Bahin 8

Katuyoan sa Diyos Nagapadulong sa Katumanan

1, 2. Sa unsang paagi ang Diyos naghimog tagana sa pagwagtang sa pag-antos?

 ANG pagmando sa maalsahong mga lalaki ug mga demonyo nagyudyod sa tawhanong pamilya paubos sa daghang kasiglohan. Bisan pa, ang Diyos dili kay walay pagtagad sa atong mga pag-antos. Hinunoa, sulod sa tanang kasiglohan, siya naghimog tagana sa pagpagawas sa mga tawo gikan sa pagpig-it sa pagkadaotan ug pag-antos.

² Panahon sa pag-alsa sa Eden, ang Diyos misugod sa pagpadayag sa iyang katuyoan nga pormahon ang usa ka kagamhanan nga maghimo ning yutaa nga paraisong puloy-anan sa katawhan. (Genesis 3:15) Sa ulahi, ingong pangunang tigpamaba sa Diyos, si Jesus naghimo nianang umaabot nga kagamhanan sa Diyos nga tema sa iyang pagpanudlo. Siya miingon nga kini mao ang bugtong paglaom sa katawhan.—Daniel 2:44; Mateo 6:9, 10; 12:21.

3. Unsay gitawag ni Jesus sa umaabot nga kagamhanan sa yuta, ug ngano?

³ Gitawag ni Jesus kanang umaabot nga kagamhanan sa Diyos “ang gingharian sa mga langit,” sanglit kana magmando gikan sa langit. (Mateo 4:17) Gitawag usab niya kana “ang gingharian sa Diyos,” sanglit ang Diyos mao ang Awtor niini. (Lucas 17:20) Latas sa kasiglohan gidasig sa Diyos ang iyang mga magsusulat sa pagsulat ug mga tagna mahitungod niadtong maglangkob sa maong kagamhanan ug kon unsay pagabuhaton niini.

Bag-ong Hari sa Yuta

4, 5. Giunsa pagpakita sa Diyos nga si Jesus mao ang iyang inuyonan nga Hari?

⁴ Mao si Jesus, duolag duha ka libo ka tuig kanhi, ang nagtuman sa daghang tagna mahitungod sa usa nga mahimong Hari sa Gingharian sa Diyos. Siya naila nga mao ang napili sa Diyos nga mahimong Magmamando nianang langitnong kagamhanan ibabaw sa katawhan. Ug tapos sa iyang kamatayon, ang Diyos nagbanhaw kang Jesus ngadto sa kinabuhi sa langit ingong gamhanan, dili-mamatay espiritung linalang. Daghan ang saksi sa iyang pagkabanhaw.​—Buhat 4:10; 9:1-9; Roma 1:1-4; 1 Corinto 15:3-8.

⁵ Unya si Jesus “milingkod sa tuong kamot sa Diyos.” (Hebreohanon 10:12) Didto siya nagpaabot sa panahon nga hatagan siyag gahom sa Diyos aron molihok ingong Hari sa langitnong Gingharian sa Diyos. Kadto nagtuman sa tagna sa Salmo 110:1, diin ang Diyos nagsulti kaniya: “Lumingkod ka sa akong tuong kamot hangtod nga ibutang ko ang imong mga kaaway nga tumbanan sa imong mga tiil.”

6. Giunsa pagpadayag ni Jesus nga siya may katakos nga mahimong Hari sa Gingharian sa Diyos?

⁶ Samtang dinhi sa yuta, gipakita ni Jesus nga siya may katakos alang sa maong katungdanan. Bisan pa sa paglutos, gipalabi niya ang paghupot sa iyang integridad ngadto sa Diyos. Sa pagbuhat niana, iyang gipakita nga si Satanas namakak sa dihang siya nangangkon nga walay tawo ang magmatinumanon sa Diyos ubos sa pagsulay. Si Jesus, usa ka tawong hingpit, ang ‘ikaduhang Adan,’ nagpakita nga ang Diyos wala masayop sa paglalang ug hingpit nga mga tawo.​—1 Corinto 15:22, 45; Mateo 4:1-11.

7, 8. Unsang maayong mga butang ang gihimo ni Jesus samtang dinhi sa yuta, ug unsay iyang gipasundayag?

⁷ Kinsang magmamandoa ang nakapalampos ug dakong kaayohan sama sa gibuhat ni Jesus sa pila ka tuig sa iyang ministeryo? Kay gihatagan ug gahom sa balaang espiritu sa Diyos, si Jesus nag-ayo sa masakiton, bakol, buta, bungol, amang. Gibanhaw pa gani niya ang patay! Gipasundayag niya sa gamayng paagi kon unsay iyang buhaton alang sa katawhan sa tibuok-yutang gidak-on sa dihang siya makabaton ug gahom sa Gingharian.​—Mateo 15:30, 31; Lucas 7:11-16.

⁸ Daghan kaayong kaayohan ang gibuhat ni Jesus sa yuta nga ang iyang tinun-an nga si Juan miingon:  “Sa pagkamatuod, adunay daghan pang ubang butang nga gibuhat usab ni Jesus, nga, kon ugaling sila nahisulat nga detalyado kaayo, sa akong pagtuo, ang kalibotan mismo dili paigo sa nasulat nga mga linukot nga basahon.”​—Juan 21:25. a

9. Nganong ang mga tawong mabuot ug kasingkasing minghugop kang Jesus?

⁹ Si Jesus maluluton ug maluluy-on, nga may dakong gugma alang sa katawhan. Gitabangan niya ang kabos ug timawa, apan wala siya magpihig niadtong bahandianon o dagkog katungdanan. Ang mga tawong mabuot ug kasingkasing misanong sa mahigugmaong pagdapit ni Jesus sa miingon siya: “Umari kamo, kamong tanan nga nabudlayan ug nabug-atan, ug ako kamong papahulayon. Isangon ang akong yugo diha kaninyo ug makakat-on gikan kanako, kay ako malumo ug mapaubsanon sa kasingkasing, ug kamo makakaplag ug pahulay sa inyong mga kalag. Kay ang akong yugo maayo ug ang akong lulan magaan.” (Mateo 11:28-30) Ang mga tawong may kahadlok sa Diyos minghugop kaniya ug nagpaabot sa iyang pagmando.​—Juan 12:19.

Kaubang mga Magmamando

10, 11. Kinsay moambit kang Jesus sa pagmando ibabaw sa yuta?

¹⁰ Maingon nga ang tawhanong mga kagamhanan adunay kaubang mga administrador, mao usab ang langitnong Gingharian sa Diyos. Gawas pa kang Jesus ang uban moambit sa pagmando sa yuta, kay si Jesus misaad sa iyang suod nga mga kauban nga sila magmando uban niya ingong mga hari ibabaw sa katawhan.​—Juan 14:2, 3; Pinadayag 5:10; 20:6.

¹¹ Busa, kauban ni Jesus, ang limitadong gidaghanon sa mga tawo pagabanhawon usab alang sa langitnong kinabuhi. Sila naglangkob sa Gingharian sa Diyos nga magdalag walay-kataposang mga panalangin sa katawhan. (2 Corinto 4:14; Pinadayag 14:1-3) Busa latas sa kapanahonan, gipahiluna ni Jehova ang patukoranan alang sa usa ka pagmando nga magdalag walay-kataposang mga panalangin alang sa tawhanong pamilya.

Matapos ang Independenteng Pagmando

12, 13. Ang Gingharian sa Diyos andam na karon sa pagbuhat ug unsa?

¹² Ning sigloha ang Diyos laktud nalambigit sa kahikayan sa yuta. Ingon nga pagahisgotan sa Bahin 9 niini nga brosyur, gipakita sa tagna sa Bibliya nga ang Gingharian sa Diyos ubos kang Kristo natukod niadtong 1914 ug karon andam na sa pagdugmok sa tibuok nga sistema ni Satanas. Ang maong Gingharian andam na nga “magapanaog taliwala sa mga kaaway [ni Kristo].”​—Salmo 110:2.

¹³ Mahitungod niini ang tagna sa Daniel 2:44 nagaingon: “Sa mga adlaw nianang mga haria [nga nagalungtad karon] ang Diyos sa langit magatukod ug usa ka gingharian [sa langit] nga dili gayod malaglag, ni ang gahom niini igahatag sa laing katawhan [tawhanong pagmando dili na gayod tugotan]. Kini [Gingharian sa Diyos] magadugmok niining tanan  nga gingharian ug magalaglag kanila, ug kini mobarog sa walay kataposan.”​—Revised Standard Version.

14. Unsay pila ka kaayohan ang moabot ingong sangpotanan sa pagkatapos sa tawhanong pagmando?

¹⁴ Tungod kay ang tanang pagmando nga independente sa Diyos mahanaw na, ang pagmando sa Gingharian sa Diyos ibabaw sa yuta mahimong bug-os. Ug tungod kay ang Gingharian nagamando gikan sa langit, dili gayod kini madaot sa mga tawo. Ang gahom sa pagmando maanaa sa dapit diin didto kini sukad sa sinugdan, sa langit, uban sa Diyos. Ug sanglit ang pagmando sa Diyos magagahom sa tibuok nga yuta, wala nay si bisan kinsa nga mapahisalaag sa bakak nga mga relihiyon o sa dili-makapatagbawng tawhanong mga pilosopiya ug politikanhong mga teoriya. Walay mausa nianang mga butanga ang tugotan sa paglungtad.​—Mateo 7:15-23; Pinadayag, mga kapitulo 17 hangtod 19.

[Mga footnote]

[Mga Pangutana sa Pagtuon]

[Hulagway sa panid 18]

Samtang dinhi sa yuta si Jesus nag-ayo sa masakiton ug nagbanhaw sa patay sa pagpakita kon unsay iyang buhaton sa bag-ong kalibotan

[Hulagway sa panid 19]

Ang langitnong Gingharian sa Diyos magalaglag sa tanang matang sa pagmando nga independente kaniya