TAN-AWA ang gamayng bata nga naghilak, ug naggunit sa tudlo sa babaye. Kini mao si Moises. Nahibalo ka bag kinsa ang maanyag nga babaye? Siya usa ka prinsesa, ang mismong anak babaye ni Paraon.

Ang inahan ni Moises nagtago sa iyang bata hangtod nga siya nag-edad tulo ka bulan, tungod kay dili siya gusto nga mapatay siya sa mga Ehiptohanon. Apan nasayod siya nga mahimo siyang mapalgan, busa iyang gisulod si Moises sa usa ka takupis, ug gibutang ang takupis sa tag-as kasagbotan daplin sa Suba sa Nilo. Ang igsoong babaye ni Moises nga si Miriam gisultihan nga motindog sa duol ug tan-awon unsay mahitabo.

Sa wala madugay ang anak babaye ni Paraon milugsong sa Suba sa Nilo aron maligo. Nakit-an dayon niya ang takupis. Iyang gisultihan ang usa sa iyang ulipong mga babaye sa pagkuha sa takupis. Unya iyang gibuksan kini ug nakita ang katahom gayod sa batang si Moises. Ang prinsesa naluoy kang Moises, ug walay gusto nga patyon siya.

Unya mitungha si Miriam. Makita mo siya dinhi sa hulagway. Matod ni Miriam: ‘Moadto ba ako ug magtawag sa usa ka Israelitang babaye nga mag-atiman sa bata alang kanimo?’

‘Palihog pagtawag,’ matod sa prinsesa.

Matuling midagan si Miriam ngadto sa iyang inahan ug gidala siya ngadto sa prinsesa. Ang prinsesa miingon: ‘Dad-a kining bataa ug atimana siya para kanako, ug ako magabayad kanimo.’

Busa ang inahan ni Moises nag-atiman sa iyang kaugalingong anak. Sa ulahi siya midala kaniya ngadto sa anak babaye ni Paraon, kinsa nagsagop kaniya ingon nga iyang kaugalingong anak. Kana mao ang paagi nga si Moises nagdako sa balay ni Paraon.