ANG maong duha ka batang lalaki managkalahi kaayo, dili ba? Nahibalo ka ba sa ilang mga ngalan? Ang mangangayam mao si Esau, ug ang batang lalaki nga nag-atiman sa mga karnero mao si Jacob.

Si Esau ug si Jacob mao ang kaluhang mga anak lalaki ni Isaac ug Rebeka. Si Isaac nakagustog dako kang Esau, tungod kay siya tig-ulian ug makaon alang sa pamilya. Apan labing gimahal ni Rebeka si Jacob, tungod kay siya usa ka hilomon, makigdaitong bata.

Atong mahanduraw lamang ang pagkagusto ni Jacob nga mamati sa apohang si Abraham nga magsugilon mahitungod kang Jehova. Sa kataposan si Abraham namatay nga 175 anyos ang panuigon, sa dihang ang managkaluha maoy 15 anyos ang panuigon.

Sa dihang 40 anyos ang panuigon ni Esau, nangasawa siya ug duha ka babaye gikan sa Canaan nga dili magsisimba ni Jehova. Kini nakapasubo kaayo ni Isaac ug Rebeka.

Ang panahon miabot nga si Isaac mihatag ug panalangin sa iyang kamagulangang anak lalaki. Si Esau mao ang kamagulangang anak. Apan si Esau nakabaligya na sa katungod sa pagdawat sa panalangin ngadto kang Jacob. Ang Diyos usab nakaingon nga si Jacob maoy modawat sa panalangin. Ug kini maoy nahitabo. Si Isaac naghatag sa panalangin ngadto sa iyang anak lalaki nga si Jacob.

Sa dihang si Esau nasayod mahitungod niini nasuko siya. Miingon siya nga iyang patyon si Jacob! Sa pagkabati ni Rebeka bahin niini nasubo kaayo siya. Mao nga misulti siya kang Isaac: ‘Maoy malisod kon si Jacob mangasawa usab sa usa niining mga babaye sa Canaan.’

Busa si Isaac mitawag kang Jacob ug miingon: ‘Lakaw ngadto sa imong apohang si Bethuel sa Haran. Pangasawa sa usa sa mga anak nga babaye sa iyang igsoon nga si Laban.’

Diha dayon si Jacob misugod sa iyang layong panaw paingon sa Haran.