Mabuhing Walay Kataposan sa Yutang Paraiso
Bahin 8
Mabuhing Walay Kataposan sa Yutang Paraiso
1, 2. Sama unya sa unsa ang kinabuhi ubos sa pagmando sa Gingharian sa Diyos?
1 Sama sa unsa unya ang kinabuhi sa diha nga ang Diyos magahanaw sa pagkadaotan ug pag-antos gikan sa yuta ug magapasulod sa iyang bag-ong kalibotan ubos sa mahigugmaong pagmando sa iyang langitnong Gingharian? Ang Diyos nagsaad nga ‘iyang pagabuksan ang iyang kamot ug pagatagbawon ang tinguha sa tanang buhing butang.’—Salmo 145:16.
2 Unsa ba ang imong angayang mga tinguha? Dili ba ang malipayong kinabuhi, mapuslanong trabaho, materyal nga kadagaya, maanindot nga palibot, pakigdait taliwala sa tanang mga katawhan, ug kagawasan gikan sa inhustisya, sakit, pag-antos, ug kamatayon? Ug unsa na man ang malipayong espirituwal nga panglantaw? Kanang tanang butang haduol nang matuman ubos sa pagmando sa Gingharian sa Diyos. Matikdi ang giingon sa mga tagna sa Bibliya mahitungod sa kahibulongang mga panalangin nga moabot nianang bag-ong kalibotan.
Katawhang May Hingpit nga Pakigdait
3-6. Unsang pasalig ang atong nabatonan nga ang mga tawo makabaton unyag kalinaw sa bag-ong kalibotan?
3 “[Ang Diyos] nagapahunong sa mga gubat hangtod sa kinatumyan sa yuta. Gibali niya ang pana ug gibunggo ang bangkaw; ang mga karro [sa gubat] iyang gisunog sa kalayo.”—Salmo 46:9.
4 “Pagasalsalon nila ang ilang mga espada ngadto sa mga punta sa daro ug ang ilang mga bangkaw ngadto sa mga galab. Ang nasod dili mobakyaw sa espada batok sa nasod, ni sila makakat-on pa sa gubat.”—Isaias 2:4.
5 “Ang mga maaghop magapanunod sa yuta, ug sila makakaplag sa ilang tumang kalipay sa kadagaya sa pakigdait.”—Salmo 37:11.
6 “Ang tibuok yuta nakapahulay, nga nahigawas sa kasamok. Ang mga tawo nagmasadyaon sa mga awit.”—Isaias 14:7.
Tawo ug mga Hayop Managdait
7, 8. Unsang panagdait ang anaa unya tali sa mga tawo ug sa mga hayop?
7 “Ang lobo mopuyo gayod sa makadiyut uban sa nating karnero, ug ang leopardo molubog uban sa nating kanding, ug ang nating baka ug ang balhiboong nating leyon ug ang linaming nga mananap manag-ipon sila; ug ang usa ka batang lalaki maoy magamando kanila. Ug ang baka ug ang uso managsibsib; ang ilang mga nati manag-ipon sa paglubog. Ug bisan ang leyon mokaon ug kompay sama sa torong baka. Ug ang bata nga masuso magadula sa lungag sa kobra; ug ang batang linutas mokuot sa lungag sa kahayag sa usa ka halas nga malala. Dili sila mangdaot o manglaglag.”—Isaias 11:6-9.
8 “Alang kanila himoon ko ang usa ka pakigtugon niadtong adlawa maylabot sa mapintas nga mananap sa kapatagan ug sa nagalupad nga linalang sa kalangitan ug sa nagakamang nga butang sa yuta . . . Pahigdaon ko sila sa kasegurohan.”—Oseas 2:18.
Hingpit nga Panglawas, Walay-Kataposang Kinabuhi
9-14. Batbata ang mga kahimtang sa panglawas sa bag-ong kalibotan.
9 “Nianang panahona ang mga mata sa mga buta mangabuka, ug ang mga igdulongog mismo sa mga bungol makadungog. Nianang panahona ang bakol mokatkat sama sa usa ka lagsaw, ug ang dila sa amang mosinggit sa kalipay.”—Isaias 35:5, 6.
10 “Pagapahiran sa [Diyos] ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa.”—Pinadayag 21:4.
11 “Walay molupyo ang magaingon: ‘Ako masakiton.’”—Isaias 33:24.
12 “Ang iyang unod mabag-o labi pa kay sa unod sa bata; siya mahabalik sa mga adlaw sa iyang pagkabatan-on.”—Job 33:25.
13 “Ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”—Roma 6:23.
14 “Ang tanan nga magatuo kaniya . . . makabaton ug kinabuhing walay kataposan.”—Juan 3:16.
Ang mga Patay Mapasig-uli sa Kinabuhi
15-17. Unsa ang paglaom niadtong nangamatay na?
15 “Adunay pagkabanhaw sa mga matarong ug sa mga dili-matarong.”—Buhat 24:15.
16 “Ang takna nagasingabot sa dihang ang tanan nga anaa sa handumanang mga lubnganan [panumdoman sa Diyos] makabati sa iyang tingog ug manggula sila.”—Juan 5:28, 29.
17 “Ang dagat mihatag sa mga patay nga anaa niini, ug ang kamatayon ug ang Hades, [ang lubnganan] mihatag sa mga patay nga anaa kanila.”—Pinadayag 20:13.
Yuta, Usa ka Paraiso sa Kadagaya
18-22. Ang tibuok yuta mabalhin ngadto sa unsa?
18 “Aduna unyay pag-ulan sa mga panalangin. Ug ang kahoy sa kapatagan mohatag sa iyang bunga, ug ang yuta mismo mohatag sa iyang abot, ug sila magapuyo sa ilang yuta diha sa kasegurohan.”—Ezekiel 34:26, 27.
19 “Ang yuta mismo mohatag gayod sa iyang bunga; ang Diyos, ang atong Diyos, magapanalangin kanato.”—Salmo 67:6.
20 “Ang kamingawan ug ang mala nga yuta magasadya, ug ang desyertong patag magmalipayon ug mamulak sama sa rosas.”—Isaias 35:1.
21 “Ang kabukiran ug ang kabungtoran mismo magmasadyaon sa atubangan nimo uban ang pag-awit, ug ang kakahoyan mismo sa kapatagan mopagakpak sa ilang mga kamot. Puli sa katunokan ang kahoy nga haya motubo. Puli sa sampinit ang kahoy nga arayan motubo.”—Isaias 55:12, 13.
22 “Ikaw magauban kanako sa Paraiso.”—Lucas 23:43.
Maayong Balay Alang sa Tanan
23, 24. Unsang pasalig ang atong nabatonan nga aduna unyay igong maayong balay alang sa tanan?
23 “Sila magatukod gayod ug mga balay ug magapuyo kanila . . . Sila dili magatukod ug lain ang magapuyo; sila dili magatanom ug lain ang magakaon. . . . Ang buhat sa ilang mga kamot pagapahimuslan sa bug-os sa akong mga pinili. Sila dili magabuhat sa walay kapuslanan, ni manganak alang sa kagul-anan.”—Isaias 65:21-23.
24 “Sila magalingkod gayod, ang matag usa ilalom sa iyang parras ug ilalom sa iyang kahoy nga igos, ug walay magapakurog kanila.”—Miqueas 4:4.
Ikaw Mabuhing Walay Kataposan sa Paraiso
25. Unsang kahibulongang palaaboton ang anaa kanato?
25 Kahibulongan gayod nga palaaboton! Pagkatinuod ang katuyoan nga maangkon karon sa mga kinabuhi sa dihang nahitagik sa lig-ong paglaom nga sa bag-ong kalibotan sa Diyos ang tanang suliran karong adlawa mahimo nang mga butang sa kagahapon sa walay kataposan! “Ang unang mga butang dili na pagahinumdoman, ni motungha pa sa kasingkasing.” (Isaias 65:17) Ug pagkamakalipay ang pagkahibalo nga ang kinabuhi unya mahimong walay kataposan: “Pagalamyon sa [Diyos] ang kamatayon sa walay kataposan.”—Isaias 25:8.
26. Unsa ang yawi ngadto sa pagkabuhing walay kataposan sa bag-ong kalibotan sa Diyos?
26 Buot mo ba nga mabuhing walay kataposan nianang Paraisong bag-ong kalibotan nga karon haduol na kaayo? ‘Unsay kinahanglan nga buhaton ko aron maangkon ang pag-uyon sa Diyos sa kataposan niining kalibotana ug magpadayon nga buhi ngadto sa iyang bag-ong kalibotan?’ tingali mangutana ka. Kinahanglang buhaton nimo kon unsay gipaila ni Jesus diha sa usa ka pag-ampo ngadto sa Diyos: “Kini nagkahulogan sa kinabuhing walay kataposan, ang ilang pagbaton ug kahibalo kanimo, ang bugtong matuod nga Diyos, ug kaniya nga imong gipadala, si Jesu-Kristo.”—Juan 17:3.
27. Unsay kinahanglang imong buhaton aron makaambit sa katuyoan sa Diyos?
27 Busa, manag-iyag usa ka Bibliya, ug susiha kon tinuod ba ang imong nabasa niining brosyura. Pangitaa ang uban nga nagtuon ug nagtudlo niining mga kamatuoran sa Bibliya. Bulag sa salingkapawng mga relihiyon nga nagtudlo ug nagbuhat sa mga butang nga supak sa Bibliya. Sayra kon sa unsang paagi ikaw, uban sa minilyon pa nga nagabuhat na sa kabubut-on sa Diyos, makaambit sa katuyoan sa Diyos nga ang mga tawo mabuhing walay kataposan sa paraisong yuta. Ug ibutang sa kasingkasing ang gipahayag sa dinasig nga Pulong sa Diyos mahitungod sa umaabot nga duol na: “Ang kalibotan mahanaw ug mao usab ang pangibog niini, apan siya nga nagatuman sa kabubut-on sa Diyos magapabilin sa walay kataposan.”—1 Juan 2:17.
[Mga Pangutana sa Pagtuon]
[Hulagway sa panid 31]
Ang katuyoan sa Diyos nga ipasig-uli ang yutan-ong paraiso duol nang matuman
