MAKASEGURO ka nga dawaton ka ni Jehova dihang mobalik ka niya. Tabangan ka niyang masagubang ang mga kabalaka ug kahiubos, ug tabangan pod ka niya nga makabatog kalinaw sa hunahuna ug kasingkasing nga maoy resulta sa hinlong konsensiya. Sa ingon, madasig kang moalagad pag-usab kang Jehova uban sa mga igsoon. Ang imong kahimtang mahisama unya sa ubang Kristohanon sa unang siglo, nga gisulatan ni apostol Pedro: “Kamo samag mga karnero nga nasaag, apan karon kamo namalik sa magbalantay ug tig-atiman sa inyong kinabuhi.”​—1 Pedro 2:25.

Ang pagbalik kang Jehova mao ang kinamaayohang desisyon nga imong mahimo. Ngano? Mapalipay nimo ang iyang kasingkasing. (Proverbio 27:11) Nahibalo ka nga si Jehova dunay pagbati, ug dunay epekto kaniya ang atong ginahimo. Siyempre, wala ta pugsa ni Jehova nga higugmaon ug alagaron siya. (Deuteronomio 30:19, 20) Sumala pa sa usa ka eskolar sa Bibliya: “Ang pultahan sa kasingkasing sa tawo walay kuptanan sa gawas. Kinahanglang sa sulod kini ablihan.” Kon kita mosimba kang Jehova uban ang kasingkasing nga punog gugma kaniya, sama rag atong giablihan ang pultahan sa atong kasingkasing. Sa ingon, gihatagan nato si Jehova ug bililhong gasa​—ang atong integridad—​ug mapalipay gyod nato siya. Sa pagkatinuod, dili matupngan ang kalipay nga atong bation kon atong ihatag kang Jehova ang pagsimba nga angay ra gyod kaniya.​—Buhat 20:35; Pinadayag 4:11.

Dugang pa, kon mobalik ka sa pag-alagad, matagan-an ang imong espirituwal nga panginahanglan. (Mateo 5:3) Daghang tawo ang nagkadiindiin sa pagpangitag tubag sa mga pangutana bahin sa katuyoan sa kinabuhi. Dili kana ikatingala kay gilalang ta ni Jehova nga dunay ingon niana nga panginahanglan. Kita gidisenyo nga mosimba kaniya, busa matagbaw lang ta kon ato nang himoon. Wala nay laing makahatag natog tinuod nga kalipay gawas sa pagsimba kang Jehova tungod sa gugma.​—Salmo 63:1-5.

Gusto kaayo ni Jehova nga mobalik ka niya. Nganong makaseguro ka niana? Hunahunaa: Daghang pag-ampo ang gihimo sa pag-andam niini nga brosyur. Tingali gihatag kini kanimo sa usa ka ansiyano o igsoon. Dayon nadasig ka sa pagbasa ug sa pagsanong sa mensahe niini. Kining tanan maoy pamatuod nga wala gyod ka kalimti ni Jehova. Siya mahigugmaong nagkabig kanimo balik kaniya.​—Juan 6:44.

Makapahupay ang pagkahibalo nga si Jehova dili gyod malimot sa iyang mga alagad nga nasaag. Napamatud-an kana sa sister nga si Donna. Siya miingon: “Anam-anam kong napalayo sa kamatuoran, pero kanunay nakong mahunahunaan ang Salmo 139:23, 24, nga nag-ingon: ‘Susiha ko, Oh Diyos, ug sayra ang akong kasingkasing. Susiha ko, ug sayra ang akong mga kabalaka. Tan-awa kon duna ba koy daotang kiling, ug tultoli ko sa dalan sa walay kataposan.’ Nahibalo ko nga dili gyod ko bahin sa kalibotan​—dili ko malipayon—​ug nahibalo ko nga kinahanglan kong mobalik sa organisasyon ni Jehova. Nakita nako nga wala gyod ko biyai ni Jehova; kinahanglan lang nakong pangitaon ang dalan balik kaniya. Ug nalipay kaayo ko nga nakita nako ni!”

Kami kinasingkasing nga nag-ampo nga hinaot bation nimo pag-usab “ang kalipay nga gikan kang Jehova.” (Nehemias 8:10) Dili gyod ka magmahay kon mobalik ka kang Jehova.