Usa ka Yuta nga Walay Pag-antos
Bahin 2
Usa ka Yuta nga Walay Pag-antos
1, 2. Unsang lahi nga panglantaw ang nabatonan sa daghan?
HINUON, milyonmilyon nga katawhan sa tibuok kalibotan adunay bug-os lahi nga panglantaw. Napanan-aw nila ang kahibulongang kaugmaon alang sa katawhan. Sila nagaingon nga dinhi mismo sa yuta aduna unyay usa ka kalibotan nga bug-os libre sa pagkadaotan ug pag-antos. Masaligon sila nga ang daotan duol nang puohon ug unya tukoron ang bug-os bag-ong kalibotan. Nagaingon pa gani sila nga gipahimutang na karon mismo ang patukoranan niining bag-ong kalibotan!
2 Kining maong katawhan nagtuo nga ang bag-ong kalibotan walay gubat, kapintasan, krimen, inhustisya, ug kakabos. Kini unya usa ka kalibotan nga walay sakit, kasub-anan, mga luha, ug bisan kamatayon. Nianang panahona ang katawhan mouswag ngadto sa kahingpitan ug mabuhing walay kataposan diha sa kalipay sa usa ka yutang paraiso. Oo, kadtong nangamatay pagabanhawon gani ug makabatog kahigayonan nga mabuhing walay kataposan!
3, 4. Nganong ang maong mga tawo masaligon mahitungod sa ilang panglantaw?
3 Kini bang panglantawa mahitungod sa umaabot usa lang ka damgo, panghanduraw lamang? Dili, dili gayod. Gipasukad kini sa lig-og pasikaranan nga pagtuo nga kining umaabot nga Paraiso seguradong mahitabo. (Hebreohanon 11:1) Nganong nakapaneguro sila pag-ayo? Kay ang labing gamhanang Maglalalang sa uniberso maoy nagsaad niini.
4 Mahitungod sa mga saad sa Diyos, ang Bibliya nagaingon: “Walay usa ka pulong sa tanang maayong mga pulong nga gipamulong kaninyo ni Jehova nga inyong Diyos ang napakyas. Silang tanan natuman alang kaninyo. Walay usa ka pulong kanila ang napakyas.” “Ang Diyos dili usa ka tawo nga siya magabakak . . . Nagsulti ba siya niana ug dili niya pagabuhaton kana, ug siya ba nakapamulong ug dili pagatumanon kana?” “Si Jehova sa mga panon nanumpa, nga nag-ingon: ‘Sumala sa akong pagbanabana niana, kana mahitabo gayod; ug sumala sa akong gipahimangno, kana mamatuman.’”—Josue 23:14; Numeros 23:19; Isaias 14:24.
5. Unsang mga pangutana ang kinahanglang tubagon?
5 Ugaling lang, kon katuyoan sa Diyos ang pagtukod ug yutan-ong paraiso nga walay pag-antos, nganong gitugotan niya nga mahitabo ang daotang mga butang sa unang bahin? Nganong gihulat niya ang unom ka libo ka tuig hangtod karon sa pagtul-id kon unsay nadaot? Dili ba kaha kanang tanang kasiglohan sa pag-antos nagapaila nga ang Diyos sa pagkatinuod walay pagtagad kanato, o siya wala gani maglungtad?
[Mga Pangutana sa Pagtuon]
