TAN-AWA kon unsay nagakahitabo! Kana mao si Moises uban sa iyang sungkod nga gituy-od ibabaw sa Pulang Dagat. Kanang uban niya mao ang mga Israelita. Apan si Paraon ug ang tanan niyang kasundalohan nangalumos sa dagat. Tan-awon ta kon naunsa kini sa pagkahitabo.

Ingon sa atong nakat-onan, ang mga Israelita nakahimo sa pagbiya sa Ehipto human sa 10 ka hampak. Dul-an sa 600,000 ka Israelitang mga lalaki ang mibiya, maingon man sa daghang babaye ug kabataan. Uban kanila mikuyog ang usa ka dakong gidaghanon sa ubang katawhan nga nahimong mga magtutuo ni Jehova. Silang tanan nagdala sa ilang mga karnero ug mga kanding ug mga baka uban kanila.

Ang mga Ehiptohanon nangalisang kaayo tungod sa kataposang hampak nga gipahamtang kanila. Busa mihatag sila sa mga Israelita sa daghang sinina ug mga butang nga hinimo sa bulawan ug salapi una pa sa ilang pagbiya.

Tapos sa pipila ka adlaw, ang mga Israelita nahiabot sa Pulang Dagat. Didto namahulay sila. Sa kasamtangan, si Paraon ug ang iyang mga tawo misugod sa pagbati sa kaguol nga ilang natugotan paglakaw ang ilang mga ulipon. Busa si Paraon nag-usab sa iyang hunahuna sa makausa pa, ug siya ug ang iyang kasundalohan sa kaabtik misugod sa paggukod sa mga Israelita.

Sa dihang nakita sa mga Israelita si Paraon ug ang iyang kasundalohan nga nagsingabot, nangalisang kaayo sila. Apan si Jehova nagbutang ug usa ka panganod taliwala sa iyang katawhan ug sa mga Ehiptohanon. Ang mga Ehiptohanon wala makahimo sa pagkakita sa mga Israelita aron pag-atake kanila.

Unya si Jehova nagsulti kang Moises sa pagtuy-od sa iyang sungkod sa ibabaw sa Pulang Dagat. Sa pagtuy-od niya, si Jehova mipahinabo sa usa ka makusog nga hangin sa paghapak. Ang mga tubig sa dagat miiway ug mipundo sa duha ka kilid.

Unya ang mga Israelita misugod sa pagbaktas latas sa dagat sa mamalang yuta. Mokabat ug mga oras alang kanilang tanan sa luwas nga paglatas ngadto sa pikas kilid. Sa kataposan ang mga Ehiptohanon nakahimo sa pagkakita sa mga Israelita. Ang ilang mga ulipon nakaikyas na! Busa sila nagdali sa paglatas sa dagat sa pag-agpas kanila.

Sa paglatas nila, gipahinabo sa Diyos nga mangalintuwad ang mga ligid sa ilang mga karo. Ang mga Ehiptohanon nangalisang, ug nakaamgo nga si Jehova maoy nakig-away dapig sa mga Israelita batok kanila. Apan kini maoy ulahi na kaayo.

Kini maoy dihang si Jehova nagsulti kang Moises sa pagtuy-od sa iyang sungkod ibabaw sa Pulang Dagat, ingon sa imong nakita sa hulagway. Sa paghimo niya niini, ang mga bungbong sa tubig misugod sa pagbalik ug nagtabon sa mga Ehiptohanon. Ang tibuok kasundalohan misunod sa mga Israelita ngadto sa dagat. Walay usang Ehiptohanong nakalingkawas nga buhi!

Pagkamalipayon ang tanang katawhan sa Diyos nga naluwas! Ang mga lalaki miawit: ‘Si Jehova midaog sa usa ka mahimayaong kadaogan. Iyang giunlod ang mga kabayo ug ang ilang mga magkakabayo sa dagat.’ Ang igsoong babaye ni Moises nga si Miriam ug ang tanan nga mga babaye misayaw nga malipayon uban sa ilang mga tambol. Samtang sila nagsayaw ilang giawit ang samang alawiton: ‘Si Jehova midaog sa usa ka mahimayaong kadaogan. Iyang giunlod ang mga kabayo ug ang ilang mga magkakabayo sa dagat.’