Leksiyon 13

Sa Unsang Paagi Makaplagan Nimo ang Matuod nga Relihiyon?

Ang tanan bang relihiyon makapahimuot sa Diyos, o usa lamang? (1)

Nganong adunay daghan kaayong relihiyon nga nag-angkong Kristohanon? (2)

Sa unsang paagi mailhan nimo ang matuod nga mga Kristohanon? (3-7)

1. Si Jesus ang nagsugod sa usa ka matuod nga Kristohanong relihiyon. Busa karong adlawa kinahanglang adunay usa lamang ka ­lawas, o pundok, sa matuod nga mga magsisimba ni Jehova nga Diyos. (Juan 4:​23, 24; Efeso 4:​4, 5) Ang Bibliya nagtudlo nga diyutay rang mga tawo ang nagsubay sa pig-ot nga dalan paingon sa kinabuhi.​—Mateo 7:​13, 14.

2. Ang Bibliya mitagna nga sa pagkamatay sa mga apostol, ang sayop nga mga pagtulon-an ug di-Kristohanong mga tulomanon inanay nga mosulod sa Kristohanong kongregasyon. Ang mga tawo mangabig ug mga sumusunod aron sila ang sundon inay si Kristo. (Mateo 7:​15, 21-23; Buhat 20:​29, 30) Kanay hinungdan nga makita nato ang daghan kaayong lainlaing mga relihiyon nga nag-angkong Kristohanon. Sa unsang paagi makaila kita sa matuod nga mga Kristohanon?

3. Ang labing talagsaong timaan sa matuod nga mga Kristohanon mao nga sila adunay tinuod nga gugma sa ilang taliwala. (Juan 13:​34, 35) Wala sila tudloi nga sila labaw kay sa katawhan sa ubang mga rasa o pamanit. Ni gitudloan sila sa pagdumot sa katawhan gikan sa ubang kanasoran. (Buhat 10:​34, 35) Busa dili sila moapil sa mga gubat. Ang matuod nga mga Kristohanon nagtinagdanay sa usag usa samag managsoong mga lalaki ug mga babaye.​—1 Juan 4:​20, 21.

4. Ang laing timaan sa matuod nga relihiyon mao nga ang mga membro niini adunay halalom nga pagtahod sa Bibliya. Ila kining gidawat ingong ang Pulong sa Diyos ug nagtuo kon unsay gipamulong niini. (Juan 17:17; 2 Timoteo 3:​16, 17) Giisip nila ang Pulong sa Diyos ingong mas hinungdanon kay sa mga ideya ug mga kostumbre sa mga tawo. (Mateo 15:​1-3, 7-9) Naningkamot sila sa pagkinabuhi sumala sa Bibliya diha sa ilang adlaw-adlawng pagkinabuhi. Mao nga sila dili  magsangyaw sa usa ka butang ug unya magbuhat sa laing butang.​—Tito 1:​15, 16.

5. Ang matuod nga relihiyon kinahanglan usab nga magpasidungog sa ngalan sa Diyos. (Mateo 6:9) Gipaila ni Jesus ang ngalan sa Diyos, si Jehova, ngadto sa uban. Kinahanglang buhaton usab kana sa matuod nga mga Kristohanon. (Juan 17:​6, 26; Roma 10:​13, 14) Kinsa ang katawhan diha sa inyong dapit nga nagasugilon sa uban bahin sa ngalan sa Diyos?

6. Ang matuod nga mga Kristohanon kinahanglang magwali bahin sa Gingharian sa Diyos. Gibuhat kana ni Jesus. Siya kanunayng naghisgot bahin sa Gingharian. (Lucas 8:1) Iyang gisugo ang iyang mga tinun-an nga iwali kining samang mensahe sa tibuok nga yuta. (Mateo 24:14; 28:​19, 20) Ang matuod nga mga Kristohanon nagtuo nga ang Gingharian sa Diyos lamang ang magpahinabo sa matuod nga pakigdait ug kasegurohan niining yutaa.​—Salmo 146:​3-5.

7. Ang mga tinun-an ni Jesus kinahanglang dili bahin niining tuman-kadaotan nga kalibotan. (Juan 17:16) Sila dili mag-apil-apil sa politikanhong mga kahikayan ug katilingbanong mga panaglantugi sa kalibotan. Sila naglikay sa makadaot nga panggawi, mga naandang buhat, ug mga tinamdan nga kasagaran sa kalibotan. (Santiago 1:27; 4:4) Makaila ka ba sa usa ka relihiyosong pundok diha sa inyong dapit nga nagbaton sa maong mga timaan sa matuod nga Kristiyanidad?

[Mga hulagway sa panid 26, 27]

Ang matuod nga mga Kristohanon naghigugmaay sa usag usa, nagtahod sa Bibliya, ug nagsangyaw bahin sa Gingharian sa Diyos