Kinsa ang Yawa?
Leksiyon 4
Kinsa ang Yawa?
Satanas nga Yawa—diin siya gikan? (1, 2)
Sa unsang paagi si Satanas nagpahisalaag sa mga tawo? (3-7)
Nganong angay nimong suklan ang Yawa? (7)
1. Ang pulong “yawa” nagkahulogan sa usa nga mosultig tuman-kadaotan nga kabakakan bahin sa laing persona. Ang “Satanas” nagkahulogan nga kaaway o magsusupak. Kini sila mga termino nga gingalan sa pangunang kaaway sa Diyos. Sa sinugdan, usa siya ka hingpit nga manulonda sa langit uban sa Diyos. Ugaling, sa ulahi hilabihan ang iyang paghunahuna sa iyang kaugalingon ug buot ang pagsimba nga takos nga iya lamang sa Diyos.—Mateo 4:8-10.
2. Ang maong manulonda, si Satanas, nakigsulti kang Eva pinaagi sa usa ka halas. Pinaagi sa pagsulti kaniyag kabakakan, iyang gipahinabo nga siya misupak sa Diyos. Sa ingon si Satanas miatake sa gitawag nga “pagkasoberano” sa Diyos, o posisyon ingong Labing Hataas. Si Satanas nagduhaduha kon ang Diyos nagmando ba sa matarong nga paagi ug sa kaayohan sa Iyang mga ginsakpan. Si Satanas nagpatungha usab sa mga pagduhaduha kon may tawo ba nga magpabiling maunongon ngadto sa Diyos. Pinaagi sa paghimo niini, gihimo ni Satanas ang iyang kaugalingon nga kaaway sa Diyos. Mao nga gitawag siyag Satanas nga Yawa.—Genesis 3:1-5; Job 1:8-11; Pinadayag 12:9.
3. Gipaningkamotan ni Satanas nga linglahon ang mga tawo aron mosimba kaniya. (2 Corinto 11:3, 14) Usa ka paagi nga iyang gipahisalaag ang mga tawo maoy pinaagi sa bakak nga relihiyon. Kon ang usa ka relihiyon nagtudlog kabakakan mahitungod sa Diyos, sa pagkamatuod nagaalagad kini sa katuyoan ni Satanas. (Juan 8:44) Ang mga tawo nga mga membro sa bakak nga mga relihiyon mahimong sinserong nagtuo nga nagasimba sila sa matuod nga Diyos. Apan sa tinuoray nagasimba sila kang Satanas. Siya mao ‘ang diyos niini nga kalibotan.’—2 Corinto 4:4.
4. Ang espiritismo maoy laing paagi nga si Satanas nagpailalom sa mga tawo sa iyang gahom. Mahimong mosangpit sila sa mga espiritu sa pagpanalipod kanila, pagdaot sa uban, pagtagna sa umaabot, o paghimog mga milagro. Si Satanas mao ang tuman-kadaotang puwersa nga nagpaluyo niining tanan nga buhat. Aron pahimut-an ang Diyos, kinahanglan nga dili kita makiglangkit sa espiritismo.—Deuteronomio 18:10-12; Buhat 19:18, 19.
5. Si Satanas nagpahisalaag usab sa mga tawo pinaagi sa hingaping garbo tungod sa rasa ug sa pagsimba sa politikanhong mga organisasyon. Gibati sa pipila nga labaw ang ilang nasod o rasa kay sa uban. Apan dili kana tinuod. (Buhat 10:34, 35) Nagsalig ang ubang mga tawo sa politikanhong mga organisasyon aron masulbad ang mga suliran sa tawo. Sa pagbuhat sa ingon, ginasalikway nila ang Gingharian sa Diyos. Kini ang bugtong solusyon sa atong mga suliran.—Daniel 2:44.
6. Ang laing paagi nga nagpahisalaag si Satanas sa mga tawo maoy pinaagi sa pagtental kanila pinaagig makasasalang mga tinguha. Si Jehova nagsugo nga atong likayan ang makasasalang mga buhat tungod kay nasayod siya nga kana makadaot kanato. (Galacia 6:7, 8) Hayan buot sa pipila ka tawo nga moduyog ka kanila sa maong mga buhat. Apan, hinumdomi nga si Satanas gayod ang buot magpabuhat kanimo nianang mga butanga.—1 Corinto 6:9, 10; 15:33.
7. Mahimong gamiton ni Satanas ang paglutos o pagsupak aron ikaw mobiya ni Jehova. Mahimong masuko kaayo ang imong pipila ka minahal tungod kay nagtuon ka sa Bibliya. Ang uban mahimong motamay pa kanimo. Apan kinsay nautangan nimo sa imong kinabuhi? Gusto ni Satanas nga hadlokon ka aron mohunong ka sa pagkakat-on bahin kang Jehova. Ayawg tugoti nga si Satanas ang makadaog! (Mateo 10:34-39; 1 Pedro 5:8, 9) Pinaagi sa pagsukol sa Yawa, makapalipay ka kang Jehova ug makapakita nga gilabanan nimo ang Iyang pagkasoberano.—Proverbio 27:11.
[Mga hulagway sa panid 9]
Ang bakak nga relihiyon, espiritismo, ug nasyonalismo nagpahisalaag sa mga tawo
[Hulagway sa panid 9]
Sukli si Satanas pinaagi sa pagpadayon sa pagkakat-on bahin kang Jehova