Bahin 5

Ang Kinabuhi Adunay Hamiling Katuyoan

1, 2. Sa unsang paagi maila nato nga ang Diyos may pagtagad kanato, ug asa kita modangop alang sa mga tubag sa mga pangutana sa kinabuhi?

¹ Ang paagi sa pagkagama sa yuta ug sa buhing mga butang niini nagpakita nga ang ilang Maglalalang maoy Diyos sa gugma nga tinuod may pagtagad. Ug ang iyang Pulong, ang Bibliya, nagpakita nga siya may pagtagad; kini naghatag kanato sa kinamaayohang mga tubag sa mga pangutana: Nganong ania kita sa yuta? ug, Asa kita padulong?

² Kinahanglang tukion nato ang Bibliya alang sa maong mga tubag. Ang Pulong sa Diyos nag-ingon: “Kon inyong pangitaon siya, inyo siya nga hikaplagan, apan kon inyo siyang biyaan kamo iyang biyaan.” (2 Cronicas 15:2) Busa, sa pagtuki sa Pulong sa Diyos unsay gipadayag kon bahin sa iyang katuyoan alang kanato?

Kon Nganong ang Diyos Naglalang ug mga Tawo

3. Nganong gilalang sa Diyos ang yuta?

³ Ang Bibliya nagpakita nga giandam sa Diyos ang yuta nga gihunahuna ilabina ang mga tawo. Ang Isaias 45:​18 nag-ingon mahitungod sa yuta nga ang Diyos “wala maglalang niini sa wala lamay kapuslanan [apan] nag-umol niini aron kini pagapuy-an.” Ug gitagan-an niya ang yuta sa tanang butang nga kinahanglanon sa mga tawo, dili lamang aron mabuhi, kondili aron matugob ang kalipay sa kinabuhi.​—Genesis, mga kapitulo 1 ug 2.

4. Nganong gilalang sa Diyos ang unang mga tawo?

⁴ Sa iyang Pulong, ang Diyos nagsugid bahin sa paglalang sa unang mga tawo, si Adan ug si Eva, ug nagpadayag kon unsay diha sa iyang hunahuna alang sa tawhanong banay. Siya miingon: “Buhaton nato ang tawo sa atong dagway, ingon sa kasama nato, ug magabuot sila sa mga isda sa dagat ug sa nagalupad nga mga linalang sa mga langit ug sa anad nga mga hayop ug sa tibuok nga yuta ug sa tanang tigkamang nga hayop nga nagakamang sa ibabaw sa yuta.” (Genesis 1:26) Mga tawo ang magbantay sa “tibuok nga yuta” ug sa kahayopan niini.

5. Diin gibutang ang unang mga tawo?

⁵ Ang Diyos nagbuhat ug dako, samag-parkeng tanaman sa usa ka dapit nga gitawag Eden, nga nahimutang sa Tungang Sidlakan. Dayon siya “nagkuha sa lalaki ug nagbutang kaniya sa tanaman sa Eden aron sa pag-ugmad niini ug sa pag-atiman niini.” Kadto usa ka paraiso nga diha ang tanang kinahanglanon nga pagkaon sa unang mga tawo. Ug kadto naglakip sa “tanang kahoy nga maayong tan-awon ug maayong kan-on,” ingon man sa ubang talamnon ug sa daghang makaiikag nga mga matang sa kahayopan.​—Genesis 2:​7-9, 15.

6. Uban sa unsang mga hiyas sa hunahuna ug lawas nga gilalang ang mga tawo?

⁶ Ang mga lawas sa unang mga tawo gilalang nga hingpit, mao nga sila dili magkasakit, matigulang, o mamatay. Gihatagan usab silag ubang mga hiyas, sama sa kagawasan sa pagpili. Ang paagi sa ilang pagkagama gisaysay sa Genesis 1:​27: “Ang Diyos naglalang sa tawo diha sa iyang dagway, sa dagway sa Diyos iya siyang gilalang; lalaki ug babaye iya silang gilalang.” Sanglit gilalang man kita sa dagway sa Diyos, kita gihatagan dili lamang sa lawasnon ug mental nga mga hiyas apan usab sa moral ug espirituwal nga mga kinaiyahan, ug kini kinahanglang tagbawon aron kita tinuod nga magmalipayon. Itagana sa Diyos ang paagi sa pagtagbaw sa maong mga panginahanglan ingon man sa panginahanglan sa pagkaon, tubig, ug hangin. Sumala sa giingon ni Jesu-Kristo, “ang tawo mabuhi, dili lamang sa tinapay, kondili sa matag pulong nga nagagula sa baba ni Jehova.”​—Mateo 4:4.

7. Unsang sugo ang gihatag sa unang parisan?

⁷ Dugang pa, gihatag sa Diyos ang kahibulongang sugo ngadto sa unang parisan samtang didto sila sa Eden: “Sumanay ug dumaghan kamo ug pun-on ninyo ang yuta.” (Genesis 1:28)  Mao nga sila makahimo sa pagsanay ug pagpanganak ug hingpit nga mga anak. Ug inigdaghan sa mga tawo, mabatonan nila ang kahimut-anang buluhaton nga ipauswag ang mga utlanan sa unang samag-parke, paraisong dapit sa Eden. Sa kataposan, ang tibuok nga yuta maugmad nga usa ka paraiso, nga puy-an sa hingpit, malipayong katawhan nga mabuhing walay kataposan. Ang Bibliya nagpahibalo kanato nga human palihoka kining tanan, “Nakita sa Diyos ang tanang butang nga iyang gibuhat ug, tan-awa! kini maayo kaayo.”​—Genesis 1:31; tan-awa usab ang Salmo 118:17.

8. Sa unsang paagi atimanon sa mga tawo ang yuta?

⁸ Dayag nga gamiton sa mga tawo ang gisakop nga yuta alang sa ilang kaayohan. Apan kana pagabuhaton sa kasaligang paagi. Ang mga tawo kinahanglang mahimong matinahorong mga piniyalan sa yuta, dili mga tigdaot niini. Ang pagdaot sa yuta nga atong nasaksihan karong adlawa maoy supak sa kabubut-on sa Diyos, ug silang nakigbahin niana nagasupak sa katuyoan sa kinabuhi sa yuta. Sila manimayad tungod niana, kay ang Bibliya nag-ingon nga ang Diyos “magalaglag niadtong nagalaglag sa yuta.”​—Pinadayag 11:18.

Katuyoan Gihapon sa Diyos

9. Nganong kita masaligon nga matuman ang katuyoan sa Diyos?

⁹ Busa, sukad sa sinugdan maoy katuyoan sa Diyos nga ang hingpit tawhanong banay magpuyo sa yuta sa walay kataposan sa usa ka paraiso. Ug kini mao gihapon ang iyang katuyoan! Walay sipyat, ang maong katuyoan matuman. Ang Bibliya nag-ingon: “Si Jehova sa mga panon nanumpa, nga nag-ingon: ‘Sa pagkamatuod sumala sa akong nahunahuna, kini mahitabo; ug sumala sa akong gitambag, kana mamatuman.’” “Ako nagsulti niini; ako usab nga pahinaboon. Ako naglaraw niini, akong pagabuhaton usab kini.”​—Isaias 14:​24; 46:11.

10, 11. Sa unsang paagi gihisgotan ang Paraiso ni Jesus, Pedro, ug sa salmistang si David?

¹⁰ Si Jesu-Kristo naghisgot mahitungod sa katuyoan sa Diyos nga ipasig-uli ang paraiso sa yuta sa giingnan niya ang usa ka tawo nga gustog paglaom sa umaabot: “Magauban ka kanako sa Paraiso.” (Lucas 23:43) Si apostol Pedro usab naghisgot sa umaabot nga bag-ong kalibotan sa mitagna siya: “Adunay bag-ong mga langit [usa ka bag-ong kahikayan labot sa kagamhanan nga magmando gikan sa langit] ug usa ka bag-ong yuta [usa ka bag-ong yutan-ong katilingban] nga atong ginapaabot sumala sa saad [sa Diyos], ug niini magapuyo ang pagkamatarong.”​—2 Pedro 3:13.

¹¹ Ang salmistang si David misulat usab mahitungod sa umaabot nga bag-ong kalibotan ug kon unsa ka dugay kini molungtad. Siya mitagna: “Ang mga matarong magapanunod sa yuta, ug sila magapuyo niana sa walay kataposan.” (Salmo 37:29) Kana ang hinungdang misaad si Jesus: “Malipayon ang mga malumo, sanglit sila magapanunod sa yuta.”​—Mateo 5:5.

12, 13. Sumaryoha ang hamiling katuyoan sa Diyos alang sa katawhan.

¹² Pagkahamili nga palaaboton, ang pagpuyong walay kataposan sa usa ka paraisong yuta nga wala ang tanang pagkadaotan, krimen, sakit, kaguol, ug kasakitan! Sa kataposang basahon sa Bibliya, ang matagnaong Pulong sa Diyos nagsuma niining hamiling katuyoan pinaagi sa pag-ingon: “[Ang Diyos] magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.” Kini midugang: “Ug ang Usang naglingkod sa trono miingon: ‘Tan-awa! Ginabag-o ko ang tanang butang.’ Usab, siya miingon: ‘Isulat mo, kay kining mga pulonga kasaligan ug matuod.’”​—Pinadayag 21:​4, 5.

¹³ Oo, ang Diyos adunay hamiling katuyoan sa hunahuna. Kini mao unyay usa ka bag-ong kalibotan sa pagkamatarong, usa ka walay-kataposang paraiso, nga gitagna sa Usa nga makatuman ug motuman kon unsay iyang gisaad, kay ang iyang “mga pulong kasaligan ug matuod.”

[Mga Pangutana sa Pagtuon]

[Mga hulagway sa panid 20, 21]

Gituyo sa Diyos nga ang mga tawo mabuhing walay kataposan sa usa ka paraisong yuta. Kana mao gihapon ang iyang katuyoan

 [Hulagway sa panid 22]

Ang tag-iya makapanudya sa mga mangangabang nga nagadaot sa iyang balay