NAKAHIMO ka ba sukad sa usa ka saad ug sa ulahi nakakaplag niini nga malisod nang tumanon? Ang tawo niining hulagway nakasaad, ug mao kana ang hinungdan nga siya nasubo kaayo. Ang tawo maoy usa ka maisog maghuhukom sa Israel nga ginganlan Jephte.

Si Jephte nagpuyo sa panahon nga ang mga Israelita wala na magsimba kang Jehova. Nagbuhat na usab sila nianang daotan. Busa si Jehova nagtugot sa katawhan sa Amon nga magdaot kanila. Busa ang mga Israelita mipakiluoy kang Jehova: ‘Kami nakasala batok kanimo. Palihog luwasa kami.’

Si Jephte maoy gipili sa katawhan nga makiggubat batok sa daotang mga Ammonitas. Si Jephte nagtinguha sa labihan nga si Jehova magtabang kaniya, busa siya misaad kang Jehova: ‘Kon ihatag mo kanako ang kadaogan, akong ihatag kanimo ang unang tawo gayod nga mogula sa akong balay sa pagtagbo kanako sa dihang ako mahibalik gikan sa kadaogan.’

Si Jehova nagtabang kang Jephte nga makaangkon sa kadaogan. Sa dihang si Jephte mipauli sa balay, nahibalo ka ba kon kinsa ang unang migula ug mitagbo kaniya? Mao ang iyang anak babaye, kinsa mao lamang ang bugtong niyang anak. Si Jephte nasubo kaayo. Apan siya nakahimo sa usa ka saad ug dili na makabakwi niini.

Sa pagkahibalo sa anak babaye ni Jephte mahitungod sa iyang saad, siya nasubo usab sa sinugdan. Kay kini nagkahulogan nga mobiya siya sa iyang amahan ug mga higala. Apan siya misulti sa iyang amahan: ‘Kon ikaw nakahimog saad kang Jehova, tumanon mo kini.’

Busa ang anak babaye ni Jephte miadto sa Shilo, ug siya migugol sa nahibilin sa iyang kinabuhi sa pag-alagad kang Jehova diha sa iyang tabernakulo. Upat ka adlaw sa matag tuig, ang mga kababayen-an sa Israel moadto sa pagduaw kaniya didto, ug sila may malipayong panahon sa panag-uban. Ang katawhan nahigugma sa anak babaye ni Jephte tungod kay siya usa ka maayong alagad ni Jehova.