SA GAWAS sa tanaman sa Eden, si Adan ug si Eva nagbudlay sa pagbuhat alang sa ilang pagkaon. Inay sa matahom nagabungang mga kahoy, ilang nakita ang daghang mga tunok ug mga sampinit. Kini tungod kay misupak si Adan ug Eva sa Diyos ug sila dili na iyang mga higala.

Ang labing ngil-ad pa kay niana, si Adan ug si Eva misugod sa pagkamatay. Hinumdomi ang Diyos miingon nga sila mamatay kon ilang kan-on ang bunga sa usa ka kahoy. Nan, sa adlaw gayod sa ilang pagkaon sila misugod sa pagkamatay.

Ang kabataan ni Adan ug Eva nangatawo ang tanan human ang Diyos magpapahawa sa ilang ginikanan sa tanaman sa Eden. Kini nagkahulogan nga ang kabataan usab matigulang ug mamatay.

Kon si Adan ug Eva misugot pa lamang kang Jehova, ang kinabuhi unta malipayon alang kanila ug sa ilang kabataan. Walay usa untang matigulang, masakit ug mamatay.

Buot sa Diyos nga ang katawhan magpuyo sa walay kataposan diha sa kalipay, ug Siya nagsaad nga may adlaw ra nga sila mabuhing walay kataposan. Ang tanan mahimong higala sa Diyos. Ug ang tibuok yuta mahimong matahom.

Apan si Eva wala na mahimong higala sa Diyos. Busa sa dihang siya nanganak sa iyang kabataan siya nakabatyag sa kasakit. Ang pagsukol kang Jehova tino nga mipatungha sa daghang kasub-anan, dili ba?

Si Adan ug Eva nanganak ug daghang kabataan. Ang ngalan sa ilang unang anak maoy Cain. Ug ang ngalan sa ilang ikaduhang anak maoy Abel. Nahibalo ka ba unsay nahitabo kanila?