Usa ka Basahon nga Pagabasahon

“Dili angay nga isipong seryoso ang Bibliya.” Kanay giingon sa usa ka propesor sa unibersidad ngadto sa usa ka prangkang-manulti nga batan-ong babaye.

“Nakabasa ka na diay sa Bibliya?” siya nangutana.

Kay nakuratan, ang propesor miangkon nga wala pa siya makabasa.

“Sa unsang paagi makapahayag kag kusganong pagtuo bahin sa usa ka basahong wala pa gayod nimo mabasa?”

Siya may punto. Ang propesor mihukom nga mobasa sa Bibliya ug unya mopahayag ug opinyon bahin niana.

ANG Bibliya, nga gilangkoban ug 66 ka sinulat, gibatbat nga “lagmit mao ang labing makapaimpluwensiya nga koleksiyon sa mga basahon sa kasaysayan sa tawo.”¹ Sa tinuoray, nakaimpluwensiya kini sa pipila sa kinabantogang arte, katitikan, ug musika sa kalibotan. Kini dakog epekto sa pamalaod. Kini gidayeg tungod sa titikanhong estilo niini ug gitamod sa daghang edukado kaayong mga tawo. Talagsaon ilabina ang epekto niini diha sa mga kinabuhi sa mga tawo sa tanang hut-ong sa katilingban. Kini nakainspirar ug talagsaong pagkamaunongon diha sa iyang daghang magbabasa. Gipameligro pa gani sa uban ang kinabuhi aron mobasa lamang niini.

Sa samang panahon, adunay pagkamatahapon bahin sa Bibliya. Adunay mga tawong may pihong mga opinyon bahin niini bisan pag sila wala pa gayod makabasa niini. Tingali ginaila nila ang titikanhon o makasaysayanhong bili niini, apan sila nahibulong: Sa unsang paagi ang usa ka basahon nga gisulat libolibo ka tuig kanhi mahimong angay niining modernong kalibotan? Kita nagkinabuhi sa “panahon sa impormasyon.” Ang labing bag-ong impormasyon bahin sa mga panghitabo karon ug sa teknolohiya atong makuha dayon. Ang “ekspertong” tambag bahin sa halos tanang suliran sa modernong pagkinabuhi sayon nga mabatonan. Ang Bibliya nasudlan ba gayod ug impormasyon nga praktikal karong adlawa?

Gipaningkamotan niini nga brosyur ang pagtubag nianang mga pangutanaha. Wala kini larawa aron pugson ka nga motuo sa relihiyosong mga hunahuna o mga tinuohan, apan kini gituyo aron ipakita nga kining basahona nga nakapaimpluwensiya sa kasaysayan, ang Bibliya, angay nimong basahon. Usa ka taho nga gipatik sa 1994 nag-ingon nga ang pipila ka edukador kusganong nagtuo nga ang Bibliya nakadulot pag-ayo sa kultura sa Kasadpan nga “si bisan kinsa, magtutuo man o dili, nga wala masinati sa mga pagtulon-an ug sa mga asoy sa Bibliya ignorante sa kultura.”²

Tingali, human makabasa sa gipatik dinhi, mouyon ka nga​—bisan kon ang usa ka tawo relihiyoso man o dili​—ang Bibliya, labing menos, maoy usa ka basahon nga pagabasahon.

[Kahon/Hulagway sa panid 3]

“Ang akong pagkanalamdagan utang gayod nako sa pagbasa sa usa ka basahon.​—Usa ka basahon? Oo, ug kini maoy karaan yanohon nga basahon, nga maoy ubos sama mismo sa kinaiyahan, ug sama ka kinaiyanhon . . . Ug ang ngalan niining basahona sa way-kutikuti gayod mao ang basahon, ang Bibliya.”​—Heinrich Heine, Alemang magsusulat sa ika-19ng siglo.³