Leksiyon 10

Mga Naandang Buhat nga Gidumtan sa Diyos

Unsay imong pagbati bahin sa mga butang nga giingon sa Diyos maoy daotan? (1)

Unsang mga matang sa seksuwal nga panggawi ang daotan? (2)

Unsay angay nga pag-isip sa usa ka Kristohanon sa pagbakak? (3) pagsugal? (3) pagpangawat? (3) kapintasan? (4) espiritismo? (5) paghuboghubog? (6)

Sa unsang paagi ang usa ka tawo makabulag sa daotang mga buhat? (7)

1. Gihigugma sa mga alagad sa Diyos kon unsay maayo. Apan kinahanglang makakat-on usab sila sa pagdumot kon unsay daotan. (Salmo 97:10) Kana nagkahulogan sa paglikay sa pila ka naandang buhat nga gidumtan sa Diyos. Unsay pipila sa maong mga naandang buhat?

2. Pakighilawas: Ang pakigsekso una maminyo, pagpanapaw, bestialidad, pag-unay, ug homoseksuwalidad ngatanan maoy seryosong mga sala batok sa Diyos. (Levitico 18:6; Roma 1:​26, 27; 1 Corinto 6:​9, 10) Kon ang usa ka parisan dili kasado apan nagpuyopuyo, angay nga magbulag sila o kaha magminyo nga legal.​—Hebreohanon 13:4.

3. Pagbakak, Pagsugal, Pagpangawat: Si Jehova nga Diyos dili makabakak. (Tito 1:2) Ang mga tawo nga buot sa iyang pag-uyon kinahanglang molikay sa pagbakak. (Proverbio 6:​16-19; Colosas 3:​9, 10) Ang matag matang sa sugal namansahan sa kadalo. Busa ang mga Kristohanon dili moapil sa bisan unsang matang sa sugal, sama sa mga loteriya, karera sa kabayo, ug binggo. (Efeso 5:​3-5) Ug ang mga Kristohanon dili mangawat. Sila dili mopalit ug kinawat nga  butang kon nahibalo sila o mokuhag mga butang nga walay permiso.​—Exodo 20:15; Efeso 4:28.

4. Mga Pagsilaob sa Kasuko, Kapintasan: Ang di-mapugngang kasuko mahimong mosangpot sa mapintasong mga buhat. (Genesis 4:​5-8) Ang usa ka tawong mapintason dili mahimong higala sa Diyos. (Salmo 11:5; Proverbio 22:​24, 25) Daotan ang pagpanimalos o pagbalos ug daotan alang sa daotang mga butang nga tingali buhaton sa uban kanato.​—Proverbio 24:29; Roma 12:​17-21.

5. Mga Pagsalamangka ug Espiritismo: Ang pila ka tawo modangop sa gahom sa mga espiritu aron sulayan pag-ayo ang mga sakit. Ipabarang sa uban ang ilang mga kaaway aron sila magsakit o aron patyon pa gani sila. Ang gahom nga nagpaluyo niining tanang naandang buhat mao si Satanas. Busa ang mga Kristohanon kinahanglang dili makigbahin sa bisan hain niini. (Deuteronomio 18:​9-13) Ang pagpabiling suod kang Jehova mao ang labing maayong panalipod batok sa mga pamarang nga tingali ipahamtang sa uban kanato.​—Proverbio 18:10.

6. Paghuboghubog: Dili daotan ang pag-inom ug diyutayng bino, serbesa, o ubang alkoholikong ilimnon. (Salmo 104:15; 1 Timoteo 5:23) Apan ang kusog nga pag-inom ug paghuboghubog maoy daotan sa panan-aw sa Diyos. (1 Corinto 5:​11-13; 1 Timoteo 3:8) Ang pag-inom ug sobra kaayo makadaot sa imong panglawas ug makabungkag sa inyong pamilya. Kini makapahinabo usab nga ikaw daling madaog sa ubang mga tentasyon.​—Proverbio 23:​20, 21, 29-35.

7. Ang mga tawo nga nagbuhat sa mga butang nga giingon sa Diyos nga daotan “dili makapanunod sa gingharian sa Diyos.” (Galacia 5:​19-21) Kon gihigugma mo gayod ang Diyos ug buot nga pahimut-an siya, ikaw makabulag sa maong mga naandang buhat. (1 Juan 5:3) Kat-oni ang pagdumot sa kon unsay giingon sa Diyos nga daotan. (Roma 12:9) Makig-uban sa mga tawo nga adunay diyosnong mga batasan. (Proverbio 13:20) Ang hamtong nga Kristohanong mga kauban mahimong tinubdan sa tabang. (Santiago 5:14) Labaw sa tanan, salig sa tabang sa Diyos pinaagi sa pag-ampo.​—Filipos 4:​6, 7, 13.

[Mga hulagway sa panid 20, 21]

Gidumtan sa Diyos ang paghuboghubog, pagpangawat, pagsugal, ug mapintasong mga buhat