KAPITULO 15
“Nagpalig-on sa mga Kongregasyon”
Ang mga nagapanawng ministro nagtabang sa mga kongregasyon aron mahimong lig-on sa pagtuo
Gibase sa Buhat 15:36–16:5
1-3. (a) Kinsay bag-ong kauban ni Pablo sa iyang panaw, ug unsay atong ikasulti bahin niya? (b) Unsay atong makat-onan niining kapituloha?
SAMTANG nagbaktas sa lisod nga mga dalan paingon sa lainlaing lungsod, si apostol Pablo namalandong bahin sa batan-ong lalaki nga iyang kauban sa panaw, si Timoteo. Ang madasigong si Timoteo lagmit tin-edyer pa o mga 20 anyos. Sa matag tikang sa panaw nga bag-o pa nilang gisugdan, siya nag-anam-anam ka layo sa ilang balay. Padayon silang nagbaktas bisag kilumkilom na ug layo na sila sa Listra ug Iconio. Unsa kahay mahitabo kanila? Nahibalo si Pablo kon unsay madahom kay kadto mao ang iyang ikaduhang misyonaryong panaw. Siya nahibalo nga daghan unya ang kapeligrohan ug problema. Makaagwanta kaha ang kauban niyang batan-on?
2 May dakong pagsalig si Pablo kang Timoteo, bisag wala tingali kaayoy pagsalig si Timoteo sa iyang kaugalingon. Tungod sa mga panghitabo di pa dugay, si Pablo mas kombinsido nga siya nagkinahanglan ug nahiangayng kauban sa iyang panaw. Nahibalo si Pablo nga ang buluhaton—pagduaw sa mga kongregasyon ug pagpalig-on kanila—nagkinahanglag determinasyon ug pagsinabtanay sa mga nagapanawng ministro. Nganong kana ang lagmit gibati ni Pablo? Tingali, ang usa ka hinungdan mao ang panaglalis ni Pablo ug Bernabe di pa dugay nga miresulta sa ilang pagbulag.
3 Niining kapituloha daghan kitag makat-onan bahin sa labing epektibong paagi sa paghusay sa mga panaglalis. Mahibaloan usab nato kon nganong si Timoteo ang gipili ni Pablo nga mahimong kauban sa iyang panaw, ug atong masabtan ang hinungdanong papel sa mga tigdumala sa sirkito karon.
“Karon Atong Balikan ug Duawon ang mga Igsoon” (Buhat 15:36)
4. Unsay giplano ni Pablo nga himoon sa iyang ikaduhang misyonaryong panaw?
4 Sa miaging kapitulo, atong nahibaloan nga upat ka igsoong lalaki—si Pablo, Bernabe, Judas, ug Silas—nagpalig-on sa kongregasyon sa Antioquia pinaagi sa pagpahibalo sa desisyon sa nagamandong lawas bahin sa isyu sa pagpatuli. Unsay sunod nga gibuhat ni Pablo? Giduol niya si Bernabe uban ang bag-ong plano sa panaw, nga nag-ingon: “Karon atong balikan ug duawon ang mga igsoon sa tanang siyudad diin gimantala nato ang pulong ni Jehova, aron atong makita kon komosta na sila.” (Buh. 15:36) Ang gihisgotan ni Pablo dili lamang basta mahigalaong pagduaw sa bag-ong nakabig nga mga Kristohanon. Gipadayag sa Mga Buhat ang katuyoan sa ikaduhang misyonaryong panaw ni Pablo. Una, nagpadayon siya sa paghatod sa mga sugo nga gidesisyonan sa nagamandong lawas. (Buh. 16:4) Ikaduha, isip nagapanawng ministro, gusto ni Pablo nga iyang mapalig-on ang pagtuo sa mga igsoon. (Roma 1:11, 12) Sa unsang paagi ang organisasyon sa mga Saksi ni Jehova karon nagsunod sa ehemplo sa mga apostoles?
5. Sa unsang paagi ang Nagamandong Lawas karon naggiya ug nagpalig-on sa mga kongregasyon?
5 Ang Nagamandong Lawas sa mga Saksi ni Jehova karon ang gigamit sa Kristo sa pagtultol sa iyang kongregasyon. Pinaagig mga sulat, printed ug electronic nga mga publikasyon, mga tigom, ug ubang paagi sa komunikasyon, kining matinumanon nga dinihogang mga lalaki naggiya ug nagpalig-on sa tanang kongregasyon sa tibuok kalibotan. Ang Nagamandong Lawas naningkamot usab sa pagpakigkomunikar kanunay sa matag kongregasyon. Ang mga tigdumala sa sirkito mao ang ilang gipadala alang sa maong katuyoan. Ang Nagamandong Lawas direktang nagtudlo ug linibo ka kuwalipikadong mga ansiyano sa tibuok kalibotan aron mag-alagad ingong mga tigdumala sa sirkito.
6, 7. Unsa ang pipila ka responsibilidad sa mga tigdumala sa sirkito?
6 Ang mga tigdumala sa sirkito mohatag ug personal nga pagtagad ug espirituwal nga pagdasig sa tanang igsoon diha sa mga kongregasyon nga ilang giduaw. Sa unsang paagi? Pinaagi sa pagsunod sa ehemplo sa mga Kristohanon sa unang siglo sama ni Pablo. Iyang gidasig ang nagapanawng tigdumala nga si Timoteo: “Isangyaw ang pulong; ayaw paglangan sa paghimo niini sa maayo ug sa lisod nga panahon; pamadlong, panul-id, panambag, uban ang dakong pailob ug maayong paagi sa pagpanudlo. . . . Padayong isangyaw ang maayong balita.”—2 Tim. 4:2, 5.
7 Nahiuyon sa maong tambag, ang tigdumala sa sirkito ug ang iyang asawa, kon minyo, mokuyog sa mga magmamantala ug makigbahin sa lainlaing paagi sa pagministeryo. Sila kugihan sa ministeryo ug hanas nga mga magtutudlo—mga hiyas nga makapadasig sa panon. (Roma 12:11; 2 Tim. 2:15) Ang mga tigdumala sa sirkito nailhan gayod sa ilang pagsakripisyo ug gugma. Kinabubut-on silang nag-alagad sa uban, nga mobiyahe bisag dili maayo ang panahon ug bisan sa kritikal nga mga lugar. (Filip. 2:3, 4) Ang mga tigdumala sa sirkito modasig, motudlo, ug motambag sa mga kongregasyon pinaagi sa mga pakigpulong nga gibase sa Bibliya. Makabenepisyo ta kon atong pamalandongon ang ilang panggawi ug sundogon ang ilang pagtuo.—Heb. 13:7.
“Naglalis Sila Pag-ayo” (Buhat 15:37-41)
8. Unsay sanong ni Bernabe sa imbitasyon ni Pablo?
8 Nalipay si Bernabe sa sugyot ni Pablo nga “duawon ang mga igsoon.” (Buh. 15:36) Maayo ang ilang pag-ubanay sa panaw ug pamilyar na sila sa mga dapit ug sa mga tawo nga ilang duawon. (Buh. 13:2–14:28) Busa morag makataronganon ug praktikal kon sila ang magkauban sa maong buluhaton. Apan mitungha ang usa ka problema. Ang Buhat 15:37 nag-ingon: “Si Bernabe miinsistir nga paubanon si Juan, nga gitawag ug Marcos.” Wala lang basta misugyot si Bernabe. “Miinsistir” siya nga paubanon ang iyang ig-agaw nga si Marcos niining ikaduhang misyonaryong panaw.
9. Nganong misupak man si Pablo kang Bernabe?
9 Misupak si Pablo. Ngano? Ang asoy nag-ingon: “Apan si Pablo wala mouyon nga paubanon [si Marcos] kanila, kay mibiya man siya kanila sa Pamfilia ug wala mokuyog kanila sa buluhaton.” (Buh. 15:38) Si Marcos nakauban na kang Pablo ug Bernabe sa ilang unang misyonaryong panaw apan wala siya molahutay. (Buh. 12:25; 13:13) Sa unang bahin sa ilang panaw, samtang didto pa sila sa Pamfilia, si Marcos mibiya sa iyang asaynment ug mipauli sa Jerusalem. Wala isulti sa Bibliya kon unsay hinungdan, apan lagmit gihunahuna ni apostol Pablo nga si Marcos iresponsable tungod sa iyang gibuhat. Mahimong nagduhaduha si Pablo sa pagkakasaligan ni Marcos.
10. Unsay resulta sa dili pagsinabtanay ni Pablo ug Bernabe?
10 Bisan pa niadto, si Bernabe determinado nga paubanon si Marcos. Si Pablo determinado pod nga dili siya paubanon. “Tungod niini naglalis sila pag-ayo, mao nga nagbulag sila,” matod sa Buhat 15:39. Si Bernabe milawig paingon sa Cipro, nga iyang islang natawhan, kuyog si Marcos. Gipadayon ni Pablo ang iyang plano. Ang asoy nag-ingon: “Gipili ni Pablo si Silas, ug human siya isalig sa mga igsoon ngadto sa dili hitupngang pagkamaayo ni Jehova, siya migikan.” (Buh. 15:40) Nag-uban sila sa pagpanaw latas “sa Sirya ug Cilicia, nga nagpalig-on sa mga kongregasyon.”—Buh. 15:41.
11. Unsang mga hiyas ang gikinahanglan aron magpabilin ang panaghigalaay bisag naay dili pagsinabtanay?
11 Kining asoya makapahinumdom kanato sa atong pagkadili-hingpit. Si Pablo ug Bernabe gitudlo ingong espesyal nga mga representante sa nagamandong lawas. Si Pablo lagmit nahimong membro sa maong lawas. Apan tungod sa pagkadili-hingpit, si Pablo ug Bernabe wala makapugong niadtong higayona. Gitugotan ba nila nga magpadayon ang ilang panaglalis? Bisag dili hingpit, si Pablo ug Bernabe mapainubsanon, nga nagsundog sa Kristo. Sa ngadtongadto, gipasaylo nila ang usag usa ug nabalik ang ilang panaghigalaay. (Efe. 4:1-3) Sa ulahi, nagkuyog ra si Pablo ug Marcos sa ubang teokratikanhong mga buluhaton. a—Col. 4:10.
12. Unsang mga hiyas ang kinahanglang ipakita sa mga tigdumala karon sa pagsundog kang Pablo ug Bernabe?
12 Dili batasan ni Bernabe o ni Pablo ang pagsilaob sa kasuko. Si Bernabe nailhan nga mahigugmaon ug mahinatagon, busa imbes gamiton sa mga apostoles ang tinuod niyang ngalan nga Jose, gianggaan nila siyag Bernabe, nga nagkahulogang “Anak sa Paghupay.” (Buh. 4:36) Si Pablo nailhan usab nga mabination ug lumo. (1 Tes. 2:7, 8) Aron masundog si Pablo ug Bernabe, ang tanang tigdumala karon, lakip ang mga tigdumala sa sirkito, maningkamot gayod kanunay nga mahimong mapainubsanon ug lumo ngadto sa ilang isigkaansiyano ug sa tibuok panon.—1 Ped. 5:2, 3.
“Duna Siyay Maayong Dungog” (Buhat 16:1-3)
13, 14. (a) Kinsa si Timoteo, ug sa unsang paagi siya nailaila ni Pablo? (b) Nganong namatikdan man ni Pablo si Timoteo? (c) Unsang asaynment ang nadawat ni Timoteo?
13 Sa iyang ikaduhang misyonaryong panaw, si Pablo nakaabot sa Romanhong probinsiya sa Galacia, diin may natukod na nga pipila ka kongregasyon. Ngadtongadto, “miabot siya sa Derbe ug usab sa Listra.” Ang asoy nag-ingon: “Dihay tinun-an didto nga ginganlag Timoteo, nga ang inahan magtutuong Hudiyo apan ang amahan Grego.”—Buh. 16:1. b
14 Dayag nga nailaila ni Pablo ang pamilya ni Timoteo sa iyang unang pagduaw sa maong dapit sa mga tuig 47 C.E. Sa iyang ikaduhang pagduaw didto, duha o tulo ka tuig sa ulahi, namatikdan gayod ni Pablo ang batan-ong lalaki nga si Timoteo. Ngano? Kay “duna siyay maayong dungog sa mga igsoon,” dili lang sa ilang kongregasyon kondili sa mga igsoon sab sa ubang kongregasyon. Ang asoy nag-ingon nga nakadayeg kaniya ang mga igsoon sa Listra ug Iconio, bisag mga 30 kilometros ni gikan sa ilang lugar. (Buh. 16:2) Pinaagi sa paggiya sa balaang espiritu, gisalig sa mga ansiyano ngadto sa batan-ong si Timoteo ang bug-at nga responsibilidad sa pagtabang kang Pablo ug Silas isip usa ka nagapanawng ministro.—Buh. 16:3.
15, 16. Nganong maayo man ug dungog si Timoteo?
15 Nganong maayo man ug dungog si Timoteo nga batan-on pa man siya? Tungod ba kay siya maayog pangutok, guwapo, o abilidaran? Kasagarang modayeg ang mga tawo sa maong mga hiyas. Bisan ang propetang si Samuel nadala sa panggawas nga panagway. Apan si Jehova nagpahinumdom kaniya: “Ang pagtan-aw sa tawo dili sama sa pagtan-aw sa Diyos; ang tawo nagatan-aw kon unsay makita sa mga mata, apan si Jehova nagatan-aw sa kasingkasing.” (1 Sam. 16:7) Si Timoteo maayog dungog dili tungod sa iyang mga abilidad kondili tungod sa iyang maayong mga hiyas.
16 Daghang katuigan sa ulahi, gihisgotan ni apostol Pablo ang pipila ka maayong mga hiyas ni Timoteo. Si Pablo naghisgot sa maayong tinamdan ni Timoteo, ang iyang pagsakripisyo ug gugma, ug ang pagkakugihan sa pag-atiman sa teokratikanhong mga asaynment. (Filip. 2:20-22) Si Timoteo nailhan usab nga naay pagtuo “nga dili pakaaron-ingnon.”—2 Tim. 1:5.
17. Sa unsang paagi ang mga batan-on karon makasundog kang Timoteo?
17 Daghang batan-on karon nagsundog kang Timoteo pinaagi sa pag-ugmad ug maayong mga hiyas. Busa sila adunay maayong dungog kang Jehova ug sa iyang katawhan, bisag sila batan-on pa. (Prov. 22:1; 1 Tim. 4:15) Nagpakita silag pagtuo nga dili pakaaron-ingnon ug dili sila dobleg kinabuhi. (Sal. 26:4) Ingong resulta, daghang batan-on, sama kang Timoteo, ang dunay hinungdanong papel diha sa kongregasyon. Makapadasig kaayo sila sa tanang alagad ni Jehova sa dihang sila mahimong kuwalipikadong mga magmamantala sa maayong balita ug sa ngadtongadto magpahinungod kang Jehova ug magpabawtismo!
“Nalig-on Diha sa Pagtuo” (Buhat 16:4, 5)
18. (a) Unsang mga pribilehiyo ang nabatonan ni Pablo ug Timoteo isip mga nagapanawng ministro? (b) Sa unsang paagi napanalanginan ang mga kongregasyon?
18 Nagkauban si Pablo ug Timoteo sa pag-alagad sulod sa daghang katuigan. Isip mga nagapanawng ministro, sila nagtuman ug lainlaing asaynment gikan sa nagamandong lawas. Ang rekord sa Bibliya nag-ingon: “Samtang mipanaw sila sa mga siyudad, ilang ipahibalo kanila ang mga sugo nga gidesisyonan sa mga apostoles ug sa mga ansiyano nga didto sa Jerusalem, aron ila kining masunod.” (Buh. 16:4) Dayag nga nagsunod ang mga kongregasyon sa instruksiyon gikan sa mga apostoles ug sa mga ansiyano sa Jerusalem. Tungod sa maong pagkamasinugtanon, “ang mga kongregasyon padayon gayong nalig-on diha sa pagtuo ug nagkadako kini adlaw-adlaw.”—Buh. 16:5.
19, 20. Nganong ang mga Kristohanon angayng magmasinugtanon sa “mga nanguna” kanila?
19 Sa samang paagi, ang mga Saksi ni Jehova karon nagtagamtam ug mga panalangin ingong resulta sa ilang pagpasakop ug pagsunod sa instruksiyon sa “mga nanguna.” (Heb. 13:17) Tungod kay ang talan-awon sa kalibotan kanunay nga nagakausab, hinungdanon nga sundon gayod sa mga Kristohanon ang mga instruksiyon nga madawat gikan sa “matinumanon ug maalamong ulipon.” (Mat. 24:45; 1 Cor. 7:29-31) Kon ato kanang buhaton, dili kita maanod palayo sa kamatuoran ug kita makapabilin nga dili mahugawan sa kalibotan.—Sant. 1:27.
20 Tinuod, ang Kristohanong mga tigdumala karon, apil ang mga membro sa Nagamandong Lawas, maoy dili hingpit, sama kang Pablo, Bernabe, Marcos, ug sa ubang dinihogang mga ansiyano sa unang siglo. (Roma 5:12; Sant. 3:2) Apan kay gisunod pag-ayo sa Nagamandong Lawas ang Pulong sa Diyos ug gisundog ang ehemplo sa mga apostoles, ilang gipamatud-an nga kasaligan sila. (2 Tim. 1:13, 14) Ingong resulta, ang mga kongregasyon nalig-on sa pagtuo.
a Tan-awa ang kahon nga “ Si Marcos Nakabaton ug Daghang Pribilehiyo.”
b Tan-awa ang kahon nga “ Si Timoteo Nagpaulipon ‘sa Pagpauswag sa Maayong Balita.’”
