mga kaayohan nga modagayday gikan sa matinagdanon nga Diyos nganha sa tawhanong pamilya sa Paraiso, ang kataposang basahon sa Bibliya nagaingon: “Ug pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit. Ang unang mga butang miagi na.”—Pinadayag 21:3, 4.
Ang Patay Mahibalik
12. Giunsa pagpasundayag ni Jesus ang iyang hinatag-sa-Diyos nga gahom sa pagkabanhaw?
12 Si Jesus wala lang mag-ayo sa masakiton ug mag-ayo sa bakol. Siya usab nagbanhaw ug mga tawo gikan sa lubnganan. Sa ingon iyang gipasundayag ang kahibulongang gahom sa pagkabanhaw nga gihatag sa Diyos kaniya. Nahinumdom ka ba sa higayon sa dihang si Jesus nakaabot sa balay sa usa ka lalaki kansang anak babaye namatay? Si Jesus miingon ngadto sa patay nga dalagita: “Inday, ako magaingon kanimo, Bangon!” Unsay sangpotanan? “Dihadiha ang dalagita mibangon ug misugod sa paglakaw.” Sa pagkakita niadto, ang katawhan didto “nalipay sa hilabihan.” Sila wala makapugong sa ilang kalipay!—Marcos 5:41, 42; tan-awa usab ang Lucas 7:11-16; Juan 11:1-45.
13. Unsang mga matang sa mga tawo ang pagabanhawon?
13 Sa bag-ong kalibotan, “adunay pagkabanhaw sa matarong ug sa mga dili-matarong.” (Buhat 24:15) Sa maong panahon gamiton ni Jesus ang iyang hinatag-sa-Diyos nga gahom sa pagbanhaw sa mga patay tungod kay, sumala pa niya, “Ako mao ang pagkabanhaw ug ang kinabuhi. Ang nagtuo kanako, bisan pag siya mamatay, mabuhi.” (Juan 11:25) Siya miingon usab: “Ang tanan nga anaa sa handumanang mga lubnganan [diha sa panumdoman sa Diyos] makadungog sa iyang [kang Jesus] tingog ug manggula.”—Juan 5:28, 29.
14. Tungod kay ang kamatayon mawala na, unsang mga butanga ang pagahanawon?
14 Dako unya ang kalipay sa tibuok yuta sa dihang ang pundokpundok sa mga tawong patay mahibalik sa kinabuhi nga mahiusa sa ilang mga minahal! Wala na unyay mga lindog sa obituwaryo nga makahatag kasubo sa mga makalabang-buhi. Hinunoa, anaa hinuon ang kaatbang: mga pahibalo sa bag-ong mga nabanhaw nga maghatag kalipay niadtong nagmahal kanila. Busa wala nay mga serbisyo sa paglubong, mga pagdaob sa mga patay, mga krematoryo, o mga sementeryo!
Usa ka Malinawon Gayod nga Kalibotan
15. Sa unsang paagi ang tagna ni Miqueas matuman sa kinabug-osang diwa?
15 Ang tinuod nga kalinaw diha sa tanang bahin sa kinabuhi mabatonan. Ang mga gubat, mga tigpasiugdag mga gubat, ug paggamag mga hinagiban mahimong mga butang sa kagahapon. Ngano? Kay ang makapabahinbahing nasodnon, tribonhon, ug rasanhong intereses mahanaw na. Dayon, sa kinabug-osang diwa, “sila dili mobakyaw ug espada, nasod batok nasod, ni sila makakat-on ug gubat.”—Miqueas 4:3.
16. Unsaon pagtino sa Diyos nga ang mga gubat dili na gayod mahitabo?
16 Tingali kini morag katingalahan tungod sa kasaysayan sa tawo sa pagkauhaw ug dugo diha sa kanunayng pakiggubat. Apan kana nahitabo kay ang katawhan nailalom sa tawhanon ug sa demonyohanong pagmando. Sa bag-ong kalibotan, ilalom sa pagmando sa Gingharian, kini maoy mahitabo: “Umari kamong katawhan, tan-awa ang mga kalihokan ni Jehova . . . Iyang ginapahunong ang mga gubat sa kinatumyan sa yuta. Iyang ginabunggo ang pana ug ginaputolputol ang bangkaw; ang mga karro [sa gubat] iyang ginasunog sa kalayo.”—Salmo 46:8, 9.
17, 18. Sa bag-ong kalibotan, unsang relasyon ang magalungtad tali sa tawo ug sa mga kahayopan?
17 Ang tawo ug mananap managdait usab, sama sa didto sa Eden. (Genesis 1:28; 2:19) Ang Diyos nagaingon: “Alang kanila akong pagahimoon ang usa ka tugon nianang adlawa may kalabotan sa mapintas nga mananap sa kapatagan ug sa nagalupad nga linalang sa kalangitan ug sa nagakamang nga butang sa yuta, ug . . . ako silang palubogon diha sa kasegurohan.”—Oseas 2:18.
18 Unsa ka bug-os ang maong pakigdait? “Ang lobo mopuyo sa makadiyut uban sa nating karnero, ug ang leopardo mohigda uban sa nating kanding, ug ang nating baka ug ang balhiboong nating leyon ug ang pinatambok nga hayop manag-uban sila; ug usa lamang ka batang lalaki ang mangulo kanila.” Dili na gayod mahitabo nga ang mga hayop mahimong hulga sa tawo o sa ilang kaugalingon. Bisan “ang leyon mokaon ug uhot sama gayod sa torong baka”!—Isaias 11:6-9; 65:25.
Yuta Mabalhin nga Paraiso
19. Ang yuta mabalhin nga unsa?
19 Ang tibuok yuta mabalhin nga paraisong puloy-anan sa tawo. Kana ang hinungdang si Jesus nakasaad sa usa ka tawo nga nagtuo kaniya: “Ikaw magauban kanako sa Paraiso.” Ang Bibliya nagaingon: “Ang kamingawan ug ang walay-tubig nga yuta managkalipay, ug ang desyertong kapatagan magmasadyaon ug mamulak sama sa rosas. . . . Kay sa kamingawan ang katubigan mosugwak, ug ang mga bul-og sa tubig diha sa desyertong kapatagan.”—Lucas 23:43; Isaias 35:1, 6.
20. Nganong ang kagutmanan dili na mohampak sa katawhan?
20 Ubos sa Gingharian sa Diyos, ang kagutmanan dili na gayod mohampak sa milyonmilyon. “Aduna unyay daghang trigo sa yuta; sa ibabaw sa kabukiran adunay pag-awas.” “Ang kahoy sa kapatagan magahatag sa iyang mga bunga, ug ang yuta mismo magahatag sa iyang abot, ug sila magapuyo sa ilang yuta nga may kasegurohan.”—Salmo 72:16; Ezekiel 34:27.
21. Unsay mahitabo sa pagkawalay-balay, mga timawang lugar, ug daotang mga silinganan?
21 Wala na unyay kakabos, walay-balay nga mga tawo, mga timawang lugar, o silinganan nga punog krimen. “Sila magatukod ug mga balay ug magapuyo niana; ug sila magatanom ug kaparrasan ug magakaon sa ilang bunga. Sila dili magatukod ug lain ang magapuyo; sila dili magatanom ug lain ang magakaon.” “Sila magalingkod, ang matag usa ilalom sa iyang parras ug ilalom sa iyang kahoy nga igira, ug walay magapakurog kanila.”—Isaias 65:21, 22; Miqueas 4:4.
22. Giunsa pagbatbat sa Bibliya ang mga panalangin sa pagmando sa Diyos?
22 Ang mga tawo mapanalanginan niining tanang butang, ug labaw pa, diha sa Paraiso. Ang Salmo 145:16 nagaingon: “Ikaw [Diyos] nagabuklad sa imong kamot ug nagatagbaw sa tinguha sa matag buhing butang.” Dili katingalahang ang tagna sa Bibliya nagapahayag: “Ang mga maaghop magapanunod sa yuta, ug sila makakaplag sa ilang tumang kalipay sa kadagaya sa pakigdait. . . . Ang mga matarong magapanunod sa yuta, ug sila magapuyo niini sa walay kataposan.”—Salmo 37:11, 29.
Pagwagtang sa Kagahapon
23. Sa unsang paagi wagtangon sa Gingharian sa Diyos ang tanang pag-antos nga atong nasinati?
23 Ang pagmando sa Gingharian sa Diyos magawagtang sa tanang kadaot nga nahimo sa tawhanong pamilya sulod sa milabayng unom ka libo ka katuigan. Ang mga kalipay nianang panahona molabaw sa bisan unsang pag-antos nga naagoman sa katawhan. Ang kinabuhi dili na matugaw sa daotang mga panumdoman sa pag-antos sa nangagi. Ang makapalig-ong mga hunahuna ug mga kalihokan nga mao unya ang matag-adlaw nga kinabuhi sa katawhan anam-anam nga magpapas sa masakit nga mga handumanan.
24, 25. (a) Unsay gitagna ni Isaias nga mahitabo? (b) Nganong makapaneguro kita nga ang mga panumdoman sa nangaging pag-antos mahanap?
24 Ang matinagdanon nga Diyos nagapahayag: “Ako nagalalang ug bag-ong mga langit [usa ka bag-o langitnong kagamhanan ibabaw sa katawhan] ug usa ka bag-ong yuta [usa ka matarong tawhanong katilingban]; ug ang unang mga butang dili pagahinumdoman, ni motungha pa sa kasingkasing. Apan maglipay, kamong katawhan, ug magmalipayon sa walay kataposan diha sa akong ginalalang.” “Ang tibuok yuta nakapahulay, nga walay kasamok. Ang katawhan nagmasadyaon uban ang mga pag-awit.”—Isaias 14:7; 65:17, 18.
25 Busa pinaagi sa iyang Gingharian, ang Diyos bug-os magbalit-ad sa daotang kahimtang nga dugay na kaayong naglungtad. Hangtod sa hangtod iyang ipakita ang iyang dakong pagtagad kanato pinaagi sa pagpaulan ug mga panalangin nga labaw pang magabalos sa bisan unsang kasakit nga atong nadawat sa atong kagahapon. Ang nangaging mga suliran nga atong nasinati mahanap na sa panumdoman unya, kon ugaling ato pang hinumdoman.
26. Nganong pagabaslan kita sa Diyos tungod sa bisan unsang nangaging pag-antos?
26 Kana unya ang igabalos sa Diyos kanato tungod sa pag-antos nga tingali atong giantos niining kalibotana. Siya nahibalo nga dili atong sala nga kita natawong dili-hingpit, kay atong napanunod ang pagkadili-hingpit gikan sa atong unang mga ginikanan. Dili atong sala nga kita natawo nganha sa satanasnong kalibotan, kay kon si Adan ug Eva nagmatinumanon pa, kita unta nangatawo diha sa paraiso. Busa uban sa dakong kaluoy ang Diyos magbalos sa daotang kagahapon nga atong naagoman.
27. Unsang mga tagna ang makakita sa ilang kahibulongang katumanan sa bag-ong kalibotan?
27 Sa bag-ong kalibotan, masinati sa katawhan ang kagawasan nga gitagna sa Roma 8:21, 22: “Ang kalalangan mismo ipahigawas gikan sa pagkaulipon sa kadunotan ug magbaton ug mahimayaong kagawasan sa mga anak sa Diyos. Kay kita nahibalo nga ang tanang kalalangan nagapadayon sa pag-agulo ug gisakitan hangtod karon.” Ang katawhan unya makakita sa bug-os nga katumanan sa pag-ampo: “Umanhi ang imong gingharian. Matuman ang imong pagbuot, ingon sa langit, mao usab sa yuta.” (Mateo 6:10) Ang kahibulongang mga kahimtang diha sa Paraisong yuta mosumbalik-silaw sa mga kahimtang sa langit.
[Mga Pangutana sa Pagtuon]
[Mga hulagway sa panid 23]
Sa bag-ong kalibotan, ang mga tigulang mobalik sa kalagsik sa pagkabatan-on
[Hulagway sa panid 24]
Ang tanang sakit ug mga depekto pagahanawon sa bag-ong kalibotan
[Hulagway sa panid 25]
Sa bag-ong kalibotan, ang mga patay pagabanhawon sa kinabuhi
[Hulagway sa panid 26]
‘Sila dili na makakat-on ug gubat’
[Mga hulagway sa panid 27]
Ang mga tawo ug mga hayop magbaton ug bug-os nga pakigdait sa Paraiso
[Hulagway sa panid 27]
‘Ang Diyos magabuklad sa iyang kamot ug magatagbaw sa tinguha sa matag buhing butang’
[Hulagway sa panid 28]
Ang Gingharian sa Diyos labawng mobalos sa tanang pag-antos nga atong naagoman
