TAN-AWA si Cain ug si Abel karon. Silang duruha pulos dagko na. Si Cain nahimong usa ka mag-uuma. Nananom siyag mga lugason ug mga prutas ug mga utanon. Si Abel nahimong usa ka magbalantay sa karnero.

Usa ka adlaw niana, si Cain ug si Abel nagdalag usa ka gasa ngadto sa Diyos. Si Cain nagdalag pipila ka pagkaon nga iyang tinanom. Ug si Abel nagdala sa kinamaayohang karnero nga iyang binuhi. Si Jehova nahimuot kang Abel ug sa iyang gasa. Apan wala siya mahimuot kang Cain ug sa iyang gasa. Nahibalo kag ngano?

Dili lamang kanang gasa ni Abel maoy labing maayo kay sa kang Cain. Kini tungod kay si Abel usa ka buotang tawo. Nahigugma siya kang Jehova ug sa iyang igsoon. Apan si Cain maoy daotan; wala siya mahigugma sa iyang igsoon.

Ang Diyos misulti kang Cain nga mag-usab siya sa iyang mga kinaiya. Apan si Cain nasuko kaayo tungod kay ang Diyos nakagusto kaayo kang Abel. Busa sa dihang sila lamang duha sa kapatagan, si Cain nagbunal sa iyang igsoong si Abel sa makusog gayod nga siya nakapatay kaniya. Dili ba kana usa ka makalilisang nga buhat?

Ang Diyos sa gihapon nahinumdom kang Abel, bisan siya namatay. Si Jehova dili gayod malimot sa usa ka buotang tawo sama kang Abel. May adlaw rang buhion pag-usab ni Jehova si Abel. Unya si Abel dili na gayod mamatay pag-usab. Dili ba maayo ang paghimamat sa mga tawong sama kang Abel?

Apan ang Diyos dili mahimuot sa mga tawong sama kang Cain. Busa tapos si Cain makapatay sa iyang igsoon, ang Diyos nagsilot kaniya. Iyang gipalakaw siya nga halayo sa uban sa iyang pamilya. Gidala ni Cain ang usa sa iyang mga igsoong babaye, ug siya nahimong iyang asawa.

Paglabay sa panahon ang ubang mga anak lalaki ug mga babaye ni Adan ug Eva nanagminyoay ug nakabatog kabataan. Sa wala madugay may daghang mga tawo sa yuta. Tun-an ta ang bahin sa pipila kanila.