Bahin 11

Ang Patukoranan sa Bag-ong Kalibotan Ginaporma na Karon

1, 2. Ingong katumanan sa tagna sa Bibliya, unsay nagakahitabo atubangan sa atong mga mata mismo?

 KAHIBULONGAN usab mao ang kamatuoran nga ang patukoranan sa bag-ong kalibotan sa Diyos ginaporma sa pagkakaron, bisan samtang nagakadaot ang daang kalibotan ni Satanas. Atubangan sa atong mga mata mismo, nagatigom ang Diyos ug mga tawo gikan sa tanang kanasoran ug nagaporma kanila ingong patukoranan sa usa ka bag-ong yutan-ong kapunongan nga duol nang mopuli sa wala-magkahiusa nga kalibotan karong adlawa. Sa Bibliya, sa 2 Pedro 3:13, kining bag-ong kapunongan gitawag “usa ka bag-ong yuta.”

² Ang tagna sa Bibliya nagaingon usab: “Sa kataposang bahin sa mga adlaw [ang panahon nga ato karong gikinabuhian] . . . , daghang mga katawhan ang manglakaw ug magaingon: ‘Umari kamo, kamong katawhan, ug manungas kita ngadto sa bukid ni Jehova [iyang matuod nga pagsimba], . . . ug kita iyang pagatudloan sa iyang mga dalan, ug kita magalakaw diha sa iyang mga alagianan.’”​—Isaias 2:2-3.

3. (a) Taliwala kang kinsa nga ginatuman ang tagna ni Isaias? (b) Sa unsang paagi gikomentohan kini sa kataposang basahon sa Bibliya?

³ Kanang tagnaa karon ginatuman taliwala sa mga nagapasakop sa ‘mga dalan sa Diyos ug nagalakaw  diha sa iyang mga alagianan.’ Ang kataposang basahon sa Bibliya nagatawag niining mahigugmaog-kalinaw internasyonal nga kapunongan sa katawhan nga “usa ka dakong panon . . . gikan sa tanang mga nasod ug mga tribo ug mga katawhan ug mga pinulongan,” usa ka tinuod tibuok-yutang pag-igsoonay nga nagaalagad sa Diyos nga nagkahiusa. Ug ang Bibliya nagaingon usab: “Kini sila mao ang nanggula sa dakong kasakitan.” Nga mao, sila makalabang-buhi sa kataposan niining daotang sistema sa mga butang.​—Pinadayag 7:9, 14; Mateo 24:3.

Usa ka Tinuod Internasyonal nga Pag-igsoonay

4, 5. Nganong ang tibuok-kalibotang pag-igsoonay sa mga Saksi ni Jehova posible?

⁴ Milyonmilyong mga Saksi ni Jehova sinserong naningkamot sa pagkinabuhi nga nahiuyon sa mga instruksiyon ug mga dalan sa Diyos. Ang ilang paglaom sa kinabuhing dayon naangkla diha sa bag-ong kalibotan sa Diyos. Pinaagi sa paggawi sa ilang matag-adlawng mga kinabuhi nga nagasunod sa mga balaod sa Diyos, ilang ginapakita ang ilang kaandam nga mopasakop sa iyang paagi sa pagmando karon ug sa bag-ong kalibotan. Sa bisan diin, waysapayan sa ilang nasyonalidad o rasa, ilang ginasunod ang samang mga sukdanan​—kanang gipadayag sa Diyos diha sa iyang Pulong. Kana ang hinungdan nga sila usa ka tinuod internasyonal nga pag-igsoonay, usa ka bag-ong kalibotan nga kapunongan nga hinimo sa Diyos.​—Isaias 54:13; Mateo 22:37, 38; Juan 15:9, 14.

⁵ Ang mga Saksi ni Jehova wala maghunahuna nga sila ang pasidunggan sa ilang linain tibuok-​yutang pag-igsoonay. Sila nahibalo nga kini sangpotanan sa paglihok sa gamhanang espiritu sa Diyos diha sa katawhan nga nagapasakop sa iyang mga balaod. (Buhat 5:29, 32; Galacia 5:22, 23) Kini maoy buhat sa Diyos. Sumala sa giingon ni Jesus, “ang mga butang dili mahimo sa mga tawo mahimo sa Diyos.” (Lucas 18:27) Busa ang Diyos nga nagpaposible sa malungtarong uniberso mao usab ang nagapaposible sa malungtarong bag-ong kalibotan nga kapunongan.

6. Nganong ang pag-igsoonay sa mga Saksi ni Jehova matawag nga modernong milagro?

⁶ Sa ingon, ang paagi sa pagmando ni Jehova sa bag-ong kalibotan makita na diha sa kon unsay iyang ginapatungha diha sa patukoranan alang sa bag-ong kalibotan nga ginaporma na karon. Ug ang iyang nahimo diha sa iyang mga Saksi maoy, sa usa ka diwa, usa ka modernong milagro. Ngano? Kay ang mga Saksi ni Jehova iyang gihugpong ngadto sa tinuod tibuok-kalibotan nga pag-igsoonay, nga dili gayod mabungkag sa makapabahinbahing nasodnon, rasanhon, o relihiyosong intereses. Bisan pag ang mga Saksi mokabat ug milyonmilyon ug nagapuyo diha sa kapig 200 ka kayutaan, sila nahugpong ingon nga usa nga dili mabungkag. Kining tibuok-kalibotang pag-igsoonay, nga talagsaon sa tibuok nga kasaysayan, sa pagkatinuod usa ka modernong milagro​—nga buhat sa Diyos.​—Isaias 43:10, 11, 21; Buhat 10:34, 35; Galacia 3:28.

Pag-ila sa Katawhan sa Diyos

7. Sumala kang Jesus sa unsang paagi mailhan ang iyang matuod nga mga sumusunod?

⁷ Sa unsang paagi matino sa dugang pa kon kinsa ang katawhan nga gigamit sa Diyos ingong patukoranan alang sa iyang bag-ong kalibotan? Aw, kinsay nagatuman sa mga pulong ni Jesus sa Juan 13:34, 35? Siya miingon: “Ako nagahatag kaninyo ug usa ka bag-ong sugo, nga kamo maghigugmaay sa usag usa, sama nga ako naghigugma kaninyo, nga kamo usab maghigugmaay sa usag usa. Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” Ang mga Saksi ni Jehova nagtuo sa mga pulong ni Jesus ug nagalihok pinasukad niini kanila. Sumala sa ginasugo sa Pulong sa Diyos, sila “magbaton ug mainitong gugma alang sa usag usa.” (1 Pedro 4:8) Sila “nagasul-ob [sa ilang kaugalingon] sa gugma, kay kini usa ka hingpit nga bugkos sa panaghiusa.” (Colosas 3:14) Busa ang inigsoong gugma mao ang “papilit” nga magatapot kanila sa tingob sa tibuok kalibotan.

8. Sa unsang paagi ang 1 Juan 3:10-12 sa dugang nagapaila sa katawhan sa Diyos?

⁸ Usab, ang 1 Juan 3:10-12 nagaingon: “Ang mga anak sa Diyos ug ang mga anak sa Yawa dayag niining kamatuorana: Ang tagsatagsa nga wala magabuhat sa pagkamatarong wala magagikan sa Diyos, ni siya nga wala mahigugma sa iyang igsoon. Kay kini mao ang balita nga inyong nadungog sukad sa sinugdanan, nga kinahanglang kita maghigugmaay sa usag usa; dili sama kang Cain, nga naggikan sa daotang usa ug nagpatay sa iyang igsoon.” Busa, ang katawhan sa Diyos maoy dili-mapintason, tibuok-yutang pag-igsoonay.

 Laing Ilhanan

9, 10. (a) Pinaagi sa unsang buluhaton ang mga alagad sa Diyos mailhan sa kataposang mga adlaw? (b) Sa unsang paagi ginatuman sa mga Saksi ni Jehova ang Mateo 24:14?

⁹ Adunay laing paagi sa pag-ila sa mga alagad sa Diyos. Sa iyang tagna mahitungod sa kataposan sa kalibotan, si Jesus miasoy ug daghang butang nga magtimaan niining yugtoa sa panahon ingong kataposang mga adlaw. (Tan-awa ang Bahin 9.) Usa ka pangunang bahin niining tagnaa gihisgotan diha sa iyang mga pulong sa Mateo 24:14: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.”

¹⁰ Nakita ba nato nga ginatuman kining tagnaa? Oo. Sukad sa pagsugod sa kataposang mga adlaw niadtong 1914, ang mga Saksi ni Jehova nagawali sa maayong balita sa Gingharian sa Diyos sa tibuok kalibotan sa paagi nga gisugo ni Jesus, nga mao, diha sa mga balay sa katawhan. (Mateo 10:7, 12; Buhat 20:20) Milyonmilyong mga Saksi nagaduaw sa katawhan diha sa matag nasod aron makigsulti kanila mahitungod sa bag-ong kalibotan. Kini misangpot sa imong pagdawat niining brosyur, kay ang buluhaton sa mga Saksi ni Jehova nagaapil sa pag-imprenta ug pagpanagtag ug binilyong mga basahon mahitungod sa Gingharian sa Diyos. May nailhan ka bang lain nga nagawali mahitungod sa Gingharian sa Diyos sa balay-balay sa tibuok nga kalibotan? Ug ang Marcos 13:10 nagapakita nga kining buluhaton sa pagwali ug pagpanudlo kinahanglang pagabuhaton “una,” sa dili pa moabot ang kataposan.

Pagtubag sa Ikaduha nga Dakong Isyu

11. Unsa pay ginahimo sa mga Saksi ni Jehova pinaagi sa pagpasakop sa pagmando sa Diyos?

¹¹ Pinaagi sa pagsunod sa mga balaod ug mga prinsipyo sa Diyos, ang mga Saksi ni Jehova may lain pang ginahimo. Ilang ginapakita nga si Satanas usa ka bakakon sa dihang siya miangkon nga ang mga tawo dili mahimong magmatinumanon sa Diyos ubos sa pagsulay, sa ingon nagatubag sa ikaduha nga dakong isyu, nga naglangkit sa integridad sa tawo. (Job 2:1-5) Kay usa ka kapunongan nga may minilyong mga tawo gikan sa tanang mga nasod, ang mga Saksi nagapasundayag, ingong usa ka lawas, sa pagkamaunongon ngadto sa pagmando sa Diyos. Bisan pag sila dili hingpit nga mga tawo, sila nagalaban sa kiliran sa Diyos sa isyu sa pagkasoberano sa uniberso, bisan pa sa satanasnong pagpit-os.

12. Pinaagi sa ilang pagtuo, kinsa ang ginasundog sa mga Saksi?

¹² Karong adlawa, kining milyonmilyong mga Saksi ni Jehova nagdugang sa ilang pamatuod sa iya sa hataas nga linya sa ubang mga saksi sa mga panahong nangagi nga nagpasundayag ug pagkamaunongon sa Diyos. Ang pipila kanila mao si Abel, Noe, Job, Abraham, Sara, Isaac, Jacob, Debora, Ruth, David, ug Daniel, sa paghisgot lang ug pipila. (Hebreohanon, kapitulo 11) Sila maoy, sumala sa ginaingon sa Bibliya, usa ka ‘dakong panganod sa matinumanong mga saksi.’ (Hebreohanon 12:1) Kini sila ug uban pa apil ang mga tinun-an ni Jesus nagpadayon sa paghupot sa integridad ngadto sa Diyos. Ug si Jesus mismo mitagana sa kinadak-ang panig-ingnan pinaagi sa paghupot ug hingpit nga integridad.

13. Unsang mga pulong ni Jesus mahitungod kang Satanas ang napamatud-ang tinuod?

¹³ Kini nagapamatuod nga ang giingon ni Jesus mahitungod kang Satanas ngadto sa relihiyosong mga pangulo maoy tinuod: “Apan karon kamo nagatinguha sa pagpatay kanako, usa ka tawo nga nagtug-an kaninyo sa kamatuoran nga akong nadungog gikan sa Diyos. . . . Kamo maoy gikan sa inyong amahan ang Yawa, ug buot ninyong buhaton ang mga tinguha sa inyong amahan. Siya usa ka mamumuno sa iyang pagsugod, ug siya wala magpabilin sa kamatuoran, tungod kay ang kamatuoran wala diha kaniya. Inigsulti niya ug bakak, siya nagasulti sumala sa iyang kaugalingong kinaiya, tungod kay siya usa ka bakakon ug amahan sa bakak.”​—Juan 8:40, 44.

Unsay Imong Pilion?

14. Unsay nagakahitabo sa patukoranan sa bag-ong kalibotan karon?

¹⁴ Ang patukoranan sa bag-ong kalibotan nga ginaporma na karon sa Diyos diha sa internasyonal nga kapunongan sa mga Saksi ni Jehova nagakalig-on ug nagakalig-on. Kada tuig ginatos ka libong katawhan nagagamit sa ilang kinaugalingong pagbuot, nga gipasukad sa tukmang kahibalo, sa pagdawat sa pagmando sa Diyos. Sila mahimong bahin sa bag-ong kalibotan nga kapunongan, nga nagalaban sa kiliran sa Diyos sa isyu sa pagkasoberano sa uniberso, ug nagapamatuod nga si Satanas bakakon.

15. Unsang buluhatong pagbulagbulag ang ginatuman ni Jesus sa atong adlaw?

¹⁵ Pinaagi sa pagpili sa pagmando sa Diyos, sila  kuwalipikado nga ibutang sa “tuong kamot” ni Kristo samtang siya nagabulagbulag sa “mga karnero” gikan sa “mga kanding.” Sa iyang tagna mahitungod sa kataposang mga adlaw, si Jesus mitagna: “Ang tanang mga kanasoran pagatigomon sa iyang atubangan, ug iyang pagabulagbulagon ang katawhan ang usa gikan sa usa, maingon sa usa ka magbalantay nga magabulag sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.” Ang mga karnero maoy mapaubsanong katawhan nga nakig-uban ug nagapaluyo sa mga igsoon ni Kristo, nga nagapasakop sa pagmando sa Diyos. Ang mga kanding maoy mga tawong gahig ulo nga nagasalikway sa mga igsoon ni Kristo ug walay ginabuhat aron sa pagpaluyo sa pagmando sa Diyos. Unsay sangpotanan? Si Jesus miingon: “Kini sila [mga kanding] moadto sa walay-kataposang pagputol, apan ang mga matarong [ang mga karnero] ngadto sa kinabuhing walay kataposan.”​—Mateo 25:31-46.

16. Unsay kinahanglan nga buhaton nimo kon buot nimong mopuyo sa Paraiso nga umaabot?

¹⁶ Tinuod, ang Diyos may pagtagad kanato! Sa duol na kaayo iyang itagana ang usa ka makapahimuot yutan-ong paraiso. Buot ba nimong mopuyo sa maong Paraiso? Kon mao, ipakita ang imong pagpabili sa mga tagna ni Jehova pinaagi sa pagkat-on mahitungod kaniya ug paglihok sumala sa imong nakat-onan. “Pangitaa si Jehova, kamong katawhan, samtang siya hikaplagan pa. Sangpita siya samtang siya anaa sa haduol. Pabiyaa ang tawong daotan sa iyang dalan, ug ang tawong madinaoton sa iyang mga hunahuna; ug pabalika siya kang Jehova, kinsa may kaluoy kaniya.”​—Isaias 55:6, 7.

17. Nganong walay panahon nga pagausikan sa pagpili kon kinsay pagaalagaron?

¹⁷ Walay panahon nga pagausikan. Ang kataposan niining daang sistema haduol na kaayo. Ang Pulong sa Diyos nagatambag: “Ayaw ninyo higugmaa ang kalibotan o ang mga butang sa kalibotan. Kon may nahigugma sa kalibotan, ang gugma sa Amahan wala diha kaniya . . . Dugang pa, ang kalibotan lumalabay ug mao usab ang pangibog niini, apan ang nagabuhat sa kabubut-on sa Diyos magapabilin sa walay kataposan.”​—1 Juan 2:15-17.

18. Unsang paglihok ang makapaarang nimo sa pagpanglantaw nga masaligon nga makapuyo sa kahibulongang bag-ong kalibotan sa Diyos?

¹⁸ Ang katawhan sa Diyos ginabansay na karon alang sa kinabuhing walay kataposan diha sa bag-ong kalibotan. Nagatuon sila sa espirituwal ug ubang mga kahanas nga gikinahanglan sa pag-ugmad sa usa ka paraiso. Nagaawhag kami kanimo sa pagpili sa Diyos ingong Magmamando ug paluyohan ang nagaluwas-kinabuhing buluhaton nga iyang ginapahimo sa tibuok yuta karong adlawa. Pagtuon sa Bibliya uban sa mga Saksi ni Jehova, ug ilha ang Diyos nga tinuod may pagtagad kanimo ug magatapos sa pag-antos. Niining paagiha ikaw usab mahimong bahin sa patukoranan sa bag-ong kalibotan. Unya ikaw masaligon nga makapanglantaw sa pagbaton sa pag-uyon sa Diyos ug mabuhing walay kataposan nianang kahibulongang bag-ong kalibotan.

[Mga Pangutana sa Pagtuon]

[Hulagway sa panid 31]

Ang mga Saksi ni Jehova adunay tinuod internasyonal nga pag-igsoonay

 [Hulagway sa panid 32]

Ang patukoranan sa bag-ong kalibotan sa Diyos ginaporma na karon