KON nakakita kag tawong pareho kataas sa kisame sa imong balay, unsa may imong mahunahuna? Kanang tawhana maoy usa ka higante! Dihay panahon nga diha gayoy mga higante sa ibabaw sa yuta. Diin man sila gikan?

Buweno, ang daotang manulunda nga si Satanas misulay gani sa pagyudyod sa mga anghel sa Diyos aron mahimong daotan. Sa kapulihay, ang pipila niining mga manulundaa mipatalinghog kang Satanas. Sila nanganaog nganhi sa yuta ug nagsul-ob sa tawhanong mga lawas alang sa ilang kaugalingon. Nahibalo ka ba sa hinungdan?

Ang Bibliya nag-ingon kini tungod kay ilang nakita ang maanyag nga mga babaye sa yuta ug gustong mangasawa kanila. Ang Bibliya nag-ingon nga kini maoy sayop, tungod kay ang Diyos nagbuhat sa mga manulunda nga magpuyo sa langit.

Sa dihang ang mga manulunda ug ang ilang mga asawa nakabaton ug mga bata, kining mga bataa maoy lahi. Samtang sila nagtubo, sila nanagko ug hangtod sila nahimong mga higante.

Kining mga higanteha daotan. Ug tungod kay sila dagko kaayo ug kusgan, sila nagsakit sa mga tawo. Sila nagsulay sa pagpugos sa tagsatagsa nga mahimong daotan sama sa ilang kaugalingon.

Si Enoch namatay na, apan dihay usa ka tawo sa yuta karon nga maayo. Ang ngalan ning tawhana mao si Noe. Siya kanunayng nagbuhat sa gusto sa Diyos nga buhaton niya.

Usa ka adlaw ang Diyos misulti kang Noe nga iyang laglagon ang tanan daotang tawo. Apan luwason sa Diyos si Noe, iyang pamilya ug daghan sa mga mananap. Tan-awon ta giunsa kini sa pagbuhat sa Diyos.