Leksiyon 12

Pagpakitag Pagtahod Alang sa Kinabuhi ug sa Dugo

Unsay angay natong pag-isip sa kinabuhi? (1) aborsiyon? (1)

Sa unsang paagi ipakita sa mga Kristohanon nga sila mahunahunaon bahin sa pagkalayo sa kapeligrohan? (2)

Daotan ba ang pagpatayg mga hayop? (3)

Unsay pipila ka naandang buhat nga wala magpakitag pagtahod alang sa kinabuhi? (4)

Unsa ang balaod sa Diyos bahin sa dugo? (5)

Naglakip ba kini sa mga abuno sa dugo? (6)

1. Si Jehova ang Tinubdan sa kinabuhi. Ang tanang buhing butang utangan sa Diyos sa ilang kinabuhi. (Salmo 36:9) Ang kinabuhi sagrado alang sa Diyos. Bisan ang kinabuhi sa wala-pa-matawong bata sulod sa tiyan sa inahan niini maoy bililhon kang Jehova. Ang pagpatay nga tinuyo sa maong nagatubong bata maoy daotan sa mga mata sa Diyos.​—Exodo 21:​22, 23; Salmo 127:3.

2. Ang matuod nga mga Kristohanon mahunahunaon bahin sa pagkalayo sa kapeligrohan. Ilang tinoon nga dili peligroso ang ilang mga sakyanan ug ilang mga balay. (Deuteronomio 22:8) Ang mga alagad sa Diyos dili magpameligro nga way-hinungdan sa ilang mga kinabuhi tungod lamang sa kalingawan o kaukyab. Busa dili sila mosalmot sa mapintasong mga esport nga tinuyong modaot sa ubang mga tawo. Molikay sila sa kalingawan nga modasig sa kapintasan.​—Salmo 11:5; Juan 13:35.

 3. Ang kinabuhi sa hayop sagrado usab alang sa Maglalalang. Ang usa ka Kristohanon mahimong mopatay ug mga hayop aron itagana ang pagkaon ug sapot o panalipdan ang iyang kaugalingon batok sa sakit ug kapeligrohan. (Genesis 3:21; 9:3; Exodo 21:28) Apan ang pagdagmal sa mga hayop o pagpatay kanila alang lamang sa esport o kalingawan maoy daotan.​—Proverbio 12:10.

4. Ang pagtabako, pagmama, ug paggamit ug mga droga alang sa kalingawan maoy dili angay sa mga Kristohanon. Kining mga bisyoha daotan tungod kay (1) kini maghimo kanato nga mga ulipon niini, (2) kini magdaot sa atong mga lawas, ug (3) kini mahugaw. (Roma 6:19; 12:1; 2 Corinto 7:1) Mahimong lisod kaayo ang paghunong sa maong mga bisyo. Apan kinahanglang himoon nato kana aron makapahimuot kang Jehova.

5. Ang dugo sagrado usab sa mga mata sa Diyos. Ang Diyos nag-ingon nga ang kalag, o kinabuhi, anaa sa dugo. Busa daotan ang pagkaon ug dugo. Daotan usab ang pagkaon ug karne sa hayop nga wala mapaagasig dugo sa tukmang paagi. Kon ang usa ka hayop gituok o namatay sa lit-ag, dili kini pagakan-on. Kon kini gibangkaw o gipusil, kinahanglang paagasan dayon kini sa dugo kon kaonon kini.​—Genesis 9:​3, 4; Levitico 17:​13, 14; Buhat 15:​28, 29.

6. Daotan ba ang pagpaabunog dugo? Hinumdomi, si Jehova nagbaod nga molikay kita sa dugo. Kini nagkahulogan nga kinahanglang dili nato ipasulod sa atong mga lawas sa bisan unsang paagi ang dugo sa ubang mga tawo o bisan ang atong kaugalingong dugo nga gipondo. (Buhat 21:25) Busa ang matuod nga mga Kristohanon dili magpaabuno ug dugo. Sila modawat sa ubang matang sa pagtambal, sama sa pagpaabuno sa dili-dugo nga mga produkto. Buot nila nga mabuhi, apan sila dili mosulay sa pagluwas sa ilang kinabuhi pinaagi sa paglapas sa mga balaod sa Diyos.​—Mateo 16:25.

[Mga hulagway sa panid 25]

Aron makapahimuot sa Diyos, kinahanglang molikay kita sa mga abuno sa dugo, mahugawng mga bisyo, ug way-hinungdang mga riyesgo