Leksiyon 9

Ang mga Alagad sa Diyos Kinahanglang Mahinlo

Nganong kinahanglang kita mahinlo sa tanang paagi? (1)

Unsay kahulogan nga mahinlo sa espirituwal? (2) mahinlo sa moral? (3) mahinlo sa hunahuna? (4) mahinlo sa lawas? (5)

Unsang mga matang sa mahugawng sinultihan ang angay natong likayan? (6)

1. Si Jehova nga Diyos mahinlo ug balaan. Gidahom niya ang iyang mga magsisimba nga magpabiling mahinlo​—sa espirituwal, sa moral, sa hunahuna, ug sa lawas. (1 Pedro 1:16) Gikinahanglan ang dakong paningkamot sa pagpabiling mahinlo sa panan-aw sa Diyos. Nagpuyo kita sa usa ka mahugawng kalibotan. Kinahanglan usab nga makigbisog kita batok sa atong kaugalingong mga hilig sa pagbuhat ug daotan. Apan kinahanglang dili kita moangka.

2. Espirituwal nga Kahinlo: Kon gusto natong mag-alagad kang Jehova, kita dili makapadayon sa pagsunod sa bisan unsa sa mga pagtulon-an o mga kostumbre sa bakak nga relihiyon. Kinahanglang mogawas kita sa bakak nga relihiyon ug dili magsuportar niana sa bisan unsang paagi. (2 Corinto 6:​14-18; Pinadayag 18:4) Sa dihang kita nakakat-on sa kamatuoran bahin sa Diyos, kinahanglang magbantay kita nga dili mapahisalaag sa mga tawo nga nagtudlog kabakakan.​—2 Juan 10, 11.

3. Moral nga Kahinlo: Gusto ni Jehova nga ang iyang mga magsisimba magagawi ingong matuod nga mga Kristohanon sa tanang panahon.  (1 Pedro 2:12) Iyang makita ang tanan nga atong gibuhat, bisan ang mga butang nga gibuhat nato sa tago. (Hebreohanon 4:13) Kinahanglang likayan nato ang seksuwal nga imoralidad ug ubang mahugawng mga buhat niining kalibotana.​—1 Corinto 6:​9-11.

4. Kahinlo sa Hunahuna: Kon atong pun-on ang atong mga hunahuna ug mahinlo, lunsayng mga panghunahuna, ang atong panggawi mahimo usab nga mahinlo. (Filipos 4:8) Apan kon kita mamalandong sa mahugawng mga butang, mosangpot kini sa tuman-kadaotang mga binuhatan. (Mateo 15:​18-20) Angay nga likayan nato ang mga matang sa kalingawan nga makapahugaw sa atong mga hunahuna. Mapuno nato ang atong mga kaisipan sa mahinlong mga panghunahuna pinaagi sa pagtuon sa Pulong sa Diyos.

5. Kahinlo sa Lawas: Tungod kay sila naghawas sa Diyos, ang mga Kristohanon angay nga maghupot sa ilang mga lawas ug sapot nga mahinlo. Angay nga atong hugasan ang atong mga kamot human sa paggamit sa kasilyas, ug angay nga atong hugasan kana sa dili pa mangaon o mokupot ug pagkaon. Kon kamo walay tukmang hiposanan sa hugaw, ang hugaw sa tawo kinahanglang ilubong. (Deuteronomio 23:​12, 13) Ang paghupot ug mahinlong lawas makatabang sa kahimsog. Ang balay sa usa ka Kristohanon kinahanglang hapsay ug hinlo sa sulod ug sa gawas. Kinahanglang kita mainila diha sa komunidad ingong usa ka maayong panig-ingnan.

6. Mahinlong Sinultihan: Ang mga alagad sa Diyos kinahanglang mosulti kanunay sa kamatuoran. Ang mga bakakon dili makasulod sa Gingharian sa Diyos. (Efeso 4:25; Pinadayag 21:8) Ang mga Kristohanon dili mogamit ug daotang sinultihan. Sila dili mamati o moasoy sa malaw-ay nga mga pasiaw o mahugawng mga estorya. Tungod sa ilang hinlong sinultihan, sila mailhan nga lahi diha sa trabahoan o sa tunghaan ug sa silinganan.​—Efeso 4:​29, 31; 5:3.

[Mga hulagway sa panid 18, 19]

Ang mga alagad sa Diyos kinahanglang mahinlo sa tanang bahin