1-3. (a) Sa unsang paagi mibiya si Jesus sa iyang mga apostoles, ug nganong dili kadto makapasubong pagpanamilitay? (b) Nganong angay natong hisayran ang pagkinabuhi ni Jesus sukad sa iyang pagbalik sa langit?

 ANG 11 ka lalaki nag-uban pagtindog sa usa ka bukid. Sila naghangad ug nagsud-ong nga mahigugmaon ug madayegon sa ika-12 nga persona. Siya may tawhanong dagway, apan siya mao ang nabanhawng Jesus, nga nahimong labing gamhanan na usab taliwala sa espiritung mga anak ni Jehova. Gitigom ni Jesus ang iyang mga apostoles aron makigkita kaniya sa kataposang higayon didto sa Bukid sa mga Olibo.

² Kining bukira, nga maoy bahin sa nagkanitkanit nga apogong kabungtoran tabok sa Walog sa Kidron gikan sa Jerusalem, nakapukaw ug daghang handomanan diha sa kaisipan ni Jesus. Nahimutang sa maong mga bakilid ang lungsod sa Betania, diin si Jesus nagbanhaw kang Lazaro. Pipila ra ka semanang milabay, gikan sa kanait nga Betfage, si Jesus nga nagsakayg asno misugod sa iyang madaogong pagsulod sa Jerusalem. Ang tanaman sa Getsemane lagmit nahimutang usab sa Bukid sa mga Olibo, diin didto nagpalabay si Jesus sa makapaguol nga mga takna una pa sa pagdakop kaniya. Niadtong tungora ug niadtong bungtora mismo, nangandam na si Jesus nga mobiya sa iyang suod kaayong mga higala ug mga sumusunod. Mipahayag siyag malulotong mga pulong isip panamilit. Unya misugod siya pagkayab gikan sa yuta! Ang mga apostoles nagbarog nga naugbok didto, nga nagsud-ong sa ilang minahal nga Agalon samtang siya gibayaw ngadto  sa langit. Sa kadugayan, siya gisalipdan ug panganod mao nga wala na sila makakita kaniya.—Buhat 1:6-12.

³ Maisip mo ba ang maong talan-awon ingon nga malipayon ug masulub-ong kataposan sa usa ka sugilanon, ingon nga makapasubong pagpanamilitay? Dili. Sa pagkatinuod, sama sa gipahinumdom niadtong higayona sa duha ka anghel ngadto sa mga apostoles, ang sugilanon ni Jesus wala pa gayod matapos. (Buhat 1:10, 11) Sa daghang paagi, ang iyang pagkayab sa langit maoy sinugdanan pa lamang. Ang Pulong sa Diyos wala maglilong kanato kon unsay sunod nga nahitabo kang Jesus. Hinungdanong hisayran ang pagkinabuhi ni Jesus sukad sa iyang pagbiya sa yuta. Ngano? Hinumdomi ang mga pulong nga gisulti ni Jesus kang Pedro: “Padayon sa pagsunod kanako.” (Juan 21:19, 22) Kitang tanan angayng mosunod sa maong sugo, dili lang ingong umalaging desisyon kondili ingong paagi sa pagkinabuhi. Sa paghimo niana, angay natong masabtan kon unsay ginabuhat karon sa atong Agalon ug kon unsang mga asaynment ang iyang nadawat sa langit.

 4. Sa unsang paagi abanteng gibutyag sa Bibliya kon unsay mahitabo sa langit sa pagbalik didto ni Jesus?

⁴ Wala ibutyag sa Kasulatan ang paagi sa pag-abiabi kang Jesus didto sa langit ug ang iyang malipayong pagpakigkita pag-usab sa iyang Amahan. Hinuon, abanteng gibutyag sa Bibliya kon unsay mahitabo sa langit sa pagbalik didto ni Jesus. Abi nimo, ang mga Hudiyo regular nga nakasaksi ug balaang seremonyas sulod sa kapig 15 ka siglo. Usa ka adlaw sa matag tuig, ang hataas nga saserdote mosulod sa Labing Balaan sa templo aron iwisik ang dugo sa mga halad sa Adlaw sa Pagtabon sa Sala atubangan sa arka  sa pakigsaad. Nianang adlawa, ang hataas nga saserdote naghulagway sa Mesiyas. Si Jesus nagtuman kas-a lang sa tanang panahon sa matagnaong kahulogan sa maong seremonyas sa dihang siya mibalik sa langit. Misulod siya sa harianong presensiya ni Jehova sa langit—ang labing balaang dapit sa uniberso—ug gitanyag ang bili sa iyang halad lukat ngadto sa iyang Amahan. (Hebreohanon 9:11, 12, 24) Gidawat ba kadto ni Jehova?

5, 6. (a) Unsang ebidensiya ang nagpakita nga gidawat ni Jehova ang halad lukat sa Kristo? (b) Kinsay makabatog kaayohan sa lukat, ug sa unsang paagi?

⁵ Atong makita ang tubag pinaagi sa pagtagad kon unsay nahitabo pipila ka adlaw human mokayab si Jesus. Ang gamayng pundok sa mga 120 ka Kristohanon nagkatigom sa Jerusalem sa usa ka lawak sa itaas sa dihang sa kalit may nahitabong kabanha gikan sa langit sama gayod nianang nagahuros nga makusog nga hangin, ug kana mipuno sa maong dapit. Ang mga dila nga daw kalayo mipakita ibabaw sa ilang mga ulo, sila napuno sa balaang espiritu, ug sila misugod sa pagsulti sa lainlaing pinulongan. (Buhat 2:1-4) Ang maong panghitabo nagtimaan sa pagkatukod sa usa ka bag-ong nasod, ang espirituwal nga Israel, nga mao ang bag-ong “piniling katawhan” ug “mga saserdote nga hari” sa Diyos aron tumanon ang kabubut-on sa Diyos sa yuta. (1 Pedro 2:9) Tin-aw nga gidawat ug giuyonan ni Jehova nga Diyos ang halad lukat sa Kristo. Ang maong pagbubo sa balaang espiritu nalakip sa unang mga panalangin nga napahimuslan tungod sa lukat.

⁶ Sukad gayod niadto, ang mga sumusunod sa Kristo sa tibuok kalibotan nakabatog kaayohan sa iyang lukat. Kon kita nalakip sa dinihogang “gamayng panon,” nga magmando uban sa Kristo sa langit, o nalakip sa “ubang mga karnero,” nga magpuyo sa yuta ilalom sa iyang pagmando, makabaton kitag kaayohan sa iyang halad. (Lucas  12:32; Juan 10:16) Mao kini ang pasikaranan sa atong paglaom ug kapasayloan sa atong mga sala. Samtang magpadayon kita sa ‘pagpakitag pagtuo’ sa maong lukat, nga magsunod kang Jesus adlaw-adlaw, atong mabatonan ang hinlong konsensiya ug ang masanag nga paglaom sa umaabot.—Juan 3:16.

 7. Unsang awtoridad ang gihatag kang Jesus sa iyang pagbalik sa langit, ug sa unsang paagi makapaluyo ka kaniya?

⁷ Unsay ginabuhat ni Jesus sa langit sukad sa iyang pagbalik didto? Siya adunay dako kaayong awtoridad. (Mateo 28:18) Sa pagkatinuod, si Jehova nagtudlo kaniya sa pagdumala sa Kristohanong kongregasyon, usa ka tinudlong buluhaton nga iyang ginatuman sa mahigugmaon ug matarong nga paagi. (Colosas 1:13) Sumala sa gitagna, si Jesus naghatag ug kasaligang mga lalaki sa pag-atiman sa mga panginahanglan sa iyang panon. (Efeso 4:8) Pananglitan, iyang gipili si Pablo nga mahimong “apostol sa kanasoran,” nga nagpadala kaniya aron sa pagpakaylap sa maayong balita sa halayong kanasoran. (Roma 11:13; 1 Timoteo 2:7) Sa hinapos sa unang siglo, gipahayag ni Jesus ang mga mensahe sa pagdayeg, tambag, ug pagtul-id ngadto sa pito ka kongregasyon sa Romanhong probinsiya sa Asia. (Pinadayag, mga kapitulo 2-3) Giila mo ba si Jesus isip ulo sa Kristohanong kongregasyon? (Efeso 5:23) Aron magpadayon sa pagsunod kaniya, angay nimong idasig ang masinugtanon, mapinasakopong espiritu diha sa inyong lokal nga kongregasyon.

8, 9. Unsang awtoridad ang gihatag kang Jesus niadtong 1914, ug unsay kahulogan niana alang kanato kon bahin sa atong paghimog mga desisyon?

⁸ Gihatagan si Jesus ug dugang pang awtoridad niadtong 1914. Nianang tuiga siya gitudlo ingong Hari sa Mesiyanikong Gingharian ni Jehova. Sa pagsugod sa pagmando ni Jesus, “miulbo ang gubat sa langit.” Unsay resulta? Si  Satanas ug ang iyang mga demonyo gitambog sa yuta, hinungdan nga nagsugod ang yugto sa kaalaotan. Ang kaylap nga mga gubat, krimen, terorismo, sakit, mga linog, ug mga gutom nga nagsakit karon sa katawhan nagpahinumdom kanato nga si Jesus nagamando sa langit sa pagkakaron. Si Satanas gihapon “ang magmamando niining kalibotana” sulod sa ‘mubo nga panahon.’ (Pinadayag 12:7-12; Juan 12:31; Mateo 24:3-7; Lucas 21:11) Bisan pa niana, si Jesus naghatag ug kahigayonan sa mga tawo sa tibuok kalibotan sa pagdawat sa iyang pagmando.

⁹ Hinungdanong modapig kita sa kiliran sa Mesiyanikong Hari. Sa tanan natong desisyon matag adlaw, angay natong tinguhaon ang iyang pag-uyon, dili niining hiwi nga kalibotan. Samtang susihon niining “Hari sa mga hari ug Ginoo sa mga ginoo” ang katawhan, mosilaob ang kasuko ug mosugwak ang kalipay diha sa iyang matarong nga kasingkasing. (Pinadayag 19:16) Ngano?

10. Unsa ang kinaiyanhong tinamdan ni Jesus, apan nganong ang atong Agalon nahupngan ug matarong nga kasuko?

¹⁰ Sama sa iyang Amahan, ang atong Agalon sa kinaiyanhon malipayon. (1 Timoteo 1:11) Ingon nga usa ka tawo, si Jesus dili hinawayon o lisod pahimut-an. Bisan pa niana, adunay daghang panghitabo sa yuta karon nga tungod niana nahupngan siyag matarong nga kasuko. Siya nasuko gayod sa tanang relihiyosong organisasyon nga sa kabakakon nangangkon nga iyang representante. Iya kanang gitagna: “Dili ang tanang moingon kanako, ‘Ginoo, Ginoo,’ makasulod sa Gingharian sa langit, kondili kadto lamang nagabuhat sa kabubut-on sa akong Amahan nga anaa sa langit. Nianang adlawa daghan ang moingon kanako: ‘Ginoo, Ginoo, wala ba mi . . . maghimog daghang  milagro pinaagi sa imong ngalan?’ Ug ako moingon kanila: ‘Wala gyod ko makaila ninyo! Pahilayo kanako, kamong mamumuhat sa kalapasan.’”—Mateo 7:21-23.

11-13. Nganong ang pipila tingali naglibog sa hait nga mga pulong nga gisulti ni Jesus ngadto sa mga nagbuhat ug “daghang milagro” pinaagi sa iyang ngalan, apan nganong nasuko siya? Iilustrar.

¹¹ Ang daghan karon nga nagtawag sa ilang kaugalingon nga mga Kristiyano tingali malibog sa maong mga pulong. Nganong isulti ni Jesus kanang hait nga mga pulong ngadto sa mga tawong nagbuhat ug “daghang milagro” pinaagi sa iyang ngalan? Ang mga relihiyon sa Kakristiyanohan nagpasiugdag mga buhat sa kaluoy, nagtabang sa mga kabos, nagtukod ug mga ospital ug mga tunghaan, ug nagbuhat ug daghan pang mga buhat. Aron masabtan kon nganong si Jesus angayng masuko kanila, tagda ang usa ka ilustrasyon.

¹² Ang usa ka amahan ug usa ka inahan kinahanglang mobiyahe. Dili nila madala ang ilang mga anak sa biyahe, busa sila mosuhol ug yaya. Yano ang ilang mga instruksiyon kaniya: “Atimana ang among mga anak. Pakan-a sila, seguroa nga sila hinlo, ug bantayi sila nga malayo sa kadaotan.” Ugaling lang, pag-uli sa mga ginikanan, sila nakurat pag-ayo sa pagkakita sa ilang mga anak nga gipanggutom. Sila nagkabulingit, nangasakit, ug luoy ug hitsura. Sila nanghilak aron tagdon sa ilang yaya, apan wala tagda ang ilang pagtuaw. Ngano? Siya nagtungtong sa usa ka hagdan, nga naghinlo sa mga bentana. Ang mga ginikanan masuk-anon nga nangayog katin-awan. Ang yaya mitubag: “Tan-awa ra god ang akong nahimo! Dili ba nahinlo ang mga bentana? May gipang-ayo usab ko sa balay, nga kanang tanan alang kaninyo!” Mahupayan ba ang mga ginikanan? Dili gayod! Wala sila magsugo kaniya sa pagbuhat sa maong mga trabaho; gusto lang nila nga  maatiman ang ilang mga anak. Ang wala niya pagsunod sa ilang mga instruksiyon nakapasuko gayod kanila.

¹³ Ang kalihokan sa Kakristiyanohan nahisama sa maong yaya. Nagtugon si Jesus sa iyang mga representante nga ang katawhan pakan-on sa espirituwal pinaagi sa pagtudlo kanila sa kamatuoran sa Pulong sa Diyos ug pagtabang kanila nga magmahinlo sa espirituwal. (Juan 21:15-17) Bisan pa niana, ang Kakristiyanohan napakyas gayod pagsunod sa mga instruksiyon ni Jesus. Iyang gipasagdan ang katawhan nga nag-antos sa kagutom sa espirituwal, nalibog tungod sa mga kabakakan ug walay alamag sa pangunang mga kamatuoran sa Bibliya. (Isaias 65:13; Amos 8:11) Bisan ang iyang mga paningkamot sa pagpauswag niining kalibotana dili gayod mahimong pasangil sa iyang tinuyong pagkamasinupakon. Ngani, kining sistemaha sa kalibotan maoy samag balay nga gitakda nang gub-on! Ang Pulong sa Diyos nagtin-aw nga ang sistema sa kalibotan ni Satanas hapit nang laglagon.—1 Juan 2:15-17.

14. Unsang buluhatona ang nakapalipay kang Jesus karon, ug ngano?

¹⁴ Sa laing bahin, si Jesus malipayon gayod kaayong nagtan-aw gikan sa langit ug nakakita sa minilyong tawo nga nagtuman sa sugo sa paghimog tinun-an nga iyang gihatag sa iyang mga sumusunod una pa mobiya sa yuta. (Mateo 28:19, 20) Pagkadakong kadungganan ang paglipay sa Mesiyanikong Hari! Angay kitang mahimong determinado nga mopadayon sa pagtabang sa “matinumanon ug maalamong ulipon.” (Mateo 24:45) Lahi sa klero sa Kakristiyanohan, kining gamayng grupo sa dinihogang mga igsoong lalaki masinugtanong nanguna sa buluhaton sa pagwali ug matinumanong nagpakaon sa mga karnero sa Kristo.

15, 16. (a) Unsay pagbati ni Jesus bahin sa kawalay-gugma nga kaylap kaayo karon, ug nganong nahibalo kita niana? (b) Nganong si Jesus angayng masuko sa Kakristiyanohan?

¹⁵ Makapaneguro kita nga ang Hari masuko sa dihang  siya makakita sa pagkakaylap sa kawalay-gugma sa yuta karon. Makahinumdom kita nga ang mga Pariseo nagsaway kang Jesus tungod sa pag-ayo sa mga masakiton sa adlaw nga Igpapahulay. Sila labihan ka tig-a ug kasingkasing, gahiag ulo, nga nagsalig lang sa ilang mapihigong pagbadbad sa Moisesnong Balaod ug sa binaba nga balaod. Daghan kaayong kaayohan ang gihatag sa mga milagro ni Jesus! Apan ang kalipay, kahupayan, kalig-on sa pagtuo nga gipahinabo niana walay bili sa maong mga lalaki. Unsay gibati ni Jesus kanila? Kas-a “siya mitan-aw kanila nga may kasuko ug naguol pag-ayo tungod sa kagahi sa ilang kasingkasing.”—Marcos 3:5.

¹⁶ Karong mga adlawa, daghan pa ang nakita ni Jesus nga ‘nakapaguol pag-ayo’ kaniya. Ang mga pangulo sa Kakristiyanohan nabutaan tungod sa ilang pagsunod sa mga tradisyon ug mga doktrina nga supak sa Kasulatan. Dugang pa, sila nasuko pag-ayo tungod sa pagwali sa maayong balita sa Gingharian sa Diyos. Sa daghang bahin sa kalibotan, ang klero nagsiba sa mapintasong paglutos sa mga Kristohanon nga sinserong naningkamot sa pagwali sa mensahe nga giwali ni Jesus. (Juan 16:2; Pinadayag 18:4, 24) Sa samang panahon, ang maong mga klerigo sagad mag-awhag sa ilang mga sumusunod mismo sa pagpakiggubat ug sa pagpatay sa uban—nga maorag ang pagbuhat niana makapahimuot kang Jesu-Kristo!

17. Sa unsang paagi ang matuod nga mga sumusunod ni Jesus naglipay sa iyang kasingkasing?

¹⁷ Sa kasukwahi, ang matuod nga mga sumusunod ni Jesus naningkamot sa pagpakitag gugma sa ilang isigkatawo. Ilang gipakig-ambit ang maayong balita sa “tanang matang sa tawo,” sama sa gihimo ni Jesus, bisan pa sa pagsupak. (1 Timoteo 2:4) Ug talagsaon ang gugma nga ilang gipakita sa usag usa; kini ang ilang pangunang  ilhanan. (Juan 13:34, 35) Samtang gitagad nila ang ilang isigka-Kristohanon uban ang gugma, pagtahod, ug kaligdong, sila nagsunod gayod kang Jesus—nga naglipay sa kasingkasing sa Mesiyanikong Hari!

18. Unsay makapaguol sa atong Agalon, apan sa unsang paagi makapahimuot kita kaniya?

¹⁸ Hinumdoman usab nato nga ang atong Agalon maguol sa dihang ang iyang mga sumusunod mapakyas sa paglahutay, mabugnaw ang ilang gugma kang Jehova ug mohunong sa pag-alagad Kaniya. (Pinadayag 2:4, 5) Apan si Jesus mahimuot niadtong molahutay hangtod sa kataposan. (Mateo 24:13) Nan, hinumdoman gayod nato kanunay ang sugo sa Kristo: “Padayon sa pagsunod kanako.” (Juan 21:19) Atong hisgotan ang pipila sa mga panalangin nga ihatag sa Mesiyanikong Hari niadtong molahutay hangtod sa kataposan.

19, 20. (a) Unsang mga panalangin karon mismo ang moresulta sa pagsunod kang Jesus? (b) Sa unsang paagi matagbaw ang atong panginahanglan alang sa usa ka amahan tungod sa pagsunod sa Kristo?

¹⁹ Ang pagsunod kang Jesus mao ang dalan sa magantihon gayong pagkinabuhi karon. Kon dawaton nato ang Kristo isip atong Agalon, sundon ang iyang pagtultol ug magpagiya sa iyang panig-ingnan, makakaplag kitag mga bahandi nga gipangita apan wala hikaplagi sa mga tawo sa tibuok kalibotan. Mapanalanginan kita ug buluhaton nga makahatag kanatog kinabuhi nga makahuloganon ug may katuyoan, usa ka pamilya sa mga isigkamagtutuo nga nahiusa sa tiunay nga bugkos sa gugma, hinlong konsensiya, ug kalinaw sa hunahuna. Sa laktod nga pagkasulti, atong matagamtam ang tugob ug matagbawon nga kinabuhi. Ug makatagamtam pa kitag dugang kaayohan.

 ²⁰ Si Jehova naghatag kang Jesus isip “Amahang Walay Kataposan” alang sa mga naglaom nga mabuhing walay kataposan sa yuta. Si Jesus mao ang kapuli sa tawhanong amahan, si Adan, nga nagluib sa tanan niyang mga anak ug nagbanlod kanila ngadto sa timawa kaayong kahimtang. (Isaias 9:6, 7) Pinaagi sa pagdawat kang Jesus isip atong “Amahang Walay Kataposan,” pagpasundayag ug pagtuo kaniya, kita adunay seguradong paglaom sa kinabuhing walay kataposan. Dugang pa, kana mas makapasuod kanato kang Jehova nga Diyos. Sumala sa atong nakat-onan, ang pagpaningkamot sa pagsunod sa panig-ingnan ni Jesus adlaw-adlaw mao ang labing maayong paagi sa pagsugot niining sugo nga inspirado sa Diyos: “Sundoga ang Diyos, ingong minahal nga mga anak.”—Efeso 5:1.

21. Sa unsang paagi ang mga sumusunod sa Kristo nagpabanaag sa kahayag diha sa mangitngit nga kalibotan?

²¹ Samtang sundogon nato si Jesus ug ang iyang Amahan, si Jehova, atong mahimo ang kahibulongang butang. Ikapabanaag nato ang masanag nga kahayag. Sa kalibotan nga gibukotan sa kangitngit, diin binilyon ang gilimbongan ni Satanas ug nagsundog sa iyang mga taras, kitang nagsunod sa Kristo nagsabwag sa nagkalainlaing dapit sa mga banaag sa labing masanag nga kahayag—ang kahayag sa mga kamatuoran sa Kasulatan, ang kahayag sa maayong Kristohanong mga hiyas, ang kahayag sa lunsay nga kalipay, sa tinuod nga pakigdait, sa tiunay nga gugma. Sa samang higayon, kita mas masuod kang Jehova, ug kana ang kinalabwang tumong nga posibleng makab-ot ni bisan kinsang intelihenteng linalang.

22, 23. (a) Unsang umaabot nga mga panalangin ang modangat niadtong maunongong mopadayon sa pagsunod kang Jesus? (b) Unsay angay natong determinasyon?

²² Hunahunaa, usab, kon unsay gustong buhaton ni  Jehova alang kanimo sa umaabot pinaagi sa iyang Mesiyanikong Hari. Sa di na madugay, ipahinabo sa maong Hari ang matarong nga pagpakiggubat batok sa daotang sistema sa mga butang ni Satanas. Segurado ang kadaogan ni Jesus! (Pinadayag 19:11-15) Human niana, sugdan na sa Kristo ang iyang Usa ka Libo ka Tuig nga Pagmando sa yuta. Ipadapat na sa iyang langitnong kagamhanan ang mga kaayohan sa lukat ngadto sa tanang matinumanong tawo, nga magbayaw kanila ngadto sa kahingpitan. Handurawa nga ikaw abtik ug himsog, batan-on ug lig-on kanunay, nga malipayong nagtrabaho kauban sa nahiusang katawhan sa paghimo niining  yutaa nga usa ka paraiso! Pagkatapos sa maong Milenyo, ibalik ni Jesus ang pagmando ngadto sa iyang Amahan. (1 Corinto 15:24) Kon ikaw maunongong mopadayon sa pagsunod sa Kristo, hatagan kag talagsaon kaayong panalangin nga lisod mahanduraw—ang “mahimayaong kagawasan sa mga anak sa Diyos”! (Roma 8:21) Oo, atong mabatonan ang tanang panalangin nga giwala ni Adan ug Eva. Ang yutan-ong mga anak nga lalaki ug babaye ni Jehova, sa walay kataposan mahigawas na sa timaan sa sala ni Adan. Sa pagkatinuod, “ang kamatayon mawala na.”—Pinadayag 21:4.

²³ Hinumdomi kadtong dato nga batan-ong magmamando nga atong gihisgotan sa Kapitulo 1. Iyang gibalibaran ang pagdapit ni Jesus: “Kuyog nako ug mahimong akong sumusunod.” (Marcos 10:17-22) Ayaw gayod himoa ang maong sayop! Hinaot imong dawaton ang pagdapit ni Jesus uban sa kalipay ug kadasig. Hinaot determinado kang molahutay, mopadayon sa pagsunod sa Maayong Magbalantay adlaw-adlaw, tuigtuig, ug mabuhi nga imong makita ang mahimayaong katumanan sa tanang katuyoan ni Jehova!