NAKITA mo ba kon unsay nahitabo dinhi? Kini silang tanan mao ang manggugubat nga mga lalaki sa Israel. Ang mga lalaking nagyuko nagainom. Si Maghuhukom Gideon mao ang lalaki nga nagbarog duol kanila. Nagbantay siya giunsa nila sa pag-inom ang tubig.

Nakita mo ba giunsa sa mga lalaki ang pag-inom? Ang pipila nagpadapat sa ilang nawong sa tubig. Apan ang usa nagkuha sa tubig pinaagi sa iyang mga kamot, aron nga siya makabantay unsay mahitabo sa palibot niya. Kini hinungdanon. Si Jehova nagsulti kang Gideon sa pagpili niadto lang mga tawo nga nagpabiling nagbantay samtang sila nag-inom. Tan-awon ta ngano.

Ang mga Israelita gisamok na usab. Wala sila makasugot kang Jehova. Ang mga tawo sa Midian nagmadaogon kanila ug nagsakit kanila. Busa ang mga Israelita mipakiluoy kang Jehova sa panabang.

Si Jehova nagsugo kang Gideon sa pagkuhag mga sundalo, busa si Gideon mitigom sa tingob 32,000 ka manggugubat nga lalaki. Apan adunay kasundalohan sa 135,000 ka lalaki ang mobatok sa Israel. Sa gihapon si Jehova misulti kang Gideon: ‘Daghan ka ra kaayog mga tawo.’ Ngano man si Jehova nakasulti niana?

Tungod kay kon ang Israel modaog sa gubat, sila maghunahuna nga midaog sila sa ilang kaugalingon ug wala magkinahanglan sa tabang ni Jehova. Busa si Jehova miingon kang Gideon. ‘Sultihi ang tanang lalaki nga nahadlok nga mamauli.’ Sa paghimo niini ni Gideon, 22,000 ka lalaki ang mipauli.

Apan pamati! Si Jehova nag-ingon: ‘Sa gihapon daghan ka ra kaayog mga tawo.’ Busa iyang gisultihan si Gideon sa pagpainom sa mga lalaki diha ning sapaa ug unya papaulion kadtong tanan nga nagbutang sa ilang mga nawong sa tubig, ug wala magpadayon sa pagbantay. ‘Ako mohatag kanimo sa kadaogan pinaagi sa 300 ka lalaki nga nabilin,’ pasalig ni Jehova.

Si Gideon mihatag sa matag usa sa iyang 300 ka tawo sa usa ka trompeta, ug sa usa ka tibod nga may sulo sa sulod niini. Sa pagkatungang gabii, nagtigom sila likos sa kampo sa kaaway. Ang tanan nagdungan sa paghuyop sa ilang mga trompeta ug mibuak sa ilang mga tibod ug misinggit sa makusog. Ang kaawayng mga sundalo nahigmata. Nalisang sila ug nanagan. Ang mga Israelita midaog sa gubat.