Bahin 6

Kon Nganong Gitugotan sa Diyos ang Pag-antos

1, 2. Giunsa pagdaot sa atong unang mga ginikanan ang maayong pagsugod nga gihatag sa Diyos kanila?

 UNSAY nasayop? Unsa ang nahitabo nga nagdaot sa maayong pagsugod nga gihatag sa Diyos sa atong unang mga ginikanan sa Paraiso sa Eden? Ngano, imbes sa kalinaw ug panaghiusa sa Paraiso, ang pagkadaotan ug pag-antos maoy naglungtad sulod sa libolibong katuigan?

² Ang hinungdan mao ang sayop nga paggamit ni Adan ug Eva sa ilang kinaugalingong pagbuot. Napakyas sila sa pagtagad sa kamatuoran nga wala sila lalanga nga molambo nga nahibulag sa Diyos ug sa iyang mga balaod. Sila mihukom nga mag-independente  sa Diyos, kay naghunahuna nga kana makapaarang-arang sa ilang mga kinabuhi. Mao nga sila milapas sa gitudlo-sa-Diyos nga mga kinutbanan sa kinaugalingong pagbuot.​—Genesis, kapitulo 3.

Ang Isyu sa Pagkasoberano sa Uniberso

3-5. Nganong ang Diyos wala dayon maglaglag kang Adan ug Eva ug magsugod na usab?

³ Nganong ang Diyos wala lang maglaglag kang Adan ug Eva ug magsugod na usab pinaagig laing tawhanong magtiayon? Kay ang iyang pagkasoberano sa uniberso, nga mao, iyang dili-mabalhin nga katungod sa pagmando, gihagit.

⁴ Ang pangutana mao: Kinsa ang may katungod sa pagmando, ug kang kansang pagmando ang matarong? Ang iyang pagkamakagagahom sa tanan ug pagka-Maglalalang sa tanang linalang nagahatag sa Diyos ug katungod sa pagmando ibabaw nila. Sanglit siya maalamon-sa-tanan, ang iyang pagmando maoy labing maayo alang sa tanang linalang. Apan karon ang pagmando sa Diyos gihagit. Gawas pa, may deperensiya ba ang iyang gilalang​—ang tawo? Atong susihon sa ulahi sa unsang paagi nalambigit ang isyu sa integridad sa tawo.

⁵ Pinaagi sa pagkahimong independente sa tawo gikan sa Diyos, ang laing pangutana gipasabot: Mas maayo ba ang mahimo sa mga tawo kon dili mandoan sa Diyos? Ang Maglalalang sa tino nahibalo sa tubag, apan ang seguradong paagi nga hisayran sa mga tawo mao ang pagtugot kanila ug bug-os nga kagawasan nga gitinguha nila. Gipalabi nila kanang dalan sa ilang kaugalingong pagbuot, busa gitugotan kana sa Diyos.

6, 7. Nganong gitugotan sa Diyos ang mga tawo ug bug-os nga kagawasan sa taas kaayong panahon?

⁶ Pinaagi sa pagtugot sa mga tawo ug igong panahon sa pag-eksperimento sa bug-os nga kagawasan, mahusay sa Diyos sa tanang panahon kon kaha ang mga tawo mas maayo ubos sa pagmando sa Diyos o nga magkinaugalingon. Ug ang panahong gitugot kinahanglang may igong gidugayon aron tugotan ang mga tawo nga mahidangat sa giisip nila nga kinapungkayan sa ilang politikanhon, industriyal, siyentipikanhon, ug medikal nga mga kahimoan.

⁷ Busa, gitugotan sa Diyos ang tawo ug bug-os nga kahigayonan hangtod sa atong adlaw sa pagpakita sa walay duhaduha kon kaha ang tawhanong pagmando nga independente kaniya mahimong molampos. Sa ingon ang tawo nakaarang sa pagpili tali sa kalulot ug kapintasan, tali sa gugma ug pagdumot, tali sa pagkamatarong ug pagkadili-matarong. Apan siya giatubang usab sa sangpotanan sa iyang pagpili: pagkamaayo ug kalinaw o pagkadaotan ug pag-antos.

Pag-alsa sa Espiritung mga Linalang

8, 9. (a) Sa unsang paagi ang pag-alsa misugod sa kalibotan sa espiritu? (b) Kinsa gawas kang Adan ug Eva ang gibuyo ni Satanas sa pag-alsa?

⁸ Adunay laing butang pagatagdon. Ang atong unang mga ginikanan dili mao lamang ang ming-alsa batok sa pagmando sa Diyos. Apan kinsa pay naglungtad niadtong panahona? Espiritung mga linalang. Sa wala pa lalanga sa Diyos ang mga tawo, siya naglalang ug taastaas nga matang sa kinabuhi, nga daghan kaayong mga manulonda, aron sa pagpuyo sa langitnong dominyo. Sila usab nalalang nga may kinaugalingong pagbuot ug usab sa panginahanglan nga magpasakop sa pagmando sa Diyos.​—Job 38:7; Salmo 104:4; Pinadayag 5:11.

⁹ Ang Bibliya nagapakita nga ang pag-alsa unang nahitabo sa dominyo sa espiritu. Usa ka espiritung linalang ang gustog bug-os nga kagawasan. Buot pa gani niya nga ang mga tawo mosimba kaniya. (Mateo  4:8, 9) Ang maong espiritung mag-aalsa nahimong galamiton sa pagbuyo kang Adan ug Eva sa pag-alsa, nga bakakong nangangkon nga ang Diyos may gihikaw nga butang maayo gikan kanila. (Genesis 3:1-5) Busa siya gitawag Yawa (Tigbutangbutang) ug Satanas (Magsusupak). Sa ulahi, iyang gibuyo ang ubang espiritung mga linalang sa pag-alsa. Sila nailhan nga mga demonyo.​—Deuteronomio 32:17; Pinadayag 12:9; 16:14.

10. Unsay misangpot sa pag-alsa sa mga tawo ug sa espiritung mga linalang?

¹⁰ Ang mga tawo, pinaagi sa pag-alsa batok sa Diyos, nagbukas sa ilang kaugalingon alang sa impluwensiya ni Satanas ug sa iyang mga demonyo. Kana ang hinungdang ang Bibliya nagatawag kang Satanas “ang diyos niining sistema sa mga butang,” nga “nagbuta sa mga hunahuna sa mga dili-matinuohon.” Busa, ang Pulong sa Diyos nagaingon nga “ang tibuok nga kalibotan nahiluna sa gahom sa usang daotan.” Si Jesus mismo nagtawag kang Satanas “ang magmamando niining kalibotana.”​—2 Corinto 4:4; 1 Juan 5:19; Juan 12:31.

Duha ka Isyu

11. Mahitungod sa unsang laing isyu nga si Satanas naghagit sa Diyos?

¹¹ Gipatungha ni Satanas ang laing isyu nga naghagit sa Diyos. Sa pagkamatuod, siya miakusar nga ang Diyos nasayop sa paagi sa paglalang Niya sa mga tawo ug walay mausa ang buot mobuhat sa hustong butang ubos sa pagpit-os. Sa pagkatinuod, siya miangkon nga ubos sa pagsulay sila magtunglo pa sa Diyos. (Job 2:1-5) Sa maong paagi giduhaduhaan ni Satanas ang integridad sa tawhanong kalalangan.

12-14. Sa unsang paagi ipadayag sa paglabay sa panahon ang kamatuoran mahitungod sa duha ka isyu nga gipatungha ni Satanas?

¹² Busa, ang Diyos nagtugot ug igong panahon aron ang tanang intelihenteng mga linalang makakita sa unsang paagi mahusay kining isyuha ingon man ang isyu sa pagkasoberano sa Diyos. (Itandi ang Exodo 9:16.) Ang mga panghitabo sa tawhanong kasaysayan magbutyag sa kamatuoran mahitungod niining duha ka isyu.

¹³ Una sa tanan, unsay ipadayag sa paglabay sa panahon mahitungod sa isyu sa pagkasoberano sa uniberso, ang pagkamatarong sa pagmando sa Diyos? Ang mga tawo kaha makamando sa ilang kaugalingon nga labaw pa kay sa Diyos? Ang bisan unsang sistema kaha sa tawhanong pagmando nga nahibulag sa Diyos magpasulod ug malipayong kalibotan nga walay gubat, krimen, ug inhustisya? May usa ka pagmando kaha nga magwagtang sa kakabos ug magtaganag kauswagan alang sa tanan? May usa ka pagmando kaha nga magpukgo sa sakit, pagkatigulang, ug kamatayon? Ang pagmando sa Diyos gilaraw sa pagbuhat nianang tanan.​—Genesis 1:26-31.

¹⁴ Mahitungod sa ikaduhang isyu, unsay ipadayag sa paglabay sa panahon kon mahitungod sa bili sa tawhanong linalang? Nasayop ba ang Diyos sa paglalang sa mga tawo sumala sa paagi sa iyang paglalang kanila? May bisan usa ba kanila ang mobuhat sa matarong nga butang ubos sa pagsulay? May usa ba ka katawhan nga magpadayag nga buot nila ang pagmando sa Diyos inay ang independenteng pagmando sa tawo?

[Mga Pangutana sa Pagtuon]

[Hulagway sa panid 13]

Ang Diyos nagtugot ug panahon aron ang mga tawo mahidangat sa kinapungkayan sa ilang mga kahimoan

[Credit Line]

Shuttle: Gibase sa letrato sa NASA