Katuyoan sa Diyos Hapit Nang Matuman
Bahin 7
Katuyoan sa Diyos Hapit Nang Matuman
1, 2. Nganong kita makapaneguro nga ang Diyos molihok sa pagtapos sa pagkadaotan ug pag-antos?
1 Bisan pag ang Diyos nagtugot sa pagkadili-hingpit ug pag-antos sa dugay nga panahon sa panglantaw sa tawo, dili niya itugot nga ang daotang mga kahimtang magpadayon sa panahong walay tino. Ang Bibliya nagtug-an kanato nga ang Diyos adunay linaing yugto sa panahon nga gitugot nga kining mga butanga mahitabo.
2 “Adunay tinudlong panahon alang sa tanang butang.” (Ecclesiastes 3:1) Sa dihang matapos ang panahong gitagal sa Diyos sa pagtugot sa pagkadaotan ug pag-antos, nan siya manghilabot na sa mga kahikayan sa tawo. Pagataposon niya ang pagkadaotan ug pag-antos ug pagatumanon ang iyang unang katuyoan nga ang yuta pun-on ug hingpit, malipayong tawhanong banay nga magpahimulos sa bug-os nga kalinaw ug kasegurohang ekonomikanhon taliwala sa Paraisong mga kahimtang.
Mga Paghukom sa Diyos
3, 4. Giunsa pagbatbat sa basahong Proverbio ang sangpotanan sa pagpanghilabot sa Diyos?
3 Matikdi ang pipila sa daghang tagna sa Bibliya nga nagpahayag kon unsa unyay kahulogan alang sa tawhanong banay ang pagpanghilabot sa Diyos, nga mao, ang mga sangpotanan sa iyang mga paghukom:
4 “Ang mga matul-id mao ang magapuyo sa yuta, ug ang mga walay-ikasaway mao ang mahibilin ibabaw niini. Mahitungod sa mga daotan, sila pagaputlon gikan sa yuta mismo; ug mahitungod sa mga mabudhion, sila pagalukahon gikan niini.”—Proverbio 2:21, 22.
5, 6. Giunsa pagpakita sa Salmo 37 kon unsay mahitabo sa diha nga manghilabot na ang Diyos?
5 “Ang mga mamumuhat ug daotan pagaputlon, apan ang mga nagalaom kang Jehova mao ang magapanunod sa yuta. Ug sa dili madugay, ug ang daotan mangawala na . . . Apan ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:9-11.
6 “Paglaom kang Jehova ug bantayi ang iyang dalan, ug siya magabayaw kanimo sa pagpanunod sa yuta. Sa diha nga pagaputlon ang mga daotan, ikaw makakita niana. Bantayi ang walay ikasaway ug timan-i ang matarong, kay ang kaugmaon nianang tawhana magmalinawon. Apan ang mga malapason mismo pagalaglagon sa tingob; ug ang kaugmaon sa mga daotang tawo pagaputlon.”—Salmo 37:34, 37, 38.
7. Unsang maayong tambag ang gihatag kanato sa Pulong sa Diyos?
7 Busa, tungod sa kahibulongang kaugmaon nga moabot niadtong nag-ila sa katungod sa labing-gamhanang Maglalalang sa pagmando kanato, kita giawhag: “Hinaot nga bantayan sa imong kasingkasing ang akong mga sugo, tungod kay ang gidugayon sa mga adlaw ug mga tuig sa kinabuhi ug pakigdait igadugang kanimo.” Sa pagkatinuod, idugang ang kinabuhing dayon niadtong mopili sa pagbuhat sa kabubut-on sa Diyos! Sa ingon, ang Pulong sa Diyos nagtambag kanato: “Salig kang Jehova uban sa bug-os mong kasingkasing ug ayaw pagsalig sa imong kaugalingong salabotan. Sa tanan mong mga dalan matikdi siya, ug siya mismo magatud-id sa imong mga alagianan.”—Proverbio 3:1, 2, 5, 6.
Pagmando sa Diyos Gikan sa Langit
8, 9. Pinaagi sa unsa nga pagahinloan sa Diyos kining yutaa?
8 Himoon sa Diyos ang maong paghinlo sa yuta pinaagi sa labing maayong kagamhanan nga mabatonan sa katawhan. Kini usa ka kagamhanan nga mopabanaag sa langitnong kinaadman kay kini magamando gikan sa langit ubos sa pagdumala sa Diyos. Ug kanang langitnong Gingharian magwagtang sa tanang matang sa tawhanong pagmando gikan sa yuta. Ang mga tawo dili na gayod makabaton pag-usab sa kapilian sa pagsulay pagmando nga independente sa Diyos.
9 Niining bahina ang tagna sa Daniel 2:44 nag-ingon: “Sa mga adlaw nianang mga haria [mga kagamhanan karong adlawa] ang Diyos sa langit magatukod ug usa ka gingharian [sa langit] nga dili gayod magun-ob. Ug ang gingharian mismo dili igahatag ngadto sa laing katawhan [ang mga tawo dili na gayod tugotan pag-usab sa pagmando nga independente sa Diyos]. Kini magadugmok ug magatapos niining tanang gingharian [nga karon naglungtad], ug kini mismo mobarog sa mga panahong walay katinoan.”—Tan-awa usab ang Pinadayag 19:11-21; 20:4-6.
10. Nganong makapaneguro kita nga ubos sa langitnong Gingharian sa Diyos, wala na gayod ing panglimbong sa kagamhanan?
10 Sa ingon, ang katawhan dili na gayod makabaton ug limbongang mga matang sa pagmando, kay human malaglag sa Diyos kining sistemaha, ang pagmando sa tawo nga independente kaniya dili na gayod molungtad pag-usab. Ug ang pagmando sa Gingharian gikan sa langit dili mahimong malimbongon, kay ang Diyos mao ang Tagmugna ug Magtitipig niini. Sa kapulihay, kini magamando alang sa kaayohan sa mga tawong ginsakpan niini. Ang kabubut-on sa Diyos unya pagatumanon na sa tibuok yuta ingon nga kana natuman sa langit. Kanay hinungdang si Jesus nakatudlo sa iyang mga tinun-an sa pag-ampo ngadto sa Diyos: “Umanhi ang imong gingharian. Matuman ang imong kabubut-on, ingon sa langit, mao man usab sa yuta.”—Mateo 6:10.
Unsa Kita ka Duol?
11. Asa sa Bibliya makakaplag kitag mga tagna nga motabang kanato sa pagtino kon unsa na kita ka duol sa kataposan niining sistemaha?
11 Unsa ba kita ka duol sa kataposan niining dili-makapatagbawng sistema sa mga butang ug sa sinugdan sa bag-ong kalibotan sa Diyos? Ang tagna sa Bibliya tin-awng naghatag kanato sa tubag. Pananglitan, si Jesus mismo mitagna kon unsay pangitaon aron kita makatino sa atong baroganan may labot sa, ingon sa pagpahayag niini sa Bibliya, “ang konklusyon sa sistema sa mga butang.” Kini nahitala sa Mateo mga kapitulo 24 ug 25, Marcos 13, ug Lucas 21. Gawas pa, sumala sa talaan sa 2 Timoteo kapitulo 3, si apostol Pablo mitagna nga aduna unyay yugto sa panahon nga pagatawgong “ang kataposang mga adlaw” sa dihang ang lainlaing mga panghitabo dugang magpamatuod kon diin na kita sa agos sa panahon.
12, 13. Unsay giingon ni Jesus ug ni Pablo mahitungod sa panahon sa kataposan?
12 Si Jesus miingon nga kining yugtoa sa panahon magsugod uban niining mga hitaboa: “Ang nasod motindog batok sa nasod ug ang gingharian batok sa gingharian, ug aduna unyay mga kanihit sa pagkaon ug mga linog sa sunodsunod nga dapit.” (Mateo 24:7) Ang Lucas 21:11 nagpakita nga siya mihisgot usab “sa sunodsunod nga dapit mga kamatay.” Ug siya mipasidaan, usab, sa “pag-usbaw sa pagkamalapason.”—Mateo 24:12.
13 Si apostol Pablo mitagna: “Apan hibaloi ninyo kini, nga sa kataposang mga adlaw ang mga panahon nga lisod sagubangon moabot. Kay ang mga tawo mahimong mga mahigugmaon sa ilang kaugalingon, mga mahigugmaon ug salapi, mapasigarbohon, mga mapasipalahon, mapahitas-on, masukihon sa mga ginikanan, dili mapasalamaton, dili maunongon, walay gugma nga kinaiya, dili ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, maburoton, mga mahigugmaon sa kalingawan inay kay sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini . . . Ang mga tawong daotan ug mga nagpakaaron-ingnon mosamot sa pagkadaotan, nga magalimbong ug malimbongan.”—2 Timoteo 3:1-5, 13.
14, 15. Sa unsang paagi ang mga panghitabo niining ika-20ng siglo nagpamatuod nga kita tinuod nga ania na sa kataposang mga adlaw?
14 Kana bang mga butanga nga gitagna ni Jesus ug ni Pablo nahitabo sa atong panahon? Oo, sila nagakahitabo gayod. Ang Gubat sa Kalibotan I mao ang labing grabeng gubat hangtod niadto. Kadto ang unang gubat sa kalibotan ug mao ang lisoanang punto sa modernong kasaysayan. Duyog niadtong gubata mao ang mga kanihit sa pagkaon, mga epidemya sa sakit, ug ubang mga katalagman. Kadtong mga panghitaboa sukad sa 1914 padayon maoy, sumala sa pagpahayag niana ni Jesus, “sinugdanan sa mga kasakit.” (Mateo 24:8) Sila ang sinugdan sa gitagnang yugto sa panahon nga gitawag “ang kataposang mga adlaw,” ang sinugdanan sa kataposang kaliwatan nga tugotan sa Diyos ang pagkadaotan ug pag-antos.
15 Lagmit sinati ka sa mga panghitabo sa ika-20ng siglo. Nasayod ka sa mga kasamok nga mitungha. Mga 100 ka milyong tawo ang napatay sa mga gubat. Ginatos ka milyon pang uban namatay gumikan sa kagutmanan ug sakit. Ang mga linog mikalas ug di-maihap nga mga kinabuhi. Nag-usbaw ang kawalay-pagtahod sa kinabuhi ug propiedad. Ang kahadlok sa krimen nahimong bahin sa adlaw-adlawng kinabuhi. Ang moral nga mga sukdanan wala pakabanaa. Ang hinobrang populasyon naghatag ug mga suliran nga wala masulbad. Ang polusyon nagadaot sa kalidad sa kinabuhi ug nagapameligro gani niini. Sa pagkatinuod, kita ania na sa kataposang mga adlaw sukad sa 1914 ug nagakahiduol na sa tayuktok sa mga tagna sa Bibliya maylabot sa atong panahon.
16. Unsa ka taas nga yugto sa panahon ang gisakop sa kataposang mga adlaw?
16 Unsa ka taas nga yugto kining kataposang mga adlaw? Si Jesus miingon mahitungod sa panahong makasinati sa “sinugdanan sa mga kasakit” gikan sa 1914 paunahan: “Kining kaliwatana dili gayod moagi hangtod mahitabo kining tanang butang.” (Mateo 24:8, 34-36) Busa, ang tanang mga timaan sa kataposang mga adlaw kinahanglang mahitabo sulod sa kinabuhi sa usa ka kaliwatan, ang kaliwatan sa 1914. Busa ang pipila ka tawo nga buhi na sa 1914 buhi pa unya sa diha nga matapos na kining sistemaha. Ang maong kaliwatan sa mga tawo karon tigulang na kaayo, nga nagpailang gamay nang panahon ang nahibilin una taposon sa Diyos kining sistema sa mga butang karon.
17, 18. Unsang tagna ang nagpakita nga kita duol na kaayo sa kataposan niining kalibotana?
17 Ang laing tagna nga nagapakita nga duol na kaayo ang kataposan niining sistemaha gihatag ni apostol Pablo, si kinsa mitagna: “Ang adlaw ni Jehova moabot nga sama gayod sa kawatan sa kagabhion. Sa diha nga sila magaingon: ‘Kalinaw ug kasegurohan!’ unya ang kalit nga kalaglagan modangat kanila . . . , ug sila dili gayod makaikyas.”—1 Tesalonica 5:2, 3; tan-awa usab ang Lucas 21:34, 35.
18 Karong adlawa ang Bugnawng Gubat natapos na, ug ang tibuok-kalibotang gubat tingali dili na dakong hulga. Busa ang mga nasod basin mobating sila duol na kaayo sa usa ka bag-ong kahikayan sa kalibotan. Apan sa diha nga sila mobati nga ang ilang mga paningkamot nagamalamposon, kana magkahulogan sa kaatbang sa ilang gihunahuna, kay kana mao na unya ang kataposang senyal nga duol na ang paglaglag sa Diyos niining sistemaha. Hinumdomi, ang politikanhong mga sabotsabot ug mga tratado wala magpahinabog tinuod nga mga kausaban diha sa katawhan. Kana sila wala maghimo sa mga tawo nga mahigugma sa usag usa. Ug ang mga pangulo sa kalibotan wala makapahunong sa krimen, ni sila nagahanaw sa sakit ug kamatayon. Busa ayaw ibutang ang imong pagsalig sa bisan unsang kaugmaran bahin sa tawhanong kalinaw ug kasegurohan ug maghunahuna nga kining kalibotana hapit nang magsulbad sa iyang mga suliran. (Salmo 146:3) Ang ipasabot gayod sa maong singgit sa kalinaw ug kasegurohan mao nga kining kalibotana haduol na kaayo sa iyang kataposan.
Pagwali sa Maayong Balita
19, 20. Unsang tagna maylabot sa pagwali sa kataposang mga adlaw ang atong nakita nga nagakatuman?
19 Ang laing tagna nga nagpakitang kita ania na sa kataposang mga adlaw sukad sa 1914 mao ang gihatag ni Jesus: “Ang maayong balita kinahanglang igawali una sa tanang nasod.” (Marcos 13:10) O sumala sa pagkahubad niana sa Mateo 24:14: “Kining maayong balita sa gingharian igawali sa tibuok gipuy-ang yuta ingon nga pamatuod sa tanang nasod; ug unya ang kataposan moabot.”
20 Karong adlawa nga labaw sukad masukad sa kasaysayan, ang maayong balita sa kataposan niining kalibotana ug sa umaabot Paraisong bag-ong kalibotan ubos sa Gingharian sa Diyos ginawali na sa tibuok yuta. Pinaagi ni kinsa? Pinaagi sa minilyong mga Saksi ni Jehova. Sila nagawali diha sa matag nasod sa yuta.
21, 22. Unsa, ilabina, ang nagpaila sa mga Saksi ni Jehova ingong matuod nga mga Kristohanon?
21 Dugang pa sa ilang pagwali mahitungod sa Gingharian sa Diyos, ang mga Saksi ni Jehova nagagawi sa paagi nga magpaila kanila ingong matuod nga mga sumusunod ni Kristo, kay siya nagpahayag: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” Busa, ang mga Saksi ni Jehova nahiusa sa tibuok-yutang panag-igsoonay tungod sa dili-mabugtong bugkos sa gugma.—Juan 13:35; tan-awa usab ang Isaias 2:2-4; Colosas 3:14; Juan 15:12-14; 1 Juan 3:10-12; 4:20, 21; Pinadayag 7:9, 10.
22 Ang mga Saksi ni Jehova nagtuo sa giingon sa Bibliya: “Ang Diyos walay pinalabi, apan sa matag nasod ang tawo nga nahadlok kaniya ug nagabuhat sa pagkamatarong dalawaton kaniya.” (Buhat 10:34, 35) Giisip nila ang ilang isigka-Saksi sa tanang nasod ingong espirituwal nga mga igsoong lalaki ug babaye, walay sapayan sa rasa o kolor. (Mateo 23:8) Ug ang kamatuoran nga ang maong tibuok-yutang panag-igsoonay naglungtad sa kalibotan karong adlawa modugang sa ebidensiya nga ang katuyoan sa Diyos duol nang matuman.
[Mga Pangutana sa Pagtuon]
[Hulagway sa panid 26]
Ang hingpit nga langitnong Gingharian sa Diyos mao ra unya ang bugtong kagamhanan sa bag-ong kalibotan
