TAN-AWA! Si Moises nagdagan pahilayo sa Ehipto. Nakita mo ba ang mga tawo nga naggukod kaniya? Nahibalo ka ba nganong gusto silang mopatay kang Moises? Tan-awon ta kon mahibaloan ta ba.

Si Moises nagtubo sa balay ni Paraon. Nahimo siyang maalam kaayo ug bantogan. Si Moises nahibalo nga dili siya usa ka Ehiptohanon, apan nga ang iyang tinuod mga ginikanan maoy Israelitang mga ulipon.

Usa ka adlaw, sa dihang kuwarenta anyos ang iyang panuigon, si Moises miadto sa pagsusi sa kahimtang sa iyang katawhan. Iyang nakita ang usa ka Ehiptohanon nga nagbunal sa usa ka Israelitang ulipon. Walay nanan-aw, busa si Moises mibunal sa Ehiptohanon ug ang Ehiptohanon namatay. Unya gitago ni Moises ang lawas sa balas.

Sa sunod adlaw si Moises miadto sa pagtan-aw na usab sa iyang katawhan. Iyang nakita ang duha ka Israelitang lalaki nga nag-away, busa si Moises miingon ngadto sa usa nga maoy saypan: ‘Nganong gibun-og mo man ang imong igsoon?’

Ang tawo miingon: ‘Kinsa ang naghimo kanimo nga among magmamando ug maghuhukom? Buot ka bang mopatay kanako sama sa pagpatay mo sa Ehiptohanon?’

Si Moises karon nalisang. May mga tawo na diayng nahibalo sa iyang nabuhat! Bisan gani si Paraon nakabati niini, ug misugog mga tawo nga mopatay kang Moises. Busa si Moises mipahawa sa Ehipto.

Si Moises didto mikalagiw sa yuta sa Midian. Didto nahimamat niya ang pamilya ni Jetro. Naminyoan niya ang usa sa iyang mga anak babaye si Zipora ug nahimong usa ka magbalantay. Sulod sa 40 ka tuig siya nagpuyo sa yuta sa Midian. Unya usa ka adlaw ang usa ka katingalahang butang nahitabo nga nag-usab sa tibuok kinabuhi ni Moises. Paklia ang panid, ug tan-awa unsa kining katingalahang butang.