Usa ka Talagsaong Palaaboton!

“Ang matag usa nga buhi ug nagapasundayag ug pagtuo kanako dili na gayod mamatay.”—JUAN 11:26.

1. Ang minilyon nga patay karon pagabanhawon ngadto sa unsang matang sa palibot?

 SA DIHANG ang milyonmilyon bangonon sa pagkabanhaw, dili sila mahibalik sa kinabuhi diha sa way-sulod nga yuta. (Buhat 24:15) Mahigmata sila diha sa maanindot nga mas maayong palibot ug makadiskobreng andam na ang mga puy-anan, biste, ug daghang pagkaon alang kanila. Kinsay mohimo niining tanan nga preparasyon? Dayag, ang mga tawo nagpuyo na sa bag-ong kalibotan sa dili pa magsugod ang yutan-ong pagkabanhaw. Apan kinsa?

2-4. Unsang talagsaong palaaboton ang anaa sa unahan alang niadtong nagkinabuhi sa “kataposang mga adlaw”?

² Ang katumanan sa tagna sa Bibliya nagpakita nga nagkinabuhi kita sa “kataposang mga adlaw” niining sistemaha karon sa mga butang. a (2 Timoteo 3:1) Sa dili madugay, si Jehova nga Diyos mobalda sa tawhanong kahikayan ug magpapas sa pagkadaotan gikan sa yuta. (Salmo 37:​10, 11; Proverbio 2:​21, 22) Nianang panahona, unsay mahitabo sa mga nag-alagad nga matinumanon sa Diyos?

³ Si Jehova dili maglaglag sa mga matarong uban sa mga daotan. (Salmo 145:20) Wala gayod siya magbuhat sa maong butang, ug dili siya mohimo niana sa dihang iyang hinloan ang yuta sa tanang pagkadaotan. (Itandi ang Genesis 18:​22, 23, 26.) Sa pagkatinuod, ang kataposang basahon sa Bibliya naghisgot bahin sa “usa ka dakong panon, nga walay tawo ang makaihap, gikan sa tanang kanasoran ug mga tribo ug mga katawhan ug mga pinulongan,” nga nagagula sa “dakong kasakitan.” (Pinadayag 7:​9-14) Oo, usa ka dakong panon ang makalabang-buhi sa dakong kasakitan diin ang presenteng daotang kalibotan matapos, ug sila mosulod sa bag-ong kalibotan sa Diyos. Didto, ang masinugtanong katawhan makapahimulos sa bug-os sa kahibulongang tagana sa Diyos sa pagpagawas sa katawhan gikan sa sala ug kamatayon. (Pinadayag 22:​1, 2) Sa ingon, ang “dakong panon” dili na gayod makaagom sa kamatayon. Pagkatalagsaong palaaboton!

⁴ Makasalig ba kita niining talagsaong paglaom? Segurado gayod! Si Jesu-Kristo mismo nagpaila nga aduna unyay panahon nga ang mga tawo magkinabuhi nga dili na gayod mamatay. Sa dayon nang banhawon ang iyang higalang si Lazaro, si Jesus miingon kang Marta: “Ang matag usa nga buhi ug nagapasundayag ug pagtuo kanako dili na gayod mamatay.”​—Juan 11:26.

Ikaw Usab Mahimong Mabuhing Walay Kataposan

5, 6. Kon buot nimong mabuhing walay kataposan sa Paraiso sa yuta, unsay angay nimong buhaton?

⁵ Buot ba nimo nga mabuhing walay kataposan sa Paraiso sa yuta? Nangandoy ka ba nga makita pag-usab ang imong mga minahal? Nan kinahanglang batonan mo ang tukmang kahibalo bahin sa kabubut-on ug mga katuyoan sa Diyos. Sa usa ka pag-ampo ngadto sa Diyos, si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

⁶ Kabubut-on sa Diyos nga “ang tanang matang sa mga tawo maluwas ug mahidangat sa tukmang  kahibalo sa kamatuoran.” (1 Timoteo 2:​3, 4) Karon na ang panahon aron mahibalo kon sa unsang paagi ikaw, uban sa minilyon pang uban nga nagabuhat na sa kabubut-on sa Diyos, mabuhing walay kataposan sa Paraiso sa yuta. Ang mga Saksi ni Jehova malipay nga motabang kanimo nga mahibalo ug dugang bahin sa Diyos ug sa iyang mga kinahanglanon. Nganong dili makigkita kanila diha sa Kingdom Hall nga duol nimo o mosulat ngadto sa kinadul-ang adres nga natala sa sunod nga panid?

[Footnote]

[Mga Pangutana sa Pagtuon]

[Hulagway sa panid 31]

Ang “usa ka dakong panon” dili na gayod makaagom ug kamatayon