NAHIBALO ka ba sa unang butang gihimo ni Noe sa dihang siya ug ang iyang pamilya migawas sa arka? Nagtanyag siya ug usa ka gasa ngadto sa Diyos. Imong makita ba siya nga naghimo niini dinhi sa hulagway? Gihalad ni Noe kining gasa nga mga mananap sa pagpasalamat sa Diyos tungod sa pagkaluwas sa iyang pamilya sa lunop.

Sa hunahuna mo si Jehova nahimuot ba sa maong gasa? Oo, nahimuot siya. Ug busa siya misaad kang Noe nga dili na gayod siya molaglag sa kalibotan pag-usab pinaagi sa usa ka lunop.

Dayon si Noe ug ang iyang pamilya misugod sa usa ka bag-ong kinabuhi sa gawas sa arka. Ang Diyos nagpanalangin kanila ug misulti kanila: ‘Kinahanglan manganak kamog daghan. Kinahanglan mouswag ang inyong gidaghanon hangtod kapuy-an sa mga tawo ang tibuok yuta.’

Apan sa ulahi, mahimong ang katawhan mangahadlok nga ang usa ka lunop nga sama kaniadto mahinabo pag-usab. Busa ang Diyos mihatag sa usa ka butang nga mopahinumdom sa katawhan sa iyang saad nga dili na gayod palunopan pag-usab ang tibuok yuta. Nahibalo ba ikaw kon unsa kini? Usa ka balangaw. Nakakita ka na ba sukad ug balangaw? Nakita mo ba ang balangaw sa hulagway?

Ang Diyos nagsaad: ‘Dili na gayod ang tanang katawhan ug mga mananap pagalaglagon pinaagi sa usa ka lunop. Ibutang ko ang akong balangaw diha sa mga panganod. Ug kon ang balangaw mopatim-aw, ako makakita niini ug mahinumdom sa akong saad.’

Busa kon ikaw makakita ug usa ka balangaw, unsa may imong mahinumdoman? Oo, ang saad sa Diyos nga dili na gayod niya laglagon pag-usab ang kalibotan pinaagi sa usa ka lunop.