Minahal nga Magmamantala sa Gingharian:

Imadyina nga usa ka sa mga apostoles nga nagtindog didto sa Bukid sa mga Olibo. Si Jesus mipakita nimo. Sa hapit na siyang mosaka sa langit, siya miingon: “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8) Unsay imong bation?

Tingali mobati ka nga imposibleng molampos ang buluhaton nga gisugo ni Jesus. Makapangutana tingali ka, “Unsaon man namo pagpamatuod ‘hangtod sa kinalay-ang bahin sa yuta’ nga gamay ra man mi?” Lagmit mahinumdom pod ka sa pasidaan ni Jesus sa gabii una siya mamatay: “Ang ulipon dili labaw sa iyang agalon. Kon ila kong gilutos, kamo usab ilang lutoson; kon ilang gituman ang akong pulong, tumanon usab nila ang inyong pulong. Apan kining tanan ilang himoon batok kaninyo tungod sa akong ngalan, kay sila wala man makaila sa Usa nga nagpadala kanako.” (Juan 15:​20, 21) Sa dihang imong pamalandongon ang maong mga pulong, makapangutana tingali ka, ‘Unsaon nako pagpamatuod sa bug-os bisan pa sa maong pagsupak ug paglutos?’

Ingon ana sab ang atong kahimtang karon. Ingong mga Saksi ni Jehova, kinahanglang bug-os tang magpamatuod hangtod sa “kinalay-ang bahin sa yuta” ngadto sa “mga tawo sa tanang kanasoran.” (Mat. 28:​19, 20) Sa unsang paagi molampos ang maong buluhaton, ilabina kay gitagna man nga supakon ni?

Ang Mga Buhat sa mga Apostoles naghisgot ug eksayting nga asoy kon giunsa pagtabang ni Jehova ang mga apostoles ug ang ubang Kristohanon nga matuman ang buluhatong pagsangyaw. Kini nga publikasyon motabang nimo nga mahibaloan ang maong asoy ug bation ang ilang kahinam tungod sa paspas nga pag-­uswag sa maong buluhaton. Mahingangha gyod ka kay parehas kaayo ang kahimtang sa katawhan sa Diyos karon ug sa unang mga Kristohanon. Pareho ra ang atong buluhaton ug ang pag-organisar sa pagbuhat niana. Ang pagpamalandong niana makapalig-on gyod sa imong pagtuo nga si Jehova nga Diyos padayong naggiya sa yutan-ong bahin sa iyang organisasyon.

Naglaom ug nag-­ampo mi nga ang imong pagtuon sa basahon sa Mga Buhat makapalig-on sa imong pagsalig nga si Jehova motabang nimo ug ang iyang balaang espiritu maghatag nimog kusog sa paglahutay. Hinaot madasig ka nga magpadayon sa “bug-os nga pagpamatuod” bahin sa Gingharian sa Diyos ug sa pagtabang sa uban nga mailhan si Jehova ug mabuhi hangtod sa hangtod.​—Buh. 28:23; 1 Tim. 4:16.