Leksiyon 15

Pagtabang sa Uban sa Pagbuhat sa Kabubut-on sa Diyos

Nganong sultihan pa man ang uban bahin sa imong nakat-onan? (1)

Kinsa ang imong kapaambitan sa maayong balita? (2)

Unsay epekto sa imong panggawi diha sa uban? (2)

Kanus-a ka makasangyaw uban sa lokal nga kongregasyon? (3)

1. Sa pagkakaron, daghan nang maayong mga butang ang imong nakat-onan gikan sa Bibliya. Kining kahibaloa angay nga motultol kanimo sa pag-ugmad sa Kristohanong personalidad. (Efeso 4:​22-24) Ang maong kahibalo kinahanglanon aron makabaton ka ug kinabuhing dayon. (Juan 17:3) Ugaling, kinahanglan usab nga ang uban makadungog sa maayong balita aron sila maluwas usab. Ang tanang matuod nga Kristohanon kinahanglang magsangyaw ngadto sa uban. Sugo kini sa Diyos.​—Roma 10:10; 1 Corinto 9:16; 1 Timoteo 4:16.

2. Makasugod ka pinaagi sa pagpaambit niadtong duol kanimo sa maayong mga butang nga imong nakat-onan. Isulti kana ngadto sa imong pamilya, mga higala, mga kauban sa tunghaan, ug mga kauban sa trabaho. Magmaluluton ug magmapailobon sa imong pagbuhat niana. (2 Timoteo 2:​24, 25) Hinumdomi nga ang mga tawo sagad motan-aw sa panggawi sa usa ka tawo nga labaw pa kay sa mamati sila sa iyang ginasulti. Busa ang imong maayong panggawi basin makadani sa uban sa pagpamati sa mensahe nga imong gisulti kanila.​—Mateo 5:16; 1 Pedro 3:​1, 2, 16.

3. Sa nahaigong panahon, mahimong makuwalipikado ka nang mosugod sa pagsangyaw kauban sa lokal nga kongregasyon sa mga Saksi ni Jehova. Usa kini ka hinungdanong tikang sa imong pag-uswag. (Mateo 24:14) Pagkadako unyang kalipay kon makatabang ka sa laing tawo nga mahimong usa ka alagad ni Jehova ug makabatog kinabuhing dayon!​—1 Tesalonica 2:​19, 20.