Bahin 7

Unsa ang Sangpotanan sa Pag-alsa?

1-3. Sa unsang paagi si Jehova napamatud-ang matarong sa paglabay sa panahon?

 MAHITUNGOD sa isyu sa katungod sa Diyos sa pagmando, unsa ang sangpotanan sa tanang kasiglohan sa tawhanong pagmando nga independente sa Diyos? Ang mga tawo ba nakapamatuod nga mas maayong mga magmamando kay sa Diyos? Kon mohukom kita pinasukad sa kapintasan sa tawo nganha sa tawo, tino nga wala.

² Sa diha nga ang atong unang mga ginikanan nagsalikway sa pagmando sa Diyos, ang katalagman misunod. Sila nagpatunghag pag-antos alang sa ilang kaugalingon ug sa tibuok tawhanong pamilya nga nagagikan kanila. Ug sila mismo ang mabasol. Ang Pulong sa Diyos nagaingon: “Sila nagdaot sa ilang kaugalingon; sila dili iyang mga anak, ang kadaot maoy ilang kaugalingon.”​—Deuteronomio 32:5.

³ Gipakita sa kasaysayan ang pagkahusto sa pasidaan sa Diyos kang Adan ug Eva nga kon sila dili na magpailalom sa mga tagana sa Diyos, sila sa inanay madaot ug sa kataposan mamatay. (Genesis 2:17; 3:19) Sila migawas sa pagmando sa Diyos, ug sa nahaigong panahon sila nagkadaot ug namatay.

4. Nganong kitang tanan natawong dili hingpit, nga lagmit magsakit ug mamatay?

⁴ Kon unsay nahitabo sa tanan nilang kaliwat pagkahuman niadto maoy sumala sa gisaysay sa  Roma 5:12: “Pinaagi sa usa ka tawo [si Adan, ang ulo sa pamilya sa katawhan] ang sala misulod sa kalibotan ug ang kamatayon pinaagi sa sala, ug sa ingon ang kamatayon mikuyanap sa tanang tawo.” Busa sa dihang ang atong unang mga ginikanan mialsa batok sa pagkamagtatan-aw sa Diyos, sila nahimong daot nga mga makasasala. Nahiuyon sa mga balaod sa henetika, ang misangpot nga pagkadili-hingpit mao lang ang ilang ikapasa ngadto sa ilang mga kaliwat. Kana ang hinungdang kitang tanan natawong daot, nga lagmit magsakit ug mamatay.

5, 6. Unsay gipakita sa kasaysayan mahitungod sa paningkamot sa tawo sa pagpatunghag tinuod nga kalinaw ug kauswagan?

⁵ Milabay ang daghang kasiglohan. Ang mga imperyo nangabot ug nangahanaw. Gisulayan ang tanang mahunahunaan nga kagamhanan. Bisan pa, sa balikbalik, ang daotang mga butang nahitabo sa tawhanong pamilya. Human sa unom ka libo ka mga katuigan, ang usa makahunahuna nga unta ang mga tawo ming-uswag na sa punto nga ang kalinaw, hustisya, ug kauswagan naangkon sa tibuok yuta ug sa pagkakaron batid na unta sila sa positibong mga prinsipyo sa kalulot, kaluoy, ug kooperasyon.

⁶ Ugaling lang, kaatbang ang nahitabo. Walay matang sa tawhanong kagamhanan nga sukad namugna ang nakapatunghag tinuod nga kalinaw ug kauswagan alang sa tanan. Niining ika-20ng siglo lamang, atong nakita ang sistematikong pagpatayg milyonmilyon panahon sa Holocaust ug ang pagpatay sa kapig 100 ka milyon diha sa mga gubat. Sa atong panahon ang dimaihap nga mga tawo gipanagsakit, gipatay, ug gibilanggo tungod sa pagkapanatiko ug sa politikanhong mga panagbingkil.

Ang Kahimtang Karong Adlawa

7. Sa unsang paagi mabatbat ang kahimtang sa tawhanong pamilya karong adlawa?

⁷ Dugang pa, tagda ang katibuk-ang kahimtang sa tawhanong pamilya karong adlawa. Ang krimen ug kapintasan kaylap. Epidemya ang pag-abusar ug droga. Lukop ang mga sakit nga gipasa sa pakigsekso. Ang minilyong katawhan nataptan sa gikalisangang sakit nga AIDS. Tinagpulo ka milyong tawo mamatay sa kagutmanan o sakit kada tuig, samtang ang pipila may dagkong katigayonan. Ang mga tawo nagahugaw ug nagadaot sa yuta. Ang pamilyahanong kinabuhi ug moral nga mga sukdanan nahugno sa bisan diin. Sa pagkatinuod, ang kinabuhi karong adlawa nagsumbalik-silaw sa ngil-ad nga pagmando sa ‘diyos niining kalibotana,’ si Satanas. Ang kalibotan nga iyang gimandoan maoy dili-mabination, walay-kaluoy, ug bug-os nga dunot.​—2 Corinto 4:4.

8. Nganong kita dili makatawag sa mga kahimoan sa tawo nga tinuod nga kauswagan?

⁸ Ang Diyos nagtugot ug igong panahon aron ang mga tawo mahidangat sa kinapungkayan sa ilang siyentipikanhon ug materyal nga kauswagan. Apan tinuod ba nga kauswagan sa dihang ang pana ug udyong gipulihan ug mga masinggan, mga tangke, mga jet nga ayroplanong pangbomba, ug nukleyar missiles? Kauswagan ba sa dihang ang mga tawo makabiyahe ngadto sa kawanangan apan dili magkahiusa sa pagpuyo nga malinawon sa yuta? Kauswagan ba sa dihang ang mga tawo mahadlok nga molakaw sa kadalanan sa magabii, o bisan sa maadlaw diha sa pila ka dapit?

 Kon Unsay Gipadayag sa Paglabay sa Panahon

9, 10. (a) Unsay tin-awng gipakita sa milabay nga kasiglohan? (b) Nganong dili kuhaon sa Diyos ang kinaugalingong pagbuot?

⁹ Ang gipadayag sa pagsulay sa kasiglohan mao nga imposible alang sa mga tawo ang pagtultol nga malamposon sa ilang kaugalingong mga lakang nga nahimulag sa pagmando sa Diyos. Imposible ang pagbuhat niana sama ra sa pagkabuhi nga dili mokaon, moinom, ug moginhawa. Tin-aw ang ebidensiya: Kita gilaraw aron magdepende sa pagtultol sa atong Maglalalang sama ra ka tino nga kita nalalang aron magdepende sa pagkaon, tubig, ug hangin.

¹⁰ Pinaagi sa pagtugot sa pagkadaotan, ang Diyos nagpasundayag sa makausa ug sa tanang panahon sa makapasubong sangpotanan sa sayop nga paggamit sa kinaugalingong pagbuot. Ug ang kinaugalingong pagbuot bililhon kaayo nga gasa nga inay kuhaon gikan sa mga tawo, gitugotan sila sa Diyos sa pagtan-aw kon unsay kahulogan sa sayop nga paggamit niana. Ang Pulong sa Diyos nagasulti sa tinuod sa nagaingon kini: “Dili iya sa tawo bisan ang pagtultol sa iyang lakang.” Matinud-anon usab kini sa nagaingon kini: “Ang tawo nagmando sa tawo sa iyang kadaotan.”​—Jeremias 10:23; Ecclesiastes 8:9.

11. May bisan unsang matang ba sa tawhanong pagmando nga nakapapas sa pag-antos?

¹¹ Ang pagtugot sa Diyos sa tawhanong pagmando sulod sa unom ka libo ka tuig kusganong nagapasiugda nga ang tawo dili makaarang sa pagpahunong sa pag-antos. Ug walay panahon nga nakahimo siya niana. Pananglitan, sa iyang adlaw si Haring Solomon sa Israel, bisan pa sa tanan niyang kinaadman, bahandi, ug gahom, wala makatul-id sa kasakitan nga sangpotanan sa tawhanong pagmando. (Ecclesiastes 4:1-3) Sa susama, sa atong adlaw ang mga pangulo sa kalibotan, bisan pag pinaagi sa kinamodernohang mga teknikal nga kauswagan, dili makaarang sa pagpapas sa pag-antos. Grabe pa, gipadayag sa kasaysayan nga ang mga tawo nga independente sa pagmando sa Diyos nakapasamot sa pag-antos inay nakapapas niana.

Layog-Abot nga Panglantaw sa Diyos

12-14. Unsang layog-abot nga mga kaayohan ang moabot ingong sangpotanan sa pagtugot sa Diyos sa pag-antos?

¹² Ang pagtugot sa Diyos sa pag-antos nahimong kasakitan alang kanato. Apan siya nagbaton ug layog-abot nga panglantaw, kay nahibalo nga moabot ang maayong sangpotanan sa kataposan. Ang panglantaw sa Diyos makahatag kaayohan sa mga linalang, dili lamang sa pila ka tuig o pila ka libo, kondili sa milyonmilyong katuigan, oo, hangtod sa kahangtoran.

¹³ Kon ugaling motungha ang kahimtang sa umaabot nga may mogamit nga sayop sa kinaugalingong pagbuot nga magpaduhaduha sa paagi sa Diyos sa pagbuhat sa mga butang, dili na kinahanglan nga hatagan siyag panahon sa pagsulay sa pagpamatuod sa iyang mga hunahuna. Kay gitugotan na ang mga mag-aalsa ug libolibong katuigan, natukod na sa Diyos ang legal nga pasikaranan nga ikapadapat hangtod sa hangtod sa bisan diin sa uniberso.

 ¹⁴ Tungod kay si Jehova nagtugot sa pagkadaotan ug pag-antos niining panahona, kini igo nang nakapamatuod nga walay bisan unsa nga wala mahiuyon kaniya ang molambo. Gikapadayag sa walay pagduhaduha nga walay independenteng laraw sa mga tawo o espiritung mga linalang ang makapatunghag malungtarong mga kaayohan. Busa, ang Diyos unya bug-os may katarongan sa tulin nga paglaglag kang bisan kinsa nga mag-aalsa. “Ang mga daotan iyang pagalaglagon.”​—Salmo 145:20; Roma 3:4.

[Mga Pangutana sa Pagtuon]

[Hulagway sa panid 15]

Human pilia sa atong unang mga ginikanan ang pagkaindependente gikan sa Diyos, sila sa kataposan natigulang ug namatay

[Mga hulagway sa panid 16]

Ang tawhanong pagmando nga nahibulag sa Diyos misangpot sa kaalaotan

[Credit Line]

Letrato sa U.S. Coast Guard