1-3. (a) Unsay sanong ni Jesus sa dihang ang duha ka buta nangayog tabang kaniya? (b) Unsay ipasabot sa mga pulong “kay giabot ug kaluoy”? (Tan-awa ang potnot.)

 DUHA ka buta naglingkod daplin sa dalan, duol sa Jerico. Sila moadto didto kada adlaw, mangitag dapit nga lagmit agian sa mga panon sa katawhan, ug magpakilimos. Apan niadtong adlawa, sila hapit nang makasinatig usa ka butang nga makapausab pag-ayo sa ilang kinabuhi.

² Sa kalit, ang mga makililimos nakadungog ug kaguliyang. Kay wala man makakita kon unsay nagkahitabo, usa kanila nangutana kon unsay gikagubtan, ug siya giingnan: “Si Jesus nga Nasaretnon nagaagi!” Si Jesus nagpaingon niadto sa Jerusalem sa kataposang higayon. Apan wala siya mag-inusara; siya gisundan ug daghang katawhan. Sa pagkadungog kon kinsay nagaagi, ang mga makililimos nakapahinabog kagubot kay sila misinggit: “Ginoo, kaluy-i kami, Anak ni David!” Tungod kay gisamokan, ang mga makililimos gibadlong sa mga panon sa katawhan aron mohilom sila, apan ang maong mga buta may dako kaayong panginahanglan. Wala sila mohunong sa pagsinggit.

³ Nadungog ni Jesus ang ilang pagsinggit bisan pa sa kaguliyang sa mga tawo. Unsay iyang himoon? Daghan kaayo ang iyang gihunahuna ug bug-at kaayo ang gibati sa iyang kasingkasing. Nagkaduol na ang kataposang semana sa iyang kinabuhi sa yuta. Nahibalo siya nga siya pagasakiton ug pagapatyon sa Jerusalem. Bisan pa niadto, iyang gihatagag pagtagad ang walay-hunong nga pagsinggit. Siya mihunong ug nagsugo nga ang mga nagsinggit dad-on kaniya. “Ginoo, mabuka unta ang among mga mata,” sila nangaliyupo. “Kay giabot ug kaluoy,”  gihikap ni Jesus ang ilang mga mata, ug nahibalik ang ilang panan-aw. a Sa walay langan, sila misunod kaniya.​—Lucas 18:35-43; Mateo 20:29-34.

4. Sa unsang paagi gituman ni Jesus ang tagna nga “maluoy siya sa timawa”?

⁴ Dili lang kadto ang higayong nagpakita si Jesus ug kahangawa. Sa daghang higayon ug sa nagkalainlaing kahimtang, dulot nga natukmod si Jesus sa pagpakitag kahangawa. Gitagna sa Bibliya nga “maluoy siya sa timawa ug sa kabos.” (Salmo 72:13) Ingong katumanan sa maong mga pulong, si Jesus sensitibo sa pagbati sa uban. Siya ang miuna paglihok diha sa pagtabang sa uban. Ang iyang kahangawa maoy nagtukmod kaniya sa pagwali. Atong tan-awon kon sa unsang paagi gipadayag sa mga Ebanghelyo ang malumong kahangawa nga gipasundayag sa mga pulong ug buhat ni Jesus ug atong hisgotan kon sa unsang paagi kita makapakitag susamang kahangawa.

5, 6. Unsang mga panig-ingnan ang nagpakita nga si Jesus maoy usa ka tawong mabination?

⁵ Si Jesus maoy usa ka tawo nga mabination kaayo. Siya nakasabot ug nagmabination sa mga nag-antos. Bisan pag wala siya makasinati sa tanan nilang kahimtang, iya gayong gibati ang ilang kasakitan diha sa iyang kasingkasing. (Hebreohanon 4:15) Sa dihang iyang giayo ang usa ka babayeng giagasan ug dugo sulod sa 12 ka tuig, iyang gibatbat ang iyang sakit ingong “grabeng sakit,” nga sa ingon iyang giila nga kadtong bayhana grabeng nag-antos tungod sa maong sakit. (Marcos 5:25-34) Sa iyang pagkakita kang Maria ug sa iyang mga kauban nga naghilak tungod sa pagkamatay ni Lazaro, siya natandog pag-ayo sa ilang kasub-anan nga siya miagulo sa espiritu. Bisag nahibalo siya nga hapit na niyang banhawon si Lazaro, si Jesus natandog pag-ayo nga nanglugmaw ang mga luha sa iyang mga mata.​—Juan 11:33, 35.

 ⁶ Sa laing higayon, ang usa ka sanlahon miduol kang Jesus ug nangaliyupo: “Kon buot mo lamang, ikaw makahinlo kanako.” Unsay sanong ni Jesus, nga usa ka hingpit nga tawo nga wala gayod masakit sukad? Siya misimpatiya sa sanlahon. Sa pagkatinuod, “siya giabot ug kaluoy.” (Marcos 1:40-42) Unya iyang gihimo ang usa ka talagsaong butang. Nahibalo gayod siya nga ang mga sanlahon mahugaw segun sa Balaod ug dili sila angayng makigsagol sa ubang tawo. (Levitico 13:45, 46) Si Jesus arang makaayo niadtong tawhana bisan pag dili niya hikapon siya. (Mateo 8:5-13) Bisan pa niana, gipalabi niyang ituy-od ang iyang kamot ug iyang gihikap ang sanlahon, nga miingon: “Buot ko. Mamahinlo ka.” Nahanaw dihadiha ang sanla. Pagkamabination ni Jesus!

7. Unsay makatabang kanato sa pag-ugmad ug pagkamabination, ug sa unsang paagi ikapahayag kining hiyasa?

⁷ Ingong mga Kristohanon, kita giawhag sa pagsundog kang Jesus sa pagpakitag pagkamabination. Ang Bibliya nag-awhag kanato nga magpakitag “pagbati alang sa isigkaingon.” b (1 Pedro 3:8) Lagmit dili dayon masabtan ang gibati sa mga nag-antos sa nakalamay nang sakit o depresyon​—ilabina kon wala kita masakit niana. Apan, hinumdoming ang pagkamabination wala magdepende sa pagkasinatig sama nga kahimtang. Si Jesus nagmabination sa masakiton bisan pag wala gayod siya masakit. Nan, sa unsang paagi makaugmad kitag pagkamabination? Pinaagi sa mapailobong pagpamati samtang ang mga masakiton mosugid kanato ug mopahayag sa ilang gibati. Makasukna kita sa atong kaugalingon, ‘Kon akoy anaa sa ilang kahimtang, unsa kahay akong bation?’ (1 Corinto 12:26) Kon kita mahimong mas sensitibo sa pagbati sa uban, kita mas ‘makahupay sa magul-anong mga kalag.’ (1 Tesalonica 5:14) Usahay, ang pagkamabination ikapahayag dili lang sa mga pulong kondili sa mga luha usab. “Hilak uban sa mga tawong nanghilak,” matod sa Roma 12:15.

8, 9. Sa unsang paagi gipakita ni Jesus ang konsiderasyon sa pagbati sa uban?

⁸ Si Jesus may konsiderasyon sa uban, ug siya nagmatinagdanon sa ilang pagbati. Hinumdomi ang higayon nga may gidala  nga usa ka lalaking bungol ug amang kang Jesus. Kay lagmit nakamatikod nga ang maong lalaki naulaw, si Jesus may gihimo nga wala niya kasagarang himoa samtang nag-ayo sa uban: “Iyang gikuha siya nga silasila ra gikan sa panon sa katawhan.” Iyang giayo ang maong lalaki nga silasila ra ug nga walay mga tawo nga nagtan-aw.​—Marcos 7:31-35.

⁹ Si Jesus nagpakitag susamang konsiderasyon sa dihang gidad-an siyag usa ka tawong buta ug gihangyo sa pag-ayo kaniya. “Gigunitan [ni Jesus] sa kamot ang tawong buta” ug “gidala siya sa gawas sa balangay.” Unya iyang gihugnahugna ang pag-ayo sa buta. Kadto lagmit nagpahinabo nga ang utok ug mga mata sa maong tawo sa inanay nakapasibo sa kasulaw ug sa daghan kaayong butang nga iyang nakita. (Marcos 8:22-26) Pagkatalagsaong konsiderasyon ang gipakita ni Jesus!

10. Sa unsang mga paagi makapakita kitag konsiderasyon sa pagbati sa uban?

¹⁰ Tungod kay kita mga sumusunod ni Jesus, kinahanglang kita magpakitag konsiderasyon sa pagbati sa uban. Busa kinahanglang magbantay kita sa atong sinultihan, nga hinumdoman nga ang di-mahunahunaong paggamit sa dila makapasilo sa uban. (Proverbio 12:18; 18:21) Ang hait nga mga pulong, matamayong mga komento, ug makapasakit nga kantalita dili angay sa mga Kristohanon, kinsa sensitibo sa mga pagbati sa ubang mga tawo. (Efeso 4:31) Mga ansiyano, sa unsang paagi makapakita kamog konsiderasyon sa pagbati sa uban? Samtang manambag, timplahig kalulot ang inyong mga pulong, aron mahuptan gihapon sa tawong gitambagan ang iyang dignidad. (Galacia 6:1) Mga ginikanan, sa unsang paagi kamo makabaton ug konsiderasyon sa pagbati sa inyong mga anak? Samtang magdisiplina, paningkamoti nga dili ninyo pakaulawan ang inyong mga anak.​—Colosas 3:21.

11, 12. Unsang mga asoy sa Bibliya ang nagpakita nga wala kanunay hangyoa si Jesus sa pagpakitag kahangawa sa uban?

¹¹ Si Jesus wala kanunay hangyoa sa pagpakitag kahangawa sa uban. Sa pagkatinuod, ang kahangawa maoy hiyas nga ipasundayag sa buhat ug aktibo. Nan, dili katingad-ang ang malumong kahangawa nagtukmod kang Jesus nga mouna sa paglihok aron tabangan ang uban. Pananglitan, samtang ang usa ka dakong panon sa katawhan nag-uban-uban kaniya sa tulo ka adlaw, nga walay kaonkaon, walay nagsulti kang Jesus nga ang mga tawo gigutom o nagsugyot nga may himoon siya bahin niadto. Ang asoy nag-ingon: “Gitawag ni Jesus ang iyang mga tinun-an ngadto kaniya ug miingon: ‘Ako naluoy sa panon, tungod kay tulo na ka adlaw nga sila nag-uban kanako ug sila walay makaon; ug dili ko buot nga palakton sila nga nagpuasa. Lagmit panguyapan sila sa dalan.’” Dayon, sa iyang kaugalingong kabubut-on, iyang gipakaon ang panon sa katawhan sa milagrosong paagi.​—Mateo 15:32-38.

¹² Tagda ang laing asoy. Sa 31 K.P., samtang nagkaduol si Jesus sa siyudad sa Nain, iyang nakita ang usa ka masulub-ong talan-awon. Dihay giyayongan nga usa ka patayng tawo paggawas sa siyudad, nga tingali nagpaingon sa mga lubnganan sa duol nga bakilid, aron ilubong ‘ang bugtong anak nga lalaki sa usa ka babayeng balo.’ Mahanduraw mo ba ang kaguol diha sa kasingkasing sa maong inahan? Hapit nang ilubong ang iyang bugtong anak, ug siya walay bana nga makaduyog sa iyang tumang kaguol. Sa tanang tawo nga nagpanon, “nakit-an” ni Jesus ang babayeng balo nga niadtong higayona nawad-ag anak. Ang iyang nakita nakapatandog kaniya​—oo, “siya giabot ug kaluoy kaniya.” Walay usa ang kinahanglang mohangyo kaniya. Ang kahangawa diha sa iyang kasingkasing maoy nagtukmod kaniya sa paghupay sa babayeng balo. Busa siya “miduol ug gihikap ang andas,” ug unya iyang gibanhaw ang batan-ong lalaki. Unsay sunod nga nahitabo? Wala hangyoa ni Jesus ang batan-ong lalaki sa pagkuyog sa dakong panon sa katawhan nga kauban sa Iyang panaw. Hinunoa, si Jesus ‘mihatag kaniya ngadto sa  iyang inahan,’ mao nga tungod niadto magkaipon na usab sila sa pagpuyo ug seguradong may mag-atiman sa babayeng balo.​—Lucas 7:11-15.

13. Sa unsang paagi makasundog kita kang Jesus nga maoy mouna sa paglihok aron tabangan kadtong nanginahanglan?

¹³ Sa unsang paagi makasunod kita sa panig-ingnan ni Jesus? Siyempre, dili kita makapatunghag daghang pagkaon pinaagi sa pagmilagro o makabanhaw ug mga patay. Apan, kita makasundog kang Jesus nga maoy mouna sa paglihok aron tabangan kadtong nanginahanglan. Ang usa ka isigkamagtutuo mahimong naglisod sa panginabuhi o nawad-ag trabaho. (1 Juan 3:17) Ang balay sa usa ka babayeng balo tingali kinahanglang reperon. (Santiago 1:27) Basin aduna kitay nasayrang pamilya nga nagbangotan ug nagkinahanglag paghupay o ubang materyal nga tabang. (1 Tesalonica 5:11) Sa mga kaso sa tinuod nga panginahanglan, dili kinahanglang hulaton nato nga kita pangayoag tabang. (Proverbio 3:27) Ang kahangawa maoy magtukmod kanato nga mouna sa paglihok aron motabang, sumala sa itugot sa atong mga kahimtang. Ayaw gayod kalimti nga ang yanong malulotong buhat o pipila ka makapahupay ug kinasingkasing nga mga pulong maoy epektibong kapahayagan sa kahangawa.​—Colosas 3:12.

14. Nganong gihatagag prioridad ni Jesus ang buluhaton sa pagwali sa maayong balita?

¹⁴ Sumala sa nakita nato sa Seksiyon 2 niining libroha, gihatag ni Jesus ang talagsaong panig-ingnan sa pagwali sa maayong balita. Siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Lucas 4:43) Nganong gihatagan niyag prioridad ang maong buluhaton? Tungod ilabina sa iyang gugma alang sa Diyos. Apan may lain pang motibo si Jesus: Ang kinasingkasing nga kahangawa nagtukmod kaniya sa pagtagbaw sa espirituwal nga mga panginahanglan sa uban. Sa tanang paagi sa iyang pagpakitag kahangawa, walay mas hinungdanon kay sa pagtagbaw sa espirituwal nga kagutom sa uban. Susihon nato  ang duha ka hitabo nga nagpakita kon unsay pag-isip ni Jesus sa katawhan nga iyang giwalihan. Ang maong paghisgot makatabang kanato sa pagsusi sa atong mga motibo mismo sa pagpakigbahin sa publikong ministeryo.

15, 16. Batbata ang duha ka hitabo nga nagpadayag kon unsay pag-isip ni Jesus sa mga tawo nga iyang giwalihan.

¹⁵ Sa 31 K.P., human sa iyang makugihong pagwali sulod sa mga duha ka tuig, gidugangan ni Jesus ang iyang paningkamot pinaagi sa pagsugod “sa paglibot sa tanang siyudad ug mga balangay” sa Galilea. Natukbil ang iyang kasingkasing sa iyang nakita. Si apostol Mateo mitaho: “Sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:35, 36) Si Jesus gibatig kaluoy sa ordinaryong mga tawo. Siya dulot nga nakaamgo sa ilang pagkatimawa sa espirituwal. Siya nahibalo nga sila gimaltratar ug gipasagdan gayod sa mga tawo nga angay unta nga maoy ilang magbalantay​—ang relihiyosong mga pangulo. Kay gitukmod sa dulot nga kahangawa, si Jesus nanlimbasog pag-ayo sa pagpaabot sa mensahe sa paglaom ngadto sa katawhan. Ang labaw nilang gikinahanglan mao ang maayong balita sa Gingharian sa Diyos.

¹⁶ Ang susamang butang nahitabo ubay-ubayng bulan sa ulahi,  sa hapit na ang Paskuwa sa 32 K.P. Niadtong higayona, si Jesus ug ang iyang mga apostoles misakayg sakayan ug mitadlas sa Dagat sa Galilea sa pagpangitag usa ka mingawng dapit aron makapahulay. Apan ang usa ka panon sa katawhan midalagan ubay sa baybayon ug nakauna pag-abot sa pikas nga tampi kay sa sakayan. Unsay sanong ni Jesus? “Sa pagkawas, iyang nakita ang usa ka dakong panon sa katawhan, apan siya giabot ug kaluoy kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.” (Marcos 6:31-34) Sa makausa pa, si Jesus “giabot ug kaluoy” tungod sa timawang espirituwal nga kahimtang sa katawhan. Samag “mga karnero nga walay magbalantay,” sila gigutom sa espirituwal ug gipasagdang magbuhibuhi lang sa ilang kaugalingon. Ang kahangawa, dili lamang ang katungdanan, maoy nagtukmod kang Jesus sa pagwali.

17, 18. (a) Unsay magtukmod kanato sa pagwali? (b) Sa unsang paagi maugmad nato ang kahangawa alang sa uban?

¹⁷ Ingong mga sumusunod ni Jesus, unsay nagtukmod kanato sa pagpakigbahin sa ministeryo? Sumala sa atong nakita sa Kapitulo 9 niining libroha, kita adunay usa ka tinudlong buluhaton, usa ka responsibilidad sa pagwali ug paghimog mga tinun-an. (Mateo 28:19, 20; 1 Corinto 9:16) Apan ang atong motibo sa pagpakigbahin niining buluhatona dili lang tungod sa katungdanan o sa obligasyon. Labaw sa tanan, ang gugma alang kang Jehova nagtukmod kanato sa pagwali sa maayong balita sa iyang Gingharian. Ang kahangawa alang sa mga tawong dili sama natog pagtuo nagtukmod usab kanato sa pagwali. (Marcos 12:28-31) Nan, sa unsang paagi maugmad nato ang kahangawa alang sa uban?

¹⁸ Kinahanglang may pagbati kita sa mga tawo ingon sa pagbati ni Jesus kanila​—“pinanitan ug nagkatibuagsa sama sa mga karnero nga walay magbalantay.” Handurawa nga ikaw nakakitag nating karnero nga nasalaag. Kay walay magbalantay nga naggiya niana ngadto sa lunhaw nga sibsibanan ug sa tubig, ang makaluluoy nga karnero gigutom ug giuhaw. Dili ka ba maluoy sa maong nating karnero? Dili ba nimo himoon ang imong  maarangan aron hatagan kanag pagkaon ug mainom? Ang maong nating karnero nahisama sa daghang tawo nga wala pa mahibalo sa maayong balita. Kay gipasagdan sa mga magbalantay sa bakak nga relihiyon, sila gigutom ug giuhaw sa espirituwal nga paagi ug walay tinuod nga paglaom sa umaabot. Atong nabatonan kon unsay ilang gikinahanglan: ang makapahimsog sa espirituwal nga pagkaon ug makapapreskong tubig sa kamatuoran nga anaa sa Pulong sa Diyos. (Isaias 55:1, 2) Kon palandongon nato ang espirituwal nga panginahanglan sa mga tawong alirong nato, kita maluoy kanila. Kon, sama kang Jesus, kita magmabination gayod sa mga tawo, buhaton nato ang atong maarangan sa pagsangyaw kanila bahin sa paglaom sa Gingharian.

19. Unsay atong mahimo sa pagdasig sa kuwalipikado nang gitun-an sa Bibliya sa pagpakigbahin sa publikong pagsangyaw?

¹⁹ Sa unsang paagi makatabang kita sa uban sa pagsunod sa panig-ingnan ni Jesus? Pananglitan kon buot natong dasigon ang kuwalipikado nang gitun-an sa Bibliya sa pagpakigbahin sa publikong pagsangyaw. O tingali buot natong tabangan ang di-aktibo aron siya bug-os makigbahin pag-usab sa ministeryo. Sa unsang paagi matabangan nato sila? Kinahanglang tukbilon nato ang ilang kasingkasing. Hinumdomi nga si Jesus sa sinugdan “giabot ug kaluoy” sa mga tawo, ug dayon iyang gitudloan sila. (Marcos 6:34) Busa kon makatabang kita kanila sa pag-ugmad ug kahangawa, ang ilang mga kasingkasing mahimong magtukmod kanila nga mahisama kang Jesus ug sila mosangyaw sa maayong balita sa uban. Kita makasukna kanila: “Sa unsang paagi nahimong mas maayo ang imong pagkinabuhi tungod sa pagdawat sa mensahe sa Gingharian? Unsay imong ikasulti bahin sa mga tawo nga  wala pa mahibalo niining mensahea​—dili ba sila nagkinahanglan usab sa maayong balita? Unsay imong mahimo sa pagtabang kanila?” Siyempre, ang labing epektibong panukmod sa pagpakigbahin sa ministeryo mao ang gugma alang sa Diyos ug tinguha sa pag-alagad kaniya.

20. (a) Unsay nalangkit sa pagkahimong sumusunod ni Jesus? (b) Unsay hisgotan sa sunod kapitulo?

²⁰ Ang pagkahimong sumusunod ni Jesus wala lang maglangkit sa pagsumaysumay sa iyang mga pulong ug pagsundog sa iyang mga buhat. Kinahanglang ugmaron nato ang samang “tinamdan sa pangisip” nga iyang nabatonan. (Filipos 2:5) Nan, pagkamapasalamaton nato nga ang Bibliya nagpadayag kanato sa mga hunahuna ug pagbati nga gipasundayag diha sa mga pulong ug buhat ni Jesus! Pinaagi sa pagkasinati sa “panghunahuna ni Kristo,” kita mas makaugmad sa pagkasensitibo ug sa kinasingkasing nga kahangawa ug sa ingon magtagad sa uban sama sa paagi sa pagtagad ni Jesus sa katibuk-ang katawhan. (1 Corinto 2:16) Sa sunod kapitulo, atong hisgotan ang nagkadaiyang mga paagi sa pagpakita ni Jesus ug gugma alang gayod sa iyang mga sumusunod.