Leksiyon 6

Unsa ang Gingharian sa Diyos?

Hain ba nahimutang ang Gingharian sa Diyos? (1)

Kinsay Hari niini? (2)

Makaambit ba ang uban sa pagmando kauban sa Hari? Kon mao, pila man sila? (3)

Unsay nagpakita nga kita nagakinabuhi sa kataposang mga adlaw? (4)

Unsay buhaton sa Gingharian sa Diyos alang sa katawhan sa umaabot? (5-7)

1. Sa dihang dinhi siya sa yuta, si Jesus nagtudlo sa iyang mga sumusunod nga iampo ang Gingharian sa Diyos. Ang usa ka gingharian maoy usa ka kagamhanan nga usa ka hari ang nagdumala. Ang Gingharian sa Diyos maoy usa ka espesyal nga kagamhanan. Natukod kini sa langit ug magmando ibabaw niining yutaa. Kini maghinlo, o magbalaan, sa ngalan sa Diyos. Ipahinabo niini ang kabubut-on sa Diyos nga matuman sa yuta maingon nga kini nahitabo sa langit.​—Mateo 6:​9, 10.

2. Ang Diyos nagsaad nga si Jesus mahimong Hari sa Iyang Gingharian. (Lucas 1:​30-33) Sa dinhi si Jesus sa yuta, iyang gipamatud-an nga siya usa ka maluloton, matarong, ug hingpit nga Magmamando. Sa dihang mibalik siya sa langit, siya wala dihadiha maentrono ingong Hari sa Gingharian sa Diyos. (Hebreohanon 10:​12, 13) Sa 1914, si Jehova mihatag kang Jesus sa awtoridad nga Iyang gisaad kaniya. Sukad niadto, si Jesus nagmando sa langit ingong tinudlo nga Hari ni Jehova.​—Daniel 7:​13, 14.

3. Si Jehova nagpili usab ug pila ka matinumanong lalaki ug mga babaye gikan sa yuta nga moadto sa langit. Sila magmando uban kang Jesus ingong mga hari, mga maghuhukom, ug mga saserdote ibabaw sa katawhan. (Lucas 22:​28-30; Pinadayag 5:​9, 10) Gitawag ni Jesus ang maong mga kaubang magmamando sa iyang Gingharian nga “gamayng panon.” Mokabat silag 144,000.​—Lucas 12:32; Pinadayag 14:​1-3.

4. Sa dihang si Jesus nahimong Hari, iyang gitambog si Satanas ug ang iyang tuman-kadaotang mga manulonda gikan sa langit ug nganhi sa dapit sa yuta. Kanay hinungdan nga ang kahimtang nahimong daotan kaayo dinhi sa yuta sukad 1914. (Pinadayag 12:​9, 12) Ang mga gubat, mga kagutmanan, mga kamatay, nagmausbawong kamalapason​—kining tanan maoy bahin sa usa ka “ilhanan” nga nagpaila nga si Jesus nagamando ug nga kining sistemaha anaa  sa kataposang mga adlaw niini.​—Mateo 24:​3, 7, 8, 12; Lucas 21:​10, 11; 2 Timoteo 3:1-5.

5. Sa dili madugay pagahukman ni Jesus ang mga tawo, nga maglain kanila ingon sa usa ka magbalantay sa karnero nga maglain sa mga karnero gikan sa mga kanding. Ang “mga karnero” mao unya kadtong nakapamatuod sa ilang kaugalingon nga iyang maunongong mga ginsakpan. Makadawat silag kinabuhing walay kataposan sa yuta. Ang “mga kanding” mao unya kadtong nagsalikway sa Gingharian sa Diyos. (Mateo 25:​31-34, 46) Sa haduol nga umaabot, pagalaglagon ni Jesus ang tanang samag-kanding nga mga tawo. (2 Tesalonica 1:​6-9) Kon gusto nimo nga mahimong usa sa “mga karnero” ni Jesus, kinahanglang mamati ka sa mensahe sa Gingharian ug molihok nga ­nahiuyon sa imong nakat-onan.​—Mateo 24:14.

6. Ang yuta karon nabahin sa daghang nasod. Ang matag usa adunay kaugalingong kagamhanan. Kining mga nasora kasagarang nagbugnoay sa usag usa. Apan pulihan sa Gingharian sa Diyos ang tanang tawhanong mga kagamhanan. Kini magmando ingong bugtong kagamhanan ibabaw sa tibuok nga yuta. (Daniel 2:44) Sa maong panahon wala na ing gubat, krimen, ug kapintasan. Ang tanang tawo mag-uban sa pagpuyo diha sa pakigdait ug panaghiusa.​—Miqueas 4:​3, 4.

7. Panahon sa Usa ka Libo ka Tuig nga Pagmando ni Jesus, ang matinumanong mga tawo mahimong hingpit, ug ang tibuok nga yuta mahimong usa ka paraiso. Sa pagkatapos sa usa ka libo ka tuig, mabuhat na ni Jesus ang tanang butang nga gipabuhat sa Diyos kaniya. Unya ibalik niyag tugyan ang Gingharian ngadto sa iyang Amahan. (1 Corinto 15:24) Nganong dili suginlan ang imong mga higala ug mga hinigugma mahitungod sa kon unsay pagabuhaton sa Gingharian sa Diyos?

[Hulagway sa panid 13]

Ubos sa pagmando ni Jesus, wala na unyay pagdumot o pagkamapihigon