TAN-AWA kon unsa kining gilubong sa tawo sa iyang tolda! Usa ka matahom sinina, ug usa ka baritang bulawan ug pipila ka buok salapi. Iyang nakuha sila gikan sa siyudad sa Jerico. Apan nahinumdom ka ba unsay buhaton sa mga butang sa Jerico?

Sila kinahanglang laglagon. Ug ang bulawan ug ang salapi kinahanglang ihatag sa tipiganan sa bahandi sa tabernakulo ni Jehova. Busa kining mga tawhana misupak sa Diyos. Gikawat nila ang iyaha sa Diyos. Ang ngalan sa tawo mao si Achan, ug kanang uban kaniya maoy bahin sa iyang pamilya. Tan-awon ta unsay nahinabo.

Tapos si Achan makakawat ning mga butanga, ang mga Israelita naparot sa gubat sa siyudad sa Ai. Si Josue nasubo kaayo ug nangutana kang Jehova nganong iyang gitugotan kini nga mahitabo.

Si Jehova mitubag: ‘Ang Israel nakasala. Ilang gikuha ang pipila sa mga butang nga unta laglagon o nga igahatag sa tabernakulo ni Jehova. Dili ako magpanalangin kaninyo hangtod laglagon mo kining mga butanga ug ang usa nga nagkuha kanila.’ Si Jehova miingon nga iyang ipakita kang Josue kinsa ang daotang tawo nga maoy naghimo ning mga butanga.

Busa si Josue nagtigom sa tanang katawhan sa tingob, ug si Jehova nagpunit sa daotang tawo si Achan. Si Achan miangkon sa iyang nabuhat, ug mitug-an kang Josue diin niya gitagoan ang kinawat nga mga butang.

Sa dihang kining mga butanga nakaplagan, si Josue miingon ngadto kang Achan: ‘Nganong nagdala kag kadaot kanamo? Karon si Jehova magdalag kadaot nganha kanimo!’ Unya si Achan ug ang iyang pamilya gibato ngadto sa kamatayon. Wala ba kini magpakita kanato nga kita kinahanglang dili gayod magkuha sa mga butang nga dili atoa?

Human niini ang Israel misulong sa pakiggubat batok sa Ai pag-usab. Ning higayona si Jehova nagtabang sa iyang katawhan, ug sila nakadaog sa gubat.