SA GAWAS sa arka, ang katawhan sa gihapon wala motuo nga ang Lunop moabot. Sila kanunayng nangatawa nga mas pa sukad. Apan sa wala madugay sila mihunong sa pagkatawa.

Kay sa kalit ang tubig misugod sa pagpangatagak. Si Noe husto! Apan ulahi na kaayo karon alang kang bisan kinsa sa pagsulod sa arka. Ang pultahan sigo nga gitakpan ni Jehova.

Wala madugay ang tanan patag nga yuta natabonan. Ang tubig nahimong sama sa dakong mga suba. Ang katawhan nangalisang. Oh, nangandoy gayod sila nga namati unta kang Noe. Apan karon ulahi na kaayo.

Sulod sa 40 ka adlaw ug 40 ka gabii ang tubig mibuhagay gikan sa langit. Kini mitubo sa mga kalid sa mga bukid, ug sa wala madugay bisan ang kinatas-ang mga bukid natabonan. Busa sumala sa gisulti gayod sa Diyos, ang tanang katawhan ug mga mananap sa gawas sa arka nangamatay. Apan ang tanan sa sulod luwas.

Ang tubig mialsa sa arka, ug kini milutaw gayod sa ibabaw sa tubig. Unya usa ka adlaw, sa mituwak na ang ulan, ang adlaw misugod sa paghayag. Pagkatalagsaong talan-awon kadto! Diha lamay usa ka dakong dagat sa tanang dapit. Ang butang lamang nga nakita mao ang arka nga naglutaw sa ibabaw.

Ang mga higante nahanaw na karon. Ang tanan kanila nangamatay, kauban ang ilang mga inahan ug ang uban pa sa daotang katawhan. Apan unsay nahitabo sa ilang mga amahan?

Ang mga amahan sa mga higante dili tinuod tawhanon sama kanatong mga tawo. Sila maoy mga manulunda nga nanganaog sa pagpuyo ingon nga mga tawo dinhi sa yuta. Busa sa miabot ang Lunop, sila namalik ngadto sa langit ingon nga mga manulunda. Apan wala na sila tugoti nga mahimong bahin sa pamilya sa Diyos sa mga manulunda. Busa sila nahimong mga manulunda ni Satanas. Ang Bibliya nagtawag kanilang mga demonyo.

Ang Diyos karon nagpahuros ug hangin, ug ang mga tubig sa lunop misugod sa paghubas. Lima ka bulan sa ulahi ang arka nahipatong sa tumoy sa usa ka bukid. Unya kadtong sa sulod sa arka sa wala madugay nakakita na sa mga tumoy sa mga bukid.

Unya gipalupad ni Noe ang itom nga langgam gitawag uwak sa gawas sa arka. Kini milupad pahilayo sa makadiyot ug unya kini mibalik, tungod kay wala kini makakaplag sa usa ka maayong dapit katugpahan.

Si Noe gustong masayod kon ang mga tubig sa yuta mihubas na ba, busa sunod iyang gipalupad ang salampati gawas sa arka. Apan ang salampati mibalik gihapon tungod kay kini wala makakaplag sa usa ka dapit nga katugdonan. Si Noe nagpalupad niini sa ikaduhang higayon, ug kini mibalik nga nagtangag na ug usa ka dahon sa olibo. Busa si Noe nahibalo nga ang mga tubig mihubas na. Si Noe mipalupad sa salampati sa ikatulong higayon, ug sa kataposan kini nakakaplag sa usa ka mamalang dapit nga kapuy-an.

Ang Diyos karon miingon kang Noe: ‘Kawas sa arka. Dad-a ang imong tibuok pamilya ug ang mga mananap nga uban nimo.’ Sila diha sa sulod sa arka nga kapin sa tibuok tuig. Busa atong mahanduraw ang pagkamalipayon nila nga diha na usab sa gawas ug buhi gihapon.