Leksiyon 5

Unsa ang Katuyoan sa Diyos Alang sa Yuta?

Nganong gilalang ni Jehova ang yuta? (1, 2)

Nganong ang yuta dili man usa ka paraiso karon? (3)

Unsay mahitabo sa mga tawo nga tuman-kadaotan? (4)

Sa umaabot, unsay buhaton ni Jesus alang sa mga masakiton? sa mga tigulang? sa mga patay? (5, 6)

Aron makaambit sa umaabot nga mga panalangin, unsa ang kinahanglan nimong buhaton? (7)

1. Gilalang ni Jehova kining yutaa aron ang mga tawo malipayong magpuyo niini sa walay kataposan. Buot niyang ang yuta pagapuy-an sa kanunay sa matarong, malipayong mga tawo. (Salmo 115:16; Isaias 45:18) Ang yuta dili gayod malaglag; magpabilin kini sa walay kataposan.​—Salmo 104:5; Ecclesiastes 1:4.

2. Sa wala pa buhata sa Diyos ang tawo, mipili Siyag usa ka gamayng bahin sa yuta ug gihimo kanang usa ka matahom nga paraiso. Kadto iyang ginganlang tanaman sa Eden. Didto niya gibutang ang unang lalaki ug babaye, si Adan ug si Eva. Katuyoan sa Diyos nga makabaton silag mga anak ug pun-on ang tibuok yuta. Sa hinayhinay ang tibuok nga yuta himoon unta nila nga usa ka paraiso.​—Genesis 1:28; 2:​8, 15.

3. Nakasala si Adan ug si Eva tungod sa tinuyo nga paglapas sa balaod sa Diyos. Busa si Jehova nagpagawas kanila gikan sa tanaman sa Eden. Nawala ang paraiso. (Genesis 3:​1-6, 23) Apan wala malimot si Jehova sa iyang katuyoan alang niining yutaa. Siya nagsaad nga himoon kini nga usa ka paraiso, diin magpuyo ang mga tawo sa walay kataposan. Unsaon man niya kini paghimo?​—Salmo 37:29.

4. Sa dili pa mahimong usa ka paraiso kining yutaa, ang tuman-kadaotang mga tawo kinahanglang wagtangon. (Salmo 37:38) Mahitabo kini sa Armageddon, nga mao ang gubat sa Diyos sa pagtapos sa pagkadaotan. Sunod, si Satanas bilanggoon sulod sa 1,000 ka tuig. Nagkahulogan kini nga walay mahibilin nga tuman-kadaotan aron daoton ang yuta. Ang katawhan sa Diyos lamang ang magpabiling buhi.​—Pinadayag 16:​14, 16; 20:​1-3. 

5. Unya si Jesu-Kristo magmando ingong Hari ibabaw niining yutaa sulod sa 1,000 ka tuig. (Pinadayag 20:6) Pagapapason niya sa inanay ang sala gikan sa atong mga kaisipan ug mga lawas. Kita mahimong hingpit nga mga tawo sama kang Adan ug Eva sa wala pa sila makasala. Unya ang sakit, pagkatigulang, ug kamatayon mawala na. Mangaayo ang mga tawong masakiton, ug mabata pag-usab ang mga tigulang.​—Job 33:25; Isaias 33:24; Pinadayag 21:​3, 4.

6. Sulod sa Usa ka Libo ka Tuig nga Pagmando ni Jesus, ang matinumanong mga tawo magbuhat aron himoong usa ka paraiso ang tibuok yuta. (Lucas 23:43) Gawas pa, ang minilyong patay ipasig-uli sa tawhanong kinabuhi sa yuta. (Buhat 24:​15) Kon ilang buhaton kon unsay gikinahanglan sa Diyos kanila, magpadayon sila sa pagpuyo sa yuta sa walay kataposan. Kon dili, pagalaglagon sila sa walay kataposan.​—Juan 5:​28, 29; Pinadayag 20:​11-15.

7. Ang unang katuyoan sa Diyos alang sa yuta sa ingon molampos. Gusto ba nimong makaambit niining umaabot nga mga panalangin? Kon mao, kinahanglan nga magpadayon ka sa pagkakat-on bahin kang Jehova ug sa pagsugot sa iyang mga kinahanglanon. Ang pagtambong sa mga tigom sa lokal nga Kingdom Hall sa mga Saksi ni Jehova mobulig kanimo sa paghimo niana.​—Isaias 11:9; Hebreohanon 10:​24, 25.

[Hulagway sa panid 10]

Paraiso nawala

[Mga hulagway sa panid 11]

Human sa Armageddon, himoong usa ka paraiso ang yuta