Minahal nga Magbabasa:

“Umari ka, mahimong akong sumusunod.” (Marcos 10:21) Pinaagi sa maong mga pulong, si Jesu-Kristo nag-awhag gayod kanato sa pagsunod kaniya. Gisunod mo ba ang iyang awhag? Dako kaayog impluwensiya sa imong kinabuhi kon imo kanang himoon. Ngano?

Si Jehova nagpadala sa iyang bugtong nga Anak nganhi sa yuta aron ihatag ang iyang kinabuhi ingon nga lukat. (Juan 3:16) Dugang pa sa pagkanamatay alang kanato, gipadayag kanato sa maong Anak kon sa unsang paagi kita magkinabuhi. Sa tanan niyang gibuhat, iyang gihuptan ang iyang integridad ug gilipay ang kasingkasing sa iyang Amahan. Gipakita usab ni Jesus kanato kon sa unsang paagi mahisama sa iyang Amahan. Ang mga paagi ug kabubut-on sa Amahan hingpit nga gipadayag diha sa mga pulong ug mga buhat sa Anak.​—⁠Juan 14:9.

Si Jesus maoy “sulondan,” nag-ingon ang Bibliya, ‘aron atong sundon pag-ayo ang iyang mga tunob.’ (1 Pedro 2:21) Kon buot natong mas masuod kang Jehova, kon buot natong makapahimulos ug makahuloganon kaayong kinabuhi karon, ug kon buot natong magpadayon sa pagsubay sa dalan padulong sa kinabuhing walay kataposan, kinahanglan natong sundon pag-ayo ang mga tunob ni Kristo.

Sa pagsugod sa maong panaw, kinahanglan kitang masinati sa kinabuhi ni Jesus dinhi sa yuta. Busa angay natong tun-an pag-ayo ang kahubitan bahin kang Jesus nga gipreserbar diha sa Bibliya. Ang pagpalandong sa mga butang nga gisulti ug gibuhat ni Jesus ug ang pagpalandong kon sa unsang paagi makasundog kita kaniya sa pulong ug sa buhat makatabang kanato nga mas tin-awng masabtan kon sa unsang paagi masunod siya.

Hinaot kining basahona makatabang kanimo sa pagpalalom sa imong gugma kang Jesus ug kang Jehova. Ug hinaot ang maong gugma modasig kanimo sa pagsunod pag-ayo sa mga tunob ni Jesus, aron makalipay ka sa kasingkasing ni Jehova karon ug hangtod sa kahangtoran.