KITANG tanan apektado sa kabalaka​—bisan ang mga alagad sa Diyos. “Nalumsan ko sa mga kabalaka,” misulat ang salmista. (Salmo 94:19) Si Jesus miingon sab nga sa kataposang mga adlaw, lisod ang pag-alagad kang Jehova tungod sa “mga kabalaka sa kinabuhi.” (Lucas 21:34) Komosta sa imong bahin? Nabug-atan ba ka sa mga problema sa pinansiyal, pamilya, ug panglawas? Sa unsang paagi si Jehova makatabang nimo sa pagsagubang niini?

Nagkinahanglan tag tabang sa pagsagubang sa kabalaka. Si apostol Pablo miingon nga kita “ginapiit pag-ayo sa tanang paagi,” “nangalibog,” ug “nangatumba.” Pero siya miingon sab nga kita “dili kay dili na makalihok,” “dili kay wala na gyoy kalingkawasan,” ug “wala malaglag.” Unsay nakatabang nato nga makalahutay? Ang “gahom nga labaw sa kasarangan”​—gahom nga gikan sa atong labing gamhanang Diyos, si Jehova.​—2 Corinto 4:7-9.

Palandonga kon sa unsang paagi ka nakadawat kaniadto ug “gahom nga labaw sa kasarangan.” Mahinumdom ba ka dihang nakadungog kag makapadasig nga pakigpulong ug tungod niana mas naapresyar nimo ang maunongong gugma ni Jehova? Nalig-on ba ang imong pagtuo sa mga saad ni Jehova dihang gitudloan nimo ang uban bahin sa Paraiso? Ang pagtambong ug mga tigom ug pagpaambit sa atong pagtuo sa uban makapalig-on nato sa pagsagubang sa mga kabalaka sa kinabuhi. Mabatonan sab nato ang kalinaw sa hunahuna aron magmalipayon ta sa pag-alagad kang Jehova.

Tinuod, lagmit mobati ka nga daghan kaayo kag responsabilidad. Pananglitan, gisugo ta ni Jehova nga unahon pagpangita ang Gingharian ug magbaton ug regular nga rutina sa espirituwal nga buluhaton. (Mateo 6:33; Lucas 13:24) Pero unsa na man kon limitado ang imong mahimo tungod sa pagsupak, sakit, o mga problema sa pamilya? O kaha ang imong trabaho makahurot sa imong panahon ug kusog nga gamiton unta nimo para sa kongregasyon? Daghan kaayo kag angayng himoon pero kapoy na ka ug kulag panahon, busa lagmit mabug-atan gyod ka. Basig makahunahuna pa gani ka nga morag daghan ra kaayog gipangayo si Jehova nimo.

Masinabtanon si Jehova. Dili siya mangayog labaw sa atong mahatag. Nahibalo siya nga nagkinahanglan tag panahon aron mobalik ang atong kusog ug maulian ang atong emosyon.​—Salmo 103:13, 14.

Pananglitan, tagda kon giunsa pag-atiman ni Jehova si propetang Elias. Dihay higayon nga si Elias naguol ug nahadlok pag-ayo ug mikalagiw sa kamingawan. Gikasab-an ba siya ni Jehova ug gipabalik sa iyang asaynment? Wala. Si Jehova kaduha nagpadalag anghel aron pukawon ug hatagag pagkaon si Elias. Paglabayg 40 ka adlaw, wala gihapon siya maulii sa iyang kabalaka ug kahadlok.  Unsa pay gihimo ni Jehova sa pagtabang niya? Una, gipakita ni Jehova nga kaya niyang panalipdan si Elias. Ikaduha, gihupay siya ni Jehova sa “kalma ug hinay nga tingog.” Dayon gisultihan siya nga may pipila pa ka libo nga matinumanong nag-alagad sa Diyos. Wala madugay, si Elias aktibo ug madasigon na sab nga nag-alagad ingong propeta. (1 Hari 19:1-19) Unsay leksiyon? Dihang si Elias nabug-atan sa kabalaka, si Jehova mapailobon ug mahigugmaong nag-atiman kaniya. Wala mausab si Jehova. Ingon niana gihapon siya hangtod karon.

Dihang maghunahuna ka kon unsay imong ikahatag kang Jehova, mas maayong magmarealistiko. Ayawg itandi ang imong mahimo karon sa imong nahimo kaniadto. Sa pag-ilustrar, ang usa ka atleta nga mihunong sa pagbansay sulod sa daghang bulan o tuig dili makabalik dihadiha sa iyang kanhing rutina. Kinahanglang magsugod siya sa ginagmayng ehersisyo aron mobaskog siya ug makalahutay. Ang mga Kristohanon samag atleta. Duna silay tumong sa ilang pagbansay. (1 Corinto 9:24-27) Nganong dili nimo sulayan nga maghimog usa ka espirituwal nga tumong nga dali nimong makab-ot sa pagkakaron? Pananglitan, puwede nimo himoong tumong ang pagtambong ug tigom. Pangayog tabang kang Jehova nga makab-ot ang imong tumong. Dihang anam-anam nga mobalik ang imong kalig-on sa espirituwal, imong matilawan ug makita nga “si Jehova maayo.” (Salmo 34:8) Hinumdomi nga gipabilhan ni Jehova ang bisan unsa nga imong mahimo​—bisag unsa pa ka gamay—​sa pagpakita sa imong gugma kaniya.​—Lucas 21:1-4.

Giunsa pagtabang ni Jehova si June nga makabalik kaniya? Si June miingon: “Sige kog ampo kang Jehova nga tabangan ko niya. Dayon giingnan ko sa akong umagad nga dunay asembliya sa among lugar. Misulay kog tambong ug usa lang ka adlaw. Nindot kaayo ang pagbati nga nakauban nako pag-usab ang katawhan ni Jehova! Kadto nga asembliya ang nakapadasig nako nga mobalik. Karon, malipayon na sab kong nag-alagad kang Jehova. Duna nay kahulogan ang akong kinabuhi. Akong nakita nga gikinahanglan gyod nako ang mga igsoon ug ang ilang tabang. Mapasalamaton kaayo ko nga nakabalik ko mentras di pa ulahi ang tanan.”