1, 2. Sa unsang paagi napakyas ang paningkamot nga pahunongon ang pagsangyaw sa maayong balita sa unang siglo?

 MIHAPAK na ang kusog nga mga balod sa paglutos, ug “pintas nga giatake” ni Saulo ang kongregasyon—usa ka ekspresyon nga sa orihinal nga pinulongan naghubit sa grabeng paglutos. (Buh. 8:3) Nangalagiw ang mga tinun-an, ug ang pipila naghunahuna nga si Saulo daw magmalamposon sa pagpuo sa mga Kristohanon. Apan ang ilang pagkatibulaag may wala damhang resulta. Unsa kadto?

² Kadtong nagkatibulaag nagsugod sa ‘pagpahayag sa maayong balita bahin sa pulong’ diha sa kayutaan nga ilang gidangpan. (Buh. 8:4) Tiaw mo na! Ang paglutos wala makapahunong sa pagsangyaw sa maayong balita kondili nakatabang hinuon sa pagpakaylap niana! Sanglit ang mga maglulutos nakapatibulaag man sa mga tinun-an, ang pagsangyaw sa Gingharian nakaabot na hinuon sa lagyong teritoryo. Ingon sa atong makita, ang samang butang nagakahitabo sa atong panahon.

3. (a) Kinsa si Felipe? (b) Nganong ang kadaghanan sa Samaria wala masangyawi sa maayong balita, ug unsay gitagna ni Jesus nga mahitabo nianang maong teritoryo?

³ Usa niadtong “nangatibulaag” mao si Felipe. a (Buh. 8:4; tan-awa ang kahon nga “ Si Felipe nga ‘Tig-ebanghelyo,’”) Siya miadto sa Samaria, usa ka siyudad nga halos wala pa masangyawi sa maayong balita tungod kay si Jesus nagsugo kaniadto sa iyang mga apostoles: “Ayawg sulod sa bisan unsang siyudad sa mga Samarianhon; apan pangitaa lang kadtong nawalang mga karnero sa nasod sa Israel.” (Mat. 10:5, 6) Apan si Jesus nahibalo nga sa ngadtongadto ang Samaria malukop ug sangyaw, kay sa wala pa siya mosaka sa langit, siya miingon: “Kamo  mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.”—Buh. 1:8.

4. Unsay reaksiyon sa mga Samarianhon sa pagsangyaw ni Felipe, ug unsa kahay usa ka hinungdan niana?

⁴ Nakita ni Felipe nga ang Samaria “hinog na aron anihon.” (Juan 4:35) Ang iyang mensahe samag lab-as nga hangin nga nakaparepresko sa mga molupyo didto, ug masabtan kon ngano. Ang mga Hudiyo dili makig-uban sa mga Samarianhon ug daghan ang nagpakitag kayugot kanila. Kasukwahi niana, nasabtan sa mga Samarianhon nga ang mensahe sa maayong balita dili mapihigon, ug busa kini lahi kaayo sa mapihigong kaisipan sa mga Pariseo. Pinaagi sa madasigon ug dili mapihigong pagsangyaw ngadto sa mga Samarianhon, gipakita ni Felipe nga wala siya maapektohi sa pagkamapihigon niadtong nagtamay kanila. Busa dili ikatingala nga daghan kaayong Samarianhon ang nagkahiusa sa pagpamati kang Felipe.—Buh. 8:6.

5-7. Paghatag ug mga pananglitan kon sa unsang paagi ang pagkatibulaag sa mga Kristohanon miresulta sa pagkaylap sa maayong balita.

⁵ Karon, sama sa unang siglo, ang paglutos sa katawhan sa Diyos wala makapahunong sa ilang pagsangyaw. Sagad, mapugos ang mga Kristohanon sa pagbalhin sa lainlaing prisohan o nasod, apan kana nakatabang hinuon sa pagsabwag sa mensahe sa Gingharian diha sa ilang bag-ong dapit.  Pananglitan, niadtong Gubat sa Kalibotan II, ang mga Saksi ni Jehova nakahimo sa pagsangyaw sa mga concentration camp sa Nazi. Usa ka Hudiyo nga nakahimamat ug mga Saksi didto miingon: “Ang kalig-on sa nabilanggong mga Saksi ni Jehova nakakombinsir kanako nga ang ilang pagtuo gipasukad sa Kasulatan—busa na-Saksi sab ko.”

⁶ Usahay, bisan ang mga maglulutos nasangyawan ug misanong. Pananglitan, dihang gibalhin ang Saksi nga si Franz Desch ngadto sa concentration camp sa Gusen sa Austria, iyang nadumalahag pagtuon sa Bibliya ang usa ka polis. Labihan nilang lipaya dihang nagkita sila sa kombensiyon sa mga Saksi ni Jehova ug silang duha magwawali na sa maayong balita!

⁷ Ingon usab niana ang nahitabo sa dihang ang mga Kristohanon namakwet sa lainlaing nasod tungod sa paglutos. Pananglitan, sa katuigan sa 1970, sa dihang ang mga Saksi nga taga-Malawi napugos sa pagbakwet sa Mozambique, sila nakahimog dakong pagpamatuod didto. Bisag mitungha ang pagsupak sa ulahi sa Mozambique, ang pagsangyaw nagpadayon didto. “Tinuod, ang pipila kanamo kadaghan gidakop tungod sa pagsangyaw,” matod ni Francisco Coana. “Apan sa dihang daghan ang midawat sa mensahe sa Gingharian, kami nagtuo gayod nga ang Diyos nagtabang kanamo, sama sa iyang gihimo sa mga Kristohanon sa unang siglo.”

8. Sa unsang paagi ang mga kausaban sa politika ug ekonomiya nakaapektar sa buluhatong pagsangyaw?

⁸ Siyempre, dili lamang paglutos ang bugtong hinungdan sa pagdaghan sa mga Kristohanon sa ubang nasod. Sa milabayng katuigan, ang mga kausaban sa politika ug ekonomiya nakahatag usab ug kahigayonan sa mga tawong lainlaig rasa ug pinulongan nga makadungog sa mensahe sa Gingharian. Ang pipila nga gikan sa mga nasod nga dunay gubat ug lisod ang ekonomiya namalhin ngadto sa mga lugar nga mas maayog kahimtang ug natun-an sila didto sa Bibliya. Tungod sa pagdagsa sa mga namakwet, naporma ang bag-ong mga teritoryo nga langyawg pinulongan. Naningkamot ba ka sa pagpamatuod ngadto sa mga tawo “gikan sa tanang kanasoran ug tribo ug katawhan ug pinulongan” diha sa inyong teritoryo?—Pin. 7:9.

9. Kinsa si Simon, ug nganong nahingangha siya kang Felipe?

⁹ Daghang milagro ang gihimo ni Felipe sa Samaria. Pananglitan, nag-ayo siyag mga baldado ug nagpagawas pa ganig daotang mga espiritu. (Buh. 8:6-8) Usa ka lalaki ang nahingangha sa katakos ni Felipe sa paghimog mga milagro. Siya si Simon, usa ka salamangkero nga tinamod pag-ayo. Gani, ang mga tawo miingon bahin kaniya: “Kining tawhana ang Gahom sa Diyos.” Niadtong higayona si Simon nakasaksi sa tinuod nga gahom sa Diyos, nga gipamatud-an sa gihimong mga milagro ni Felipe, ug siya nahimong magtutuo. (Buh. 8:9-13) Apan ang motibo ni Simon nadayag sa ulahi. Sa unsang paagi?

10. (a) Unsay gihimo ni Pedro ug Juan sa Samaria? (b) Unsay gihimo ni Simon dihang nakita niya nga ang bag-ong mga tinun-an nakadawat ug balaang espiritu dihang si Pedro ug Juan nagpatong sa ilang mga kamot kanila?

 ¹⁰ Sa dihang nasayran sa mga apostoles nga may pag-uswag sa Samaria, ilang gipadala si Pedro ug Juan didto. (Tan-awa ang kahon nga “ Gigamit ni Pedro ang ‘mga Yawi sa Gingharian.’”) Pag-abot sa duha ka apostoles, gipatong nila ang ilang mga kamot sa bag-ong mga tinun-an, mao nga ang matag usa nakadawat sa balaang espiritu. b Nahingangha si Simon pagkakita niya niana. “Hatagi usab ko niini nga awtoridad,” iyang giingnan ang mga apostoles, “aron nga si bisan kinsa nga patongan nako sa akong mga kamot makadawat ug balaang espiritu.” Mitanyag pa gani si Simon ug salapi aron makabaton siya sa maong gahom gikan sa Diyos!—Buh. 8:14-19.

11. Unsay gitambag ni Pedro kang Simon, ug unsay reaksiyon ni Simon?

¹¹ Prangka ang tubag ni Pedro kang Simon. “Malaglag pa unta ang imong plata uban kanimo,” miingon ang apostol, “kay naghunahuna ka nga mabatonan nimo ang walay bayad nga gasa sa Diyos pinaagig salapi. Wala kay bahin o pahat niining butanga, kay ang imong kasingkasing dili matarong sa panan-aw sa Diyos.” Dayon giawhag ni Pedro si Simon sa paghinulsol ug sa pag-ampo aron pasayloon siya. “Pangamuyo kang Jehova,” miingon si Pedro, “nga, kon mahimo, pasayloon ang daotang intensiyon sa imong kasingkasing [“kining imong daotang  laraw,” New Jerusalem Bible].” Dayag nga si Simon dili daotan; buot niyang buhaton kon unsay matarong, apan wala pa siyay tukmang pagsabot. Busa iyang gihangyo ang mga apostoles: “Pangamuyo mo kang Jehova alang kanako nga walay usa sa inyong mga giingon ang mahitabo kanako.”—Buh. 8:20-24.

12. Unsa ang simoniya, ug sa unsang paagi ang Kakristiyanohan nalit-agan niini?

¹² Ang pagbadlong ni Pedro kang Simon nagsilbing pasidaan sa mga Kristohanon karon. Sa pagkatinuod, naporma ang Iningles nga pulong “simony” o simoniya tungod niini nga panghitabo. Kining pulonga nagpasabot sa pagpalit o pagbaligyag relihiyosong mga posisyon. Kining batasana maoy kasagaran sa kasaysayan sa apostatang Kakristiyanohan. Gani, ang ikasiyam nga edisyon sa The Encyclopædia Britannica (1878) miingon: “Ang pagtuon sa kasaysayan sa pagpilig mga Papa mopadayag nga ang simoniya kanunayng nalangkit sa piliay, ug sa daghang kahimtang kana kinangil-aran, makauulaw kaayo, ug way tagotago.”

13. Sa unsang mga paagi malikayan sa mga Kristohanon ang simoniya?

¹³ Ang mga Kristohanon kinahanglang magbantay batok sa simoniya. Pananglitan, angay nilang likayan ang paghatag ug daghang regalo o sobrang pagdayeg niadtong may mga responsibilidad sa kongregasyon aron lang makakuha silag pabor o dugang nga mga pribilehiyo. Sa laing bahin, kadtong dunay awtoridad angayng magbantay batok sa pagpakitag paboritismo sa mga dato. Nalangkit ang simoniya niining duha ka kahimtang. Sa pagkatinuod, angayng isipon sa tanang alagad sa Diyos nga sila “ubos,” ug maghulat sa espiritu ni Jehova nga maoy mohimog mga pagtudlo sa mga pribilehiyo sa kongregasyon. (Luc. 9:48) Kadtong ‘nagtinguhag kadungganan’ wala gayoy luna sa organisasyon sa Diyos.—Prov. 25:27.

14, 15. (a) Kinsa ang “Etiopianhong eunuko,” ug sa unsang paagi siya nahibalag ni Felipe? (b) Unsay reaksiyon sa Etiopianhon sa mensahe ni Felipe, ug nganong dili dinalidali nga desisyon ang iyang pagpabawtismo? (Tan-awa ang footnote.)

¹⁴ Karon, ang anghel ni Jehova nagsugo kang Felipe sa pagsubay sa dalan gikan sa Jerusalem paingon sa Gaza. Kon nahibulong si Felipe kon nganong  paadtoon siya didto, siya natin-awan ra human niya mahibalag ang usa ka Etiopianhong eunuko nga “nagbasag kusog sa basahon ni propetang Isaias.” (Tan-awa ang kahon nga “ Sa Unsang Diwa Siya usa ka ‘Eunuko’?”) Ang balaang espiritu ni Jehova nagdasig kang Felipe sa pagduol sa karo sa eunuko. “Nasabtan ba gyod nimo ang imong ginabasa?” nangutana siya sa Etiopianhon samtang nagdagan abay sa karo. “Unsaon man nako pagkasabot kon walay magtudlo kanako?” mitubag ang Etiopianhon.—Buh. 8:26-31.

¹⁵ Gidapit ug gipasakay sa Etiopianhon si Felipe sa karo. Seryoso kaayo ang ilang estoryahay! Dugay nang usa ka misteryo kon kinsa ang “karnero” o “alagad” diha sa tagna ni Isaias. (Isa. 53:1-12) Apan, samtang sila nagbiyahe, gipatin-aw ni Felipe sa Etiopianhong eunuko nga ang maong tagna natuman kang Jesu-Kristo. Sama niadtong mga nabawtismohan sa Pentekostes 33 C.E., ang Etiopianhon—nga usa na ka Hudiyong kinabig—nahibalo dayon kon unsay angay niyang himoon. “Tan-awa!” siya miingon kang Felipe. “Dunay tubig diri; unsay nakapugong nako nga mabawtismohan?” Gibawtismohan dayon ni Felipe ang Etiopianhon! c (Tan-awa ang kahon nga “ Bawtismo sa ‘Dapit nga may Tubig.’”) Human niana, si Felipe gigiyahan sa balaang espiritu sa pag-adto sa Asdod, diin iyang gipadayon ang pagwali sa maayong balita.—Buh. 8:32-40.

16, 17. Unsay papel sa mga anghel sa buluhatong pagsangyaw karon?

¹⁶ Ang mga Kristohanon karon may pribilehiyo sa pagpakigbahin sa buluhaton sama sa gihimo ni Felipe. Sila kasagarang magsangyaw sa mensahe sa Gingharian sa impormal nga paagi, pananglitan samtang nagbiyahe. Sa daghang kahimtang, ang ilang pagkahibalag ug tawong interesado dayag nga dili lang sulagma. Kini madahom kay ang Bibliya nagpatin-aw nga ang buluhatong pagsangyaw gigiyahan sa mga anghel aron ang mensahe makaabot sa “matag nasod ug tribo ug pinulongan  ug katawhan.” (Pin. 14:6) Gitagna ni Jesus ang paggiya sa mga anghel sa buluhatong pagsangyaw. Sa iyang ilustrasyon bahin sa trigo ug mga bunglayon, si Jesus miingon nga sa ting-ani—sa hinapos sa sistema sa mga butang—“ang mga mangangani mao ang mga anghel.” Siya midugang nga “tigomon [sa mga anghel] gikan sa iyang Gingharian ang tanang nag-aghat sa uban sa pagpakasala ug kadtong naghimog kalapasan.” (Mat. 13:37-41) Sa samang panahon, tigomon usab sa mga anghel ang langitnong mga manununod sa Gingharian—ug sa ulahi ang “dakong panon” sa “ubang mga karnero”—nga buot tigomon ni Jehova sa iyang organisasyon.—Pin. 7:9; Juan 6:44, 65; 10:16.

¹⁷ Ingong pamatuod nga nagakahitabo kini, ang pipila sa atong nasangyawan moingon nga nag-ampo sila alang sa tabang sa Diyos. Tagda ang eksperyensiya sa duha ka magmamantala sa Gingharian nga may kaubang bata. Sa udto-udto na, mohunong na unta silag sangyaw, apan ang bata nangagda gayod sa pagduaw sa sunod nga balay. Gani, ang bata lang ang miadto ug nanuktok! Sa dihang gibuksan ang pultahan sa usa ka batan-ong babaye, ang duha ka Saksi miduol aron makigsulti niya. Natingala sila dihang miingon ang babaye nga bag-o pa gayod siyang nag-ampo nga may moduaw aron tabangan siya nga masabtan ang Bibliya. Nasugdan ang pagtuon sa Bibliya!

18. Nganong dili gayod nato angayng pakamenoson ang atong ministeryo?

¹⁸ Ingong sakop sa Kristohanong kongregasyon, ikaw may pribilehiyo sa pagbuhat uban sa mga anghel samtang nagpadayon ang pagsangyaw karon ngadto sa mas daghang tawo. Ayaw gayod pakamenosa ang maong pribilehiyo. Pinaagi sa paglahutay, makabaton kag dakong kalipay samtang padayon nimong ipahayag ang “maayong balita bahin kang Jesus.”—Buh. 8:35.