1-3. Unsay nahitabo sa dihang ang mga ginikanan nagdala sa ilang mga anak ngadto kang Jesus, ug unsay gipadayag niadtong hitaboa bahin kang Jesus?

 NAHIBALO si Jesus nga hapit nang matapos ang iyang kinabuhi sa yuta. Pipila na lang ka semana ang nahibilin, ug daghan pa kaayo ang pagabuhaton! Siya nagwali uban sa iyang mga apostoles didto sa Perea, nga maoy usa ka rehiyon sidlakan sa Suba sa Jordan. Sila nagpadayon sa pagwali pahabagatan paingon sa Jerusalem, diin si Jesus motambong sa iyang kataposan ug labing maukyabong Paskuwa.

² Human sa seryosong pagpakiglantugi sa pipila ka relihiyosong pangulo, may nahitabo nga gamayng kakisaw. Gidala sa mga tawo ang ilang mga bata aron makigkita kang Jesus. Lagmit lainlain ang edad sa mga bata, kay sa dihang si Marcos naghisgot kanila, iyang gigamit ang samang pulong nga iyang gigamit una pa niini sa pagbatbat sa 12 anyos nga bata, samtang si Lucas migamit sa pulong nga mahimong hubarong “mga masuso.” (Lucas 18:15; Marcos 5:41, 42; 10:13) Hinuon, sa bisan diin nga adunay mga bata, kasagarang anaay kakisaw ug kaguliyang. Ang mga tinun-an ni Jesus nagbadlong sa mga ginikanan, kay lagmit sila nagtuo nga ang Agalon puliki kaayo busa dili siya makatagad sa mga bata. Unsay gihimo ni Jesus?

³ Sa pagkakita niya sa nahitabo, si Jesus nasuko. Kang kinsa? Sa mga bata? Sa mga ginikanan? Dili—kondili sa iyang mga tinun-an! Siya miingon: “Pasagdi ang mga bata nga moduol nako. Ayaw silag pugngi, kay ang Gingharian sa Diyos alang niadtong sama kanila. Sa pagkatinuod  sultihan mo nako, si bisan kinsa nga dili modawat sa Gingharian sa Diyos sama sa pagdawat sa usa ka bata dili gayod makasulod niini.” Unya “gikugos” ni Jesus ang mga bata, ug iyang gipanalanginan sila. (Marcos 10:13-16) Ang mga pulong nga gigamit dinhi ni Marcos nagpasabot nga sila mapinanggaong gigakos ni Jesus, nga mahimong ang pipila ka gagmayng bata “gisipitan sa iyang bukton,” sumala sa usa ka maghuhubad. Tin-aw, si Jesus ganahag mga bata. Hinuon, aduna kitay laing makat-onan bahin kaniya gikan niini—siya sayon duolon.

4, 5. (a) Sa unsang paagi makapaneguro kita nga si Jesus sayon duolon? (b) Unsang mga pangutana ang atong susihon niini nga kapitulo?

⁴ Kon si Jesus maoy estrikto, di mahigalaon, o hambogirong tawo, kadtong mga bataa lagmit dili madani kaniya; ang ilang mga ginikanan usab magpanuko pagduol kaniya. Sa dihang imong handurawon ang maong talan-awon, dili ba makita nimong nagpahiyom ang mga ginikanan samtang ang maong malulotong tawo nagpadayag sa iyang pagmahal sa ilang mga bata, nga nag-ila sa pagkabililhon sa mga bata sa panan-aw sa Diyos, ug nagpanalangin kanila? Sa pagkatinuod, bisan pag si Jesus nag-abaga ug bug-at kaayong mga responsibilidad, siya nagpabiling usa ka tawo nga labing sayon duolon.

⁵ Kinsa pay nag-isip nga si Jesus sayon duolon? Unsay hinungdan nga siya sayon kaayo nga duolon? Ug sa unsang paagi makakat-on kita sa pagsundog kang Jesus niining bahina? Atong tan-awon.

6-8. Kinsay kasagarang kauban ni Jesus, ug sa unsang paagi ang iyang tinamdan lahi nianang sa relihiyosong mga pangulo?

⁶ Samtang magbasa ka sa mga asoy sa Ebanghelyo, lagmit mahingangha ka nga ang daghang tawo wala magpanuko  pagduol kang Jesus. Pananglitan, mahitungod kaniya, kita kasagarang makabasa bahin sa dakong mga panon sa katawhan. “Panonpanon sa katawhan ang misunod kaniya gikan sa Galilea.” “Gitapok-an siya sa daghang tawo.” “Miduol kaniya ang daghan kaayong tawo.” “May dakong panon sa katawhan nga mikuyog niya sa pagpanaw.” (Mateo 4:25; 13:2; 15:30; Lucas 14:25) Oo, si Jesus kanunayng gialirongan ug mga panon sa katawhan.

⁷ Kadto sila maoy ordinaryo lamang nga mga tawo, nga matamayong ginganlan sa relihiyosong mga pangulo ug “katawhan sa yuta.” Ang mga Pariseo ug ang mga saserdote dayag nga nag-ingon: “Kining mga tawhana nga wala mahibalo sa Balaod maoy tinunglo nga katawhan.” (Juan 7:49) Ang maong tinamdan gipamatud-an sa ulahing mga sinulat sa mga rabbi. Giisip sa daghang relihiyosong pangulo kanang mga tawhana ingong ubos nga matang sa mga tawo, busa sila dili gani makigsalo kanila sa pagpangaon, dili mamalit gikan kanila, o makig-uban kanila. Ngani, ang pipila nagtuo nga ang mga tawo nga wala mahibalo sa binaba nga balaod walay paglaom sa pagkabanhaw! Ang maong mga pangulo gilikayan sa daghang timawang mga tawo imbes pangayoan silag tabang o giya. Apan lahi si Jesus.

⁸ Si Jesus wala magpanuko sa pagpakig-uban sa ordinaryong mga tawo. Siya nakigsalo kanila sa pagpangaon, nag-ayo sa ilang mga sakit, nanudlo kanila, ug naghatag kanilag paglaom. Hinuon, si Jesus realistiko, kay giila niya nga ang kadaghanan mosalikway sa kahigayonan sa pag-alagad kang Jehova. (Mateo 7:13, 14) Bisan pa niana, siya naglaom nga adunay mga indibiduwal nga mosanong ug siya nahibalo nga daghan kanila adunay katakos sa pagbuhat sa matarong. Pagkasukwahi sa mga saserdote ug mga Pariseo nga gahig kasingkasing! Katingad-anan hinuon, bisan ang mga saserdote ug mga Pariseo miduol kang  Jesus, ug ubay-ubay kanila ang nagbag-o sa ilang kinabuhi ug misunod kaniya. (Buhat 6:7; 15:5) Ang pipila ka tawong dato ug gamhanan nag-isip usab nga si Jesus sayon duolon.—Marcos 10:17, 22.

 9. Nganong ang mga babaye wala magpanuko sa pagduol kang Jesus?

⁹ Ang mga babaye wala magpanuko sa pagduol kang Jesus. Sila kasagarang maulawon tungod kay sila gitamay sa relihiyosong mga pangulo. Ang mga rabbi sagad nagtamay kang bisan kinsang nagtudlo sa kababayen-an. Sa pagkatinuod, ang mga babaye dili gani tugotan nga mosaksi sa mga kaso sa hukmanan; giisip silang di kasaligang mga saksi. Ngani, nag-ampo pa ang mga rabbi diin nagpasalamat sila sa Diyos nga dili sila mga babaye! Apan, si Jesus wala magtamay sa mga babaye. Daghan ang miduol kaniya, nga ikag makakat-on. Pananglitan, atong mabasa nga ang manghod ni Lazaro nga si Maria naglingkod sa tiilan sa Ginoo, nga namati pag-ayo sa mga pulong ni Jesus samtang ang iyang magulang nga si Marta napuliki ug nabalaka pag-ayo bahin sa pag-andam ug pagkaon. Gidayeg ni Jesus si Maria tungod sa pag-una sa mas hinungdanong mga butang.—Lucas 10:39-42.

10. Sa unsang paagi si Jesus lahi sa relihiyosong mga pangulo sa iyang paagi sa pagtagad sa mga masakiton?

¹⁰ Ang mga masakiton nagpanon usab sa pagduol kang Jesus, bisan pag sila sagad giisip sa relihiyosong mga pangulo ingong mga tinamay. Ang Moisesnong Balaod naglagda sa pagkuwarentinas sa mga sanlahon aron sila dili manakod, apan kana dili katarongan nga magmapintason kanila. (Levitico, kapitulo 13) Apan ang ulahing mga kalagdaan sa mga rabbi nag-ingon nga ang mga sanlahon makaluod samag kinalibang. Gibato pa gani sa pipila ka relihiyosong pangulo ang mga sanlahon aron dili  sila mopaduol! Dili gayod nato mahanduraw nga ang mga tawo nga gitratar sa ingon nga paagi mangarisgar pagduol sa usa ka magtutudlo, apan ang mga sanlahon miduol kang Jesus. Usa kanila nagpahayag niining bantog nga kapahayagan sa pagtuo: “Ginoo, kon gusto lang nimo, ikaw makahinlo nako.” (Lucas 5:12) Sa sunod nga kapitulo, atong hisgotan kon unsay sanong ni Jesus. Pagkakaron, igo nang isulti nga kini mao ang labing tin-aw nga pamatuod nga si Jesus sayon duolon.

11. Unsang pananglitan ang nagpakita nga kadtong nabug-atan sa pagbati nga sad-an wala magpanuko sa pagduol kang Jesus, ug nganong hinungdanon kini?

¹¹ Ang mga tawo nga nabug-atan sa pagbati nga sad-an wala magpanuko pagduol kang Jesus. Pananglitan, hunahunaa ang higayon dihang si Jesus nagkaon sa balay sa usa ka Pariseo. Ang usa ka babaye nga nailhang makasasala misulod ug miluhod sa tiilan ni Jesus, nga mihilak tungod sa iyang pagkamakasasala. Ang mga tiil ni Jesus nahumod sa iyang mga luha, ug iyang gipahiran kana sa iyang buhok. Bisan pag ang tagbalay ni Jesus nakurat ug nakasaway pag-ayo kang Jesus tungod sa pagtugot niadtong bayhana sa pagduol kaniya, malulotong gidayeg ni Jesus ang maong babaye tungod sa iyang tim-os nga paghinulsol ug gipasaligan siya sa kapasayloan ni Jehova. (Lucas 7:36-50) Karong panahona ilabina, ang mga tawo nga nabug-atan sa pagbati nga sad-an angayng dili magpanuko sa pagduol niadtong makatabang nga mapasig-uli ang ilang relasyon sa Diyos! Unsay hinungdan nga si Jesus sayon duolon?

12. Nganong dili katingad-anan nga si Jesus sayon duolon?

¹² Hinumdomi nga si Jesus hingpit nga nagsundog sa iyang minahal nga langitnong Amahan. (Juan 14:9) Ang  Bibliya nagpahinumdom kanato nga si Jehova “dili layo sa matag usa kanato.” (Buhat 17:27) Ang “Tigpatalinghog sa pag-ampo,” si Jehova, kanunayng sayon duolon sa iyang matinumanong mga alagad ug sa uban pa nga gusto gayong makakaplag ug makaalagad kaniya. (Salmo 65:2) Hunahunaa ra god—ang labing gamhanan ug hinungdanong Persona sa uniberso sayon usab kaayong duolon! Sama sa iyang Amahan, si Jesus nahigugma sa mga tawo. Sa sunod nga mga kapitulo, atong hisgotan ang dakong gugma diha sa kasingkasing ni Jesus. Apan, si Jesus sayon duolon tungod ilabina kay nadayag pag-ayo ang iyang gugma alang sa mga tawo. Atong susihon ang pipila sa mga kinaiya ni Jesus nga nagpasundayag sa maong gugma.

13. Sa unsang paagi ang mga ginikanan makasundog sa panig-ingnan ni Jesus?

¹³ Nakamatikod dayon ang mga tawo nga si Jesus personal nga interesado kanila. Wala mahanaw ang maong personal nga interes sa dihang napit-osan si Jesus. Sumala sa ato nang nakita, sa dihang gidala sa mga ginikanan ang ilang mga anak ngadto kaniya, si Jesus sayon gihapon nga duolon bisan pag siya puliki, nga nag-abagag bug-at nga mga responsibilidad. Pagkatalagsaon nga panig-ingnan ang iyang gihatag alang sa mga ginikanan! Ang pagmatutog mga anak malisod sa kalibotan karon. Bisan pa niana, hinungdanon nga masabtan sa mga anak nga ang ilang mga ginikanan sayon nga duolon. Kon ikaw usa ka ginikanan, nasayod ka nga adunay mga higayon nga puliki ka kaayo mao nga dili ka dayon makahatag ug pagtagad sa imong anak nga maoy iyang gikinahanglan. Bisan pa niana, mapasaligan mo ba siya nga imo siyang hatagag pagtagad sa labing madaling panahon? Samtang tumanon mo ang imong saad, makat-onan sa imong anak ang mga ganti sa pagkamapailobon. Makat-onan usab sa imong anak  nga siya makaduol kanunay kanimo kon siya may problema o kabalaka.

14-16. (a) Unsang mga kahimtang ang miagak kang Jesus sa paghimo sa iyang unang milagro, ug nganong kadto usa ka katingalahang buhat? (b) Unsay gipadayag sa milagro ni Jesus sa Cana bahin kaniya, ug unsang pagtulon-an ang gihatag niini alang sa mga ginikanan?

¹⁴ Gipadayag ni Jesus sa mga tawo nga ang ilang mga suliran mahinungdanon kaniya. Pananglitan, palandonga ang unang milagro nga gihimo ni Jesus. Mitambong siya niadtong higayona sa usa ka kombira sa kasal sa Cana, nga usa ka lungsod sa Galilea. Mitungha ang usa ka makauulaw nga suliran—sila nahutdag bino! Gisultihan ni Maria, nga inahan ni Jesus, ang iyang anak kon unsay nahitabo. Unsay gihimo ni Jesus? Iyang gisugo ang mga sulugoon nga pun-og tubig ang unom ka dagkong banga. Sa dihang gipatilawan kini ngadto sa tigdumala sa kombira, katingad-anan  nga kadto maoy maayong bino! Kadto ba inabtik nga pakalaki lang sa kamot? Dili, ang tubig “nahimong bino.” (Juan 2:1-11) Ang pag-usob sa usa ka butang ngadto sa laing butang dugay nang gipangandoy sa mga tawo. Sa daghang siglo, ang mga tawo nga gitawag ug mga alchemist naningkamot sa pag-usob sa tingga ngadto sa bulawan. Sila wala gayod molampos—bisan pag ang tingga ug ang bulawan magkaamgid gayong mga elemento. a Unsay ikasulti bahin sa tubig ug bino? Kon bahin sa kemikal nga mga sangkap niini, ang tubig maoy yanong panagtapo sa duha ka pangunang elemento. Sa laing bahin, ang bino adunay duolag usa ka libong sangkap, nga ang daghan niana maoy komplikadong mga elemento! Nganong gihimo ni Jesus kadtong kahibulongang buhat aron masulbad ang dili kaayo hinungdanong butang sama sa kakulang ug bino panahon sa usa ka kombira sa kasal?

¹⁵ Kadtong problemaha dili gamayng butang alang sa bag-ong kinasal. Sa karaang Tungang Sidlakan, hinungdanon kaayo ang pag-abiabi sa mga dinapit. Ang pagkahurot sa bino panahon sa kombira sa kasal makauulaw kaayo alang sa kinasal, nga makapasubo sa adlaw sa ilang kasal ug sa panahong hinumdoman kana. Ang problema hinungdanon kanila, ug kang Jesus. Busa iyang gisulbad ang problema. Masabtan mo ba kon nganong ang mga tawo moduol kaniya mahitungod sa ilang mga suliran?

¹⁶ Ang mga ginikanan makakat-on ug mapuslanong pagtulon-an gikan niini. Unsa man kon ang imong anak moduol kanimo, nga nabug-atan sa problema? Tingali  isipon dayon nimo nga ang iyang problema dili hinungdanon ug dili nimo kana tagdon. Tingalig kataw-an pa nimo kana. Kon itandi sa imong kaugalingong mga suliran, ang problema sa bata daw dili hinungdanon. Apan, hinumdomi nga kana dili gamayng butang alang sa bata! Kon kana hinungdanon sa usa nga imong minahal kaayo, dili ba kana hinungdanon usab kanimo? Ang pagpasabot sa imong anak nga ikaw nabalaka sa iyang mga problema maghimo kanimo nga usa ka ginikanan nga sayon duolon.

17. Unsang panig-ingnan ang gihatag ni Jesus bahin sa kalumo, ug nganong kining hiyasa maoy usa ka pamatuod sa kalig-on?

¹⁷ Sumala sa atong gihisgotan sa Kapitulo 3, si Jesus malumo ug mapainubsanon. (Mateo 11:29) Ang kalumo maoy dalayegong hiyas, nga lig-ong pamatuod sa pagkamapainubsanon diha sa kasingkasing sa usa ka tawo. Kini maoy usa sa mga bunga sa balaang espiritu sa Diyos ug nalangkit sa diyosnong kaalam. (Galacia 5:22, 23; Santiago 3:13) Bisan pag grabeng gihagit, si Jesus padayong nagpugong sa kaugalingon. Ang iyang kalumo dili gayod kahuyangan. Usa ka eskolar nag-ingon bahin niining hiyasa: “Luyo sa kalumo adunay kalig-on nga sama sa puthaw.” Sa pagkatinuod, ang kalig-on sagad gikinahanglan sa pagpugong sa atong kasuko ug sa pagtratar sa uban nga may kalumo. Apan tungod sa pagpaluyo ni Jehova sa atong paningkamot, kita makasundog kang Jesus sa pagpakitag kalumo, ug kana maghimo kanato nga mas sayon duolon.

18. Unsang pananglitan ang nagpadayag sa pagkamakataronganon ni Jesus, ug sa imong hunahuna, nganong kining hiyasa maghimo sa usa ka tawo nga sayon duolon?

¹⁸ Si Jesus makataronganon. Sa dihang si Jesus didto sa Tiro, usa ka babaye miduol kaniya tungod kay ang iyang anak nga babaye “nag-antos pag-ayo kay siya gidemonyohan.” Sa tulo ka lainlaing paagi, gipaila ni Jesus nga dili siya buot mobuhat sa gihangyo kaniya sa babaye. Una,  wala siya magtingog; ikaduha, iyang gisulti ang hinungdan kon nganong dili siya angayng mobuhat sa gihangyo sa babaye; ikatulo, gipahayag niya ang usa ka ilustrasyon nga mas nakapatin-aw sa punto. Bisan pa niadto, ang iyang panggawi ba maoy di mabination ug gahian? Iya bang gipasabot nga ang babaye wala magpakitag pagtahod tungod kay siya nangahas sa pagtubagtubag sa usa ka bantogan kaayong tawo? Wala, tin-aw nga nagmasaligon kadtong bayhana. Wala lang siya mangayog tabang kondili wala siya mohunong paghangyo bisan pag si Jesus daw dili gustong motabang kaniya. Nakita ni Jesus ang talagsaong pagtuo nga nagtukmod sa babaye sa dili paghunong sa paghangyo, busa giayo ni Jesus ang iyang anak nga babaye. (Mateo 15:22-28) Tungod gayod sa pagkamakataronganon ni Jesus, sa iyang kaandam sa pagpamati ug pagpahiuyon kon kana nahiangay, ang mga tawo naikag sa pagduol kaniya!

19. Sa unsang paagi atong mahibaloan kon tinuod ba nga kita sayon duolon?

¹⁹ Gustong hunahunaon sa mga tawo nga sila sayon duolon. Pananglitan, ang pipila nga may katungdanan lagmit moingon nga sila liberal ug panghunahuna, nga kadtong ubos kanilag katungdanan libre kanunay nga moduol kanila. Ugaling lang, ang Bibliya adunay ugdang nga pasidaan: “Daghan ang mopahayag sa ilang maunongong gugma, apan kinsay makakitag maunongong tawo?” (Proverbio 20:6) Sayon ang pagsulti nga kita sayon duolon, apan matinumanon ba gayod natong gisundog kining bahina sa gugma ni Jesus? Ang tubag wala diha sa kon unsay atong pag-isip sa atong kaugalingon, kondili anaa sa kon unsay pag-isip sa uban kanato. Si Pablo miingon: “Ipakita sa tanan ang inyong pagkamakataronganon.” (Filipos 4:5)  Maayong mangutana ang matag usa kanato: ‘Unsay hunahuna sa uban kanako? Unsay akong dungog?’

20. (a) Nganong hinungdanon nga ang Kristohanong mga ansiyano sayon duolon? (b) Nganong angay kitang magmakataronganon sa atong dahomon gikan sa mga ansiyano sa kongregasyon?

²⁰ Ang Kristohanong mga ansiyano ilabinang maningkamot nga mahimong sayon duolon. Sila magmatinguhaon gayod sa pagtuman sa kabatbatan nga natala diha sa Isaias 32:1, 2: “Ang matag usa mahisamag tagoanan gikan sa hangin, usa ka salipdanan gikan sa bagyo, mahisamag mga sapa diha sa yuta nga walay tubig, mahisamag landong sa dako kaayong bato diha sa umaw nga yuta.” Ang usa ka ansiyano makatagana lang sa maong panalipod, kalagsik, ug kahupayan kon siya magpabiling sayon duolon. Tinuod, dili kanunayng sayon ang paghimo niana, kay ang mga ansiyano nag-abagag bug-at nga responsibilidad niining lisod nga panahon. Bisan pa niana, ang mga ansiyano maningkamot gayod nga dili magpadayag nga sila puliki kaayo mao nga dili sila makaatiman sa mga panginahanglan sa mga karnero ni Jehova. (1 Pedro 5:2) Ang uban diha sa kongregasyon maningkamot nga magmakataronganon kon bahin sa ilang dahomon gikan sa maong matinumanong mga lalaki, pinaagi sa pagpakitag pagkamapainubsanon ug sa ilang pagpakigkooperar sa mga ansiyano.—Hebreohanon 13:17.

21. Sa unsang paagi ang mga ginikanan makapabiling sayon duolon sa ilang mga anak, ug unsay atong hisgotan sa sunod nga kapitulo?

 ²¹ Ang mga ginikanan nagtinguha nga sa kanunay sila sayon duolon sa ilang mga anak. Kini seryoso kaayong butang! Buot nilang masayran sa ilang mga anak nga ang pagtug-an sa ilang suliran kang Papa o Mama maoy panalipod. Busa, ang Kristohanong mga ginikanan magbantay nga magmalumo ug magmakataronganon, nga dili mosinghag dayon sa dihang ang ilang anak motug-an sa usa ka sayop o magpasundayag ug dili hustong panghunahuna. Samtang ang mga ginikanan mapailobong magbansay sa ilang mga anak, sila maningkamot nga ang ilang mga anak dili magpanuko sa pagpakigsulti kanila. Sa pagkatinuod, buot natong tanan nga magpabiling sayon duolon, sama kang Jesus. Sa sunod nga kapitulo, atong hisgotan ang kinasingkasing nga kaluoy ni Jesus—usa sa pangunang mga hiyas nga naghimo kaniya nga sayon duolon.