Leksiyon 2

Kinsa ang Diyos?

Kinsa ang matuod nga Diyos, ug unsay iyang ngalan? (1, 2)

Unsang matang sa lawas ang iyang nabatonan? (3)

Unsa ang iyang talagsaong mga hiyas? (4)

Angay bang mogamit kitag mga imahen ug mga simbolo sa atong pagsimba kaniya? (5)

Unsa ang duha ka paagi nga kita makakat-on bahin sa Diyos? (6)

1. Daghang butang ang ginasimba sa mga tawo. Apan gisuginlan kita sa Bibliya nga usa lamang ang MATUOD nga Diyos. Iyang gilalang ang tanang butang sa langit ug sa yuta. Tungod kay iya kitang gihatagag kinabuhi, siya lamang ang Usa nga atong pagasimbahon.​—1 Corinto 8:​5, 6; Pinadayag 4:11.

2. Ang Diyos adunay daghang titulo apan usa lamang ka ngalan. Kanang ngalana maoy JEHOVA. Sa kadaghanang Bibliya, ang ngalan sa Diyos gikuha ug giilisan sa mga titulo nga GINOO o DIYOS. Apan sa dihang ang Bibliya gisulat, ang ngalang Jehova makitag 7,000 ka beses diha niana!​—Exodo 3:15; Salmo 83:18.

3. Si Jehova adunay usa ka lawas, apan dili kini sama sa atoa. “Ang Diyos maoy Espiritu,” matod sa Bibliya. (Juan 4:24) Ang espiritu maoy usa ka matang sa kinabuhi nga labi pang hataas kay sa atoa. Walay  tawo ang nakakita sukad sa Diyos. Si Jehova nagpuyo sa langit, apan makakita siya sa tanang butang. (Salmo 11:​4, 5; Juan 1:18) Apan, unsa ba ang balaang espiritu? Dili kini usa ka persona nga sama sa Diyos. Hinunoa, kini mao ang aktibong puwersa sa Diyos.​—Salmo 104:30.

4. Gipadayag kanato sa Bibliya ang personalidad ni Jehova. Gipakita niini nga ang iyang talagsaong mga hiyas mao ang gugma, hustisya, kaalam, ug gahom. (Deuteronomio 32:4; Job 12:13; Isaias 40:26; 1 Juan 4:8) Ang Bibliya nagsugilon kanato nga siya usab maoy maluluy-on, maluloton, mapinasayloon, mahinatagon, ug mapailobon. Kita, samag masinugtanong mga anak, angayng maningkamot sa pagsundog kaniya.​—Efeso 5:​1, 2.

5. Angay ba nga moyukbo o moampo kita ngadto sa mga imahen, mga hulagway, o mga simbolo diha sa atong pagsimba? Dili! (Exodo 20:​4, 5) Si Jehova nagsugo nga siya lamang ang atong pagasimbahon. Dili niya ipaambit ang iyang himaya kang bisan kinsa o sa bisan unsa. Ang mga imahen walay gahom sa pagtabang kanato.​—Salmo 115:​4-8; Isaias 42:8.

6. Sa unsang paagi nga mas makaila kita sa Diyos? Ang usa ka paagi mao ang pagpaniid sa mga butang nga iyang nalalang ug pagpalandong nga halalom mahitungod sa ginasugilon niini kanato. Ang kalalangan sa Diyos nagpadayag kanato nga siya adunay dakong gahom ug kaalam. Makita nato ang iyang gugma diha sa tanan nga iyang gibuhat. (Salmo 19:​1-6; Roma 1:20) Ang laing paagi nga makakat-on kita bahin sa Diyos maoy pinaagi sa pagtuon sa Bibliya. Diha niana siya nagsugilon kanato ug labi pang daghan mahitungod sa kon unsang matanga siya sa Diyos. Siya nagsugilon usab kanato mahitungod sa iyang katuyoan ug kon unsa ang gusto niyang ipabuhat kanato.​—Amos 3:7; 2 Timoteo 3:​16, 17.

[Mga hulagway sa panid 5]

Kita makakat-on mahitungod sa Diyos gikan sa kalalangan ug gikan sa Bibliya