1. Sa unsang paagi managsama ang unang mga Kristohanon ug ang mga Saksi ni Jehova karon?

 SILA madasigon nga nagpamatuod. Mapainubsanon nilang gidawat ang tabang ug giya sa balaang espiritu. Wala sila mohunong sa pagwali bisan pa sa paglutos. Ug dagaya silang gipanalanginan sa Diyos. Kining tanan tinuod sa unang mga Kristohanon, ingon man sa mga Saksi ni Jehova karon.

2, 3. Nganong talagsaon ang basahon sa Mga Buhat?

² Nadasig ka gayod sa makapalig-on sa pagtuo nga mga asoy diha sa punog aksiyon nga basahon sa Bibliya, ang Mga Buhat sa mga Apostoles! Kini talagsaon, kay kini lamang ang inspirado sa Diyos nga kasaysayan sa Kristiyanidad sa unang siglo.

³ Ang basahon sa Mga Buhat naghisgot ug 95 ka tawo gikan sa 32 ka nasod, 54 ka siyudad, ug 9 ka isla. Kulbahinam kini nga estorya mahitungod sa ordinaryong mga tawo, mapahitas-ong mga sumusunod sa bakak nga relihiyon, hambogirong mga politiko, ug panatikong mga maglulutos. Apan labaw sa tanan, estorya kini mahitungod sa imong mga isigkamagtutuo sa unang siglo, nga bisan pa sa mga suliran sa kinabuhi, sila nagwali gihapon nga masiboton sa maayong balita.

4. Nganong mobati kita nga suod kang apostol Pablo, Tabitha, ug sa ubang matinumanong mga saksi sa karaang panahon?

⁴ Halos 2,000 ka tuig na ang milabay sukad sa panahon sa masibotong mga apostoles nga si Pedro ug Pablo, sa minahal nga doktor nga si Lucas, sa manggihatagong si Bernabe, sa maisogong si Esteban, sa maluluy-ong si Tabitha, sa maabiabihong si Lydia, ug sa daghan pang matinumanong mga saksi. Bisan pa sa maong gidugayon, mobati kita nga suod kanila. Ngano? Kay usa ra ang atong buluhaton, ang paghimog mga tinun-an. (Mat. 28:19, 20) Pagkadakong pribilehiyo nga kita nagpakigbahin niining buluhatona!

5. Diin nagsugod ang mga sumusunod ni Jesus sa pagtuman sa buluhatong gisugo kanila?

⁵ Pamalandonga ang sugo ni Jesus sa iyang mga sumusunod. “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8) Una, sa tabang sa balaang espiritu  ang mga tinun-an nahimong mga saksi “sa Jerusalem.” (Buh. 1:1–8:3) Sunod, pinaagi sa pagtultol sa espiritu, sila nagpamatuod “sa tibuok Judea ug Samaria.” (Buh. 8:4–13:3) Dayon ilang giwali ang maayong balita “hangtod sa kinalay-ang bahin sa yuta.”—Buh. 13:4–28:31.

6, 7. Nganong mas sayon alang kanato ang pagtuman sa atong ministeryo kay sa atong mga isigkamagtutuo sa unang siglo?

⁶ Ang imong mga isigkamagtutuo sa unang siglo wala makabaton ug kompletong Bibliya aron magamit sa ilang buluhaton sa pagpamatuod. Niadtong mga 41 C.E. lang natapos ang Ebanghelyo ni Mateo, ug ang pipila ka sulat ni Pablo gisulat sa wala pa matapos pagsulat ang Mga Buhat niadtong mga 61 C.E. Sila walay personal nga kopya sa kompletong Bibliya ug mga basahon nga ilang ikabilin sa mga tawong interesado. Sa wala pa mahimong tinun-an ni Jesus, ang Hudiyong mga Kristohanon nakadungog na nga gibasa ang Hebreohanong Kasulatan diha sa sinagoga. (2 Cor. 3:14-16) Apan sila kinahanglan gihapong maminaw pag-ayo ug isilsil sa ilang hunahuna kon unsay ilang madungog kay tingalig kinahanglan silang mokutlo niana.

⁷ Kadaghanan nato karon may personal nga kopya sa Bibliya ug daghang literatura sa Bibliya. Nagahimo kitag mga tinun-an pinaagi sa pagsangyaw sa maayong balita diha sa kapig 240 ka kayutaan ug diha sa daghang pinulongan.

8, 9. (a) Unsay nahimo sa mga tinun-an ni Jesus pinaagi sa tabang sa balaang espiritu? (b) Unsay ginahimo o ginaimprenta sa matinumanong ulipon sa tabang sa espiritu sa Diyos?

⁸ Sa dihang gisugo ni Jesus ang mga tinun-an nga mahimong mga saksi, siya miingon kanila: “Makadawat mog gahom dihang mokunsad kaninyo ang balaang espiritu.” Sa giya sa espiritu o aktibong puwersa sa Diyos, ang mga sumusunod ni Jesus mahimong mga saksi sa tibuok yuta. Pinaagi sa balaang espiritu, si Pedro ug Pablo nakaayog mga sakit, nakapagulag mga demonyo, ug nakabanhaw pa ganig mga patay! Apan ang gahom nga nadawat pinaagi sa balaang espiritu may mas hinungdanong katuyoan. Pinaagi niadto, ang mga apostoles ug ubang tinun-an nakaarang sa pagpakig-ambit sa tukmang kahibalo nga motultol sa kinabuhing walay kataposan.—Juan 17:3.

⁹ Niadtong Pentekostes 33 C.E., ang mga tinun-an ni Jesus nagsultig “lainlaing pinulongan, sumala sa gipahinabo sa espiritu nga ilang isulti.” Sa ingon, sila nagpamatuod bahin sa “halangdong mga butang sa Diyos.” (Buh. 2:1-4, 11) Kita karon dili makasultig lainlaing pinulongan sa milagrosong paagi. Bisan pa niana, sa tabang sa espiritu sa Diyos, ang matinumanong ulipon naghimog mga basahon bahin sa Bibliya diha sa daghang pinulongan. Pananglitan, milyonmilyong kopya sa Ang Bantayanang Torre ug Pagmata! ang ginaimprenta kada bulan, ug ang atong website nga jw.org naay mga publikasyon ug video nga gibase sa Bibliya diha sa kapig 1,000 ka pinulongan. Kining tanan nakatabang kanato sa pagpahayag sa “halangdong mga butang sa Diyos” ngadto sa katawhan sa tanang kanasoran, tribo, ug pinulongan.—Pin. 7:9.

10. Sukad sa 1989, unsa nay nahimo bahin sa paghubad sa Bibliya?

¹⁰ Sukad sa 1989, ang matinumanong ulipon naghatag ug pangunang pagtagad  sa paghubad sa Bag-ong Kalibotang Hubad sa Balaang Kasulatan ngadto sa daghang pinulongan. Nahubad na ang maong Bibliya sa kapig 200 ka pinulongan, ug milyonmilyon nang kopya ang naimprenta—ug daghan pa ang ginaimprenta. Kini nagmalamposon tungod lamang sa tabang sa Diyos ug sa iyang espiritu.

11. Unsa nay nahimo bahin sa paghubad sa mga publikasyon sa mga Saksi ni Jehova?

¹¹ Ang paghubad ginahimo sa linibo ka boluntaryo diha sa kapig 150 ka nasod ug kayutaan. Dili kita angayng matingala, kay walay laing organisasyon sa yuta ang gigiyahan sa balaang espiritu sa “bug-os nga pagpamatuod” sa tibuok yuta bahin kang Jehova nga Diyos, sa iyang Mesiyanikong Hari, ug sa natukod nga langitnong Gingharian!—Buh. 28:23.

12. Sa unsang paagi nakahimo sa pagpamatuod si Pablo ug ang ubang mga Kristohanon?

¹² Sa dihang si Pablo nagpamatuod ngadto sa mga Hudiyo ug sa mga Hentil sa Antioquia sa Pisidia, “kadtong tanan nga nakiling sa pagdawat sa kamatuoran nga motultol sa kinabuhing walay kataposan nahimong magtutuo.” (Buh. 13:48) Dihang gitapos ni Lucas pagsulat ang basahon sa Mga Buhat, si Pablo, “nagwali sa Gingharian sa Diyos . . . uban ang dako kaayong kagawasan sa pagsulti, nga walay babag.” (Buh. 28:31) Diin nagwali ang apostol? Sa Roma—ang kaulohan sa usa ka gamhanang nasod sa kalibotan kaniadto! Pinaagig mga diskurso o ubang mga paagi, ang unang mga sumusunod ni Jesus nakapamatuod sa tabang ug giya sa balaang espiritu.

13. Nganong angay kitang mag-ampo sa dihang ginalutos?

¹³ Sa dihang nakaagom ug paglutos ang unang mga tinun-an ni Jesus, nangayo silag kaisog kang Jehova. Unsay resulta? Sila napunog balaang espiritu ug nakasulti sa pulong sa Diyos uban ang kaisog. (Buh. 4:18-31) Makapangayo usab kitag kaalam ug kusog aron padayong makapamatuod bisan pa sa paglutos. (Sant. 1:2-8) Tungod sa panalangin sa Diyos ug sa tabang sa iyang espiritu, kita padayong nagsangyaw sa Gingharian. Wala gayoy makapugong sa buluhaton sa pagpamatuod—bisan ang grabeng pagsupak o mapintas nga paglutos. Sa dihang ginalutos kita, kinahanglang mag-ampo kita alang sa giya sa balaang espiritu ug alang sa kaalam ug kaisog sa pagpahayag sa maayong balita.—Luc. 11:13.

14, 15. (a) Unsay resulta sa ‘kasakitan nga nahitabo kang Esteban’? (b) Sa atong panahon, sa unsang paagi ang daghang tawo sa Siberia nahibalo sa kamatuoran?

¹⁴ Maisogong nagpamatuod si Esteban una siya patya sa iyang mga kaaway. (Buh. 6:5; 7:54-60) Tungod sa “dakong paglutos” nga nahitabo niadtong panahona, ang tanang tinun-an, gawas sa mga apostoles, natibulaag sa tibuok Judea ug Samaria. Bisan pa niadto, ang buluhaton sa pagpamatuod wala mahunong. Si Felipe miadto sa Samaria aron ‘iwali ang Kristo,’ ug maayo kaayo ang resulta. (Buh. 8:1-8, 14, 15, 25) Dugang pa, ang asoy nag-ingon: “Kadtong mga natibulaag tungod sa kasakitan ingong resulta sa nahitabo kang Esteban nakaabot hangtod sa Fenicia, Cipro, ug Antioquia, apan mga Hudiyo lang ang ilang gisangyawan. Apan ang pipila kanila nga gikan sa Cipro ug Cirene nangadto sa Antioquia ug nagpahayag sa maayong balita bahin sa Ginoong Jesus ngadto sa mga nagsultig Grego.” (Buh. 11:19, 20) Mikaylap hinuon ang mensahe sa Gingharian tungod sa pagpanglutos.

 ¹⁵ Sa atong panahon, ang susamang butang nahitabo sa kanhi Soviet Union. Ilabina sa katuigang 1950, libolibo ka Saksi ni Jehova ang gidestiyero sa Siberia. Kay natibulaag man sila sa lainlaing dapit, ang maayong balita nagpadayon sa pagkaylap nianang dako kaayong rehiyon. Ang daghang Saksi walay igong kuwarta aron makabiyaheg mga 10,000 kilometros aron masangyaw ang maayong balita! Apan ang gobyerno na hinuon maoy nagpadala kanila ngadto sa lainlaing bahin sa nasod. “Ingong resulta,” matod sa usa ka brader, “ang mga anaa sa kagamhanan nakatabang aron ang libolibo ka sinserong mga tawo sa Siberia mahibalo sa kamatuoran.”

16, 17. Unsa ang ebidensiya diha sa Mga Buhat nga si Jehova nagpanalangin sa buluhaton sa pagpamatuod?

¹⁶ Gipanalanginan gayod ni Jehova ang unang mga Kristohanon. Si Pablo ug ang uban pa ang nagtanom ug nagbisbis, “apan ang Diyos ang nagpadayon sa pagpatubo niini.” (1 Cor. 3:5, 6) Ang mga taho sa basahon sa Mga Buhat naghatag ug ebidensiya sa maong pagtubo nga resulta sa pagpanalangin ni Jehova sa buluhaton sa pagpamatuod. Pananglitan, “ang pulong sa Diyos padayong mikaylap, ug ang mga tinun-an padayong nagkadaghan sa hilabihan gayod sa Jerusalem.” (Buh. 6:7) Sa dihang mikaylap ang buluhaton sa pagpamatuod, “ang kongregasyon sa tibuok Judea ug Galilea ug Samaria nakabaton ug yugto sa kalinaw, ug kini napalig-on; ug padayong midaghan ang mga tinun-an kay sila nagkinabuhi nga may kahadlok kang Jehova ug nagkinabuhi uyon sa paghupay sa balaang espiritu.”—Buh. 9:31.

¹⁷ Sa Antioquia sa Sirya, ang mga Hudiyo ug ang nagsultig Grego nga katawhan nakadungog sa kamatuoran gikan sa maisogong mga saksi. “Dugang pa,” matod sa asoy, “ang kamot ni Jehova nag-uban kanila, ug daghan kaayo ang nahimong magtutuo ug misunod sa Ginoo.” (Buh. 11:21) Bahin sa dugang nga pag-uswag sa maong siyudad, atong mabasa: “Ang pulong ni Jehova padayong mikaylap ug daghan pa ang nahimong magtutuo.” (Buh. 12:24) Ug tungod sa bug-os nga pagpamatuod ni Pablo ug sa uban pa taliwala sa mga Hentil, ang “pulong [ni Jehova] padayong mikaylap ug nagmadaogon.”—Buh. 19:20.

18, 19. (a) Nganong nahibalo kita nga “ang kamot ni Jehova” nagauban kanato? (b) Paghatag ug pananglitan nga nagpakita nga si Jehova nagsuportar sa iyang katawhan.

¹⁸ “Ang kamot ni Jehova” klarong nagauban kanato karon. Kanay hinungdan nga daghan ang nahimong magtutuo ug nagpabawtismo ingong simbolo sa ilang pagpahinungod sa Diyos. Dugang pa, pinaagi lamang sa tabang ug panalangin sa Diyos nga masagubang nato ang grabeng pagsupak—usahay mapintasong paglutos—ug molampos kita sa pagtuman sa atong ministeryo, sama kang Pablo ug sa unang mga Kristohanon. (Buh. 14:19-21) Si Jehova nga Diyos kanunayng motabang kanato. Ang iyang “mga bukton nga magpabilin hangtod sa hangtod” magtabang gayod kanato panahon sa tanan natong pagsulay. (Deut. 33:27) Tungod sa halangdong ngalan ni Jehova, dili gayod niya talikdan ang iyang katawhan.—1 Sam. 12:22; Sal. 94:14.

¹⁹ Ang usa ka pananglitan mao si Brader Harald Abt. Tungod sa iyang padayong pagpamatuod, gibalhog siya sa mga Nazi ngadto sa kampo konsentrasyon sa  Sachsenhausen panahon sa Gubat sa Kalibotan II. Niadtong Mayo 1942 ang Gestapo miadto sa balay sa iyang asawa nga si Elsa, gikuha ang ilang batang babaye, ug dayon gidakop si Elsa. Gibalhog siya sa lainlaing mga kampo. “Ang daghang tuig nga akong gigugol sa mga kampo konsentrasyon sa Germany nagtudlo kanakog talagsaong leksiyon,” matod ni Sister Abt. “Kon makaagom kag grabeng pagsulay, ang espiritu ni Jehova makapalig-on kanimo! Sa wala pa ko dakpa, nakabasa kog sulat sa usa ka sister nga nag-ingon nga kon makaagom kag grabeng pagsulay, ang espiritu ni Jehova makatabang kanimo nga mahimong kalmado. Abi kog nagpasobra siyag sulti. Apan sa dihang ako na mismo ang nakaagom niana, nakaingon ko nga tinuod ang iyang giingon. Mao gayod kanay mahitabo. Dili ka makasulti niana gawas kon kana mahitabo kanimo. Ug nahitabo gayod kana kanako.”

20. Unsay gihimo ni Pablo samtang gibilanggo sulod sa usa ka balay, ug sa unsang paagi makapadasig kini sa pipila nato ka mga igsoon?

²⁰ Natapos ang basahon sa Mga Buhat nga naghisgot nga si Pablo madasigong “nagwali sa Gingharian sa Diyos.” (Buh. 28:31) Kay siya gibilanggo man sulod sa usa ka balay niadtong panahona, wala siya makapamalaybalay sa Roma. Apan siya nagpadayon sa pagpamatuod ngadto sa tanan nga miduaw kaniya. Sa atong panahon, ang pipila sa atong minahal nga mga igsoon anaa lang sa ilang balay, kay tingali naglubog na lang sa higdaanan, o diha sa pipila ka nasod, sila nagpuyo sa mga nursing home tungod sa katigulangon, kaluyahon, o sakit. Apan bisan pa niana, wala gayod moawop ang ilang gugma sa Diyos ug kadasig sa pagpamatuod. Mahimo natong iampo sila ug hangyoon ang atong langitnong Amahan sa pagtabang kanila nga makaplagan ang mga tawo nga nangandoy nga mailhan siya ug mahibalo sa iyang kahibulongang mga katuyoan.

21. Nganong dili kita angayng maglangaylangay sa pagtuman sa atong buluhaton sa pagpamatuod?

²¹ Ang kadaghanan kanato makaarang sa pagpakigbahin sa pagsangyaw sa balay ug balay ug sa ubang paagi sa paghimog tinun-an. Busa buhaton nato ang atong maarangan sa pagsangyaw sa Gingharian, nga makigbahin sa pagpamatuod “hangtod sa kinalay-ang bahin sa yuta.” Angayng dili kita maglangaylangay sa pagbuhat niini, kay dayag na kaayo ang “ilhanan” sa presensiya sa Kristo. (Mat. 24:3-14) Dili nato angayng usikan ang panahon. Sa pagkakaron, kita daghag buluhaton diha sa Ginoo.—1 Cor. 15:58.

22. Unsay atong determinasyon samtang naghulat kita sa adlaw ni Jehova?

²² Samtang naghulat kita nga “moabot ang dako ug makalilisang nga adlaw ni Jehova,” magmadeterminado kita nga magmatinumanon ug magpadayon sa pagpamatuod nga maisogon. (Joel 2:31) Daghan pa kitag makaplagang mga tawo nga sama sa mga taga-Berea, kinsa ‘maikagong midawat sa pulong.’ (Buh. 17:10, 11) Busa hinaot nga kita magpamatuod hangtod ato nang madungog ang mga pulong: “Dalayegon ang imong gihimo, maayo ug kasaligan nga ulipon!” (Mat. 25:23) Kon magmadasigon kita sa paghimog tinun-an ug padayong magmatinumanon kang Jehova, magmalipayon kita hangtod sa hangtod kay kita nakapribilehiyo sa “bug-os nga pagpamatuod” sa Gingharian sa Diyos!