Ang Talagsaong Gasa sa Kinaugalingong Pagbuot
Bahin 5
Ang Talagsaong Gasa sa Kinaugalingong Pagbuot
1, 2. Unsang talagsaong gasa ang bahin sa atong pagkamao?
ARON hisabtan nganong gitugotan sa Diyos ang pag-antos ug kon unsay iyang pagabuhaton niini, kinahanglang maapresyar nato kon giunsa niya kita pagbuhat. Labaw pa ang iyang gihimo sa paglalang kanato nga basta may lawas ug utok. Kita usab iyang gilalang nga may linaing mental ug emosyonal nga mga katakos.
2 Usa ka paninugdang bahin sa atong mental ug emosyonal nga katakos mao ang free will o kinaugalingong pagbuot. Oo, ang Diyos nagtanom diha kanato sa katakos nga mao ang kagawasan sa pagpili. Kini sa pagkatinuod talagsaong gasa gikan niya.
Kon Giunsa Kita Pagbuhat
3-5. Nganong giapresyar nato ang kinaugalingong pagbuot?
3 Atong tagdon kon sa unsang paagi nalangkit ang kinaugalingong pagbuot diha sa pagtugot sa Diyos sa pag-antos. Sa pagsugod, hunahunaa kini: Giapresyar mo ba ang pagbaton ug kagawasan sa pagpili kon unsay imong buhaton ug isulti, kon unsay imong kan-on ug isul-ob, kon unsang matanga sa trabaho ang imong pagabuhaton, ug kon diin ug sa unsang paagi ikaw magpuyo? O buot ba nimong may magdiktar sa imong matag pulong ug lihok sa matag gutlo sa imong kinabuhi?
4 Walay normal nga tawo ang gustong mawad-an sa paggahom sa iyang kinabuhi sa bug-os gayod. Nganong wala man? Tungod sa paagi sa pagbuhat kanato sa Diyos. Ang Bibliya nagasugid kanato nga gilalang sa Diyos ang tawo diha sa iyang ‘dagway ug kasamahan,’ ug usa sa mga katakos nga nabatonan mismo sa Diyos mao ang kagawasan sa pagpili. (Genesis 1:26; Deuteronomio 7:6) Sa gilalang niya ang mga tawo, iyang gihatagan sila niana mismong talagsaong katakos—ang gasa sa kinaugalingong pagbuot. Kana ang usa ka hinungdan nganong mobati kitag kapakyasan nga maulipon sa madaogdaogong mga magmamando.
5 Busa ang tinguha sa kagawasan dili aksidente, kay ang Diyos maoy Diyos sa kagawasan. Ang Bibliya nagaingon: “Kon hain ang espiritu ni Jehova, anaa ang kagawasan.” (2 Corinto 3:17) Busa, ang Diyos naghatag kanato sa kinaugalingong pagbuot ingong bahin sa atong pagkamao mismo. Sanglit siya nahibalo sa paagi sa pag-obra sa atong mga hunahuna ug mga emosyon, siya nasayod nga kita labing malipayon kon makabuot sa kaugalingon.
6. Giunsa paglalang sa Diyos ang atong utok aron moobra nga nahiuyon sa kinaugalingong pagbuot?
6 Duyog sa gasa sa kinaugalingong pagbuot, gihatagan kita sa Diyos ug katakos sa paghunahuna, pagtulotimbang sa mga butang, paghimog mga desisyon, ug pagkahibalo sa matarong gikan sa daotan. (Hebreohanon 5:14) Busa, ang kinaugalingong pagbuot kinahanglang ipasukad sa intelihenteng pagpili. Wala kita buhata nga samag way-buot nga mga robot nga walay kinaugalingong pagbuot. Ni kita gilalang aron molihok sumala sa kinaiyanhong sugyot o instinto samag mga hayop. Hinunoa, ang atong kahibulongang utok gidesinyo aron moobra nga nahiuyon sa atong kagawasan sa pagpili.
Ang Kinamaayohang Pagsugod
7, 8. Unsang maayong pagsugod ang gihatag sa Diyos sa atong unang mga ginikanan?
7 Sa pagpakita kon unsa ka matinagdanon ang Diyos, uban sa gasa sa kinaugalingong pagbuot, ang atong unang mga ginikanan, si Adan ug si Eva, gihatagan sa tanang butang nga makataronganong gikinahanglan ni bisan kinsa. Gibutang sila sa usa ka dako, samag-parkeng paraiso. Sila dagaya sa materyal. Sila may hingpit nga mga hunahuna ug mga lawas, mao nga sila dili matigulang o magsakit o mamatay—sila mabuhi unta sa walay kataposan. Sila makabaton untag hingpit nga mga anak nga makabaton usab untag malipayon, walay-kataposang kaugmaon. Ug ang nagkadaghang populasyon makabaton unta ug makapatagbawng buluhaton nga mao ang paghimo ngadtongadto sa tibuok yuta nga paraiso.—Genesis 1:26-30; 2:15.
8 Mahitungod sa kon unsay gitagana, ang Bibliya nagasugid: “Nakita sa Diyos ang tanang butang iyang gibuhat ug, tan-awa! kini maayo kaayo.” (Genesis 1:31) Ang Bibliya nagaingon usab mahitungod sa Diyos: “Hingpit ang iyang mga buhat.” (Deuteronomio 32:4) Oo, ang Maglalalang naghatag sa tawhanong pamilya ug hingpit nga pagsugod. Wala nay makalabaw niadto. Pagkamatinagdanon gayod sa Diyos!
Kagawasan nga May mga Kinutbanan
9, 10. Nganong ang kinaugalingong pagbuot kinahanglang mapaigoigo sa tukma?
9 Bisan pa niana, gituyo ba sa Diyos nga ang kinaugalingong pagbuot mawalay kinutbanan? Handurawa ang usa ka puliki nga siyudad nga walay mga balaod sa trapiko, diin ang tanan makamaneho sa bisan unsang direksiyon sa bisan unsang katulinon. Buot ba nimong momaneho ubos nianang mga kahimtanga? Dili, kana maoy anarkiya sa trapiko ug seguradong mosangpot sa daghang aksidente.
10 Mao usab ang gasa sa Diyos sa kinaugalingong pagbuot. Ang walay-kinutbanang kagawasan magpasabot sa anarkiya sa katilingban. Kinahanglang may mga balaod sa pagtultol sa kalihokan sa tawo. Ang Pulong sa Diyos nagaingon: “Paggawi kamo nga sama sa mga tawong may kagawasan, ug ayaw gayod ninyo gamita ang inyong kagawasan ingong pasumangil sa pagkadaotan.” (1 Pedro 2:16, JB) Buot sa Diyos nga ang kinaugalingong pagbuot mapaigoigo alang sa kaayohan sa tanan. Iyang katuyoan nga kita dili magbaton sa bug-os nga kagawasan apan sa relatibong kagawasan, nga nailalom sa lagda sa balaod.
Kansang mga Balaod?
11. Kita nalaraw sa pagsunod sa kang kansang mga balaod?
11 Kita nalaraw sa pagsunod sa kang kansang mga balaod? Ang laing bahin sa teksto sa 1 Pedro 2:16 ( JB) nagaingon: “Kamo dili mga ulipon ni bisan kinsa gawas sa Diyos.” Kini wala magkahulogan sa madaogdaogon nga pagkaulipon, kondili, hinunoa, kini nagkahulogan nga kita nalaraw nga mahimong labing malipayon kon magpasakop sa mga balaod sa Diyos. (Mateo 22:35-40) Ang iyang mga balaod, labaw kay sa mga balaod nga namugna sa mga tawo, nagtagana sa labing maayong giya. “Ako, si Jehova, mao ang imong Diyos, ang Usa nga nagatudlo kanimo sa pagpahimulos sa imong kaugalingon, ang Usa nga nagapalakat kanimo sa dalan nga angay nimong pagalaktan.”—Isaias 48:17.
12. Unsang kagawasan sa pagpili ang atong nabatonan sulod sa mga balaod sa Diyos?
12 Sa samang panahon, ang mga balaod sa Diyos nagatugot ug dakong kagawasan sa pagpili sulod sa mga kinutbanan niini. Kini mosangpot sa pagkadaiya ug mohimo sa tawhanong pamilya nga madanihon. Palandonga ang lainlaing mga matang sa pagkaon, sinina, musika, arte, ug kabalayan sa tibuok kalibotan. Seguradong palabihon nato nga kita ang mopili nianang mga butanga inay kay laing tawo ang mohukom alang kanato.
13. Unsang pisikal nga mga balaod ang kinahanglang atong sundon alang sa atong kaugalingong kaayohan?
13 Busa kita nalalang nga mahimong labing malipayon sa dihang magpasakop sa mga balaod sa Diyos alang sa tawhanong kagawian. Susama kini sa pagkanailalom sa pisikal nga mga balaod sa Diyos. Pananglitan, kon dili nato tagdon ang balaod sa grabidad ug molukso gikan sa usa ka habog nga dapit, kita masamdan o mamatay. Kon dili nato tagdon ang mga balaod sa kahiladman sa atong lawas ug mohunong sa pagkaon, pag-inom ug tubig, o pagginhawa, kita mamatay.
14. Giunsa nato pagkahibalo nga ang mga tawo wala lalanga aron maindependente sa Diyos?
14 Sama ka segurado nga kita nalalang nga may panginahanglan sa pagpasakop sa pisikal nga mga balaod sa Diyos, kita nalalang nga may panginahanglan sa pagpailalom sa moral ug sosyal nga mga balaod sa Diyos. (Mateo 4:4) Ang mga tawo wala lalanga aron maindependente sa ilang Magbubuhat ug magmalamposon. Ang propetang Jeremias nagaingon: “Dili iya sa tawo nga nagalakaw bisan ang pagtultol sa iyang lakang. Tul-ira ako, Oh Jehova.” (Jeremias 10:23, 24) Busa sa tanang paagi ang mga tawo nalalang aron magkinabuhi ubos sa pagmando sa Diyos, dili sa ilang kaugalingon.
15. Ang mga balaod sa Diyos ba mabug-at alang kang Adan ug Eva?
15 Ang pagsunod sa mga balaod sa Diyos dili unta mabug-at alang sa atong unang mga ginikanan. Hinunoa, kadto unta magpausbaw sa ilang kaayohan ug sa iya sa tibuok tawhanong pamilya. Kon ang unang magtiayon nagpabilin pa unta sulod sa mga kinutbanan sa mga balaod sa Diyos, ang tanan magmaayo ra unta. Sa pagkamatuod, kita karon nagapuyo unta sa usa ka kahibulongang paraiso sa kalipay ingong mahigugmaon, nahiusang tawhanong pamilya! Wala untay pagkadaotan, pag-antos, ug kamatayon.
[Mga Pangutana sa Pagtuon]
[Hulagway sa panid 11]
Ang Maglalalang mihatag sa mga tawo ug hingpit nga pagsugod
[Hulagway sa panid 12]
Buot ba nimong momaneho diha sa daghang sakyanan kon walay mga balaod sa trapiko?
