ANG pagbati nga sad-an bug-at kaayong palas-anon. Si Haring David misulat: “Ang akong kasaypanan milapaw sa akong ulo; samag bug-at nga palas-anon, dili nako kini mapas-an.” (Salmo 38:4) Ang ubang Kristohanon nalumsan sa tumang kaguol kay nagtuo nga dili na sila mapasaylo ni Jehova. (2 Corinto 2:7) Husto ba kana nga panghunahuna? Ibutang ta nga nakahimo kag grabeng sala. Nagpasabot ba kana nga layo na kaayo ka kang Jehova ug dili na ka niya mapasaylo? Dili, dili ingon niana si Jehova!

Dili talikdan ni Jehova ang nakasala nga maghinulsol. Gani, siya pay moduol nila! Diha sa ilustrasyon sa mausikong anak, gipakasama ni Jesus si Jehova sa mahigugmaong amahan kansang anak milayas ug nagpatuyang sa iyang kinabuhi. Sa ulahi, gustong mopauli ang anak. “Samtang layo pa [ang anak] sa balay, nalantawan siya sa iyang amahan ug naluoy pag-ayo kaniya. Ang amahan midagan ug migakos sa iyang anak ug mapinanggaong mihalok kaniya.” (Lucas 15:11-20) Nangandoy ba ka nga mobalik kang Jehova pero morag “layo” na kaayo ka niya? Sama sa amahan diha sa ilustrasyon ni Jesus, si Jehova naluoy kaayo nimo. Naghulat siya sa imong pagbalik.

Pero unsaon man kon naghunahuna ka nga bug-at o daghan kaayo ang imong sala maong dili na ka mapasaylo ni Jehova? Palihog matikdi ang pagdapit ni Jehova diha sa Isaias 1:18: “‘Ari mo karon, ug husayon nato ang mga butang tali kanato,’ miingon si Jehova. ‘Bisan tuod ang inyong mga sala hayag-pula, kini papution sama sa niyebe.’” Oo, si Jehova dagaya nga mopasaylo bisan sa mga sala nga gipakasamag hayag-pula nga mansa diha sa puti nga panapton.

Gusto ni Jehova nga mahuwasan ka sa kabug-at nga imong gibati. Nan, unsay imong himoon aron magmalinawon ang imong hunahuna, nga maoy resulta sa kapasayloan sa Diyos ug sa hinlo nga konsensiya? Tagda kining duha ka butang nga gihimo ni Haring David. Una, siya miingon: “Isugid nako kang Jehova ang akong mga kalapasan.” (Salmo 32:5) Hinumdomi, gidapit ka ni Jehova nga moduol kaniya diha sa pag-ampo ug ‘makighusay’ kaniya. Dawata ang iyang pagdapit. Isugid kang Jehova ang imong mga sala ug ibubo ang imong kasingkasing kaniya. Tungod sa naeksperyensiyahan ni David, siya masaligon nga makaampo: “Hinloi ko gikan sa akong sala. . . . Ang kasingkasing nga gun-ob ug dugmok, Oh Diyos, dili nimo isalikway.”​—Salmo 51:2, 17.

Ikaduha, si David gitabangan ni Natan, ang propeta nga gipadala sa Diyos. (2 Samuel 12:13) Karon, si Jehova nagtaganag mga ansiyano sa kongregasyon nga gibansay sa pagtabang sa mga mahinulsolon nga makabalik kang Jehova. Kon moduol  ka sa mga ansiyano, dasigon ka nila pinaagi sa Bibliya. Mag-ampo sab sila para nimo aron mahupay ang imong kasingkasing ug makunhoran o mawala ang imong negatibong pagbati. Andam silang motabang aron maulian ang imong espirituwalidad.​—Santiago 5:14-16.

Tinuod, basin bation nimo nga lisod kaayo ang pagsugid sa imong mga sala kang Jehova ug pagpangayog tabang sa mga ansiyano. Lagmit ingon sab niana ang gibati ni David. Dugaydugay niyang ‘gihilom’ ang iyang mga sala. (Salmo 32:3) Pero sa ulahi, naapresyar niya ang kaayohan sa pagsugid sa iyang mga sala ug sa pagtul-id sa iyang kinabuhi.

Nagmalipayon pag-usab si David, ug usa kana sa iyang gipasalamatan. Siya misulat: “Malipayon ang usa kansang kalapasan gipasaylo, kansang sala gipapas.” (Salmo 32:1) Siya miampo sab: “Oh Jehova, bukha ang akong mga ngabil, aron ikapahayag sa akong baba ang imong kadayeganan.” (Salmo 51:15) Kay si David wala na hasola sa iyang konsensiya ug mapasalamaton nga gipasaylo sa Diyos, nadasig siya sa pagsulti ngadto sa uban bahin kang Jehova.

Gusto ni Jehova nga makabaton kag hinlo nga konsensiya aron dili na ka mabug-atan. Dili niya gusto nga bug-at ang imong dughan dihang mosulti ka sa uban bahin niya ug sa iyang katuyoan. Gusto niya nga mosulti ka nga malipayon ug gikan sa kasingkasing. (Salmo 65:1-4) Hinumdomi ang iyang pagdapit “aron mapapas ang inyong mga sala, aron ang mga panahon sa kahayahay moabot gikan mismo kang Jehova.”​—Buhat 3:19.

Kanay nahitabo kang Martha. Siya miingon: “Kanunay kong padad-an sa akong anak ug Bantayanang Torre ug Pagmata! ug anam-anam nga nabalik ang akong apresasyon kang Jehova. Ang kinalisdang bahin sa akong pagbalik mao ang pagpangayog pasaylo sa tanan nakong sala. Pero sa ulahi, nakahimo ra gyod ko sa pag-ampo sa Diyos ug nakapangayog pasaylo. Di ko katuo nga 40 ka tuig pa ang milabay una ko mibalik kang Jehova. Ako ang buhing pamatuod nga bisag unsa pa ta ka dugay nga miundang sa pag-alagad, may kahigayonan gihapon tang mobalik kang Jehova ug masuod kaniya pag-usab.”