1-4. (a) Sa unsang paagi si Jesus mahanasong nagtudlo sa usa ka babayeng Samarianhon, ug unsay sangpotanan? (b) Unsay reaksiyon sa iyang mga apostoles?

 NAGBAKTAS na silag daghang oras. Si Jesus ug ang iyang mga apostoles nagbaktas paamihanan, gikan sa Judea paingon sa Galilea. Sa pagsubay sa kinamub-ang ruta—mga tulo ka adlaw nga panaw—miagi sila sa Samaria. Samtang nagsingabot ang kaudtohon, nagkaduol sila sa gamayng siyudad sa Sikar, diin mihapit sila aron makapahulay ug makakaon.

² Samtang nanglakaw ang iyang mga apostoles aron mopalit ug pagkaon, si Jesus mipahulay daplin sa usa ka atabay sa gawas sa siyudad. Miabot ang usa ka babaye aron mokalos ug tubig. Mahimong dili lang tagdon ni Jesus kadtong bayhana. Siya “gikapoy sa panaw.” (Juan 4:6) Hisabtan kon iyang ipiyong lang ang iyang mga mata ug pasagdan kadtong babayeng Samarianhon nga moabot ug unya mopahawa. Sumala sa atong nasabtan sa Kapitulo 4 niining basahona, lagmit nagdahom ang babaye nga si bisan kinsang Hudiyo motamihid kaniya. Bisan pa niana, nakigsulti si Jesus niadtong bayhana.

³ Misugod siya sa pagpakigsulti nga migamit ug ilustrasyon, nga may kalangkitan sa matag adlaw nga pagkinabuhi sa babaye—sa pagkatinuod, sa gibuhat mismo sa babaye niadtong gutloa. Ang babaye miadto didto aron mokalos ug tubig; si Jesus mihisgot bahin sa nagahatag ug kinabuhi nga tubig nga magtagbaw sa iyang espirituwal nga kauhaw. Kadtong bayhana nagpatunghag daghang lantugionong mga isyu. a  Mataktikanhong gilikayan ni Jesus ang paghisgot sa maong mga isyu ug gipadayon niya paghisgot ang ulohang diha sa iyang hunahuna. Ang espirituwal nga mga butang ang bug-os niyang gihisgotan—ang putling pagsimba ug si Jehova nga Diyos. Kaylap ug epekto ang iyang mga pulong, kay kana gisulti sa babaye ngadto sa mga tawo sa siyudad, ug buot usab nilang magpatalinghog kang Jesus.—Juan 4:3-42.

⁴ Sa paghibalik nila, unsay gibati sa mga apostoles bahin sa talagsaong pagpamatuod nga gihimo ni Jesus duol sa atabay? Walay timailhan nga sila nadasig. Natingala gani sila nga si Jesus nakigsulti niadtong bayhana, ug lagmit nga sila wala makigsulti kaniya. Sa paglakaw sa babaye, sila nagpadayon sa pag-agda kang Jesus nga mokaon sa pagkaon nga ilang gidala. Hinunoa, giingnan sila ni Jesus: “Duna koy pagkaon nga wala ninyo mahibaloi.” Kay nalibog, naghunahuna sila sa sinugdan nga si Jesus may literal nga pagkaon. Unya siya mipatin-aw: “Ang akong pagkaon mao ang pagbuhat sa kabubut-on sa usa nga nagpadala kanako ug ang paghuman sa iyang buluhaton.” (Juan 4:32, 34) Sa ingon si Jesus nagtudlo kanila nga alang kaniya ang iyang pangunang buluhaton sa kinabuhi mas hinungdanon kay sa pagkaon. Buot niya nga kana usab ang ilang pagbati bahin niana. Unsa ba kining buluhatona?

 5. Unsay tibuok kinabuhing buluhaton ni Jesus, ug unsay atong hisgotan niining kapituloha?

⁵ Dihay higayon nga si Jesus miingon: “Kinahanglan sab nakong isangyaw ang maayong balita sa Gingharian sa Diyos . . . , kay ako gipadala alang niini.” (Lucas 4:43) Oo, si Jesus gipadala aron sa pagwali ug pagtudlo sa maayong balita sa Gingharian sa Diyos. b Ang mga sumusunod ni Jesus karon  adunay samang buluhaton. Nan, hinungdanong atong hisgotan kon nganong nagwali si Jesus, kon unsay iyang giwali, ug kon unsay iyang tinamdan bahin sa iyang buluhaton.

6, 7. Unsay gusto ni Jesus nga bation sa “matag magtutudlo sa publiko” bahin sa pagpakig-ambit sa maayong balita sa uban? Iilustrar.

⁶ Atong hisgotan kon unsay pagbati ni Jesus bahin sa mga kamatuoran nga iyang gitudlo; dayon atong hisgotan ang iyang tinamdan bahin sa mga tawong iyang gitudloan. Gigamit ni Jesus ang usa ka tin-awng ilustrasyon sa pagpakita sa iyang pagbati bahin sa pagpakig-ambit sa uban sa mga kamatuoran nga gitudlo ni Jehova kaniya. Siya miingon: “Ang matag magtutudlo sa publiko nga natudloan bahin sa Gingharian sa langit nahisama sa usa ka agalon nga magpagawas ug bag-o ug daan nga mga butang gikan sa iyang tipiganag bahandi.” (Mateo 13:52) Nganong ang tagbalay niini nga ilustrasyon magpagawas ug mga butang gikan sa iyang tipiganag bahandi?

⁷ Ang tagbalay wala magpasigarbo sa iyang mga kabtangan, sama sa gihimo ni Haring Ezequias sa karaang kapanahonan—nga may daotang mga sangpotanan. (2 Hari 20:13-20) Unsay nagtukmod sa tagbalay? Tagda ang usa ka ilustrasyon: Ikaw miduaw sa usa ka tinahod nga magtutudlo diha sa iyang balay. Iyang gibuksan ang usa ka hunos ug gikuha ang duha ka sulat—ang usa ka sulat nadalag tungod sa kadaan, ang lain bubag-o pa. Kana maoy mga sulat nga iyang nadawat gikan sa iyang amahan—ang usa ka sulat nadawat daghang katuigan kanhi sa dihang ang magtutudlo tin-edyer pa, ang laing sulat nadawat dili pa dugay. Migilak ang iyang mga mata sa kalipay samtang nagsulti siya kanimo nga ang maong mga sulat bililhon kaayo ug nga ang tambag niana nakapausab kaayo sa iyang kinabuhi ug kini mahimong makatabang kanimo. Tin-awng gipabilhan sa magtutudlo ang mga sulat, nga minahal kaayo sa iyang kasingkasing. (Lucas 6:45) Iyang  gipakita kanimo ang mga sulat, dili sa pagpasigarbo o pagpanapi, kondili aron makahatag kinig kaayohan kanimo ug ipasabot kanimo ang pagkabililhon kaayo niana.

 8. Nganong aduna gayod kitay balidong katarongan sa pagbati nga ang mga kamatuoran nga atong nakat-onan gikan sa Pulong sa Diyos maoy mga bahandi?

⁸ Ang Dakong Magtutudlo, si Jesus, may susamang mga motibo sa pagpahayag sa mga kamatuoran sa Diyos ngadto sa uban. Alang kaniya, ang maong mga kamatuoran maoy bililhon kaayong mga bahandi. Iya kanang gimahal, ug maikagon siyang nagpahayag niana. Buot niya nga kana usab ang bation sa iyang tanang sumusunod, “ang matag magtutudlo sa publiko.” Mao ba usab kanay atong pagbati? Aduna kitay balidong katarongan sa paghigugma sa matag kamatuoran nga atong nakat-onan gikan sa Pulong sa Diyos. Atong gimahal ang bililhong mga kamatuoran bisan kon kana dugay nang gimahal nga mga tinuohan o bag-ong mga katin-awan. Pinaagi sa kinasingkasing ug madasigong pagsulti ug sa paghigugma kanunay sa gitudlo ni Jehova kanato, atong mapahayag ang maong gugma, sama kang Jesus.

 9. (a) Unsay pagbati ni Jesus bahin sa mga tawo nga iyang gitudloan? (b) Sa unsang paagi makasundog kita sa tinamdan ni Jesus bahin sa mga tawo?

⁹ Gihigugma usab ni Jesus ang katawhan nga iyang gitudloan, nga dugang natong hisgotan sa Seksiyon 3. Gitagna nga ang Mesiyas ‘maluoy sa timawa ug sa kabos.’ (Salmo 72:13) Sa pagkatinuod, si Jesus matinagdanon sa mga tawo. Nabalaka siya bahin sa mga hunahuna ug mga tinamdan nga nagtukmod kanila; naghunahuna siya sa mga suliran nga nakapalisod kanila ug sa mga butang nga nakababag sa ilang pagsabot sa kamatuoran. (Mateo 11:28; 16:13; 23:13, 15) Pananglitan, hinumdomi ang babayeng Samarianhon. Walay duhaduha nga siya nahingangha kaayo nga si Jesus nagmatinagdanon kaniya. Ang pagkasabot ni Jesus sa personal niyang kahimtang nagtukmod sa maong babaye sa pagtuo nga siya usa ka propeta ug sa pagsulti sa uban bahin kaniya. (Juan  4:16-19, 39) Tinuod, ang mga sumusunod ni Jesus karon dili makabasa sa mga kasingkasing sa mga tawo nga ilang sangyawan. Bisan pa niana, makapakita kitag interes sa mga tawo, sama ni Jesus; ikapakita nato ang atong pagkamahunahunaon kanila; ug ikapasibo nato ang atong mga pulong aron mahupay ang ilang mga kabalaka, mga suliran, ug matagbaw ang ilang mga panginahanglan.

10, 11. (a) Unsay giwali ni Jesus? (b) Nganong gikinahanglan ang Gingharian sa Diyos?

¹⁰ Unsay giwali ni Jesus? Kon ikaw mangitag tubag pinaagi sa pagsusi sa mga pagtulon-an sa daghang iglesya nga nag-angkong iyang representante, mahimong mohinapos ka nga siya nagmantalag usa ka matang sa social gospel o balitang nalangkit sa katilingban. O mahimong sabton nimo nga siya nagpasiugdag politikanhong reporma o nga iyang gipasiugda nga labing hinungdanon ang personal nga kaluwasan. Bisan pa niana, sumala sa giingon na, si Jesus yanong miingon: “Kinahanglan . . . nakong isangyaw ang maayong balita sa Gingharian sa Diyos.” Unsa ba gayod ang nalangkit niana?

¹¹ Hinumdomi, si Jesus presente niadto sa langit sa dihang unang gipasipalahan ni Satanas ang balaang ngalan ni Jehova ug gikuwestiyon ang paagi sa Diyos sa pagmando. Segurado nga naguol pag-ayo si Jesus sa pagkakita nga ang iyang matarong nga Amahan giakusar ingong di makataronganong Magmamando ug nga iyang gihikawag kaayohan ang Iyang mga linalang! Naguol kaayo ang Anak sa Diyos sa dihang si Adan ug Eva, ang mahimong mga ginikanan sa katawhan, mituo sa pagbutangbutang ni Satanas! Nakita sa Anak nga ang tawhanong pamilya naapektohan sa sala ug sa kamatayon ingong sangpotanan sa maong pagrebelde. (Roma 5:12) Bisan pa niana, pagkadako sa iyang kalipay sa pagkahibalo nga may adlaw ra nga tul-iron sa iyang Amahan ang kahimtang!

12, 13. Unsang mga inhustisya ang pagatul-iron sa Gingharian sa Diyos, ug sa unsang paagi ang Gingharian gihatagag unang pagtagad ni Jesus diha sa iyang ministeryo?

 ¹² Labaw sa tanan, unsa ang pangunang isyu nga pagahusayon? Ang balaang ngalan ni Jehova kinahanglang mabalaan, mahinloan sa tanang timaan sa kaulawan nga gipahamtang niana ni Satanas ug sa tanan niyang dumadapig. Kay ang ngalan ni Jehova naglakip sa iyang reputasyon ingong magmamando, kinahanglang mapamatud-an nga kinamaayohan ang iyang paagi sa pagmando. Mas nasabtan ni Jesus ang maong hinungdanong mga isyu kay ni bisan kinsang tawo. Sa modelong pag-ampo, iyang gitudloan ang iyang mga sumusunod nga hangyoon una nga mabalaan ang ngalan sa iyang Amahan, dayon moabot ang Gingharian sa iyang Amahan, ug unya matuman ang kabubut-on sa Diyos sa yuta. (Mateo 6:9, 10) Ang Gingharian sa Diyos, uban si Kristo Jesus ingong Magmamando niini, duol nang magwagtang sa hiwi nga sistema ni Satanas gikan sa yuta ug magpalig-on sa matarong nga pagmando ni Jehova hangtod sa hangtod.—Daniel 2:44.

¹³ Ang maong Gingharian mao ang tema sa ministeryo ni Jesus. Ang iyang tanang pulong ug buhat nakapatin-aw kon unsa ang maong Gingharian ug kon sa unsang paagi kana magpatuman sa katuyoan ni Jehova. Wala itugot ni Jesus nga may makapahilayo kaniya gikan sa iyang katuyoan sa pagwali sa maayong balita sa Gingharian sa Diyos. Sa iyang adlaw, dihay katilingbanong mga isyu nga angayng sulbaron dayon, di maihap nga mga inhustisya, apan iyang unang gitagad ang iyang mensahe ug ang iyang buluhaton. Ang padayong pag-una niana nagpasabot ba nga si Jesus kortog hunahuna, dili mabination ug makalaay ang iyang pamaagi? Dili gayod!

14, 15. (a) Sa unsang paagi gipamatud-an ni Jesus nga siya “labaw pa kang Solomon”? (b) Sa unsang paagi makasundog kita kang Jesus bahin sa mensahe nga atong ginawali?

¹⁴ Sumala sa atong masabtan niining tibuok nga seksiyon, gihimo ni Jesus ang iyang pagtudlo nga makapainteres ug  makapadani. Iyang gitukbil ang kasingkasing sa mga tawo. Makahinumdom tingali kita sa maalamong si Haring Solomon, kinsa nangitag nindot nga mga pulong, hustong mga pulong sa kamatuoran, aron ipasa ang mga hunahuna nga gipasulat ni Jehova kaniya ubos sa Iyang paggiya. (Ecclesiastes 12:10) Si Jehova mihatag ug “kasingkasing nga may pagsabot” sa maong dili hingpit nga tawo, nga tungod niana siya nakasulti bahin sa daghang butang, nga naglakip sa kalanggaman, kaisdaan, kakahoyan, ug kahayopan. Nangabot ang mga tawo gikan sa halayo aron magpatalinghog sa mga pulong ni Solomon. (1 Hari 4:29-34) Bisan pa niana, si Jesus “labaw pa kang Solomon.” (Mateo 12:42) Siya mas maalamon, nga may ‘kasingkasing nga mas lapad ug pagsabot.’ Sa dihang iyang gitudloan ang mga tawo, gigamit ni Jesus ang iyang mas dakong kahibalo bahin sa Pulong sa Diyos ug bahin sa kalanggaman, kahayopan, kaisdaan, pagpanguma, klima, presenteng mga panghitabo, kasaysayan, ug mga kahimtang sa katilingban. Sa samang higayon, wala gayod ipasigarbo ni Jesus ang iyang kahibalo aron dayegon siya sa uban. Iyang gipayano ug gihimong tin-aw ang iyang mensahe. Dili katingad-an nga ang mga tawo nalipay sa pagpatalinghog sa iyang gipahayag!—Marcos 12:37; Lucas 19:48.

¹⁵ Ang mga Kristohanon karon naningkamot sa pagsunod sa pagpanguna ni Jesus. Wala kitay dakong kaalam ug kahibalo nga sama sa iyaha, apan kitang tanan may igong kahibalo ug kasinatian nga atong magamit sa dihang ipakig-ambit nato sa uban ang mga kamatuoran sa Pulong sa Diyos. Pananglitan, ang mga ginikanan makagamit sa ilang kasinatian diha sa pagmatuto sa ilang mga anak aron iilustrar ang gugma ni Jehova alang sa Iyang mga anak. Ang uban mahimong mogamit ug mga pananglitan o mga ilustrasyon gikan sa sekular nga trabaho, tunghaan, o sa ilang kahibalo bahin sa mga tawo ug sa presenteng mga panghitabo. Sa samang higayon, magbantay kita nga walay makapahilayo sa atong pagtagad gikan sa atong mensahe—ang maayong balita sa Gingharian sa Diyos.—1 Timoteo 4:16.

16, 17. (a) Unsay tinamdan ni Jesus bahin sa iyang ministeryo? (b) Sa unsang paagi gipakita ni Jesus nga ang iyang ministeryo maoy panguna sa iyang kinabuhi?

¹⁶ Gibati ni Jesus nga ang iyang ministeryo maoy bililhong bahandi. Nalipay siya nga motabang sa mga tawo aron sila makaila sa iyang langitnong Amahan sumala sa Iyang tinuod nga kinaiyahan, nga wala malubog sa makalilibog ug ginamag tawo nga mga doktrina ug mga tradisyon. Buot ni Jesus nga motabang sa mga tawo aron ilang mabatonan ang inuyonang relasyon uban kang Jehova ug ang paglaom sa kinabuhing walay kataposan. Nalipay siya sa paghatag sa mga tawo ug kahupayan ug sa kalipay sa maayong balita. Sa unsang paagi gipakita niya nga kana ang iyang mga pagbati? Tagda ang tulo ka paagi.

¹⁷ Una, gihimo ni Jesus ang ministeryo nga panguna sa iyang kinabuhi. Ang paghisgot bahin sa Gingharian mao ang iyang karera, ang iyang okupasyon sa kinabuhi, ang iyang pangunang interes. Kanay hinungdan, sumala sa atong gihisgotan sa Kapitulo 5, nga maalamong gipayano ni Jesus ang iyang pagkinabuhi. Samtang nagtambag siya sa uban, iyang gitutok ang iyang mata sa kon unsay labing hinungdanon. Wala siya mabalda sa daghang butang nga kinahanglan unta niyang bayran, mentinahon, ug ayohon o ilisan paglabay sa panahon. Yano ang iyang pagkinabuhi mao nga walay nakapahilayo kaniya gikan sa iyang ministeryo.—Mateo 6:22; 8:20.

18. Sa unsang mga paagi si Jesus nagmakugihon sa iyang ministeryo?

¹⁸ Ikaduha, nagmakugihon si Jesus sa iyang ministeryo. Naghago siya pag-ayo sa ministeryo, nga sa literal mibaktas ug ginatos ka kilometros sa tibuok Palestina, nga nangitag mga tawo nga iyang sangyawan sa maayong balita. Nakigsulti siya kanila diha sa ilang mga balay, sa publikong mga plasa, sa mga merkado, ug sa kanataran. Nakigsulti siya kanila bisan pag nagkinahanglan siyag pahulay, pagkaon, tubig, o diyutayng kahilom kauban sa suod niyang mga higala. Bisan pag  siya hapit nang mamatay, nagpadayon siya sa pagwali sa maayong balita sa Gingharian sa Diyos ngadto sa uban!—Lucas 23:39-43.

19, 20. Sa unsang paagi giilustrar ni Jesus ang pagkadinalian sa buluhatong pagwali?

¹⁹ Ikatulo, giisip ni Jesus nga ang ministeryo maoy dinalian. Hinumdomi ang iyang pagpakigsulti sa babayeng Samarianhon daplin sa atabay sa gawas sa Sikar. Lagmit wala hisabti sa mga apostoles ni Jesus nga ang maayong balita kinahanglang iwali niadtong kahimtanga. Si Jesus miingon kanila: “Dili ba nag-ingon mo nga duna pay upat ka bulan una ang pag-ani? Apan sultihan ko kamo: Lantawa ang kaumahan. Kini puti na aron anihon.”—Juan 4:35, footnote.

²⁰ Ang maong ilustrasyon gipasukad ni Jesus niadtong yugtoa sa panahon. Lagmit nga kadto bulan sa Kislev (Nobyembre/Disyembre). Ang pag-ani sa sebada pagahimoon paglabay sa upat ka bulan, sa panahon sa Paskuwa, sa Nisan 14. Busa wala batia sa mga mag-uuma nga dinalian ang pag-ani niadtong panahona. Molabay pa ang taas nga panahon una pa sa ting-ani. Apan komosta ang pag-ani ug mga tawo? Aw, daghan ang andam magpatalinghog, makakat-on, mahimong mga tinun-an sa Kristo ug makabaton sa kahibulongang paglaom nga gitagana ni Jehova kanila. Si Jesus daw nakakita na sa maong masambingayong kaumahan ug nakakita nga ang uma puti na ug ang tanang uhay nga puno sa hinog nga mga lugas nagbawogbawog sa hangin, nga nagtimaan nga andam na kanang anihon. c Kadto mao na ang panahon, ug ang buluhaton maoy dinalian! Busa, sa dihang ang katawhan sa usa ka siyudad misulay paghawid kang Jesus, siya mitubag: “Kinahanglan sab nakong isangyaw ang maayong balita sa Gingharian sa Diyos ngadto sa ubang siyudad, kay ako gipadala alang niini.”—Lucas 4:43.

21. Sa unsang paagi makasundog kita kang Jesus?

 ²¹ Sa tulo ka paagi nga bag-o pang gihisgotan, kita makasundog kang Jesus. Atong mahimo ang Kristohanong ministeryo nga panguna sa atong kinabuhi. Bisan pag aduna tingali kitay pamilyahanon ug sekular nga mga obligasyon, ikapakita nato nga ang atong ministeryo maoy panguna pinaagi sa masiboton, regular nga pagpakig-ambit niini, sama kang Jesus. (Mateo 6:33; 1 Timoteo 5:8) Kita mahimong magmakugihon diha sa ministeryo, nga maghatag nga madagayaon sa atong panahon, kusog, ug kahinguhaan sa pagpaluyo niini. (Lucas 13:24) Ug mahimo natong ibutang kanunay sa hunahuna nga dinalian ang atong buluhaton. (2 Timoteo 4:2) Kinahanglang pahimuslan nato ang tanang higayon sa pagwali!

22. Unsay pagahisgotan sa sunod nga kapitulo?

²² Gipakita usab ni Jesus nga iyang nasabtan ang kahinungdanon sa buluhaton pinaagi sa pagpaneguro nga kini magpadayon pagkamatay niya. Iyang gisugo ang iyang mga sumusunod sa pagpadayon sa buluhatong pagwali ug pagpanudlo. Ang maong sugo mao ang ulohan sa sunod nga kapitulo.