SI Jose buot masayod kon ang iyang 10 ka magulang igsoong lalaki waypuangod ug dimaluluy-on ba gihapon. Busa siya miingon: ‘Kamo mga espiya.’

‘Dili kami espiya,’ namalibad sila. ‘Buotan kaming mga tawo. Managsoon kaming tanan. 12 kami. Apan ang usa ka igsoon wala, ug ang kinamanghoran atua sa balay uban sa among amahan.’

Nagpakaaron-ingnon si Jose nga wala motuo kanila. Iyang gipabilanggo ang igsoon nga ginganlan Simeon, ug gitugotan ang uban nga makakuhag pagkaon ug makapauli. Apan iyang gisultihan sila: ‘Kon kamo mobalik, kinahanglan dad-on ninyo ang inyong kinamanghorang igsoong lalaki uban kaninyo.’

Sa nahibalik sila sa ilang pinuy-anan sa Canaan, ang managsoon nagsugilon sa ilang amahang si Jacob sa nahitabo. Si Jacob nasubo kaayo. Midumili siyang dad-on nila si Benjamin sa Ehipto. Apan sa nagkahurot na ang ilang pagkaon, mitugot na lamang si Jacob kanila nga dad-on si Benjamin sa Ehipto aron sila makakuhag dugang pagkaon.

Sa dihang nakita ni Jose nga nagsingabot ang iyang mga igsoon, nalipay kaayo siyang nakakita sa iyang manghod nga si Benjamin. Siempre, walay usa kanilang nahibalo nga kining inilang tawo mao si Jose. Si Jose karon may gibuhat sa pagtigi sa iyang mga igsoon sa amahan.

Gipapuno niya sa iyang mga ulipon ang tanan nilang mga baluyot sa pagkaon. Apan sa walay pagpahibalo kanila, iya usab gisulod ang iyang espesyal salapi nga kopa sa baluyot ni Benjamin. Sa nakalakaw na sila ug nalayolayo na ug diyotay sa agianan si Jose nagpagukod sa iyang mga ulipon kanila.

Sa dihang ilang naapsan sila, ang mga ulipon nangutingkay sa tanan nga mga baluyot ug ilang nakaplagan ang kopa sa baluyot ni Benjamin. Daw nadayag nga gikawat ni Benjamin ang kopa! Ang mga ulipon nag-ingon: ‘Ang uban kaninyo makalakaw na. Si Benjamin kinahanglang mouban kanamo.’ Unsa may buhaton sa maong 10 ka igsoong lalaki sa amahan?

Namalik sila uban kang Benjamin ngadto kang Jose. Si Jose nag-ingon: ‘Kamong tanan makapamauli. Apan si Benjamin kinahanglang mopabilin dinhi ingon nga akong ulipon.’

Si Juda karon miingon: ‘Palihog, akoy ibilin dinhi ingon nga imong ulipon, apan pasagdi ang bata makapauli.’

Nakita ni Jose nga ang iyang mga igsoon nausab na. Wala na ang ilang pagkawaypuangod ug pagkadimaluluy-on. Tan-awon nato kon unsay gibuhat ni Jose karon.