Leksiyon 8

Pamilyahanong Kinabuhi nga Makapahimuot sa Diyos

Unsay posisyon sa bana diha sa pamilya? (1)

Unsay angay nga pagtagad sa usa ka bana sa iyang asawa? (2)

Unsay mga responsabilidad sa usa ka amahan? (3)

Unsay papel sa asawa diha sa pamilya? (4)

Unsay gikinahanglan sa Diyos gikan sa mga ginikanan ug sa mga anak? (5)

Unsay panghunahuna sa Bibliya bahin sa pagbulag ug diborsiyo? (6, 7)

1. Ang Bibliya nag-ingon nga ang bana mao ang ulo sa iyang pamilya. (1 Corinto 11:3) Ang bana kinahanglang adunay usa lamang ka asawa. Sila angay nga tukmang pagkaminyo sumala sa balaod.​—1 Timoteo 3:2; Tito 3:1.

2. Ang bana angay nga mahigugma sa iyang asawa maingon nga siya nahigugma sa iyang kaugalingon. Angay nga iyang tagdon siya sa paagi sa pagtagad ni Jesus sa iyang mga sumusunod. (Efeso 5:​25, 28, 29) Angay nga dili gayod niya sumbagon ang iyang asawa o dagmalan siya sa bisan unsang paagi. Sa kapulihay, angay nga siya magpakita kaniyag pasidungog ug pagtahod.​—Colosas 3:19; 1 Pedro 3:7.

3. Ang usa ka amahan angayng magkugi aron maatiman ang iyang pamilya. Kinahanglang iyang itagana ang pagkaon, sapot, ug balay alang sa iyang asawa ug mga anak. Ang usa ka amahan kinahanglan usab nga magtagana sa espirituwal nga mga panginahanglan sa iyang pamilya. (1 Timoteo 5:8) Siya ang manguna sa pagtabang sa iyang pamilya nga makakat-on bahin sa Diyos ug sa Iyang mga katuyoan.​—Deuteronomio 6:​4-9; Efeso 6:4.

4. Ang usa ka asawa angay nga mahimong maayong katabang sa iyang bana. (Genesis 2:18) Siya kinahanglang motabang sa iyang bana sa pagtudlo ug pagbansay sa ilang mga anak. (Proverbio 1:8) Gibaod ni Jehova nga ang usa ka asawa mag-atiman sa iyang pamilya sa mahigugmaong paagi. (Proverbio 31:​10, 15, 26, 27; Tito 2:​4, 5) Angay nga siya magbaton ug halalom nga pagtahod sa iyang bana.​—Efeso 5:​22, 23, 33.

5. Gibaod sa Diyos nga ang mga anak magmasinugtanon  sa ilang mga ginikanan. (Efeso 6:​1-3) Gidahom niya ang mga ginikanan nga magtudlo ug magtul-id sa ilang mga anak. Ang mga ginikanan kinahanglang mogugol ug panahon kauban sa ilang mga anak ug magtuon sa Bibliya kauban nila, nga mag-atiman sa ilang espirituwal ug emosyonal nga mga panginahanglan. (Deuteronomio 11:​18, 19; Proverbio 22:​6, 15) Ang mga ginikanan angay nga dili magmabangis o magmapintason sa pagdisiplina sa ilang mga anak.​—Colosas 3:21.

6. Sa dihang ang mga kapikas sa kaminyoon adunay mga suliran sa pagsinabtanay, angay nga sulayan nila ang pagpadapat sa tambag sa Bibliya. Ang Bibliya nag-awhag kanato nga ipakita ang gugma ug magmapasayloon. (Colosas 3:​12-14) Ang Pulong sa Diyos wala magdasig sa panagbulag ingong paagi sa pagsulbad sa ginagmayng mga suliran. Apan ang usa ka asawa mahimong mopili sa pagbiya sa iyang bana kon (1) siya magmagahion sa pagdumili sa pagsuportar sa iyang pamilya, (2) siya mapintason kaayo nga ang panglawas ug kinabuhi sa asawa nameligro, o (3) ang iyang hingaping pagsupak magpaimposible sa asawa sa pagsimba kang Jehova.​—1 Corinto 7:​12, 13.

7. Ang mga kapikas sa kaminyoon kinahanglang magmaunongon sa usag usa. Ang pagpanapaw maoy usa ka sala batok sa Diyos ug batok sa kapikas sa usa. (Hebreohanon 13:4) Ang mga relasyong seksuwal nga gawas sa kaminyoon mao ang bugtong Kasulatanhong pasikaranan sa diborsiyo nga motugot sa pagminyo pag-usab. (Mateo 19:​6-9; Roma 7:​2, 3) Gidumtan ni Jehova sa dihang ang mga tawo magdiborsiyo nga walay Kasulatanhong mga pasikaranan ug magminyog lain.​—Malaquias 2:​14-16.

[Mga hulagway sa panid 16, 17]

Gidahom sa Diyos nga ang mga ginikanan magtudlo sa ilang mga anak ug magtul-id kanila

[Hulagway sa panid 17]

Ang usa ka mahigugmaong amahan magtagana alang sa iyang pamilya sa materyal ug espirituwal nga paagi